Langutelo Ra Bibele

Xana Swi Bihile Ku Cinca Vukhongeri Bya Wena?

Loko wansati la vuriwaka Avtar a sungula ku dyondza Bibele, ndyangu wa yena lowu a wu ri swirho swa vukhongeri bya Masikh a wu hlundzuke ngopfu. U ri: “Etikweni ra ka hina loko wo cinca vukhongeri bya wena, vanhu va sungula ku tihambanisa na wena. Hambi ku ri mavito ya hina ma fambisana ni vukhongeri lebyi munhu a nga eka byona. Ku cinca vukhongeri bya wena swi nga ha tekiwa ku ri ku cukumeta ndhavuko wa wena naswona swi kombisa leswaku a wu byi xiximi vukhongeri bya ka n’wina.”

AVTAR u hetelele a ve Mbhoni ya Yehovha. Xana swi bihile leswi a nga swi endla? Kumbexana na wena u pfumelelana ni vanhu va vukhongeri lebyi a a ri eka byona. U nga ha tibyela leswaku vukhongeri lebyi u nga eka byona a wu fanelanga u byi cinca hikuva byi fambisana ni ndhavuko wa ka n’wina.

Ku xixima ndyangu wa ka n’wina i swa nkoka. Bibele yi ri: “Yingisa tata wa wena la ku velekeke.” (Swivuriso 23:22) Kambe i swa nkoka ku endla ndzavisiso leswaku u ta tiva ntiyiso hi Muvumbi wa hina ni hi swikongomelo swakwe. (Esaya 55:6) Xana swa koteka ku endla ndzavisiso wolowo? Loko swi koteka, i swa nkoka ku fikela kwihi eka wena?

Ku Lavisisa Vukhongeri Bya Ntiyiso

Vukhongeri byo tala byi dyondzisa tidyondzo leti lwisanaka. Hikwalaho, swi nge endleki leswaku hinkwato ka tona ti ri ta ntiyiso. Leswi ku nga riki vukhongeri hinkwabyo lebyi nga bya ntiyiso, sweswo swi vula leswaku ku ni vanhu vo tala lava Bibele yi vulaka leswaku va “hisekela Xikwembu; kambe ku nga ri hikwalaho ka vutivi lebyi kongomeke.” (Varhoma 10:2) Hilaha swi tsariweke hakona eka 1 Timotiya 2:4, muapostola Pawulo u vula leswaku i ku rhandza ka Xikwembu ku va “vanhu va mixaka hinkwayo . . . va fikelela vutivi lebyi kongomeke bya ntiyiso.” Xana vutivi byebyo lebyi kongomeke byi nga kumiwa njhani?

Xiya swivangelo leswi endlaka leswaku hi kambisisa Bibele. Pawulo, loyi a a huhuteriwe ku tsala Bibele u te: “Matsalwa hinkwawo ma huhuteriwe hi Xikwembu naswona ma pfuna ku dyondzisa.” (2 Timotiya 3:16) Loko u ri karhi u endla ndzavisiso, dzika swinene eka leswi Bibele yi swi dyondzisaka. Yi kambisise kutani u tivonela hi ya wena leswaku yi tele hi vutlhari lebyi nga ringanisiwiki na nchumu, matimu lama pakanisaka ni vuprofeta byo tala lebyi se byi nga hetiseka.

Ematshan’weni yo dyondzisa leswaku vukhongeri hinkwabyo bya amukeleka eka Xikwembu, Bibele yi byela vahlayi va yona leswaku va nga kholwi marito hinkwawo lawa va ma twaka kambe va fanele va ‘kambisisa marito lama huhuteriweke ku vona loko ma huma eka Xikwembu.’ (1 Yohane 4:1) Hi xikombiso, tidyondzo leti humaka eka Xikwembu ti fanele ti pfumelelana ni vumunhu bya xona ku katsa ni mfanelo ya xona ya rirhandzu.—1 Yohane 4:8.

Bibele yi hi byela leswaku Xikwembu xi lava leswaku hi xi lavisisa naswona hi ‘xi kuma.’ (Mintirho 17:26, 27) Leswi Muvumbi wa hina a lavaka leswaku hi lavisisa ntiyiso, swi ta va swi nga bihanga  ku endla hi ku pfumelelana ni ndzavisiso lowu hi nga wu kuma, hambiloko leswi swi ta lava leswaku hi cinca vukhongeri bya hina. Kambe ku vuriwa yini hi swiphiqo leswi u nga ha langutanaka na swona loko u cinca vukhongeri bya wena?

Ku Ringanisela Ndlela Leyi U Tshembekaka Ha Yona Eka Swirho Swa Ndyangu Wa Wena

Loko vanhu va cinca vukhongeri bya vona va tshika ku hlanganyela eka mikhuva ya byona kumbe tiholideyi ta byona. Leswi swi nga endla leswaku swirho swa ndyangu wa ka n’wina swi ku venga. Yesu a a swi tiva leswi. U byele vadyondzisiwa vakwe a ku: “Ndzi tele ku ta vanga ku avana exikarhi ka jaha ni tata wa rona, ni le xikarhi ka n’wana wa nhwanyana ni mana wa yena, ni le xikarhi ka nhlomi ni n’wingi wa yona.” (Matewu 10:35) Xana Yesu a a vula leswaku tidyondzo ta Bibele ti endleriwe ku hambanisa swirho swa ndyangu? Nikatsongo. Kambe u swi vone ka ha ri emahlweni leswaku swirho swin’wana swa ndyangu swi ta ku venga loko u endla hi ku pfumelela ni ndzavisiso lowu u nga wu kuma loko u lavisisa vukhongeri bya ntiyiso.

Xana swi nga koteka ku papalata timholovo leti nga ha tshukaka ti va kona endyangwini? Bibele yi dyondzisa leswaku vana va fanele va yingisa vatswari va vona naswona vavasati va fanele va tiveka ehansi ka vanuna va vona. (Vaefesa 5:22; 6:1) Yi tlhela yi lerisa lava rhandzaka Xikwembu leswaku va “yingisa Xikwembu tanihi mufumi ku tlula vanhu.” (Mintirho 5:29) Minkarhi yin’wana ku tshembeka eka Xikwembu swi nga endla leswaku u endla swiboho leswi swirho swin’wana swa ndyangu wa ka n’wina swi nga ta ka swi nga swi tsakeli.

Hambileswi Bibele yi ti vekaka erivaleni tidyondzo ta vukhongeri bya ntiyiso ni bya mavunwa, Xikwembu xi lava leswaku munhu un’wana ni un’wana a ti hlawulela leti a lavaka ku ti landzela. (Deteronoma 30:19, 20) Munhu a nga fanelanga a sindzisiwa ku gandzela Xikwembu hi ndlela leyi a vonaka leswaku yi hoxile kumbe a byeriwa ku hlawula leswi a swi lavaka exikarhi ka vukhongeri bya yena kumbe ndyangu wa yena. Xana ku dyondza Bibele swi endla leswaku mimpatswa yi hambana? Nikatsongo. Entiyisweni Bibele yi khutaza vavanuna ni vavasati leswaku va tshama swin’we hambiloko va nga ri eka vukhongeri byin’we.—1 Vakorinto 7:12, 13.

Ku Hlula Ku Chava

U nga chava leswaku vanhu va ta ku yini loko u dyondza Bibele ni Timbhoni ta Yehovha. Mariamma u ri: “Ndyangu wa ka hina a wu vilela hileswaku a ndzi nge n’wi kumi wanuna la nga ta ndzi hlayisa. Kutani a wu ndzi cinisa gija.” Mariamma u veke ntshembo wakwe eka Yehovha Xikwembu kutani a ya emahlweni a dyondza. (Pisalema 37:3, 4) Na wena u nga endla leswi fanaka. Ematshan’weni yo chava leswi nga ta endleka, ehleketa hi vuyelo lebyi nga ta va kona. Rungula ra Bibele ri cinca vutomi bya vanhu. Vanhu va dyondza ndlela leyinene yo rhandza mindyangu ya vona. Va kota ku hlula mikhuva yo biha yo tanihi mavulavulelo ya nhlambha, madzolonga, ku nwa byala ku tlula mpimo ni ku tirhisa swidzidziharisi hi ndlela yo biha. (2 Vakorinto 7:1) Bibele yi endla leswaku vanhu va va ni timfanelo letinene to tanihi ku tshembeka ni ku tirha hi matimba. (Swivuriso 31:10-31; Vaefesa 4:24, 28) Ha yini u nga dyondzi Bibele kutani u vona ndlela leyi ku tirhisa tidyondzo ta yona swi nga ku vuyerisaka ha yona evuton’wini bya wena?

XANA U TSHAME U TIVUTISA?

◼ Ha yini u fanele u kambisisa vukhongeri bya wena?—Swivuriso 23:23; 1 Timotiya 2:3, 4.

◼ Xana u nga ti tiva njhani tidyondzo ta ntiyiso?—2 Timotiya 3:16; 1 Yohane 4:1.

◼ Xana ku kanetiwa endyangwini swi fanele swi ku sivela ku ya emahlweni u dyondza Bibele?—Mintirho 5:29.

[Marito lama tshahiweke exihlokweni lama nga eka tluka 29]

Rungula ra le Bibeleni ri hundzula vutomi bya vanhu

[Xifaniso lexi nga eka tluka 29]

Mariamma ni nuna wakwe