EMISAVENI ya namuntlha leyi rhandzaka rifuwo swinene, vanhu vo tala a va na mhaka ni Xikwembu. Hambiswiritano, Muvumbi wa hina u ni mhaka na hina naswona u lava leswaku swilo swi hi fambela kahle evuton’wini. Ndlela leyi a titwaka ha yona yi hlamuseriwe kahle eka Esaya 41:10 leyi nge: “U nga chavi, hikuva ndzi na wena. . . . Kunene ndzi ta ku pfuna.”

Exihlokweni lexi hundzeke, hi kambisise ndlela leyi Xikwembu xi hi pfunaka ha yona hi ku tirhisa milawu ya mahanyelo leyi nga eBibeleni. (2 Timotiya 3:16) Kambe Bibele a yo hi nyika nkongomiso ntsena. Yi tlhela yi hi byela hi timfanelo letinene ta Xikwembu nileswaku xa hi rhandza. Hikwalaho, hilaha vatswari vo tala lava nga Vakreste—lava nga voxe kumbe va nga vambirhi—va swi voneke hakona, loko hi tirhisa leswi Bibele yi swi vulaka hi vona vunene bya Xikwembu.

Robert wa le Austria u ri: “Yehovha Xikwembu i tatana kumbe manana lonene ku tlula un’wana ni un’wana wa hina. Wa swi tiva leswi vana va hina va swi lavaka naswona wa yi tiva ndlela yo va sirhelela. Kutani mina ni xinhwanyetana xa mina hi khongela eka yena nkarhi ni nkarhi.”

Ayusa wa le Japani u ri: “Swa ndzi tsakisa ku vona ndlela leyi xifanyetana xa mina xi wu tshembaka ha yona mpfuno wa Yehovha loko xi ku, ‘Hinkwaswo swi ta famba kahle hikuva Yehovha u na hina.’”

Cristina wa le Italy u ri: “Loko ndzi ri ni xiphiqo lexi ndzi vonaka leswaku xi le henhla ka matimba ya mina, ndzi khongela eka Yehovha ndzi kombela leswaku a ndzi lulamisela xona. Hi ku hatlisa, ndzi titwa ndzi ri ni ku rhula ka mianakanyo hi ku tiva leswaku xiphiqo xexo xi ta lulamisiwa hi ndlela leyinene.”

Laurentine wa le Furwa u ri: “Ndzi nga vula handle ko ba mariri leswaku Yehovha u ndzi katekisile hambileswi ndzi nga mutswari loyi a nga yexe. Hakunene wa va pfuna lava xanisekaka ni lava nga riki na tatana kumbe manana.”

Keiko wa le Japani u ri: “Xikwembu a xi yi hi nghohe. Xi lava ku kombisa ndlela leyi xi khathalaka ha yona hi mindyangu hinkwayo, ku nga khathariseki leswaku yi ni mutswari un’we kumbe vambirhi.”—Mintirho 10:34.

Loko Yesu Kreste a kombisa ndlela leyi Xikwembu xi hi twelaka vusiwana ni ku khathala hi hina ha yona, u te: “Tanani eka mina, n’wina hinkwenu lava tirhaka hi matimba ni lava tikeriwaka, ndzi ta mi phyuphyisa . . . , hikuva ndzi ni moya wo rhula ni mbilu yo titsongahata, kutani mi ta kumela mimoya-xiviri ya n’wina ku phyuphya.” (Matewu 11:28-30) Handle ko kanakana, Yesu ni Tata wakwe wa le tilweni, ku nga Yehovha Xikwembu, va lava leswaku hi titwa hi sirhelelekile ehansi ka nkongomiso wa vona wa rirhandzu. Pisalema 34:8 yi ri: “Nantswani mi vona leswaku Yehovha hi lonene.” Entiyisweni, u lava leswaku mi tivonela hi ya n’wina leswaku switsundzuxo swakwe swa tirha nileswaku u mi navelela swilo leswinene n’wina ni mindyangu ya n’wina. Xana u ta xi amukela xirhambo xakwe xa rirhandzu?