LOKO munhu un’wana a n’wayitela loko a hlangana na wena, xana u angula njhani? A swi kanakanisi leswaku na wena wa n’wayitela u tlhela u tsaka. Loko munhu a n’wayitela, ku nga khathariseki leswaku wa n’wi tiva kumbe a wu n’wi tivi swi endla leswaku u tsaka. Magdalena, u te: “A ndzi tsakisiwa hi ndlela leyi Georg nuna wa mina loyi sweswi a feke, a a n’wayitela ha yona. Loko ho tshuka hi kotlane hi mahlo, a ndzi titwa ndzi ntshunxekile naswona a ndzi swi xiya leswaku wa ndzi rhandza.”

Loko munhu a n’wayitela swi huma embilwini, swi kombisa leswaku u tsakile. Nhlokomhaka yin’wana leyi kumekaka eka magazini wa Observer, lowu nga eka Internet, wa Association for Psychological Science, wu vula leswaku “vuswikoti byo n’wayitela i nchumu lowu hi velekiwaka hi ri na wona.” Xihloko xexo loko xi vulavula hi tincece, xi vula leswaku na tona “ta swi kota ku vona loko munhu a tsakile kumbe a nga tsakanga hi ku n’wi languta exikandzeni.” Xi tlhele xi ku: “Ku n’wayitela swi tlhela swi pfuna munhu leswaku a kota ku lawula vumunhu byakwe.”

Vaendli va ndzavisiso le Yunivhesiti ya le United States va endle ndzavisiso eka ntlawa wa swigulana leswi dyuhaleke malunghana ni ndlela leyi swi titwaka ha yona loko vaongori lava swi khathalelaka va n’wayitela. Loko swikandza swa vanhu volavo swi kombisa leswaku va tsakile naswona va khathala ha swona, swigulana sweswo a swi  rivala hi vuvabyi bya swona. Kambe loko va nga kombisi ku swi tsakela a swi titwa swi tshikilelekile.

Ku n’wayitela swi nga tlhela swi pfuna wena. Vakambisisi va ringanyeta leswaku swi nga ha ku pfuna leswaku u ya u titshemba u tlhela u tsaka ni ku ku hungutela ntshikilelo. Kambe ku visinganisa xikandza swi nga ku vangela ntshikilelo.

Magdalena, loyi ku vulavuriweke ha yena eku sunguleni a ri Mbhoni ya Yehovha hi nkarhi wa Nyimpi ya Vumbirhi ya Misava. U yisiwe ekampeni ya nxaniso eRavensbrück, eJarimani hikwalaho ko ala ku amukela tidyondzo ta Manazi. U ri: “Minkarhi yin’wana varindzi a va nga pfumeli leswaku hi vulavula ni vabohiwa van’wana. Kambe a va nga ta swi kota ku hi tshikisa ku n’wayitela. Loko ndzi vona manana na sesi va n’wayitela, sweswo swi ndzi tiyisile swi tlhela swi endla leswaku ndzi kota ku tiyisela.”

Kumbexana swiphiqo hi swona leswi endlaka leswaku u tsandzeka ku n’wayitela. Kambe tsundzuka leswaku ndlela leyi u titwaka ha yona yi nga ha vangiwa hi leswi u swi anakanyaka. (Swivuriso 15:15; Vafilipiya 4:8, 9) Hambileswi swi tikaka, kambe ringeta ku dzikisa mianakanyo ya wena eka swilo leswinene loko swi koteka. * Ku hlaya Bibele ni ku khongela swi pfune vanhu vo tala leswaku va swi kota ku endla tano. (Matewu 5:3; Vafilipiya 4:6, 7) I ntiyisweni rito leri nge “tsaka” ni man’wana lama fambisanaka na rona ma humelela minkarhi yo tala eBibeleni! Hikokwalaho ka yini u nga tinyiki nkarhi wo hlaya tindzima to karhi ta Bibele siku ni siku? Ku endla tano swi nga ha ku pfuna leswaku na wena u tshama u ri eku n’wayiteleni.

Vana wo sungula ku n’wayitelela vanhu van’wana, ku endla tano swi ta endla leswaku vanhu volavo va tsakela siku. Yi tirhise kahle nyiko ya ku n’wayitela leyi Xikwembu xi ku nyikeke yona leswaku u tiphina hi ntsako ni ku endla leswaku vanhu van’wana na vona va tsaka.