Ku Velekeriwa eMisaveni Leyi Nga Riki Na Rirhandzu!

N’WANA u velekeriwa emisaveni ya tihanyi, leyi nga riki na rirhandzu, misava leyi teleke hi ntshikilelo. Hambileswi a nga taka a nga swi koti ku kombisa mintlhaveko yakwe, vativi van’wana va sayense va vula leswaku hambiloko mbungu wu nga si velekiwa, wa swi xiya leswi endlekaka.

Buku leyi nge The Secret Life of the Unborn Child yi ri: “Sweswi ha swi tiva leswaku n’wana la nga siki velekiwaka wa swi kota ku xiya leswi endlekaka, naswona wa angula ehansi ka swiyimo swo karhi, ku sukela etin’hwetini ta tsevu (kumbexana ehansinyana ka tona) u va a ri na yona mintlhaveko.” Hambiloko n’wana o ka a nga tsundzuki leswi tshameke swi humelela, vativi van’wana va sayense va ehleketa leswaku swiphiqo leswi vaka kona loko n’wana a velekiwa swi nga ha khumba vutomi byakwe hi ku famba ka nkarhi.

Loko a velekiwile, ntshikilelo wu ya emahlweni. Loko n’wana se a velekiwile, a nga ha dyisiwi hi ndlela leyi a a dyisiwa ha yona loko a ha ri ekhwirini. Tiphayiphi leti a ti fambisa okisijini ni swiaki swa miri ti va ti nga ha ri kona. Leswaku a ya emahlweni a hanya, u fanele a sungula ku hefemula ni ku dya swakudya leswi akaka miri. U lava munhu la nga ta n’wi dyisa ni ku khathalela swilaveko swin’wana swa miri wakwe.

Ricece leri ri fanele ri kula emiehleketweni, hi tlhelo ra mintlhaveko ni ra moya. Hikwalaho, ku fanele ku va ni munhu la nga ta kurisa n’wana loyi. I mani la nga le xiyin’weni lexinene xa ku kurisa n’wana? N’wana loyi u lava yini eka vatswari vakwe? Xana a nga nyikiwa njhani swilo leswi hi ndlela leyi enerisaka? Swihloko leswi landzelaka swi ta hi pfuna ku hlamula swivutiso leswi.