BOKISI RO DYONDZISA 4A
“Ndzi Langute Swivumbiwa Leswi Hanyaka”
Handle ko kanakana Ezekiyele u vone swifaniso leswikulu swa tinkuzi ni tinghala leti nga ni timpapa ni swikandza swa vanhu swi yime tanihi varindzi emahlweni ka tiyindlu ta tihosi ni titempele. Swifaniso swo tano a swi kumeka emutini hinkwawo wa Asiriya ni le Babilona wa khale. Ku fana ni vahlaleri hinkwavo, u fanele a langute swivumbiwa hi ku hlamala, leswi swin’wana swa swona a swi lehe kwalomu ka timitara ta tsevu. Nilokoswiritano, hambileswi swivumbiwa leswi a swi vonaka swi ri ni matimba, a swi nga hanyi hikuva a swi kovotliwe eribyeni.
Ku hambana na swona, swivumbiwa swa mune leswi Ezekiyele a swi voneke exivonweni a swi ri “swivumbiwa leswi hanyaka.” Koloko a ku ri ku hambana lokukulu! Xivono lexi xi hlamarise Ezekiyele lerova a vula marito lama nge “swivumbiwa leswi hanyaka” ka 11 eka xingheniso xa vuprofeta byakwe. (Ezek. 1:5-22) Swivumbiwa swa mune leswi hanyaka leswi nga exivonweni, leswi fambaka swin’we ehansi ka xiluvelo xa Xikwembu swi fanele swi endle Ezekiyele a swi xiya leswaku Yehovha u lawula ntumbuluko wakwe hinkwawo hi ku helela. Ninamuntlha, xivono xexo xi hi endla hi swi xiya leswaku Yehovha u ni matimba lamakulu naswona i Hosi ya vuako hinkwabyo.—1 Tikr. 29:11.