EBibeleni, rito ra Xiheveru leri nge na·vaʼʹ, leri hundzuluxeriweke ri ku “profeta” ri vula ku byela van’wana rungula leri huhuteriweke, vuavanyisi, ku dyondzisa mahanyelo lamanene kumbe xileriso lexi humaka eka Xikwembu. Ri nga tlhela ri vula ku byela van’wana rungula ra Xikwembu ra leswi nga ta endleka enkarhini lowu taka. Vuprofeta bya Ezekiyele byi katsa mixaka yoleyo hinkwayo ya vuprofeta lebyi humaka eka Xikwembu.—Ezek. 3:10, 11; 11:4-8; 14:6, 7; 37:9, 10; 38:1-4.

• SWIVONO

• SWIFANISO

• SWIKOMBISO

Buku ya Ezekiyele yi vulavula hi swivono, swifaniso ni swikombiso swa vuprofeta.

Vuprofeta lebyi vuriweke hi Ezekiyele mikarhi yin’wana byi hetiseka ku tlula kan’we. Hi xikombiso, vuprofeta bya ku pfuxetiwa a byi hetisekanga hi ku helela loko vanhu va Xikwembu va tlhelela eTikweni leri Tshembisiweke. Hilaha swi hlamuseriweke hakona eka Ndzima 9 ya buku leyi, byo tala bya vuprofeta bya ku pfuxetiwa bya hetiseka namuntlha naswona byi ta tlhela byi hetiseka enkarhini lowu taka.

Enkarhini lowu hundzeke, swilo swin’wana eka vuprofeta bya Ezekiyele a hi swi teka swi fanekisela swilo swo karhi. Buku leyi a yi hlamuseli munhu, nchumu, ndhawu kumbe xiendlakalo xo karhi swi ri vuprofeta lebyi fanekiselaka swilo swo karhi leswi endlekaka namuntlha handle ka loko Tsalwa ro karhi ri seketela mhaka yoleyo. * Kambe, yi ta hi komba ku hetiseka lokukulu ka vuprofeta byo tala bya Ezekiyele. Yi ta tlhela yi hlamusela leswi hi nga swi dyondzaka eka rungula ra Ezekiyele, vanhu, tindhawu ni swiendlakalo leswi a swi boxeke.