TIYISEKA leswaku Yehovha u ta ku pfuna loko u tlhelela eka yena. U ta ku pfuna leswaku u langutana ni ku karhateka, ku twisiwa ku vava loku u nga na kona ni leswaku u va ni ku rhula ka mianakanyo loku munhu a vaka na kona hi ku va ni ripfalo leri baseke. Kutani u nga ha tlhela u susumeteleka ku tirhela Yehovha swin’we ni vagandzerikulobye. U nga ha fana ni Vakreste van’wana va lembexidzana ro sungula, lava muapostola Petro a va tsaleleke a ku: “A mi fana ni tinyimpfu, mi pepetseka; kambe sweswi mi vuyele eka murisi ni mulanguteri wa mimoya-xiviri ya n’wina.”—1 Petro 2:25.

Ku tlhelela eka Yehovha i nchumu lowunene lowu u nga wu endlaka. Ha yini? U ta endla leswaku Yehovha a tsaka. (Swivuriso 27:11) Hilaha u tivaka hakona, Yehovha u ni mintlhaveko, kutani swiendlo swa hina swa n’wi khumba. Yehovha a nga hi sindzisi leswaku hi n’wi rhandza ni ku n’wi tirhela. (Deteronoma 30:19, 20) Mukambisisi un’wana wa Bibele u swi veka hi ndlela leyi: “Mbilu ya munhu a yi na xikhomo. Yi fanele yi pfuriwa hi le ndzeni.” Loko hi gandzela Yehovha hi mbilu hinkwayo, hi va hi ri karhi hi pfula timbilu ta hina. Loko hi endla tano, hi n’wi nyika nyiko ya risima—ku tshembeka ka hina—naswona hi endla leswaku a tsaka swinene. Hakunene ku hava nchumu lowu hi nga wu ringanisaka ni ntsako lowu hi vaka na wona loko hi gandzela Yehovha hi ndlela leyi n’wi fanelaka.—Mintirho 20:35; Nhlavutelo 4:11.

Ku engetela kwalaho loko u tlhela u sungula ku gandzela Xikwembu, u ta tlhela u va ni vuxaka na xona. (Matewu 5:3) Hi ndlela yihi? Vanhu emisaveni hinkwayo va tivutisa leswi, ‘Ha yini hi ri laha?’ Va lava tinhlamulo ta swivutiso leswi va nga na swona malunghana ni xikongomelo xa vutomi. Vanhu va lava ku va ni vuxaka na Yehovha hikuva u va vumbe va ri tano. U hi vumbe leswaku hi tiphina hi ku n’wi tirhela. A hi nge eneriseki loko hi tiva leswaku hi gandzela Yehovha ku nga ri hi ku swi rhandza.—Pisalema 63:1-5.

Tiva leswaku Yehovha u lava leswaku u tlhelela eka yena. U nga tiyiseka njhani hi sweswo? Xiya: Hi rhange hi khongela swinene leswaku hi lunghiselela broxara leyi. Kumbexana u nyikiwe yona hi nkulu kumbe hi mupfumerikulobye. Kutani u susumeteleke ku yi hlaya ivi u endla leswi yi swi vulaka. Hinkwaswo leswi i vumbhoni bya leswaku Yehovha a nga ku rivalanga. Ku hambana ni sweswo u ku vuyisela eka yena.—Yohane 6:44.

Hi nga chaveleleka ku tiva leswaku Yehovha a nga ma rivali malandza yakwe lama hambukeke. Leswi hi swona leswi tsakiseke makwerhu wa xisati loyi a vuriwaka Donna. U te: “Hakatsongotsongo ndzi tshike ntiyiso, kambe hakanyingi a ndzi anakanyisisa hi Pisalema 139:23, 24 leyi nge: ‘Ndzi lavisise, Wena Xikwembu, u tiva mbilu ya mina. Ndzi kambele, u tiva miehleketo ya mina leyi karhataka. U vona loko ku ri ni ndlela leyi nga riki yinene eka mina, u ndzi kongomisa endleleni hilaha ku nga riki na makumu.’ A ndzi swi tiva leswaku a ndzi fanelanga ndzi va emisaveni—a ndzi nga faneleki nikatsongo eka yona—naswona a ndzi swi tiva leswaku a ndzi fanele ndzi va enhlengeletanweni ya Yehovha. Ndzi sungule ku swi vona leswaku Yehovha a nga ndzi fularhelanga nikan’we; a ndzi fanele ndzi kuma ndlela yo tlhelela eka yena. Kutani ndza tsaka swinene leswi ndzi tlheleleke eka yena!”

Hi khongela hi mbilu hinkwayo leswaku na wena u tlhela u va ni “ntsako wa Yehovha.” (Nehemiya 8:10) A wu nge tisoli nikan’we hi ku tlhelela eka Yehovha.