1. Ku sukela eku sunguleni, i yini lexi endleke leswaku ntirho wa Xikwembu wu humelela?

YEHOVHA na Yesu a va ri ni vun’we ku sukela eku sunguleni ka ntumbuluko. Yehovha u rhange hi ku vumba Yesu. Kutani, Yesu u tirhe na yena naswona a “ri etlhelo ka yena [a] ri mutirhi la nga ni vuswikoti.” (Swivuriso 8:30) Malandza ya Yehovha na wona ma tirhisanile loko ma fanele ma endla ntirho wo karhi. Hi xikombiso, Nowa ni ndyangu wakwe va ake ngalava. Hi ku famba ka nkarhi, Vaisrayele va tirhe swin’we leswaku va aka tabernakela ni ku tlhela va yi yisa etindhawini to hambanahambana. Etempeleni, a va yimbelela ni ku chaya swichayachayana leswaku va dzunisa Yehovha hi vuyimbeleri byo tsakisa. Vanhu va Yehovha a va kota ku endla swilo leswi hinkwaswo hikuva a va tirhisana.—Genesa 6:14-16, 22; Tinhlayo 4:4-32; 1 Tikronika 25:1-8.

2. (a) I yini lexi a xi xiyeka hi mavandlha ya Vakreste vo sungula? (b) Hi swihi swivutiso leswi hi nga ta swi kambisisa?

 ² Vakreste vo sungula a va tirhisana. Muapostola Pawulo u vule leswaku hambileswi a va ri ni vuswikoti ni swiavelo swo hambanahambana a va ri ni vun’we. Hinkwavo a va landzela Yesu Kreste, Murhangeri wa vona. Pawulo u va fanise ni miri lowu nga ni swirho swo hambanahambana leswi tirhisanaka. (Hlaya 1 Vakorinto 12:4-6, 12.) Kambe ku vuriwa yini hi hina namuntlha? Xana hi nga tirhisana njhani entirhweni wo chumayela, evandlheni ni le ndyangwini?

3. Hi xihi xivono lexi muapostola Yohane a xi voneke?

³ Hi va-100 B.C.E. muapostola Yohane u vone xivono xa tintsumi ta nkombo leti a ti ri karhi ti yimba mhalamhala. Loko ntsumi ya vuntlhanu yi yimba mhalamhala, Yohane u vone “nyeleti leyi weke hi le tilweni yi wela emisaveni.” “Nyeleti” yoleyo yi tirhise xilotlelo leswaku yi pfula mugodi wa khele ro enta. Xo sungula, ku hume musi emugodini kutani ku huma tinjiya emusini. Ematshan’weni yo va ti dya mirhi ni swimila, tinjiya teto ti hlasele lava “nga riki na mfungho wa Xikwembu emimombyeni ya vona.” (Nhlavutelo 9:1-4) Yohane a swi tiva leswaku tinjiya teto ti nga onha swinene hilaha ti onheke hakona aEgipta enkarhini wa Muxe. (Eksoda 10:12-15) Tinjiya teto leti voniweke hi Yohane ti yimela Vakreste lava totiweke lava chumayelaka rungula ra matimba leri paluxaka vukhongeri bya mavunwa. Naswona vanhu va timiliyoni lava swi languteleke hi mahlongati ku hanya laha misaveni va tirha swin’we na vona entirhweni wolowo. Hinkwavo va tirha hi vun’we entirhweni wo chumayela. Ntirho lowu wu pfune vanhu vo tala leswaku va tshika vukhongeri bya mavunwa naswona va tshika ku lawuriwa hi Sathana.

4. Hi wihi ntirho lowukulu lowu vanhu va Yehovha va nyikiweke wona naswona hi yihi ndlela yin’we ntsena leyi va nga wu endlaka ha yona?

⁴ Hi nyikiwe ntirho wo chumayela “mahungu lamanene” eka vanhu hinkwavo makumu ma nga si fika. Ku endla ntirho lowu a hi matlangwana! (Matewu 24:14; 28:19, 20) Hi fanele hi rhamba hinkwavo lava nga ni “torha” ro nwa “mati ya vutomi;” leswi vulaka leswaku hi fanele hi dyondzisa vanhu hinkwavo ntiyiso wa le Bibeleni eka lava lavaka ku wu twisisa. (Nhlavutelo 22:17) Kambe hi nga endla leswi ntsena loko hi “hlanganisiwa swin’we hi vun’we” naswona hi tirhisana evandlheni.—Vaefesa 4:16.

5, 6. Hi va ni vun’we hi ndlela yihi loko hi chumayela mahungu lamanene?

⁵ Leswaku hi fikelela vanhu vo tala hilaha swi nga kotekaka hakona, ntirho wa hina wu fanele wu va lowu hlelekeke swinene. Nkongomiso lowu hi wu kumaka emavandlheni ya hina wu hi pfuna leswaku hi hleleka. Endzhaku ka nhlangano wa nsimu, hi ya hi ya chumayela vanhu mahungu lamanene ya Mfumo. Hi tlhela hi va nyika minkandziyiso  leyi sekeriweke eBibeleni. Hi nyike vanhu va timiliyoni minkandziyiso emisaveni hinkwayo. Minkarhi yin’wana hi komberiwa ku endla matsima yo hlawuleka yo chumayela. Loko u endla ntirho lowu, u va nyandza yin’we ni vanhu va timiliyoni emisaveni hinkwayo lava na vona va nga le ku chumayeleni ka rungula leri fanaka! Nakambe u va u ri eku tirheni ni tintsumi, leti pfunaka vanhu va Xikwembu ku chumayela mahungu lamanene.—Nhlavutelo 14:6.

⁶ A hi ku tsakisa ka swona ku hlaya hi vuyelo bya ntirho wo chumayela emisaveni hinkwayo eka Buku Ya Lembe! Nakambe, ehleketa hi ndlela leyi hi vaka ni vun’we ha yona emisaveni hinkwayo loko hi rhambela vanhu etinhlengeletanweni ta hina. Loko hi ri kwalaho hi dyondza rungula leri fanaka. Tinkulumo, tidrama ni minkombiso swa hi khutaza leswaku hi tirhela Yehovha hi mbilu hinkwayo. Nakambe hi va ni vun’we ni vamakwerhu emisaveni hinkwayo loko hi va kona eXitsundzuxweni lembe ni lembe. (1 Vakorinto 11:23-26) Hi hlangana hi siku leri fanaka hi Nisani 14, endzhaku ka ku pela ka dyambu leswaku hi kombisa ndlela leyi hi khensaka Yehovha hi leswi a hi endleleke swona naswona hi yingisa xileriso xa Yesu. Naswona loko ka ha sale mavhiki leswaku hi khoma Xitsundzuxo, hi tirha swin’we leswaku hi rhamba vanhu vo tala hilaha hi nga kotaka hakona leswaku va va na hina eka xiendlakalo lexi xa nkoka.

7. I yini leswi hi kotaka ku swi fikelela loko hi ri karhi hi tirha swin’we?

⁷ Njiya yin’we a yi nge swi koti ku boxa ndzima yi ri yoxe. Hilaha ku fanaka, munhu un’we a nge swi koti ku chumayela vanhu hinkwavo. Kambe hikwalaho ka leswi hi tirhaka swin’we, hi kota ku byela vanhu va timiliyoni hi Yehovha ni ku pfuna van’wana leswaku va n’wi dzunisa.

8, 9. (a) Hi xihi xikombiso lexi Pawulo a xi tirhiseke ku dyondzisa Vakreste ku tshama va ri ni vun’we? (b) Hi nga tirhisana njhani evandlheni?

⁸ Pawulo u hlamusele Vaefesa ndlela leyi vandlha ri hleriweke ha yona naswona u vule leswaku swirho hinkwaswo swa vandlha swi fanele swi ‘kula eka swilo hinkwaswo.’ (Hlaya Vaefesa 4:15, 16.) Pawulo u tirhise xikombiso xa miri ku hlamusela ndlela leyi Mukreste ha un’we a nga pfunaka ha yona evandlheni leswaku ri tshama ri ri ni vun’we ni ku yingisa Yesu, Murhangeri wa vandlha. U vule leswaku swirho hinkwaswo swa miri swa tirhisana “hi mahlangano hinkwawo lama nyikaka leswi lavekaka.” Kutani ku nga khathariseki leswaku ha ha ri vantshwa kumbe se hi kurile, hi hanye kahle kumbe doo, i yini leswi ha un’we wa hina a faneleke a swi endla?

⁹ Yesu u veke vakulu leswaku va rhangela vandlha naswona u lava hi va xixima ni ku yingisa nkongomiso lowu va hi nyikaka wona. (Vaheveru 13:7, 17) Minkarhi yin’wana a swi olovi ku endla tano. Kambe hi nga kombela leswaku Yehovha a hi pfuna. Moya wakwe lowo kwetsima wu nga hi pfuna hi yingisa nkongomiso wihi ni wihi lowu vakulu va hi  nyikaka wona. Nakambe ehleketa ndlela leyi hi nga pfunaka vandlha ra hina ha yona loko hi titsongahata ni ku tirhisana ni vakulu. Ri ta va ni vun’we naswona ndlela leyi hi rhandzanaka ha yona yi ta ya yi kula.

10. Malandza ya vutirheli ma ri pfuna njhani vandlha leswaku ri va ni vun’we? (Vona xifaniso lexi nga eku sunguleni ka xihloko lexi.)

¹⁰ Malandza ya vutirheli na wona ma pfuneta leswaku vandlha ri tshama ri ri ni vun’we. Ma tirha hi matimba leswaku ma pfuna vakulu naswona ha swi tlangela swilo hinkwaswo leswi ma swi endlaka. Hi xikombiso, ma tiyiseka leswaku ku ni minkandziyiso leyi eneleke leyi nga ta tirhisiwa ensin’wini naswona ma amukela vaendzi lava taka eminhlanganweni. Ma tlhela ma tirha hi matimba leswaku ma lunghisa Holo ya Mfumo ni ku endla leswaku yi tshama yi basile. Loko hi tirhisana ni vamakwerhu lava, hi va ni vun’we naswona hi tirhela Yehovha hi ndlela leyi hlelekeke.—Ringanisa na Mintirho 6:3-6.

11. I yini lexi vamakwerhu va xinuna lava ha riki vantshwa va nga xi endlaka leswaku vandlha ri va ni vun’we?

¹¹ Vakulu van’wana se va ni nkarhi wo leha va ri karhi va tirha hi matimba evandlheni. Kumbexana a va ha swi koti ku endla leswi a va swi endla hi leswi va dyuhaleke. Vamakwerhu lava ha riki vantshwa va nga pfuneta. Loko va leteriwa, va nga swi kota ku endla mintirho yo tala evandlheni. Loko malandza ya vutirheli ma tirha hi matimba, ma nga ha faneleka ku va vakulu enkarhini lowu taka. (1 Timotiya 3:1, 10) Vakulu van’wana lava ha riki vantshwa va endle nhluvuko lowukulu. Sweswi i valanguteri va miganga naswona va pfuna vamakwerhu emavandlheni yo tala. Ha swi tlangela loko vantshwa va tirhela vamakwerhu hi ku swi rhandza.​—Hlaya Pisalema 110:3; Eklesiasta 12:1.

12, 13. I yini lexi nga pfunaka ndyangu leswaku wu tirhisana?

¹² Hi nga va pfuna njhani lava hi tshamaka na vona ekaya leswaku hi tirhisana? Loko hi khoma vugandzeri bya ndyangu vhiki ni vhiki swi nga hi pfuna. Loko vatswari ni vana va heta nkarhi va ri karhi va dyondza hi Yehovha, ndlela leyi va rhandzanaka ha yona ya kula. Hi nkarhi wa vugandzeri bya ndyangu, va nga titoloveta leswi va nga ta swi vula ensin’wini, leswi nga ta va endla leswaku va tshama va lunghekile. Loko va twa ndlela leyi ha un’we wa vona a vulavulaka ha yona ni ku vona ndlela leyi hinkwavo ka vona va rhandzaka Yehovha ha yona ni ku lava ku n’wi tsakisa va ya va va ni vun’we.

¹³ Nuna ni nsati va nga tirhisana njhani? (Matewu 19:6) Loko havambirhi va rhandza Yehovha naswona va n’wi tirhela swin’we, va ta va ni ntsako ni vun’we evukatini bya vona. Va fanele va rhandzana, hilaha Abrahama na Sara, Isaka na Raveka, Elkana na Hana va endleke hakona. (Genesa 26:8; 1 Samuwele 1:5, 8; 1 Petro 3:5, 6) Loko nuna  ni nsati va endla leswi, va ta va ni vun’we naswona va ta va ni vuxaka lebyikulu na Yehovha.​——Hlaya Eklesiasta 4:12.

14. Loko nuna wa wena kumbe nsati a nga ri Mbhoni, u nga endla yini leswaku vukati bya wena byi tiya?

¹⁴ Bibele yi swi veka erivaleni leswaku a hi fanelanga hi tekana ni munhu loyi a nga tirheliki Yehovha. (2 Vakorinto 6:14) Hambiswiritano, ku ni vamakwerhu lava ana se va tekaneke ni vanhu lava nga riki Timbhoni ta Yehovha. Van’wana va ve Timbhoni endzhaku ka loko va nghenele vukati naswona vanghana va vona va vukati a va wu tekanga ntiyiso. Van’wana va tekane va ri Timbhoni ta Yehovha, kambe hi ku famba ka nkarhi un’we u tshike ntiyiso. Eka swiyimo leswi, Vakreste va fanele va endla hinkwaswo leswi va nga swi kotaka leswaku va tiyisa vukati bya vona hi ku yingisa ndzayo ya Bibele. Minkarhi yin’wana a swi nge olovi ku endla tano. Hi xikombiso, Mary ni nuna wakwe, David, a va tirhela Yehovha swin’we. Kambe, hi ku famba ka nkarhi David u tshike ku ya eminhlanganweni. Kambe Mary u ye emahlweni a va nsati lonene ni ku hambeta a hanya tanihi Mukreste. U tlhele a dyondzisa vana vakwe va tsevu hi Yehovha ni ku hambeta a ya eminhlanganweni ni le tinhlengeletanweni. Endzhaku ka malembe yo tala, loko vana vakwe va kurile naswona se va rhurhile ekaya, Mary u ye emahlweni a tirhela Yehovha hambileswi se a swi ya swi n’wi tikela. David u tlhele a sungula ku hlaya timagazini leti a nyikiweke tona hi Mary. Hi ku famba ka nkarhi, u tlhele a sungula ku ya eka yin’wana ya minhlangano. Minkarhi hinkwayo ntukulu wakwe wa malembe ya tsevu a n’wi vekela xitulu, naswona loko David a nga yi, a n’wi vutisa leswi, “Kokwana, ha yini u nga tanga namuntlha eminhlanganweni?” David u tlhelele eka Yehovha endzhaku ka malembe ya 25 naswona yena ni nsati wakwe va tsakile sweswi hileswi va tirhelaka Yehovha swin’we.

15. Vamakwerhu lava nga ni malembe yo tala va catile va nga yi pfuna njhani mimpatswa leyintshwa?

¹⁵ Namuntlha Sathana u hlasela mindyangu. Hi yona mhaka leyi vatekani lava tirhelaka  Yehovha va faneleke va tirhisana. Ku nga khathariseki leswaku u ni malembe mangani u nghenele vukati, ehleketa hi leswi u nga swi vulaka kumbe ku swi endla leswaku u tiyisa vukati bya wena. Loko se mi ri ni malembe mi tekanile, mi nga va xikombiso lexinene eka lava ha ku nghenelaka vukati. Kumbexana mi nga rhamba mpatswa lowuntshwa leswaku wu va na n’wina eka vugandzeri bya ndyangu. Wu ta swi vona leswaku ku nga khathariseki malembe lawa mpatswa wu nga na wona wu tekanile, wu fanele wu rhandzana ni ku va ni vun’we.—Tito 2:3-7.

16, 17. Hi yihi mikateko leyi malandza ya Xikwembu ma yi languteleke hi mahlongati?

¹⁶ Loko Vaisrayele va ya eminkhubyeni ya vona eYerusalema a va tirhisana. Va lunghiselele swilo hinkwaswo leswi a va ta swi tirhisa endleleni. Kutani va fambe swin’we ni ku pfunana. Hinkwavo ka vona va gandzele Yehovha swin’we etempeleni. (Luka 2:41-44) Namuntlha loko hi ri karhi hi tilunghiselela ku ya hanya emisaveni leyintshwa, hi fanele hi va ni vun’we ni ku endla hinkwaswo leswi hi nga swi kotaka leswaku hi tirhisana. Xana ti kona tindlela leti u ehleketaka ku endla leswi ha tona hilaha ku engetelekeke?

¹⁷ Vanhu emisaveni leyi a va twanani naswona va lwa hikwalaho ka swilo swo tala. Kambe hi khensa Yehovha hi leswi a hi pfuneke leswaku hi va ni ku rhula ni ku twisisa ntiyiso! Vanhu vakwe emisaveni hinkwayo va n’wi gandzela hi ndlela leyi a yi lavaka. Vanhu va Yehovha va ya va va ni vun’we ngopfungopfu emasikwini lawa ya makumu. Hilaha Esaya na Mikiya va profeteke hakona, hi ya “entshaveni ya Yehovha” swin’we. (Esaya 2:2-4; hlaya Mikiya 4:2-4.) Mawaku ndlela leyi hi nga ta tsaka ha yona enkarhini lowu taka loko vanhu hinkwavo emisaveni hinkwayo va “hlanganisiwa swin’we hi vun’we” naswona va tirhisana loko va ri karhi va gandzela Yehovha!