1-3. (a) Hlamusela leswi Ezekiyele a swi voneke ni ku swi twa. (Vona xifaniso lexi nga eku sunguleni.) (b) I matimba ya mani lama pfuneke Ezekiyele leswaku a vona swivono naswona a a titwa njhani?

EZEKIYELE u langute ekule, u honelele rivala leri nga ni sava. U swinya mahlo a tlhela a ma pfula. A nga swi tshembi leswi a swi vonaka. Loko a languta ekusuhi ni le vugimamusi, wa swi vona leswaku xidzedze xi le ku teni. Kambe a hi xidzedze lexi tolovelekeke. Loko xidzedze xexo lexi humaka en’walungwini xi ri karhi xi hunga misisi ni swiambalo swakwe, u vona papa lerikulu. Ri vonaka loko rihati ri hatima naswona ku hatima ka rona ku n’wi tsundzuxa hi ntsopfu wa risima lowu n’okisiweke. * Loko papa ri ri karhi ri ya laha ku nga na Ezekiyele hi ku hatlisa, pongo ri ya ri tinyika matimba, ri twala ku fana ni vuthu lerikulu leri nga eku fambeni.—Ezek. 1:4, 24.

² Loko jaha leri ri ri ni malembe ya kwalomu ka 30, ri vone xivono xo sungula xa swivono leswi nga rivalekiki. Ri twe “voko ra Yehovha” ri ri ehenhla ka yena, ku nga matimba lamakulu ya moya lowo kwetsima wa Yehovha. Leswi moya wolowo a wu ta n’wi endla a swi vona ni ku swi twa a swi ta va erivaleni ku tlula leswi endliwaka eka tifilimi ta manguva lawa. Xivono xexo a xi ta n’wi siya a lo gabaa, a we ehansi hi xikandza.—Ezek. 1:3, 28.

 ³ Hambiswiritano, xikongomelo xa Yehovha a ku nga ri ku hlamarisa Ezekiyele. Ku fana ni swivono leswin’wana leswi tsariweke eka buku yoleyo yo tsakisa ya vuprofeta, xivono xo sungula xa Ezekiyele xi vula swo tala eka yena ni le ka malandza yo tshembeka ya Yehovha namuntlha. Kutani a hi kambisiseni leswi Ezekiyele a swi voneke ni ku swi twa.

4, 5. Xiyimo a xi ri njhani loko Ezekiyele a vona xivono?

⁴ Hlaya Ezekiyele 1:1-3. A hi rhangeni hi kambisisa xiyimo xa kona. A ku ri hi lembe ra 613 B.C.E. Hilaha hi dyondzeke hakona eka ndzima leyi hundzeke, Ezekiyele a a ri eBabilona, a a tshama ni vanhu lava yisiweke vuhlongeni endhawini leyi a yi ri etlhelo ka nambu wa Kebari—swi vonaka onge nambu lowu a ku ri mugerho lowu a wu endliwe hi vanhu wu suka enambyeni wa Yufrata wu tlhela wu vuyela kona.

⁵ Tiko ra vona, ku nga Yerusalema a ri ri kwalomu ka tikhilomitara ta 800. * Tempele leyi tata wa Ezekiyele a nga tshama a va muprista eka yona a yi thyakisiwile hi swikwembu swa hava. Xiluvelo xa le Yerusalema lexi Davhida na Solomoni va tshameke va fuma eka xona se a xi khomisa tingana. Hosi Yoyakini loyi a a nga ri na ripfumelo a a ri eBabilona ni vanhu lava yisiweke evuhlongeni. Sedekiyasi loyi a n’wi tlhandlameke exiluvelweni xakwe a a lawuriwa hi hosi ya Babilona naswona a a ri wanuna wo homboloka.—2 Tih. 24:8-12, 17, 19.

6, 7. Hikwalaho ka yini Ezekiyele a nga vaka a titwe a hanya enkarhini wo tika swinene?

⁶ Eka Ezekiyele wanuna wa ripfumelo, swi nga endleka leswaku nkarhi lowu a ku ri wona wo tika swinene evuton’wini byakwe. Van’wana  lava a a ri na vona evuhlongeni va nga ha va va tivutise leswi: ‘Xana Yehovha u hi tshikele makumu? Xana mfumo lowu wo homboloka wa Babilona ni swikwembu swa wona swo tala swa mavunwa wu ta byi herisela makumu vugandzeri bya Yehovha lebyi tengeke ku katsa ni vulawuri byakwe emisaveni?’

⁷ Loko wa ha anakanya hi sweswo, hikwalaho ka yini u nga sunguli ku dyondza nhlokomhaka leyi eka dyondzo ya wena n’wini, u hlaya nhlamuselo ya xivono xo sungula xa Ezekiyele? (Ezek. 1:4-28) Loko u ri karhi u endla tano, hi tihlo ra mianakanyo ringeta ku tiveka exiyin’weni xa Ezekiyele, u vona leswi a swi voneke ni ku twa leswi a swi tweke.

8. I yini leswi Ezekiyele a swi voneke exivonweni naswona a swi yimela yini?

⁸ Hi ku komisa, Ezekiyele u vone yini? U vone nchumu lowu fanaka ni golonyi leyikulu, leyi hlamarisaka swinene leyi hlamuseriweke tanihi kalichi. A yi ri ni mavhilwa ya mune lamakulu lawa a ma ri ni swivumbiwa swa mune swa moya leswi nga tolovelekangiki leswi endzhakunyana swi hlamuseriweke tanihi makerubu. (Ezek. 10:1) Ehenhla ka wona a ku ri ni nchumu lowu fanaka na ayisi leyi ehenhla ka yona ku nga ni xiluvelo lexi Yehovha Xikwembu a tshameke eka xona. Kutani xana kalichi yoleyo a yi yimela yini? Xivono xa Ezekiyele xi yimela nchumu wun’we ntsena, ku nga xiphemu xa le tilweni  xa nhlangano wa Yehovha lowu vangamaka wa vuako hinkwabyo. Hikwalaho ka yini hi vula tano? Xiya swilo swinharhu leswi endlaka hi vula tano.

9. Vuxaka lebyi Yehovha a nga na byona ni swivumbiwa swakwe swa le tilweni byi hlamuseriwe njhani hi ku tirhisa golonyi?

⁹ Vuxaka lebyi Yehovha a nga na byona ni swivumbiwa swakwe swa le tilweni. Xiya leswaku exivonweni lexi, xiluvelo xa Yehovha xi le henhla ka makerubu. Eka swiphemu swin’wana swa Rito ra Xikwembu, Yehovha u hlamuseriwa a tshame ehenhla kumbe exikarhi ka makerubu yakwe. (Hlaya 2 Tihosi 19:15; Eks. 25:22; Ps. 80:1) I ntiyiso leswaku a nga tshamanga ehenhla ka makerubu hi ku kongoma onge hiloko a lava ku rhwariwa hi swivumbiwa sweswo swa moya swa matimba—tanihi leswi ni kalichi leyi a yi khandziyeke yi nga riki ya xiviri. Kambe makerubu ma seketela vuhosi byakwe, naswona u ma rhuma kun’wana ni kun’wana leswaku ma ya endla ku rhandza kakwe. Makerubu, ku fana ni tintsumi hinkwato ta Xikwembu to kwetsima, ma hetisisa swiboho swa Yehovha tanihi vatirheli kumbe malandza yakwe. (Ps. 104:4) Hi ndlela yoleyo Yehovha hi yena a ma kongomisaka tanihi mufumi wa wona, onge hiloko ma vumba golonyi yinʼwe leyikulu leyi nga ni vun’we.

10. I yini leswi kombisaka leswaku ku katseka makerubu yo tala ku nga ri ya mune ntsena eka kalichi ya Yehovha ya le tilweni?

¹⁰ Golonyi a yi yimeli makerubu ntsena. Makerubu lawa Ezekiyele a ma voneke a ma ri mune. Mikarhi yo tala nhlayo yoleyo eBibeleni yi vula ku ringana kumbe ku helela kumbe ku hlamusela nchumu lowu nga siyiki munhu. Kutani swa fanela leswi vana hinkwavo va  moya lava tshembekaka va Yehovha va yimeriwaka hi makerubu wolawo ya mune. Nakambe xiya leswaku mavhilwa ni makerubu swi ni matihlo yo tala, leswi kombisaka leswaku hi rindziwe hi swivumbiwa swo tala ku nga ri swivumbiwa leswi swa mune ntsena leswi a swi voneke. Kutani ndlela leyi Ezekiyele a yi hlamuselaka ha yona golonyi yoleyo yi swi veka erivaleni leswaku i yikulu, lerova hambi ku ri makerubu wolawo lamakulu ma languteka ma ri matsongo. (Ezek. 1:18, 22; 10:12) Hilaha ku fanaka, xiphemu xa le tilweni xa nhlangano wa Yehovha i xikulu, xi ni makerubu yo tala swinene ku tlula ya mune.

11. Daniyele u vone xivono xihi lexi fanaka ni xa Ezekiyele naswona sweswo swi endla leswaku hi gimeta hi ku vula yini?

¹¹ Daniyele u vone xivono xa le tilweni lexi fanaka. Muprofeta Daniyele u tshame malembe yo tala evuhlongeni emutini wa Babilona naswona na yena u kombiwe xivono xa le tilweni. Lexi tsakisaka hileswaku ni le ka xivono xexo xiluvelo xa Yehovha a xi ri ni mavhilwa. Xivono xexo a xi kombisa leswaku ndyangu wa Yehovha wa moya wa le tilweni i wukulu. Daniyele u vone vana va moya va Xikwembu va ‘10 000 lava andzisiweke ka 10 000’ va yime emahlweni ka Yehovha. A va tshame tanihi Huvo ya le tilweni, unwana ni unwana a tshame laha a averiweke kona. (Dan. 7:9, 10, 13-18) Hi nga ha gimeta hi ku vula leswaku xivono xa Ezekiyele xi yimela swivumbiwa sweswo swa moya leswi vangamaka!

12. Hikwalaho ka yini swi hi sirhelela ku dyondza tindzimana to tanihi leti vulavulaka hi xivono xa Ezekiyele xa kalichi ya le tilweni?

¹² Yehovha wa swi tiva leswaku swa hi sirhelela ku anakanyisisa hi “swilo leswi nga voniwiki” hilaha muapostola Pawulo a vulaka hakona. Hikwalaho ka yini? Leswi hi nga vanhu va nyama hi tshamela ku ehleketa hi ‘swilo leswi hi swi vonaka’ ni leswi hi karhataka, ku nga swilo swa nkarhinyana ntsena. (Hlaya 2 Vakorinto 4:18.) Hakanyingi Sathana wa swi vona leswaku hi voyamele kwihi kutani a hi susumetela ku ehleketa hi swilo swa nyama. Leswaku a hi pfuna ku lwisana ni ntshikilelo wolowo, Yehovha hi rirhandzu u hi nyike tindzimana to fana ni leti, leti nga eka vuprofeta bya Ezekiyele, leti hi tsundzuxaka hi ndyangu lowukulu wa Yehovha wa le tilweni!

13, 14. (a) Ezekiyele u ma hlamusele njhani mavhilwa lama a ma voneke? (b) Hikwalaho ka yini swi fanela ku vula leswaku kalichi ya Yehovha yi ni mavhilwa?

¹³ Eku sunguleni, Ezekiyele u vulavule hi makerubu ya mune naswona eka Ndzima 4 ya buku leyi, hi ta vona leswi swivumbiwa sweswo ni ku languteka ka swona loku hlamarisaka swi hi dyondzisaka swona hi Yehovha. Hambiswiritano, Ezekiyele u vone mavhilwa ya mune ematlhelo ka makerubu wolawo eka matlhelo hinkwawo ya mune, ma vumba xikwere lexikulu. (Hlaya Ezekiyele 1:16-18.) Mavhilwa lawa a ma languteka ku fana ni ribye ra risima leri vuriwaka krisolita leri vonikelaka ra muhlovo wa xitshopana kumbe wa xitshopana xa rihlaza. Mavhilwa lawa yo saseka a ma vangama.

¹⁴ Xivono xa Ezekiyele xi vulavula ngopfu hi mavhilwa ya kalichi. Swa hlamarisa leswaku xiluvelo xi ni mavhilwa! Hi ntolovelo xiluvelo xi tshama ndhawu yin’we, hikuva vafumi va misava va fuma ndhawu  yo karhi ntsena. Kambe vuhosi bya Yehovha byi hambanile ni bya vanhu. Hilaha Ezekiyele a a ta swi vona hakona, vuhosi bya Yehovha a byi na swipimelo. (Neh. 9:6) Yehovha u fuma kun’wana ni kun’wana!

15. I yini leswi Ezekiyele a swi xiyeke hi xivumbeko ni vukulu bya mavhilwa?

¹⁵ Ezekiyele u hlamarisiwe hi vukulu bya mavhilwa. U tsale a ku: “Mavhilwa a ma tlakuke hi ndlela leyi chavisaka.” Hi nga vona Ezekiyele hi tihlo ra mianakanyo a ri karhi a languta ehenhla, a vona mavhilwa lamakulu lama hatimaka ma ri karhi ma tlakuka ma ya etilweni. U tlhele a vula rungula leri hlamarisaka a ku: “[Mavhilwa lawa] hi mune ka wona a ma ri ni matihlo ehandle ka wona matlhelo hinkwawo.” Kumbexana lexi hlamarisaka swinene a ku ri xivumbeko xa mavhilwa wolawo. U te: “Xivumbeko xa wona a xi fana ni loko vhilwa ri nghenisiwe exikarhi ka vhilwa rin’wana.” Xana sweswo a swi vula yini?

16, 17. (a) Mavhilwa ya kalichi a ma vonaka ma hlanganile hi ndlela yihi? (b) Mavhilwa ma hi byela yini hi ndlela leyi kalichi ya Yehovha yi fambaka ha yona?

¹⁶ Swi le rivaleni leswaku, vhilwa rin’wana ni rin’wana leri Ezekiyele a ri voneke a ri vonaka ri ri mavhilwa mambirhi lama hlanganisiweke laha rin’wana ri nghenelaneke ni rin’wana. Sweswo swi endla hi twisisa leswi Ezekiyele a vuleke leswaku mavhilwa lawa ma kota ku swi endla, u te: “Loko ma famba, a ma swi kota ku ya ematlhelweni hinkwawo ya mune ma nga jikanga.” Xana mavhilwa lawa ma hi byela yini hi kalichi ya le tilweni leyi Ezekiyele a yi voneke?

¹⁷ Mavhilwa lamakulu hi ndlela yo hlamarisa a ma ta fika ekule swinene hi ku ndzuluka kan’we ntsena. Kahlekahle, xivono xexo xi kombisa leswaku kalichi yoleyo a yi tsutsuma hi rivilo ro fana ni rihati! (Ezek. 1:14) Ku engetela kwalaho, mavhilwa ya mune lama nga tolovelekangiki ma famba hi ndlela yo hlamarisa swinene lerova hambi ku ri vanjhiniyara a va nge pfuki va swi kotile ku ma endla. Kalichi leyi, yi kota ku ya ematlhelo yo hambanahambana yi nga kalanga yi hunguta rivilo kumbe ku jika! Kambe kalichi leyi a yo tifambela ntsena. Matihlo yo tala lama nga emavhilweni ma kombisa leswaku kalichi leyi yi vona hinkwaswo matlhelo hinkwawo.

18. Hi dyondza yini hi vukulu bya mavhilwa ni leswi ma nga ni matihlo yo tala?

¹⁸ Xana Yehovha a a lava leswaku Ezekiyele ni vanhu hinkwavo vo tshembeka va dyondza yini hi xiphemu xa le tilweni xa nhlangano Wakwe? Ehleketa hi leswi se hi swi voneke ku fikela sweswi. Wa vangama naswona wa hlamarisa hilaha swi kombisiweke ha kona hi ku vangama ka mavhilwa ni vukulu bya wona. Wu vona hinkwaswo, tanihi leswi mavhilwa ya kona ma nga ni matihlo yo tala. Matihlo ya Yehovha ma vona swilo hinkwaswo. (Swiv. 15:3; Yer. 23:24) Ku tlula kwalaho, u ni malandza ya timiliyoni ta tintsumi leti a ti rhumaka kun’wana ni kun’wana ti fika ti kambisisa hi vukheta kutani ti ya vikela Hosi ya tona.—Hlaya Vaheveru 1:13, 14.

19. Ndlela leyi kalichi ya Yehovha yi tsutsumaka ha yona ni ndlela leyi a yi lawuriwa ha yona swi hi dyondzisa yini hi Yehovha ni hi xiphemu xa le tilweni xa nhlangano wakwe?

¹⁹ Nakambe, ha swi vona leswaku kalichi yi tsutsuma hi rivilo lerikulu naswona ya lawuleka. Anakanya hi ku hambana loku nga kona exikarhi ka xiphemu xa le tilweni xa nhlangano wa Yehovha ni mimfumo  ya vanhu ni minhlangano ya vona! A yi swi koti ku lulamisa swiphiqo swa misava ni ku fambisana ni ku cinca ka swiyimo, hikwalaho ka sweswo yi ta lovisiwa. Kambe kalichi ya Yehovha yi swi kombisa kahle leswaku Xikwembu lexi yi lawulaka xa anakanyela naswona xa swi kota ku fambisana ni ku cinca ka swiyimo. Hilaha vito rakwe ri swi kombisaka hakona, wa swi kota ku va nchumu wun’wana ni wun’wana leswaku a hetisisa xikongomelo xakwe. (Eks. 3:13, 14) Hi xikombiso, a nga va Nhenha leyi lwelaka vanhu va yona hi ku copeta ka tihlo, kambe a nga ha tlhela a va Murivaleri wa swidyoho loyi a nga ni musa hi ku copeta ka tihlo, loyi a chavelelaka hambi ku ri vadyohi, lava tshovekeke timbilu, lava hundzukeke.—Ps. 30:5; Esa. 66:13.

20. Hikwalaho ka yini kalichi ya Yehovha yi fanele yi hi hlamarisa?

²⁰ Sweswi xivono xa Ezekiyele xi nga endla leswaku hi tivutisa, ‘Xana hakunene kalichi ya Yehovha ya ndzi hlamarisa?’ Hi fanele hi tsundzuka leswaku kalichi yoleyo yi le ku fambeni sweswi. A hi fanelanga hi ehleketa leswaku Yehovha, N’wana wakwe ni tintsumi hinkwato a va swi voni swiphiqo leswi hi hetaka matimba. Nakambe a hi fanelanga hi ehleketa leswaku Xikwembu xa hina xi ta hlwela ku hi nyika leswi hi swi kombelaka kumbe leswaku nhlangano wakwe wu ta tsandzeka ku fambisana ni swiyimo leswi tshamelaka ku cinca emisaveni leyi. Hi fanele hi tsundzuka leswaku nhlangano wa Yehovha wu tshama wu ri erivilweni. Kahlekahle Ezekiyele u twe rito ri huma etilweni ri huwelela ri ku: “Mavhilwa lama rhendzelekaka!”—swi le rivaleni leswaku a ri lerisa mavhilwa leswaku ma famba. (Ezek. 10:13) Xana a wu tsaki loko u anakanyisisa hi ndlela leyi Yehovha a lawulaka nhlangano wakwe ha yona? Sweswo swi hi endla hi n’wi xixima swinene Yehovha.

21, 22. I yini lexi endlaka leswaku kalichi ya Yehovha yi va nchumu wun’we?

²¹ Loko Ezekiyele a languta ehenhla ka mavhilwa u vone “nchumu lowu fanaka ni lwangu leri hatimaka ku fana ni ayisi.” (Ezek. 1:22) Ehenhla ka tinhloko ta makerubu a ku ri ni nchumu lowu fanaka ni lwangu lowu hatimaka swinene. Muhlayi loyi a twisisaka ndlela leyi michini yi tirhaka ha yona a nga tivutisa swo tala hi kalichi leyi. Hi xikombiso, van’wana va nga ha tivutisa leswi: ‘I yini leswi khomeke nchumu wolowo lowu fanaka ni lwangu lowu nga ehenhla ka mavhilwa? Naswona mavhilwa ma nga famba njhani ma nga ri na ansi leyi ma hlanganisaka?’ Tsundzuka leswaku kalichi leyi a yi lawuriwi hi munhu, i yo fanekisela, i xikombiso xa leswi humelelaka etilweni. Nakambe xiya marito ya nkoka lama nge: “Moya lowu a wu tirha eka swona [swivumbiwa leswi hanyaka] a wu tirha ni le ka wona [mavhilwa].” (Ezek. 1:20, 21) I moya wa mani lowu a wu tirha eka mavhilwa ni makerubu wolawo?

²² A swi kanakanisi leswaku a ku ri moya lowo kwetsima wa Yehovha, ku nga moya wa matimba lamakulu evuakweni hinkwabyo. Matimba  wolawo lama tirhaka hi wona ma endlaka kalichi leyi yi va nchumu wun’we, ma yi nyika matimba ni ku yi fambisa. Loko ha ha anakanya hi sweswo, a hi voneni loko Ezekiyele a langute Loyi a lawulaka kalichi yoleyo.

23. Hi wahi marito lama Ezekiyele a ma tirhiseke loko a ringeta ku hlamusela Yehovha naswona hikwalaho ka yini?

²³ Hlaya Ezekiyele 1:26-28. Loko a ri karhi a hlamusela xivono lexi, Ezekiyele u tala ku tirhisa marito lama nge, “nchumu lowu fanaka ni,” “a wu languteka ku fana ni” ni lama nge “xivumbeko xa wona.” Kambe loko swi ta eka tindzimana leti u ma tirhisa ngopfu marito wolawo. U tikomba a kala ni marito yo hlamusela leswi a swi vonaka. U vone “nchumu lowu fanaka ni ribye ra safiri, lowu a wu languteka ku fana ni xiluvelo.” Xana wa xi vona hi tihlo ra mianakanyo xiluvelo lexi langutekaka ku fana ni ribye lerikulu ra safiri ra muhlovo wa wasi? A ku ri ni Loyi a tshameke ehenhla ka xona. Xivumbeko xakwe a xi “languteka ku fana ni munhu.”

24, 25. (a) Nkwangulatilo lowu rhendzeleke xiluvelo xa Yehovha wu hi tsundzuxa yini? (b) Xana vavanuna va ripfumelo va titwe njhani hi swivono leswi va swi voneke?

²⁴ Ezekiyele u hlamusele xivumbeko lexi hlamarisaka hi ku ya hi ndlela leyi a xi twisisaka ha yona, hikuva Yehovha u kombisa ku vangama kakwe loku a ku languteka ku fana ni ndzilo ku suka emasengeni ku ya ehansi ni ku suka emasengeni ku ya ehenhla. Hi tihlo ra mianakanyo a hi voneni muprofeta a ri karhi a swinya mahlo loko a ri karhi a languta xivumbeko lexi vangamaka. Eku heteleleni Ezekiyele  u vone nchumu lowu hlamarisaka swinene: “A a rhendzeriwe hi ku vangama loku fanaka ni nkwangulatilo epapeni hi siku leri ku naka mpfula.” Xana a wu tsaki loko u vona nkwangulatilo? Hakunene wona i nchumu lowu tsakisaka lowu hi tsundzuxaka hi ku vangama ka Mutumbuluxi wa hina! Nkwangulatilo wolowo lowu humelelaka exibakabakeni wu tlhela wu hi tsundzuxa ntwanano wa ku rhula lowu Yehovha a wu endleke endzhaku ka Ndhambi. (Gen. 9:11-16) Hambileswi a nga ni matimba, Lowa Matimba Hinkwawo i Xikwembu xa ku rhula. (Hev. 13:20) Leswi a nga ni ku rhula ni vagandzeri vakwe vo tshembeka va ni ku rhula.

²⁵ Ku humelele yini loko Ezekiyele a vona ku vangama ka Yehovha Xikwembu? Ezekiyele u tsale leswi endlekeke a ku: “Loko ndzi ku vona, hiloko ndzi wa xikandza xa mina xi languta ehansi.” Ezekiyele u tiwisele ehansi, hikwalaho ko hlamala ni ku xixima. Vaprofeta van’wana va endle leswi fanaka loko Yehovha a va komba swivono; swi nga ha va swi endle leswaku va titwa va nga ri nchumu va tlhela va chava. (Esa. 6:1-5; Dan. 10:8, 9; Nhlav. 1:12-17) Hambiswiritano, hi ku famba ka nkarhi leswi Yehovha a va kombeke swona swi tiyise ripfumelo ra vona. A swi kanakanisi leswaku Ezekiyele na yena xi n’wi tiyisile xivono lexi. Kutani xana hi fanele hi titwa njhani loko hi hlaya Matsalwa yo fana ni lawa?

26. Xana xivono lexi Ezekiyele a xi voneke xi n’wi tiyise njhani?

²⁶ Loko ku ri leswaku Ezekiyele a a karhatiwa hi xiyimo lexi vanhu va Xikwembu a va ri eka xona eBabilona, xivono xexo xi fanele xi n’wi tiyisile. Ku nga khathariseki leswaku vanhu vo tshembeka va Xikwembu a va ri eYerusalema kumbe eBabilona kumbe kun’wana, a swi nga ta endleka leswaku kalichi ya Yehovha leyi hlamarisaka yi nga fiki laha va nga kona. Sathana a nge pfuki a sivele Xikwembu lexi lawulaka nhlangano lowu vangamaka wa tilweni! (Hlaya Pisalema 118:6.) Ezekiyele na yena u swi vonile leswaku kalichi ya le tilweni a yi nga ri ekule ni vanhu. Hi vula tano hikuva mavhilwa ya yona a ma khumbe misava! (Ezek. 1:19) Hikwalaho Yehovha a khathala hi vanhu vakwe vo tshembeka lava a va ri evuhlongeni. Mikarhi hinkwayo Tata wa vona a a ta va khathalela!

27. Xana xivono xa Ezekiyele xi vula yini eka hina namuntlha?

²⁷ Xana xivono xa Ezekiyele xa hi khumba na hina namuntlha? Ina! Tsundzuka leswaku namuntlha Sathana u lwisana ngopfu ni vugandzeri bya Yehovha lebyi tengeke. U lava hi kholwa leswaku hi le kule ngopfu ni Tata wa hina wa le tilweni swin’we ni nhlangano wakwe. U nga pfumeleli mavunwa wolawo ma nghena embilwini kumbe emiehleketweni ya wena! (Ps. 139:7-12) Na hina ha hlamala ku fana na Ezekiyele. Kambe hina a hi nge tiwiseli ehansi ku fana na yena. Hambiswiritano, hi hlamarisiwa hi matimba, rivilo ni mafambelo ya xiphemu xa le tilweni xa nhlangano wa Yehovha. Hi tlhela hi hlamarisiwa  hi leswi yi vangamaka swinene ni ndlela leyi yi fambisanaka ni swiyimo ha yona.

28, 29. I yini leswi kombisaka leswaku kalichi ya Yehovha a yi ri eku fambeni ni le ka malembe ya dzana lama hundzeke?

²⁸ U nga rivali leswaku nhlangano wa Yehovha wu ni xiphemu xa laha misaveni. Xiphemu lexi, xa laha misaveni xi vumbiwa hi vanhu lava nga hetisekangiki. Kambe ehleketa hi leswi Yehovha a swi endleke laha misaveni! Emisaveni hinkwayo Yehovha u pfune vanhu lava nga hetisekangiki leswaku va endla swilo leswi a va nga ta pfuka va swi kotile hi matimba ya vona. (Yoh. 14:12) Loko hi hlaya buku leyi nge Mfumo Wa Xikwembu Wa Fuma! yi ta hi pfuna ku vona ntirho lowukulu wo chumayela lowu endliweke eka malembe ya dzana lama hundzeke. Yi ta tlhela yi hi pfuna ku vona leswi nhlangano wa Yehovha wu swi endleke ku dyondzisa Vakreste va ntiyiso, ndlela leyi wu hluleke ha yona eka swa nawu hambi ku ri ku tirhisa thekinoloji ya manguva lawa leswaku wu endla ku rhandza ka Xikwembu!

²⁹ Loko hi kambisisa hinkwaswo leswi endliweke leswaku ku pfuxetiwa vugandzeri lebyi tengeke emasikwini lawa ya makumu ya misava leyi yo biha hi ta swi xiya leswaku kalichi ya Yehovha a yi yimanga. I nkateko lowukulu ku va eka nhlangano lowu ni ku tirhela Hosi leyi Tlakukeke!—Ps 84:10.

30. I yini leswi hi nga ta swi dyondza eka ndzima leyi landzelaka?

³⁰ Hambiswiritano, ka ha ri ni swo tala leswi hi nga swi dyondzaka eka xivono xa Ezekiyele. Eka ndzima leyi landzelaka, hi ta kambisisa “swivumbiwa leswi hanyaka” swa mune leswi hlamarisaka kumbe makerubu. Swi ta hi dyondzisa yini hi Hosi ya hina leyi vangamaka, ku nga Yehovha Xikwembu?