1, 2. (a) Hi xihi xiyenge xa nkoka xa tiko lexi faneleke xi vekeriwa etlhelo? (Vona xifaniso lexi nga eku sunguleni.) (b) Hi xihi xitshembiso lexi lava va nga evuhlongeni va xi kumaka exivonweni lexi?

EZEKIYELE, eka xivono xakwe xo hetelela u vona xiyenge xa tiko lexi a xi fanele xi vekeriwa xikongomelo xo hlawuleka. Xiyenge xexo a hi ndzhaka ya nyimba yo karhi ya Vaisrayele, kambe i munyikelo wa Yehovha. Ezekiyele u tlhele a vona ni muti wa nkoka lowu nga ni vito leri nga tolovelekangiki. Xiyenge lexi xa xivono xi nyika lava nga evuhlongeni xitshembiso xa nkoka lexi nge: Yehovha u ta va na vona loko va vuyela etikweni ra rikwavo leri va ri rhandzaka ngopfu.

² Ezekiyele u hi hlamusela hi munyikelo wolowo hi vuxokoxoko. A hi kambisiseni rungula leri, leri hi dyondzisaka swo tala hina vagandzeri va Yehovha va ntiyiso.

3. Hi tihi tindhawu ta ntlhanu leti a ti vumba ndhawu leyi Yehovha a yi hlawuleke, naswona tindhawu teto a ti tirhiseriwa xikongomelo xihi? (Vona bokisi leri nge “Munyikelo Lowu Mi Faneleke Mi Wu Nyikela.”)

³ Xiyenge xo hlawuleka xa tiko a xi ri swisungunu swa 25 000 (tikhilomitara ta 13) ku suka en’walungwini ku ya edzongeni xi tlhela xi va swisungunu swa 25 000 ku suka evuxeni ku ya evupeladyambu. Ndhawu leyi, leyi matlhelo ya yona ya mune ma ringanaka a yi vitaniwa “matlhelo hinkwawo ya munyikelo.” A yi aviwe yi va swiyenge swinharhu swo leha leswi nga anamangiki. Xiyenge xa le henhla a ku  ri xa Valevhi kasi xa le xikarhi a xi vekeriwe tempele ni vaprista. Swiyenge sweswo swimbirhi a swi vumba “munyikelo wo kwetsima.” Xiyenge lexitsongo xa le hansi kumbe “ndhawu leyi saleke,” a xi ri xa “swilo leswi tolovelekeke.” A xi ri xa muti.—Ezek. 48:15, 20.

4. Hi dyondza yini eka rungula leri vulavulaka hi munyikelo lowu yaka Yehovha?

⁴ Hi dyondza yini eka rungula leri, leri vulavulaka hi munyikelo lowu yaka eka Yehovha? Hi ku rhanga a hlawula ndhawu ya munyikelo wo hlawuleka, endzhaku ka swona a avela tinyimba ndhawu ya tona, hi ndlela yoleyo Yehovha a a kombisa leswaku ndhawu leyi ya vugandzeri leyi a yi ri exikarhi ka tiko a yi fanele yi tekiwa yi ri ya nkoka swinene. (Ezek. 45:1) A swi kanakanisi leswaku, mahlonga ma dyondze swo karhi hi ku hleriwa ka tindhawu hi ku ya hi nkoka wa tona. A ma fanele ma teka vugandzeri bya Yehovha byi ri bya nkoka ngopfu evuton’wini bya wona. Hilaha ku fanaka, na hina namuntlha hi teka migingiriko ya vugandzeri, yo tanihi ku dyondza Rito ra Xikwembu, ku ya etinhlengeletanweni ta Vakreste ni ntirho wo chumayela swi ri swa nkoka swinene. Yehovha u hi dyondzisa leswaku ku n’wi gandzela swi fanele swi va swa nkoka swinene evuton’wini bya hina.

5, 6. (a) Muti a wu ri wa vamani? (b) I yini leswi muti a wu nga yimeli swona naswona hikwalaho ka yini?

⁵ Hlaya Ezekiyele 48:15. Hi wihi nchumu lowu a wu ri wa nkoka hi “muti” ni ndhawu leyi a yi ri ekusuhi na wona? (Ezek. 48:16-18) Yehovha u byele Ezekiyele exivonweni, a ku: ‘Ndhawu leyi nyikiweke muti yi ta va ya vanhu hinkwavo va Israyele.’ (Ezek. 45:6, 7) Hikwalaho, muti ni ndhawu leyi a yi ri ekusuhi na wona a swi nga ri swa “munyikelo wo kwetsima” lowu a wu fanele wu “vekeriwa Yehovha.” (Ezek. 48:9) Loko hi ri karhi hi ehleketa hi sweswo, a hi kambisiseni leswi hi swi dyondzaka namuntlha eka ndlela leyi muti a wu hleriwe ha yona.

⁶ Hi fanele hi rhanga hi tiva leswi muti lowu wu nga yimeliki swona, leswaku hi kota ku tiva leswi hi swi dyondzaka eka wona. Muti lowu, a wu yimeli muti wa Yerusalema lowu pfuxetiweke ni tempele ya wona. Hikwalaho ka yini? Hikuva muti lowu Ezekiyele a wu voneke exivonweni a ku nga ta va na tempele eka wona. Nakambe muti lowu a wu nga yimeli wun’wana wa miti leyi a yi ri kona etikweni leri pfuxetiweke ra Israyele. Hikwalaho ka yini? Hikuva vanhu lava vuyeke hi le vuhlongeni kumbe vatukulu va vona a va wu akanga muti lowu nga ni swiyenge leswi hlamuseriweke eka xivono lexi. Ku engetela kwalaho, muti lowu a wu yimeli muti wa le tilweni. Hikwalaho ka yini? Hikuva a wu akiwe endhawini “leyi nga kwetsimiki” ku hambana ni miako leyi a yi akiwe endhawini leyi vekeriweke vugandzeri lebyi kwetsimaka.—Ezek. 42:20.

7. I yini muti lowu Ezekiyele a wu voneke naswona wu tikomba wu yimela yini? (Vona xifaniso lexi nga eku sunguleni.)

⁷ Kutani muti lowu Ezekiyele a wu voneke i yini? U nga rivali leswaku exivonweni lexi a voneke tiko eka xona u vone ni muti. (Ezek. 40:2; 45:1, 6) Rito ra Xikwembu ri kombisa leswaku tiko rero ri yimela tiko ro fanekisela, leswi vulaka leswaku muti na wona wu fanele  wu ri wo fanekisela. Hi ntolovelo rito “muti” ri vula yini? Rito leri ri vula vanhu lava tshamaka swin’we hi ndlela yo hleleka. Hikwalaho, muti lowu wo hleleka lowu Ezekiyele a wu voneke lowu a wu ri ni matlhelo ya mune lama ringanaka, wu vonaka wu yimela mfumo lowu hlelekeke.

8. Xana mfumo lowu wu fuma vamani naswona hikwalaho ka yini?

⁸ Xana mfumo lowu wu fuma vamani? Xivono xa Ezekiyele xi paluxa leswaku mfumo lowu wu fuma vanhu lava nga etikweni leri katekisiweke hi Xikwembu. Hikwalaho, mfumo lowu wu kongomisa mitirho leyi endliwaka hi vanhu va Xikwembu namuntlha. Mhaka ya leswaku muti lowu wu akiwe endhawini leyi nga kwetsimiki yi kombisa yini? Yi hi tsundzuxa leswaku muti lowu a wu yimeli mfumo wa le tilweni kambe wu yimela mfumo wa laha misaveni, lowu ku nga khale wu ri karhi wu pfuna vanhu lava nga eparadeyisini yo fanekisela.

9. (a) I vamani namuntlha lava vumbaka mfumo lowu wa laha misaveni? (b) I yini leswi Yesu a nga ta swi endla hi nkarhi wa Mfumo wa Gidi ra Malembe?

⁹ I vamani lava vumbaka mfumo lowu wa laha misaveni? Exivonweni xa Ezekiyele, loyi a a rhangela emfun’weni lowu fanisiwaka ni muti a a vuriwa “ndhuna.” (Ezek. 45:7) A a rhangela vanhu, kambe a a nga ri muprista naswona a a nga ri Mulevhi. Ndhuna leyi yi hi endla hi ehleketa ngopfu hi lava rhangelaka emavandlheni namuntlha lava nga totiwangiki hi moya wa Xikwembu. Varisi lava vo fanekisela lava khathalaka lava nga va “tinyimpfu tin’wana” i malandza ya laha misaveni lama titsongahataka ya mfumo wa Kreste wa le tilweni. (Yoh. 10:16) Hi nkarhi wa Mfumo wa Gidi ra Malembe lowu taka, Yesu u ta hlawula a tlhela a veka vakulu lava khathalaka kumbe “tihosana emisaveni hinkwayo.” (Ps. 45:16) Ehansi ka nkongomiso wa Mfumo wa le tilweni, va ta pfuna vanhu va Xikwembu hi swilo leswi va swi lavaka hi nkarhi wa Mfumo wa Gidi ra Malembe.

10. Vito ra muti i mani naswona hi xihi xitshembiso lexi ri xi nyikelaka?

¹⁰ Hlaya Ezekiyele 48:35. Vito ra muti i “Yehovha U Kwalaho.” Vito leri i xitshembiso xa leswaku emutini lowu swi ta va swi twala leswaku Yehovha u kona. Loko Yehovha a komba Ezekiyele muti lowu, lowu nga exikarhi ka tiko, kahlekahle a a byela lava nga evuhlongeni leswi: ‘Ndzi ta tlhela ndzi va na n’wina!’ Lexi i xitshembiso lexi tiyisaka nhlana hakunene!

11. Hi dyondza yini eka xivono xa Ezekiyele lexi vulavulaka hi muti ni vito ra wona ra nkoka?

¹¹ Hi dyondza yini eka xiyenge lexi xa vuprofeta bya Ezekiyele? Vito ra mfumo lowu fanisiwaka ni doroba ri tshembisa hina malandza ya Xikwembu namuntlha leswaku Yehovha u tshama ni malandza yakwe yo tshembeka ya laha misaveni sweswi naswona u ta tshama na wona hilaha ku nga heriki. Vito leri ra nkoka ri tlhela ri kandziyisa ntiyiso wa nkoka wa leswaku muti lowu a wu nyiki vanhu matimba yo fuma vanhu van’wana kambe wu va pfumelela leswaku va rhangela vanhu va Yehovha hi ndlela ya yena ya rirhandzu naswona yo anakanyela. Hi xikombiso, Yehovha a nga va nyikanga lava rhangelaka matimba yo ava tiko, tanihi leswi vanhu a va ta swi vona swi fanerile. Kambe, Yehovha u langutele leswaku lava rhangelaka va nyika malandza yakwe  vutihlamuleri kumbe ndhawu leyi yena a nga ma avela yona, ku katsa ni ‘swisiwana.’—Swiv. 19:17; Ezek. 46:18; 48:29.

12. (a) Hi xihi xiyenge xin’wana xa nkoka xa muti lowu naswona xi fanekisela yini? (b) Xiyenge xa xivono lexi i xitsundzuxo xa nkoka hi ndlela yihi eka Vakreste lava rhangelaka?

¹² Hi xihi xiyenge xin’wana xa nkoka xa muti lowu vitaniwaka “Yehovha U Kwalaho”? Hambileswi miti ya khale a yi biyeriwe hi makhumbi yo yi sirhelela yi tlhela yi va ni tigede ti nga ri tingani, muti lowu a wu ri ni tigede ta 12! (Ezek. 48:30-34) Tigede leti to tala (tinharhu eka tlhelo rin’wana ni rin’wana) ti kombisa leswaku lava rhangelaka emutini lowu va ni xinghana naswona va tshama va lunghekele ku pfuna malandza hinkwawo ya Xikwembu. Nakambe leswi muti a wu ri ni tigede ta 12, swi kombisa leswaku a wu pfulekele un’wana ni un’wana eka “vanhu hinkwavo va Israyele.” (Ezek. 45:6) Mhaka ya leswaku muti lowu wu ni tigede to tala, leswi endlaka swi olova swinene ku nghena eka wona i xitsundzuxo xa nkoka eka Vakreste lava rhangelaka. Yehovha u lava leswaku va va ni xinghana, va ngheneka, va tlhela va kumeka hi ku olova eka hinkwavo lava tshamaka eparadeyisini yo fanekisela.

13. Hi yihi mitirho yo hambanahambana leyi Yehovha a vuleke leswaku vanhu va ta yi endla?

¹³ A hi tlheleni hi ehleketa hi nkarhi wa Ezekiyele kutani hi kumisisa swin’wana leswi a swi tsaleke hi xivono lexi xa ku aviwa ka tiko lexi nga ni vuxokoxoko byo tala. Yehovha u vulavula hi vanhu lava endlaka mitirho yo hambanahambana. Vaprista “lava tirhaka endhawini yo kwetsima” a va fanele va nyikela magandzelo naswona va tshinela eka Yehovha leswaku va ta n’wi tirhela. Valevhi “lava tirhaka etempeleni” a va fanele “va khathalela mitirho ya kona ni swilo hinkwaswo leswi faneleke swi endliwa eka yona.” (Ezek. 44:14-16; 45:4, 5) Kambe, vatirhi a va ta tirhela ekusuhi ni muti. Xana i vamani vatirhi lava?

14. Lava tirhaka ekusuhi ni muti va hi tsundzuxa yini?

¹⁴ Lava tirhaka ekusuhi ni muti va huma eka “tinyimba hinkwato ta Israyele.” Va pfuneta ku endla mitirho yin’wana. Ntirho wa vona i ku rima masimu lama nga ta humesa swakudya leswi nga ta “dyiwa hi lava tirhaka emutini.” (Ezek. 48:18, 19) Xana sweswo swi hi tsundzuxa hi vutihlamuleri lebyi hi nga na byona namuntlha? Ina. Namuntlha vanhu hinkwavo lava nga eparadeyisini yo fanekisela va ni vutihlamuleri byo seketela ntirho wa vamakwavo va Kreste lava totiweke ni wa lava “ntshungu lowukulu” lava Yehovha a va hlawuleke leswaku va rhangela. (Nhlav. 7:9, 10) Ndlela leyi hi va seketelaka ha yona i ku wu yingisa hi ku swi rhandza nkongomiso lowu humaka eka nandza wo tshembeka.

15, 16. (a) Hi byihi vuxokoxoko byin’wana lebyi hi byi kumaka exivonweni xa Ezekiyele? (b) Hi katseka eka mitirho yihi leyi fanaka?

¹⁵ Xivono xa Ezekiyele xi ni vuxokoxoko byin’wana lebyi hi dyondzisaka swo karhi hi mitirho ya hina ya Vukreste. Hi byihi vuxokoxoko bya kona? Yehovha u vula leswaku vanhu va tinyimba ta 12 leti nga riki ta Valevhi a va ta tirha etindhawini timbirhi: ku nga exivaveni xa tempele ni le masin’wini lama nga emutini. Va endla yini etindhawini  teto? Exivaveni xa tempele, vanhu va tinyimba hinkwato va ‘nghena leswaku va ta gandzela’ hi ku nyikela magandzelo eka Yehovha. (Ezek. 46:9, 24) Emasin’wini ya muti, vanhu va tinyimba hinkwato va ta va ta seketela muti hi ku rima masimu ya wona. Hi dyondza yini eka vatirhi lava?

¹⁶ Namuntlha, lava ntshungu lowukulu va katseka eka mitirho yo fana ni leyi a yi endliwa exivonweni xa Ezekiyele. Va gandzela Yehovha ‘etempeleni ya yena’ hi ku nyikela magandzelo yo dzunisa. (Nhlav. 7:9-15) Va endla tano hi ku katseka entirhweni wo chumayela ni ku tlhela va kombisa ripfumelo ra vona hi ku hlamula etinhlengeletanweni ta Vakreste. Va swi teka ku ri vutihlamuleri bya vona bya nkoka swinene ku gandzela Yehovha hi ndlela leyi. (1 Tikr. 16:29) Ku engetela kwalaho, vo tala va vanhu va Xikwembu va kota ku seketela nhlangano wa xona hi tindlela to tala. Hi xikombiso, va pfuneta ku aka ni ku khathalela Tiholo ta Mfumo ni miako ya marhavi naswona va tlhela va pfuneta ni le ka matsima man’wana yo tala ya nhlangano wa Yehovha. Van’wana va seketela matsima lawa hi ku nyikela hi mali. Va endla mitirho yoleyo yo rima masimu hi ndlela yo fanekisela leswaku va “dzunisa Xikwembu.” (1 Kor. 10:31) Va endla ntirho wa vona hi ku gingiriteka ni hi ntsako hikuva va swi tiva leswaku Yehovha u “tsakisiwa ngopfu hi magandzelo yo tano.” (Hev. 13:16) Xana  u wu tirhisa kahle nkarhi lowu u wu kumaka leswaku u katseka eka mitirho yo tano?

17. (a) Enkarhini lowu taka, hi ta vona ku hetiseka kwihi lokukulu ka xivono xa Ezekiyele? (b) I vamani lava nga ta vuyeriwa eka mfumo lowu fanisiwaka ni doroba hi nkarhi wa Gidi ra Malembe?

¹⁷ Enkarhini lowu taka, xana hi ta vona ku hetiseka lokukulu ka xivono xa Ezekiyele xa munyikelo? Ina! Ehleketa hi leswi: Ezekiyele u vone leswaku ndhawu yin’wana leyi vuriwaka “munyikelo wo kwetsima” a yi ri exikarhi ka tiko. (Ezek. 48:10) Hilaha ku fanaka, endzhaku ka Armagedoni, kun’wana ni kun’wana laha hi nga ta va hi tshama kona emisaveni, Yehovha u ta va a ri na hina. (Nhlav. 21:3) Hi nkarhi wa Gidi ra Malembe, mfumo lowu, lowu fanisiwaka ni doroba ku nga lava nga ta hlawuriwa laha misaveni leswaku va khathalela swilaveko swa vanhu va Xikwembu, wu ta nyikela swiletelo ni nkongomiso emisaveni hinkwayo eka hinkwavo lava tshamaka ‘emisaveni leyintshwa,’ ku nga vanhu vo lulama.—2 Pet. 3:13.

18. (a) Hikwalaho ka yini hi tshemba leswaku mfumo lowu, lowu fanisiwaka ni doroba wu ta fambisana hi ku helela ni vuhosi bya Xikwembu? (b) Vito ra muti ri hi nyika xitshembiso xihi lexi tiyeke?

¹⁸ Hikwalaho ka yini hi tshemba leswaku mfumo lowu, lowu fanisiwaka ni doroba wu ta fambisana hi ku helela ni vuhosi bya Xikwembu? Hikuva Rito ra Xikwembu ri swi veka erivaleni leswaku muti wa laha misaveni lowu nga ni tigede ta 12 wu yimela muti wa le tilweni lowu nga ni tigede ta 12, ku nga Yerusalema Lowuntshwa, lowu vumbiwaka hi vafumikulobye va Kreste va 144 000. (Nhlav. 21:2, 12, 21-27) Leswi swi kombisa leswaku mfumo wa laha misaveni wu ta fambisana ni swiboho hinkwaswo leswi endliweke hi Mfumo wa Xikwembu etilweni naswona wu ta swi hetisisa hi vukheta. Vito ra muti leri nge, “Yehovha U Kwalaho” ri tshembisa un’wana ni un’wana wa hina leswaku vugandzeri lebyi tengeke byi ta va kona hilaha ku nga heriki eParadeyisini. Mawaku vumundzuku byo xonga swonghasi lebyi hi nga ta va na byona!