Etlela nkarhi lowu eneleke. “Voko leri teleke ku wisa ra antswa ku ri ni mavoko mambirhi lama teleke ntirho wa matimba ni ku hlongorisa mheho.” (Eklesiasta 4:6) Swiphiqo ni swikavanyeto swa vutomi namuntlha swi dyela vanhu nkarhi lowu a va fanele va wu tirhisela ku etlela. Kambe ku etlela i swa nkoka leswaku munhu a va ni rihanyo lerinene. Vulavisisi byi komba leswaku loko hi etlele, miri ni byongo bya hina swa tivuyetela, leswaku hi kota ku tsundzuka hi tlhela hi titwa hi hanye kahle.

Ku etlela swi endla leswaku fambiselo ra miri ri tirha kahle naswona swi endla leswaku mavabyi yo tanihi vuvabyi bya chukele, vuvabyi byo oma swirho, vuvabyi bya mbilu, khensa, ku nyuhela, ntshikilelo hambi ku ri vuvabyi bya Alzheimer byi nga hi khomi hi ku olova. Ematshan’weni yo bakanyela vurhongo etlhelo, ku nga “xisirhelelo xa hina” xa ntumbuluko—hi ku dya swilo swo tanihi swiwitsi, khafeyini kumbe swilo swin’wana leswi nga endlaka leswaku hi nga khomiwi hi vurhongo, hi fanele hi swi papalata leswaku hi ta kota ku etlela. Vanhu lavakulu va fanele va etlela tiawara ta nkombo ku ya eka nhungu vusiku byin’wana ni byin’wana leswaku va ta titwa kahle ni ku endla ntirho kahle. Vana lavatsongo va fanele va etlela tiawara to tala. Vantshwa lava nga etleriki va le khombyeni lerikulu ro khomiwa hi vuvabyi bya ntshikilelo wa mianakanyo kumbe va etlela loko va ri karhi va chayela.

Ku etlela i swa nkoka swinene loko hi vabya. Miri wa hina wu nga hlula mavabyi man’wana, yo tanihi mukhuhlwana loko hi etlela nkarhi lowu eneleke hi tlhela hi nwa swihalaki swo tala.

Khathalela meno ya wena. Ku hlamba meno ni ku tirhisa xintambyana xo ma basisa loko u heta ku dya ni ku ma hlamba loko u nga si ya eku etleleni swi ta endla leswaku ma nga boli, u nga khomiwi hi vuvabyi bya maxinini naswona ma nga guleki. A hi nga ta swi kota ku tiphina hi swakudya leswi hi swi dyaka loko a hi nga ri na meno. Ku vuriwa leswaku tindlopfu a ti fi hikwalaho ka leswi ti dyuhaleke kambe ti fa hi leswi ti sikeke hi ndlala endzhaku ka loko meno ya tona ma gulekile hikuva a ta ha swi koti ku cakunya kahle. Vana lava dyondzisiweke ku hlamba ni ku tirhisa xintambyana xo hlamba meno endzhaku ko dya va ta tiphina hi rihanyo lerinene evuntshweni ni le vuton’wini bya vona hinkwabyo.

Yana eka dokodela. Loko u ri ni vuvabyi byo karhi, u fanele u ya eka dokodela la nga ni ntokoto. Ku tshungula vuvabyi to hu suka swi tala ku va ni vuyelo lebyinene ni ku nga tirhisi mali yo tala. Loko u nga titwi kahle, kombela mpfuno leswaku u kuma ni ku herisa leswi byi vangaka ematshan’weni yo lava ku hunguta swikombiso swa byona.

Ku kamberiwa nkarhi ni nkarhi eka dokodela la nga ni ntokoto swi nga herisa swiphiqo swo tala swa rihanyo, laha u nga ta kuma matshungulelo lamanene loko u tikile. * Tsundzuka leswaku dokodela yoloye a nge ku horisi hi singita. Ku tshunguriwa hinkwako ka vuvabyi bya hina swi ta va kona ntsena loko Xikwembu xi endla “swilo hinkwaswo swi va leswintshwa.”—Nhlavutelo 21:4, 5.