Lexi Endlaka Leswaku Ndzi Nga Lavi Ku Dzaha!

XIHLOKO lexi a xi nyikiwe vana va xikolo va madzana lava a va nghenele mphikizano wa mfumo wa ku tsala lowu a wu sekeriwe hi Missouri State Medical Association (MSMA) eUnited States. Vana va kwalomu ka 675 lava humaka eswikolweni swa 42 va nghenele mphikizano lowu. Sagwadi ra kona ri winiwe hi Breanna la nga ni malembe ya 12, naswona xiphato xakwe lexi n’wi winiseke xi kandziyisiwe eka MSMA, ku nga magazini wa Missouri Medicine. Breanna u tlhele a va ni lunghelo ro hlayela lava a va tile eka ntsombano wa lembe ni lembe wa MSMA. A nga si hlaya, Breanna u byele vayingiseri a ku:

“Ndzi Mbhoni ya Yehovha, naswona tinhla hinkwato leti ndzi ti boxeke eka xiphato lexi ti huma eka magazini wa Xalamuka! Entiyisweni, marito lawa ndzi ma tirhiseke ngopfu eka xiphato lexi ma huma eka xifunengeto xa nkandziyiso lowu. Wu kombisa xipalapala xi ri ni fole leri lengaka enon’wini wa xona naswona xi nga ni marito lama nge: ‘Rifu ra Xavisiwa.’ Se i nkarhi wo leha magazini wa Xalamuka! wu kandziyisa swihloko leswi vulavulaka hi makhombo ya ku dzaha.”

Timbhoni ta Yehovha a ti dzahi. Ti kholwa leswaku ku tirhisa hi vomu nchumu wun’wana ni wun’wana lowu thyakisaka miri swi kombisa leswaku a hi yi xiximi nyiko ya vutomi, swin’we ni Muvumbi. (Mintirho 17:24, 25) Hikwalaho, ti landzela xitsundzuxo xa Matsalwa lexi nge: “A hi tibasiseni eka swilo hinkwaswo leswi nyamisaka nyama ni moya.”—2 Vakorinto 7:1.

Ku fana ni vantshwa van’wana lava nga Timbhoni, Breanna u lwela ku hanya hi misinya ya milawu ya Bibele. Swi le rivaleni leswaku hinkwavo vantshwa vo tano va tsakisa mbilu ya Muvumbi wa vona.—Swivuriso 27:11.

[Xifaniso lexi nga eka tluka 10]

Breanna (loyi sweswi a nga ni malembe ya 14) a khome xiphato xakwe