Eka Ezekiyele ndzima 23, hi kuma rungula ro vava leri yaka eka vanhu va Xikwembu hikwalaho ka ku nga tshembeki ka vona. Ndzima 23 ya Ezekiyele yi fana na ndzima 16 hi tindlela to tala. Ndzima 23 na yona yi tirhisa xifaniso xa nghwavava ku fana na ndzima 16. Yerusalema u vitaniwa ntsongwana ya Samariya kasi Samariya u vitaniwa sesi wa kona. Tindzima leti hatimbirhi ti kombisa ndlela leyi lowa ntsongwana a nga tekelela vunghwavava bya sesi wakwe ha yona a tlhela a homboloka ni ku tikhoma ku biha ku tlula ni sesi wakwe. Eka ndzima 23 Yehovha u thya vamakwavo lavambirhi mavito: Ohola i makwavo lonkulu ku nga Samariya, ntsindza wa mfumo wa tinyimba ta khume ta Israyele; Oholiba i makwavo lontsongo ku nga Yerusalema, ntsindza wa Yuda. *—Ezek. 23:1-4.

Ka ha ri na swin’wana leswi tindzima letimbirhi ti fanaka ha swona. Kumbexana ku fana lokukulu hi loku: Eku sunguleni tinghwavava leti a ti ri vasati va Yehovha kutani ti n’wi xandzukela. Nakambe ku ni rungula ra ntshembo. Ndzima 23 a yi vulavuli ngopfu hi ntshembo wa ku kutsuriwa kambe yi fana ni ndzima 16 laha Yehovha a nge: “Ndzi ta endla leswaku u tshika ku endla manyala ni vunghwavava.”—Ezek. 16:16, 20, 21, 37, 38, 41, 42; 23:4, 11, 22, 23, 27, 37.

Enkarhini lowu hundzeke minkandziyiso ya hina yi vule leswaku vamakwavo lavambirhi ku nga Ohola na Oholiba eka vuprofeta lebyi va fanekisela Vujagana ni ku avana ka byona byi va kereke ya Khatoliki ni ya Protestente. Kambe endzhaku ko khongela ni ku endla ndzavisiso lowu engetelekeke hi tivutise swivutiso leswi swa nkoka. Xana Vujagana byi tshame byi va nsati wa Yehovha? Xana u tshame a endla ntwanano na byona? Nikatsongo. Vujagana a byi nga ri kona ni ku va kona loko Yesu a va muhlanganisi wa “ntwanano lowuntshwa” ni vatotiwa; naswona Vujagana a byi si tshama byi va xiphemu xa tiko leri katekisiweke hi Yehovha ra Vakreste lava totiweke. (Yer. 31:31; Luka 22:20) Vujagana byi sungule ku va kona endzhaku ka ku fa ka vaapostola. Byi sungule ku va kona emalembeni ya va-300 endzhaku ka loko Yesu se a tile emisaveni, byi ri mugwinehi, ku nga nhlangano wo homboloka lowu a wu vumbiwa hi “mfava” lowu nga Vakreste va mavunwa lava boxiweke eka vuprofeta bya Yesu mayelana ni koroni ni mfava.—Mat. 13:24-30.

Ku hambana kun’wana lokukulu hi loku: Yehovha u tshembise ku kutsula Yerusalema na Samariya, matiko lama nga tshembekangiki eka yena. (Ezek. 16:41, 42, 53-55) Xana wu kona ntshembo wo karhi lowu Bibele yi wu boxaka mayelana ni Vujagana? A wu kona! A byi na ntshembo ku fana ni vukhongeri hinkwabyo bya Babilona Lonkulu.

Hikwalaho, eka vuprofeta Ohola na Oholiba a va fanekiseli Vujagana. Hambiswiritano, vukona bya vona byi hi pfuna ku twisisa nchumu wun’wana wa nkoka swinene: ku nga ndlela leyi Yehovha a titwaka ha yona hi lava va nga ri yimeliki kahle vito rakwe ro kwetsima ni milawu yakwe ya vugandzeri lebyi tengeke. Vujagana byi ni nandzu lowukulu swinene emhakeni leyi hikuva tikereke ta byona ta ntsandzavahlayi ti vula leswaku ti yimela Xikwembu xa le Bibeleni. Xo biha no tlurisa, ti vula leswaku murhangeri wa tona i Yesu Kreste, N’wana wa Yehovha la rhandzekaka. Kambe ti vula mavunwa hi ku teka Yesu a ri xiphemu xa xikwembu xa vunharhu bya tilo ni hi ku tlula xileriso xakwe lexi nga erivaleni xa ku nga vi “xiphemu xa misava.” (Yoh. 15:19) Leswi Vujagana byi yaka emahlweni byi katseka eka vugandzeri bya swikwembu swa hava ni le ka minhlangano ya tipolitiki, byi tikombise byi ri xiphemu lexikulu xa “nghwavava leyikulu.” (Nhlav. 17:1) A swi kanakanisi leswaku byi fanele byi weriwa hi khombo leri nga ta wela mfumo wa misava wa vukhongeri bya mavunwa!