SE SWI endla kwalomu ka malembe ya 2 000 vanhu lava tivulaka Vakreste va ri karhi va khongelela ku ta ka Mfumo wa Xikwembu. Xikhongelo xa vona xi sekeriwe eka marito lama vuriweke hi Yesu. U dyondzise vadyondzisiwa vakwe ku khongela va ku: “Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.”—Matewu 6:10.

I yini Mfumo lowu vanhu vo tala swonghasi va wu khongelelaka? I hulumendhe ya Xikwembu ya le tilweni naswona yi ta herisa tihulumendhe letin’wana hinkwato. Leswi Yesu Kreste a nga Hosi leyi hlawuriweke ya Mfumo lowu, u endla ku rhandza ka Xikwembu etilweni ni laha misaveni. (Daniyele 2:44; 7:9, 10) Hi nkarhi lowu vekiweke, Xikwembu xi ta hlamula xikhongelo lexi xa xikombiso hi ku herisa vuhomboloki ni ku xaniseka kutani xi ponisa “ntshungu lowukulu” wa ntsandza-vahlayi wa vagandzeri va xona vo tshembeka. (Nhlavutelo 7:9, 10, 13-17) Kutani, “lavo lulama va ta dya ndzhaka ya misava, va ta tshama eka yona hi masiku.”—Pisalema 37:29.

Xana yi kona ndlela yo tiva leswaku hi swihi swiyimo leswi hi nga swi langutelaka loko Kreste se a fuma? Ina, yi kona! Loko Yesu a ha ri laha misaveni, u kombise ndlela leyi a a swi lava ha yona ku tlhantlha swiphiqo swa vanhu ni matimba yakwe yo endla tano. A hi kambisiseni vuprofeta bya mune bya Bibele ivi hi xiya ndlela leyi Yesu a hi kombeke ha yona hi mpimo wutsongo leswi a nga ta swi endla emisaveni hinkwayo tanihi Hosi eMfun’weni wa Xikwembu wa le tilweni.

“Yehovha . . . u herisa tinyimpi ku ya fika emakumu ya misava. Vurha u byi tshova hi le xikarhi naswona u tshovelela fumu; tigolonyi u ti hisa endzilweni.”—Pisalema 46:8, 9.

Ku hetiseka ka byona: Yesu Kreste, loyi a nga “Hosana ya ku Rhula,” u ta tisa ku rhula loku nga heriki eka pulanete ya hina. Hi ku tirhisa nongonoko wo dyondzisa vanhu hi ku rhula ni ku herisa matlhari emisaveni hinkwayo, Mfumo wa Xikwembu wu ta endla leswaku vanhu hinkwavo va va ni vun’we emisaveni hinkwayo.—Esaya 2:2-4; 9:6, 7.

Leswi matimu ma swi vulaka:

Yesu u dyondzise valandzeri vakwe leswaku va nga tirhisi matlhari kambe va hanyisana hi ku rhula. Loko un’wana wa vadyondzisiwa vakwe a ringete ku n’wi sirhelela a khome banga, Yesu u n’wi byele a ku: “Vuyisela banga ra wena endhawini ya rona, hikuva hinkwavo lava khomaka banga va ta lova hi banga.” (Matewu 26:51, 52) Yesu u vule leswaku Vakreste va ntiyiso va ta tiviwa hi rirhandzu leri va kombanaka rona.—Yohane 13:34, 35.

“Ku ta va ni mavele yo tala emisaveni; ma ta khapakhapa etinhlohlorhini ta tintshava.”—Pisalema 72:16.

Ku hetiseka ka byona: Mfumo wa Xikwembu wu ta herisa ku sika, ku kayivela ka swakudya ni swakudya leswi nga riki na rihanyo. Vanhu hinkwavo va ta va ni ndzalo ya swakudya leswinene.

Leswi matimu ma swi vulaka:

Yesu u swi kombise kahle leswaku u ni ntwela-vusiwana eka vanhu lava nga ni ndlala naswona vuswikoti byakwe byo phamela mintshungu hi singita byi hlamarise vo tala. Mbhoni yin’wana leyi voneke singita rero yi te: “[Yesu] a lerisa mintshungu ku vurhama ebyanyini kutani a teka swinkwa swa ntlhanu ni tinhlampfi timbirhi, a languta ehenhla etilweni, a nkhensa, endzhaku ko phema swinkwa, a swi avela vadyondzisiwa vakwe, vadyondzisiwa na vona va avela mintshungu. Hi ndlela yoleyo hinkwavo va dya va xurha, kutani va hlengeleta swiphemu leswi saleke, ku tala swirhundzu swa 12. Hambiswiritano lava dyeke a ku ri vavanuna va kwalomu ka 5 000, ku nga hlayiwi vavasati ni vana lavatsongo.”—Matewu 14:14, 19-21.

“Ku hava munhu la tshamaka kona la nga ta ku: ‘Ndza vabya.’” (Esaya 33:24) “Mahlo ya lava nga voniki ma ta pfuriwa, ni tindleve ta lava nga twiki ti ta pfuriwa. Hi nkarhi wolowo la khutaka u ta tlula kukota mhunti, ni ririmi ra la nga vulavuriki ri ta huwelela hi ku tsaka.”—Esaya 35:5, 6.

Ku hetiseka ka byona: Mfumo wa Xikwembu  wu ta herisa mixaka hinkwayo ya vuvabyi ni ku dyuhala. Mabofu ma ta vona naswona timbheveve ti ta twa ti tlhela ti vulavula. Vanhu a va nge he pfuki va lave mirhi, swibedlhele kumbe madokodela.

Leswi matimu ma swi vulaka:

Loko Yesu a dyondzisa vanhu hi Mfumo wa Xikwembu, u va tshungule mavabyi ni vulema bya vona hinkwabyo hi ku tirhandzela. Xisweswo, hi mpimo wutsongo, u kombise leswi a nga ta swi endla emisaveni hinkwayo tanihi Hosi ya Mfumo wa Xikwembu wa le tilweni.—Luka 7:22; 9:11.

Xikwembu “entiyisweni [xi] ta mita rifu hi masiku.”—Esaya 25:8.

Ku hetiseka ka byona: Loko Kreste se a fuma tanihi Hosi ya Mfumo wa Xikwembu, “lava nga eka masirha-bako ya xitsundzuxo” va ta pfuxiwa leswaku va ta hanya emisaveni leyi nga paradeyisi. (Yohane 5:28, 29) Yesu u ta ri herisela makumu rifu, ku nga nala wa hina loyi a nga ni tihanyi naswona u ta endla leswaku hi tiphina hi vutomi lebyi nga heriki.—Pisalema 37:29.

Leswi matimu ma swi vulaka:

Eka swiendlakalo swinharhu, Yesu u kombise matimba yakwe hi ku pfuxa vanhu lava feke. (Luka 7:11-15; 8:41-55; Yohane 11:38-44) Endzhaku ka loko Yesu a file, timbhoni ta kwalomu ka 500 ti vule leswaku u pfuxiwile eka lava feke.—1 Vakorinto 15:3-8.

Nhloko-mhaka leyi leyi nga ni swihloko swa nhungu leswi ntlhandlamanaka yi tlhuvutse vuprofeta byo tala lebyi hetisekeke. Vuprofeta byebyo hinkwabyo, ku katsa ni byin’wana byo tala, byi kombisa leswaku Bibele a yi tsariwanga hi vanhu vo tlhariha ntsena. Ematshan’weni ya sweswo, ku ni vumbhoni lebyi nga erivaleni lebyi kombisaka leswaku Bibele yi huhuteriwe hi Xikwembu. A swi kanakanisi leswaku “hinkwaswo leswi nga eMatsalweni i Rito ra Xikwembu.”—2 Timotiya 3:16, Contemporary English Version.

Leswi Bibele ku nga buku leyi nga ni vuprofeta lebyi tshembekaka, u ni xivangelo lexi twalaka xo tshemba leswaku “hi nkarhinyana, lowo homboloka a nge he vi kona; kunene u ta languta endhawini yakwe, u ta va a nga ri kona. Kambe lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.”—Pisalema 37:10, 11.