Hlawula Swilo Leswi Nga Swa Nkoka
Loko swi koteka dyanani swin’we tanihi ndyangu kan’we hi siku
“Minkarhi hinkwayo a ndzi tshama ndzi karhele hileswi a ndzi ehleketa hi ndlela yo ringanisela loko swi ta emhakeni ya ntirho wa mina wo tihanyisa, ku kurisa vana, xiyimiso xa hina xa vugandzeri, mintirho ya le kaya swin’we ni ku wisa.”—YOKO WA LE JAPANI.
Ntlhontlho.
Miranda, manana wa swifanyetana swimbirhi, u ri: “Ntlhontlho lowukulu lowu ndzi langutanaka na wona i ku va manana loyi a tirhaka, loyi a nga ni vutihlamuleri byo khathalela ndyangu hi tlhelo ra nyama, hi tlhelo ra mintlhaveko ni hi tlhelo ra moya handle ko pfuniwa hi nuna wa mina.”
Swiringanyeto.
Hlawula swilo leswi nga swa nkoka swinene eka wena ni le ka vana va wena ivi u swi rhangisa endyangwini wa wena.
U nga pfumeleli nchumu wun’wana wu ku cincisa swilo leswi u swi rhangisaka endyangwini wa wena naswona dyondza ku tirhisa nkarhi ni mali hi ndlela leyinene. Hi xikombiso: Rihanyo ra vana va wena i ra nkoka kutani tirhisa mali leyi u yi dzukeleke nyuku leswaku u va xavela swakudya leswi nga ni rihanyo. Sweswo swa antswa ku tlula ku hakela mali yo tala eswibedlhele hileswi vana va wena va vabyaka hikwalaho ko dya swakudya leswi nga riki na rihanyo. Swi tsale ehansi swilo leswi u lavaka ku swi xava u nga si ya exitolo. Sweswo swi ta ku pfuna leswaku u nga tlangisi mali hi ku xava swilo leswi a wu nga hlelanga ku swi xava. Roberto, loyi a tshamaka eUnited States ni vana vakwe va mune, u ri: “Ndzi rhandza ku sweka. Kambe ndzi dyondze ku xava swilo swa nkoka leswi a hi ta swi tirhisa siku ni siku.”
Cukumeta swilo leswi u nga swi tirhisiki swo tanihi tibuku, swiambalo ni swingolongondzwana. Manana un’wana loyi a nga yexe u tsale a ku: “Nhundzu yo tala swinene yi vangelana ntshikilelo. Loko u ya u va ni swilo swo tala swinene, u ta va ni swilo swo tala leswi u faneleke u swi basisa, u swi lunghisa ni ku swi khathalela. Goza ra nkoka ro olovisa vutomi bya wena i ku hunguta nhundzu ya wena.”
Tirhisa mali leyi u yi dzukeleke nyuku leswaku u xava swakudya leswi nga ni rihanyo. Sweswo swa antswa ku tlula ku hakela mali yo tala eswibedlhele
Dyondzisa vana va wena ku paka swilo swa vona madyambu man’wana ni man’wana. U nga pfumeli leswaku kaya ra wena ri va ndhawu leyi nga hlelekangiki. Sweswo swi ta va dyondzisa ku va ni vutihlamuleri byo basisa kamara ra vona ku katsa ni muti hinkwawo. Entiyisweni, vana va wena swi ta va olovela ku ku yingisa loko u va vekela xikombiso lexinene.
Hambileswi u nga ha vaka u khomekile swinene, u fanele u tinyika nkarhi wo tala hilaha u nga kotaka hakona wo tshama ni vana va wena. Vana va wena va lava leswaku u tinyika nkarhi wo tshama na vona ni ku va komba leswaku wa va rhandza.—Deteronoma 6:7.
Loko swi koteka dyanani swin’we tanihi ndyangu kan’we hi siku naswona endlani leswaku nkarhi wolowo wu va lowu tsakisaka. Colette, loyi a nga ni vana vanharhu, u ri: “Hi pfumelelane hileswaku nkarhi wo lalela loko hinkwerhu hi helerile ekaya, hi ta phofulelana ta le mbilwini ni ku bula hi timhaka ta moya. Ninamuntlha nkarhi wolowo wa ha ri wa nkoka swinene endyangwini wa mina.”
