KU LANGUTANA ni ntshikilelo swi fana ni ku koka bokisi lerikulu ra nsimbi ro tika swinene ro rhumela ha rona nhundzu. Lori leyikulu yi nga swi kota ku ri koka hi ku olova. Kambe movha a yi nge swi koti nikatsongo. Njhini ya yona yi nga onhaka loko yo ringeta ku ri koka hambi ko va mpfukanyana. Ku nga endleka leswi fanaka hi miri wa wena loko u tshikileleke ku tlula mpimo.

Xana swi kona leswi u nga swi endlaka loko u tshikileleke ku tlula mpimo? Ina! Leswaku u kota ku koka bokisi rero, u fanele u hunguta ndzhwalo wa wena kumbe u endla leswaku miri wa wena wu va ni matimba lama engetelekeke. Kambe, ntiyiso wa mhaka hileswaku u nga swi kota ku swi endla ha swimbirhi ka swona. A hi voneni leswaku u nga swi endlisa ku yini.

NTLHONTLHO: Ku ringeta ku endla mintirho yo tala hambiloko u nga ri na nkarhi.

“Un’wana u ndzi kombela leswaku ndzi n’wi pfuna hi swin’wana kumbe ndzi tihungasa na yena hambiloko ndzi ri ni swilo swin’wana leswi ndzi lavaka ku swi endla. A ndzi swi rhandzi ku ala loko munhu a ndzi kombela.”—Karina. *

LESWI U NGA SWI ENDLAKA: Dyondza ku ala.

Bibele yi ri: “Vutlhari byi ni lava va titsongahataka.” (Swivuriso 11:2) Ku titsongahata kumbe ku tiva ku tsana ka wena, swi ta ku susumetela ku ala loko u vona onge swi ta ku tikela ku endla leswi u komberiwaka swona.

I ntiyiso leswaku a hi minkarhi hinkwayo laha u nga alaka loko u nyikiwa ntirho. Hi xikombiso, a wu nge ali loko vatswari va wena va ku byela leswaku u endla mintirho ya wena ya le kaya. Kambe loko wo pfumelela un’wana ni un’wana leswaku a ku nyika mintirho leyi engetelekeke eka leyi u nga na yona, u ta hetelela u tsandzeka no yi endla. Hambi ku ri tilori letikulu ti fanele ti rhwala ndzhwalo wo karhi lowu pimiweke.

Xitsundzuxo: Loko swi ku tikela ku ala hi nkarhi wolowo loko munhu a ku kombela ku n’wi endlela swin’wana, ringeta ku n’wi byela u ku: “Ndzi ta ku  hlamula endzhakunyana ka nkarhi.” Kutani loko u nga si n’wi hlamula, tivutise u ku, ‘Xana ndzi ta swi kota hakunene ku endla leswi a ndzi kombelaka swona?’

NTLHONTLHO: Xinamu.

“Loko ntirho wu tikomba wu ndzi tikela, ndzi wu vekela etlhelo. Kambe a ndzi dyi byi rhelela hi ku tiva leswaku ndza ha fanele ndzi wu endla. Loko ndzi tlhela ndzi wu sungula, ndzi boheka ku wu endla hi xihatla, kutani sweswo swa ndzi tshikilela.”—Serena.

LESWI U NGA SWI ENDLAKA: Wu sungule hambiloko u nga wu heti hi nkarhi wolowo.

Bibele yi ri: “Mi nga lolohi entirhweni wa n’wina.” (Varhoma 12:11) Ku endla ntirho wo tika i ndzhwalo, kutani ha yini u tiengetelela ndzhwalo hi ku va ni xinamu? Sweswo swi endla leswaku ndzhwalo wolowo wu tshama emakatleni ya wena nkarhi wo leha!

Leswaku u hisekela ku endla mintirho ya wena, tiendlele xiyimiso. Pandzelela mintirho leyikulu yi va swintirhwana leswi u nga kotaka ku swi endla. Muntshwa un’wana loyi a vuriwaka Carol u ri: “Ndzi rhandza ku yi tsala ehansi mintirho ya mina. Hakanyingi ndzi rhanga hi leyi ndzi nga yi rhandziki kutani loko ndzi ri karhi ndzi yi heta, swi sungula ku  ndzi olovela. Handle ko swi xiya, u ta tikuma se u ri eku endleni ka mintirho leyi u yi rhandzaka swinene!”

Xitsundzuxo: Loko swi ku tikela ku sungula ntirho wo karhi, seta timinete ta 10 kumbe ta 15 eka watchi ya wena ivi u sungula ku wu endla hi nkarhi wolowo. Loko nkarhi wolowo wu hela, u ta va u wu hungutile hi timinete ta 10 kumbe ta 15. Kutani leswi se u wu sunguleke, swi nga ha ku hlamarisa ku vona ndlela leyi swi olovaka ha yona ku endla leswi engetelekeke eka wona.

Khathalela miri wa wena.

Vativi va ta rihanyo va pfumela leswaku ku dya swakudya leswi nga ni rihanyo, ku endla vutiolori nkarhi ni nkarhi swin’we ni ku etlela tiawara leti ringaneke swi nga ku pfuna leswaku u endla ntirho wo tala. * U nga vileli—ku khathalela miri wa wena a swi tiki nikatsongo. Ku teka magoza ma nga ri mangani yo olova swi nga ku pfuna. Hi xikombiso, loko swi ta emhakeni yo etlela, ringeta leswi landzelaka.

1. Etlela tiawara leti ringaneke. Tivekele nkarhi lowu fanaka lowu u nga ta etlela ni ku pfuka ha wona siku ni siku, ngopfu-ngopfu hi masiku lawa u yaka ha wona exikolweni kumbe entirhweni.

2. Tinyike nkarhi wo wisa emahlweni yo ya eku etleleni. U nga endli vutiolori loko ku sale tiawara tinharhu leswaku u ya eku etleleni naswona papalata ku dya swakudya swo tiya ni swilo leswi nga ni khafeyini loko se ku tshinele nkarhi wo ya eku etleleni.

3. Loko nkarhi wo ya eku etleleni wu fika, tima timboni ekamareni ra wena, susa leswi nga ku vangelaka pongo ni ku endla leswaku u nga kavanyeteki loko u etlele.

Kombela mpfuno eka van’wana.

U nga kanakani ku kombela mpfuno eka vatswari swin’we ni le ka vanghana va wena. Xana sweswo swi nga ku pfuna? Ina, hikuva nkambisiso lowu endliweke wu kombisa leswaku ku pfuniwa hi van’wana swi nga ku hungutela ntshikilelo lowu nga endlaka leswaku u khomiwa hi vuvabyi bya mbilu, bya misiha ni ku tsanisa fambiselo ra miri ro lwisana ni mavabyi.

Rungula rero leri kumiwe ri pfumelelana ni leswi Bibele yi swi vulaka loko yi ku: “Ku vilela embilwini ya munhu hi kona loku nga ta yi tshova, kambe rito lerinene ra yi tsakisa.” (Swivuriso 12:25) Loko “ku vilela” ku ku heta matimba, vanghana va xiviri va nga ku nyika “rito lerinene” ra xikhutazo, leri kumbexana ku nga rona leri u ri lavaka leswaku ri ku tiyisa nhlana.

Loko wa ha lava mpfuno lowu engetelekeke wo langutana ni ntshikilelo, hlaya tindzima leti landzelaka ebukwini leyi nge Vantshwa Va Vutisa—Tinhlamulo Leti Tirhaka, Vholumo 1 na 2, leyi kandziyisiweke hi Timbhoni ta Yehovha.

VHOLUMO 1

• Ndzima 18: Ndzi Nga Wu Hlurisa Ku Yini Ntshikilelo eXikolweni?

• Ndzima 21: Ndzi Nga Wu Tirhisa Njhani Nkarhi Wa Mina Hi Vutlhari?

VHOLUMO 2

• Ndzima 26: Ndzi Nga Yi Lawula Njhani Ndlela Leyi Ndzi Titwaka Ha Yona?

• Ndzima 27: Ha Yini Ndzi Va Ni Gome Loko Ndzi Endla Swihoxo?