Swi Njhani Ku Va Ni Ntshikilelo Wa Mianakanyo?

JAMES a u te: “Siku rin’wana loko ndzi ri ni malembe ya 12, ndzi pfuke nimixo kutani ndzi tshama emakumu ka mubedo ivi ndzi tivutisa ndzi ku: ‘Xana namuntlha hi rona siku leri ndzi nga ta fa ha rona?’” James a a ri ni ntshikilelo lowukulu wa mianakanyo. Endzhaku ka malembe ya 30, James u te: “Siku ni siku a ndzi lwisana ni vuvabyi lebyi bya mianakanyo lebyi a byi ndzi tshikilela.” Loko James a a ha ri ntsongo a a titwa a ri xikangalafula lerova u handzulele swinepe leswi a tekiweke swona loko a ha ri ntsongo. U ri: “A ndzi ehleketa leswaku vanhu a va ndzi teka ndzi nga pfuni nchumu.”

Leswi minkarhi yin’wana hinkwerhu hi lwisanaka ni gome leri hi vaka na rona, hi nga gimeta hi ku vula leswaku ha swi twisisa leswaku swi njhani ku va ni ntshikilelo wa mianakanyo. Kambe, swi njhani ku va ni ntshikilelo lowukulu wa mianakanyo?

Vuvabyi Lebyi Nga Ni Nsele

Ku hambana ni gome ra nkarhinyana leri munhu a nga vaka na rona, ntshikilelo lowukulu wa mianakanyo i ku pfilunganyeka lokukulu loku hakanyingi ku endlaka leswaku munhu a tsandzeka ku endla mintirho ya siku ni siku.

Hi xikombiso, ku tlula malembe ya 40, Álvaro a a karhatiwa “hi ku chava, ku pfilunganyeka, ku vaviseka ni ku va ni gome lerikulu.” U te: “Ntshikilelo wa mianakanyo lowu a ndzi ri na wona a wu endla leswaku ndzi karhateka swinene hi mavonelo ya vanhu van’wana. Minkarhi hinkwayo a ndzi tivona nandzu loko swilo hinkwaswo swi famba ximatsi.” U vule leswaku ku va ni ntshikilelo wa mianakanyo swi fana ni “ku twa ku vava swinene kambe u nga swi tivi leswaku ku vava kwihi, u chava kambe u nga swi tivi leswaku i yini lexi ku chavisaka naswona lexi vavisaka ngopfu hileswaku a wu lavi ku vulavula ni vanhu van’wana hi mhaka yoleyo.” Kambe sweswi a nga ha karhateki ngopfu. Se wa swi tiva leswaku sweswo a swi vangiwa hi yini. U te: “Ku tiva leswaku van’wana va ni xiphiqo lexi ndzi nga na xona swi ndzi endle ndzi titwa ndzi antswa.”

Le Brazil, Maria loyi a nga ni malembe ya 49, a a ri ni ntshikilelo wa mianakanyo lowu a wu n’wi vangela nkelunkelu, switlhavi, ku nyangatseka naswona “a a ri ni gome leri a ri tikomba ri nga heli.” Loko Maria a byeriwe leswaku u khomiwe hi ntshikilelo wa mianakanyo u titwe a ntshunxekile hileswi se a a byi tiva vuvabyi lebyi a byi n’wi karhataka. U te: “Kambe ndzi sungule ku karhateka swinene hikuva vanhu lava twisisaka vuvabyi bya ntshikilelo wa mianakanyo a va tati ni xandla naswona van’wana lava nga na byona va ehleketa leswaku byi khomisa tingana.”

Xana Byi Fanele Byi Ku Khomisa Tingana?

Hambileswi minkarhi yin’wana munhu a khomiwaka hi vuvabyi bya ntshikilelo wa mianakanyo hikwalaho ka xivangelo xo karhi, kambe hakanyingi byi ku khoma handle ko ku lemukisa. Richard wa le Afrika Dzonga u te: “Hi xitshuketa u nga tikuma u ri ni gome lerikulu handle ka xivangelo lexi twalaka. Hambileswi ku nga riki na munhu loyi u n’wi tivaka loyi a feke kumbe ku nga humelelangiki nchumu lowu ku karhateke, kambe u titwa u tshikilelekile. Naswona ku hava lexi nga ta endla leswaku u antswa. U titwa u heleriwe hi ntshembo kambe a wu swi tivi leswaku ha yini.”

A wu fanelanga u khomiwa hi tingana hikwalaho ka leswi u nga ni ntshikilelo wa mianakanyo. Kambe Ana wa le Brazil u khomiwe hi tingana loko a byeriwa leswaku u ni ntshikilelo wa mianakanyo. U ri: “Entiyisweni hambileswi se ndzi nga ni malembe ya nhungu ndzi khomiwe hi vuvabyi lebyi, ni sweswi bya ha ndzi khomisa tingana.” Lexi n’wi khomisaka tingana swinene hileswi swi n’wi nonon’hwelaka ku tshama a ri ni gome. U te: “Minkarhi yin’wana a ndzi twa ku vava swinene emirini wa mina. Misiha hinkwayo ya mina a yi pandza.” Hi minkarhi yo tano swa tika swinene leswaku munhu a kota ku pfuka  emubedweni. Naswona minkarhi yin’wana Ana a a tshamela ku rila. U ri: “A ndzi rila hi xiviti ndzi kala ndzi karhala naswona a ndzi twa onge ngati ya mina a ya ha rhendzeleki emirini.”

Bibele yi vula leswaku vanhu va nga va ni gome lerikulu leri nga vekaka vutomi bya vona ekhombyeni. Hi xikombiso, muapostola Pawulo a a karhatekile hileswaku munhu un’wana a a ta tshuka ‘a hluriwa hi gome ku tlula mpimo.’ (2 Vakorinto 2:7, Bibele—Mahungu Lamanene) Vanhu van’wana lava nga ni gome lerikulu va nga ha vona onge swa antswa ku va va fa. Vanhu vo tala va titwa hilaha muprofeta Yonasi a titweke hakona loko a ku: “Swa antswa leswaku ndzi fa ematshan’weni ya leswaku ndzi hanya.”—Yonasi 4:3.

I yini leswi vanhu lava nga ni ntshikilelo wa mianakanyo va nga swi endlaka leswaku va tshunguriwa eka vuvabyi byebyo naswona va byi tiyiselela?

[Nhlamuselo ya le hansi]

[Marito lama tshahiweke exihlokweni lama nga eka tluka 3]

“Hi xitshuketa u nga tikuma u ri ni gome lerikulu handle ka xivangelo lexi twalaka”