Nhlampfi Leyi Nga Ni Xivumbeko Xo Fana Ni Bokisi

 Xana Yi Lo Endliwa?

Leswaku vaendli va timovha va endla movha leyi tiyeke, leyi nga dyiki petirolo yo tala ni leyi nga humesiki musi lowu thyakisaka moya, va langutise endhawini leyi a va nga ehleketi leswaku va nga kuma mavonelo lamantshwa eka yona, ku nga ehansi ka lwandle. Nhlampfi leyi nga ni xivumbeko xo fana ni bokisi, leyi kumekaka ekusuhi ni magiyagiya ya tikorala ematini ya le tindhawini leti hisaka, ku tirhisiwe xivumbeko xa yona leswaku ku endliwa movha leyi vevukaka leyi xivumbeko xa yona xi endlaka leswaku yi kota ku famba hi rivilo lerikulu handle ko siveriwa hi moya.

Xiya: Nhlampfi yoleyo yi kota ku hlambela hi rivilo lerikulu—hi sekoni yin’we yi famba mpfhuka lowu ringanaka ni miri wa yona lowu phindhiweke ka tsevu. Kambe nhlampfi leyi a yi hlambeli hi rivilo lerikulu hikwalaho ka leswi yi nga ni matimba. Ku hambana ni leswi vanhu a va swi ehleketa, kahle-kahle xivumbeko xa nhlampfi leyi hi xona lexi endlaka leswaku yi kota ku hlambela hi rivilo lerikulu. Entiyisweni, loko vanjhiniyara lava endleke movha lowu fanaka ni nhlampfi yoleyo va wu kambele endzeni ka muhocho lowu nga ni moya, va kume leswaku wu kota ku famba hi rivilo lerikulu ku tlula timovha letitsongo.

Nhlampfi leyi yi ni marhambu yo tala lama endlaka leswaku yi kota ku hlambela hi rivilo lerikulu handle ko tikiwa. Mati lama khulukaka hi xihatla ma vumba xirhendzevutana ma rhendzela nhlampfi leyi, ma endla leswaku yi kota ku sima loko mati lama nga ekusuhi na yona ma khuluka hi matimba. Xisweswo, nhlampfi leyi yi kota ku jika-jika kahle naswona ya sirheleleka eka timhangu.

Vanjhiniyara va anakanya leswaku nhlampfi leyi yi va pfule mahlo leswaku va kota ku endla movha leyi sirhelelekeke, leyi nga dyiki ngopfu petirolo naswona yi nga tikiki. Dok. Thomas Weber, murhangeri wa ta mindzavisiso ni ku endla swilo, u ri: “Entiyisweni swi hi hlamarise ngopfu leswaku hi boheke ku tirhisa xivumbeko xa nhlampfi leyi, leyi swarheke leswaku hi endla movha leyi kotaka ku famba hi rivilo lerikulu handle ko siveriwa hi moya naswona yi nga dyiki ngopfu petirolo.”

U anakanya yini? Xana nhlampfi leyi yi lo tiendlekela? Kumbe yi lo endliwa?

[Laha Swifaniso Swi Humaka Kona eka tluka 10]

Boxfish: © Hal Beral/V&W/SeaPics.com; car: Mercedes-Benz USA