Ripfumelo Ra Ndyangu Ri Va eKhombyeni

INDIA, xinhwanyetana xo saseka xa malembe ya kaye xa le Wisconsin, eU.S.A., a xi ri mbita ya vovo. Ana se a xi endliwe vuhandzuri byinharhu lebyikulu ni byin’wana byo tala lebyitsongo. Lori mana wakwe, u ri: “Emalembeni ya tsevu, India a a nga hambani ni makamara ya xilamulela-mhangu, a a tshamela ku ya exibedlhele ni ku ya vonana ni madokodela.”

Xiyimo lexi xi sungule loko India a ri ni tin’hweti ta 18. U sungule ku va ni swikombiso swin’wana leswi nga tolovelekangiki, ku katsa ni nchuluko lowukulu, ku hisa ka miri, ku pfimba ka khwiri ni ku ondza. Nakambe a a ri ni xitlhavi ekhwirini. Ku hundze malembe mambirhi, vusiku byin’wana ni byin’wana India a pfuka ko tala nivusiku a ri karhi a rila, a konya minkarhi yin’wana a huwelela hi ku twa ku vava.

Loko madokodela ma ringete ku kumisisa leswaku a nga va a karhatiwa ha yini, eka India a ko va phula-phulani. Lori u ri: “Entiyisweni, n’wana wa hina a a sikela ku fa.” Mark, tata wa India wa engetela: “Ku hundze lembe hi vona n’wana wa hina a ri karhi a hlakala, naswona a hi nga swi tivi leswaku hi ta n’wi pfuna njhani. Ndzi tsundzuka ndzi titwa ndzi ri hava lexi ndzi nga xi endlaka siku rin’wana loko mina na Lori hi ri karhi hi vulavula hi xilahlo xa India, lexi hi nkarhi wolowo a hi ehleketa leswaku a xi nge papalateki.”

Hi ku famba ka nkarhi, swi kumekile leswaku India a a ri ni swilondza swa le marhumbyini—ku nga vuvabyi lebyi hlaselaka hala ndzeni ka marhumbu lamakulu. Nakambe a a ri ni vuvabyi bya xivindzi, lebyi vavisaka tiphayiphi ta nyongwa exivindzini. Mavabyi lawa a ma tshunguleka. Hambiswiritano, a ku fanele ku endliwa vuhandzuri, naswona swilondza swa le marhumbyini a swi fanele swi tshunguriwa hi mirhi. Munhu la khomiweke hi mavabyi lawa a a fanela a tshama a vekiwe tihlo naswona a khathaleriwa loko a ri karhi a hlakarhela.

Sweswi se a ku hundze malembe ya nkombo hi mpfhuka India a sungula ku vabya. Hikwalaho ko pfuniwa hi madokodela lama nga ni vukheta, u karhi wa hlakarhela. Leswi va nga Timbhoni ta Yehovha, Mark na Lori va vona onge ku pfumela ka vona eRitweni ra Xikwembu—ngopfu-ngopfu leswi ri swi vulaka hi mavabyi, ku fa ni ntshembo wa nkarhi lowu taka wa ku pfuxiwa  ka vafi—ku va pfunile. Swi ve tano na hi India. Lori u ri: “Minkarhi hinkwayo India u vulavula a ntshunxekile hi ntshembo wa ku pfuxiwa ka vafi hilaha wu hlamuseriwaka hakona eBibeleni. I wa xiviri hakunene eka yena.”

Siku rin’wana loko India a ri ekamareni ro tlangela eka rona exibedlhele, u hlangane ni xinhwanyetana xin’wana lexi sesi wa xona a a khomiwe hi vuvabyi bya khensa ya tisele ta ngati. Lori wa hlamusela leswi landzeleke: “Nhwanyana loyi u byele India leswaku u vona onge makwavo u ta fa. Kutani India u n’wi hlamusele leswi rifu ri nga swona hi ku ya hi Bibele nileswaku yena a a nga ku chavi ku fa. Siku leri tlhandlamaka mana wa nhwanyana loyi u te eka mina a ri ni swivutiso. U hlamale ku vona leswaku India a a vulavula a ntshunxekile naswona a nga chavi nchumu hi swilo swo tano.”

Mark na Lori va kume leswaku swikhongelo swa vapfumeri-kulobye swi va seketele ngopfu. Mark u ri: “Eku sunguleni, loko ndzi byela vanhu leswaku ndzi ta va tsundzuka eswikhongelweni swa mina kumbe loko ndzi khongela na vona, minkarhi hinkwayo a ndzi vona onge leswi ndzi swi endlaka a swi enelanga. Sweswi ndza swi vona leswaku swikhongelo sweswo a swi ri swa nkoka njhani. Xikhongelo a xi ri nchumu wa nkoka swinene lowu nga endliwaka loko hi langutane ni swiyimo swo tika. Mawaku vamakwerhu lava hi nga na vona lava nga ni rirhandzu!”

Mark na yena u vona onge vuvabyi bya India byi va pfunile va vona leswaku i yini xa nkoka evuton’wini bya vona. U ri: “Vonelo ra hina hi swilo leswi vonakaka ri cincile hakunene. A swi pfuni nchumu loko n’wana wa wena a vabya! Nchumu lowu a wu ri wa nkoka evuton’wini ni lowu nga wa nkoka evuton’wini i vuxaka bya hina na Yehovha Xikwembu ni vamakwerhu va hina lava nga ni rirhandzu.”

Mark na Lori swin’we na India ni vamakwavo va langutele emahlweni eka nkarhi lowu profetiweke hi muprofeta Esaya loko a ku, “ku hava munhu la tshamaka kona la nga ta ku: ‘Ndza vabya.’ ”—Esaya 33:24; Nhlavutelo 21:4.

[Xifaniso lexi nga eka tluka 30]

India Erickson

[Xifaniso lexi nga eka tluka 31]

Xibedlhele xa Vana xa le San Diego

[Xifaniso lexi nga eka tluka 31]

India a ri ni ndyangu wa ka vona