UN’WANA NI UN’WANA wa karhateka—hambi ku ri vanhu va Xikwembu. Mupisalema u tsale a ku: “Miehleketo ya mina leyi ndzi karhataka yi tele endzeni ka mina.” (Pisalema 94:19) Yesu u vule leswaku enkarhini wa makumu, “ku vilela hi vutomi” ku nga endla leswaku swi tika swinene ku tirhela Yehovha. (Luka 21:34) Ku vuriwa yini hi wena? Xana u titwa u tikeriwa hi swiphiqo swa timali, swa ndyangu kumbe swa rihanyo? Xana Yehovha a nga ku pfuna njhani leswaku u langutana ni xiyimo lexi?

Loko hi nga pfuniwi, hina hi hexe a hi nge swi koti ku tshika ku karhateka. Muapostola Pawulo u tsale a ku: “Hi kamanyetiwile hi tindlela hinkwato, . . . Hi pfilunganyekile . . . ; ha xanisiwa.” U tlhele a vula leswaku “kambe a hi manyiwanga lerova hi nga swi koti ni ku famba,” “a hi yi pfumali hi ku helela ndlela yo huma” naswona “a hi lovisiwi.” I yini lexi hi pfunaka leswaku hi tiyisela? I “matimba lama tlulaka lama tolovelekeke”—matimba lama humaka eka Xikwembu xa hina lexi nga ni matimba hinkwawo, ku nga Yehovha.—2 Vakorinto 4:7-9.

Anakanya hi ndlela leyi u ma kumeke ha yona “matimba lama tlulaka lama tolovelekeke” enkarhini lowu hundzeke. Xana wa ha yi tsundzuka nkulumo leyi khutazaka leyi endleke leswaku u ya u ri tlangela swinene rirhandzu ro tshembeka ra Yehovha? Xana ripfumelo ra wena eka switshembiso swa Yehovha ri ye ri tiya swinene loko u dyondzisa van’wana hi ntshembo lowu u nga na wona hi Paradeyisi? Loko hi ya eminhlanganweni ya Vukreste ni loko hi byela van’wana hi leswi hi pfumelaka eka swona, hi kuma matimba yo tiyisela ku karhateka loku hi langutanaka na kona kutani hi va ni ku rhula ka mianakanyo leswaku hi tirhela Yehovha hi ntsako.

Entiyisweni, u nga ha titwa u lava ku endla swilo swo tala hi nkarhi wun’we. Hi xikombiso, Yehovha u hi kombela leswaku hi lava Mfumo wakwe ku sungula ni ku tlhela hi ya emahlweni ni xiyimiso xa hina xa swilo swa moya. (Matewu 6:33; Luka 13:24) Kambe ku vuriwa yini loko nkaneto, mavabyi kumbe swiphiqo swa ndyangu swi endla leswaku u nga swi koti ku endla sweswo? Kumbe ku vuriwa yini loko ntirho wa wena wa ku tihanyisa wu ku hetela nkarhi ni matimba leswi a wu ta swi tirhisa evandlheni? Hikwalaho ko endla swilo swo tala leswi lavaka nkarhi ni matimba ya wena—kutani swi ku siya ni nkarhi wutsongo ni matimba matsongo—u nga ha titwa u karhatekile. Kumbexana u tshame u tivutisa loko Yehovha a langutele swo tala eka wena.

Yehovha wa anakanyela. A nge pfuki a langutele swo tala eka hina swo tlula leswi hi nga kotaka ku n’wi endlela swona. Nakambe wa swi xiya leswaku swi teka nkarhi ku hlakarhela loko hi tshikilelekile.—Pisalema 103:13, 14.

Hi xikombiso, xiya ndlela leyi Yehovha a n’wi khathaleleke ha yona muprofeta Eliya. Loko Eliya a hele matimba a tlhela a khomiwa hi rhumbyana lerova a tsutsumela emananga, xana Yehovha u n’wi holoverile kutani a n’wi lerisa leswaku a tlhelela exiavelweni xakwe? Doo! Ku ringana kambirhi, Yehovha  u rhume ntsumi leswaku yi ya n’wi pfuxa kutani yi n’wi nyika swakudya. Nilokoswiritano, endzhaku ka masiku ya 40, Eliya a ha karhatekile ni ku khomiwa hi rhumbyana. I yini swin’wana leswi Yehovha a swi endleke leswaku a n’wi pfuna? Xo sungula, Yehovha u kombise leswaku a nga n’wi sirhelela. Xa vumbirhi, Yehovha u chavelele Eliya hi ‘rito ro rhula ni ro olova.’ Xo hetelela, Yehovha u paluxe leswaku a ku ri ni van’wana va magidi lava a va n’wi gandzela hi ku tshembeka. Hi ku hatlisa, Eliya u tlhele a va muprofeta loyi a hisekaka. (1 Tihosi 19:1-19) Hi dyondza yini emhakeni leyi? Loko Eliya a karhatekile, Yehovha u n’wi lehisele mbilu a tlhela a n’wi twela vusiwana. Yehovha a nga si cinca. U hi khathalela hi ndlela leyi fanaka.

Loko u anakanya hileswi u nga swi endlelaka Yehovha, anakanya hileswi u nga kotaka ku swi endla. U nga ringanisi leswi u nga swi endlaka namuntlha ni leswi a wu kota ku swi endla eku sunguleni. Hi xikombiso: Xitsutsumi lexi tshikaka ku endla vutiolori ku ringana tin’hweti to hlayanyana kumbe malembe a xi nge swi koti ku namba xi tsutsuma hilaha a xi endla hakona eku sunguleni. Ematshan’weni ya sweswo, xi sungula hi ku tivekela tipakani leti nga ta xi nyika matimba ni ku kota ku tiyisela. Vakreste va fana ni switsutsumi. Va tiletela va ri ni pakani emianakanyweni. (1 Vakorinto 9:24-27) Ha yini u nga nambi u tivekela pakani ya moya leyi swi nga ta ku olovela ku yi fikelela? Hi xikombiso, u nga ha tivekela pakani yo va kona eminhlanganweni ya vandlha. Kombela Yehovha leswaku a ku pfuna u fikelela pakani ya wena. Loko u ri karhi u hlakarhela hi tlhelo ra moya, u ta ‘nantswa u vona leswaku Yehovha hi lonene.’ (Pisalema 34:8) Tsundzuka leswaku xin’wana ni xin’wana lexi u xi endlaka leswaku u kombisa ndlela leyi u rhandzaka Yehovha ha yona—hambiloko xi vonaka xi ri xitsongo—i xa risima eka yena.—Luka 21:1-4.

Xana Yehovha u n’wi pfune njhani June leswaku a tlhelela eka yena? U hi byela leswi: “Ndzi hambete ndzi khongela Yehovha, ndzi kombela leswaku a ndzi pfuna. Kutani nsati wa n’wana wa mina u ndzi byele hi nhlengeletano leyi a yi ta va kona edorobeni leri ndzi tshamaka eka rona. Ndzi endle xiboho xo ya siku rin’we. Hakunene, a swi tsakisa ku tlhela ndzi hlangana ni vanhu va Yehovha! Nhlengeletano yoleyo yi ve mpfuno lowu a ndzi wu lava. Sweswi ndzi tiphina hi ku tirhela Yehovha. Sweswi se ndzi hanya vutomi lebyi nga ni xikongomelo. Ku tlula rini na rini, ndza swi xiya leswaku a ndzi nge hanyi handle ka vamakwerhu naswona ndzi fanele ndzi amukela mpfuno wa vona. Ndzi nkhensa leswi ndzi tlheleleke enhlengeletanweni nkarhi wa ha ri kona.”