VANHU van’wana va pfumela leswaku Xikwembu xi tirhisa timhangu ta ntumbuluko ku xupula vanhu. Van’wanyana a va pfumelelani na yona mhaka leyi. Kasi van’wana a va swi tivi leswi va faneleke va swi tshemba. Profesa un’wana wa ta vukhongeri u te: “Vukhongeri byo tala byi dyondzisa leswaku ku hava munhu loyi a swi tivaka leswaku timhangu ta ntumbuluko i ku rhandza ka Xikwembu.”

Hambiswiritano, Bibele yi ni tinhlamulo leti enerisaka. Yi hi pfuna ku twisisa leswaku Xikwembu a xi tirhisi timhangu ta ntumbuluko ku xupula vanhu namuntlha. Yi tlhela yi hi pfuna ku twisisa leswaku i yini lexi vangaka maxangu lama dyisaka vanhu vo tala mbitsi.

Bibele yi hi hlamusela tinhla timbirhi ta nkoka malunghana ni Xikwembu, lexi vito ra xona ku nga Yehovha. Yinhla yo sungula hileswaku Xikwembu i Muvumbi, xisweswo xi ni ntamu wo lawula matimba ya ntumbuluko ya laha misaveni. (Nhlavutelo 4:11) Yinhla ya vumbirhi hileswaku swilo leswi xi swi endlaka minkarhi hinkwayo swi fambisana ni vumunhu, timfanelo ni milawu ya xona. Eka Malakiya 3:6 xi te: “Hi mina Yehovha; a ndzi hundzukanga.” Leswi se u tivaka tinhla letimbirhi, kambisisa swiendlakalo swimbirhi leswi endlekeke enkarhini lowu hundzeke, leswi katsaka ndhambi ni dyandza. U ta xiya leswaku eBibeleni loko Xikwembu xi tirhisa matimba ya ntumbuluko ku avanyisa vanhu, minkarhi hinkwayo a xi nyikela (1) xilemukiso, (2) xivangelo ni (3) nsirhelelo eka vagandzeri va xona lava yingisaka.

Xilemukiso.

Loko ka ha sele makume ya malembe leswaku Ndhambi yi fika, Yehovha u byele Nowa a ku: “Loko ku ri mina, ndzi tisa ndhambi ya mati ehenhla ka misava leswaku yi lovisa nyama hinkwayo.” (Genesa 6:17) Nowa, “muchumayeri wa leswo lulama,” u lemukise vanhu kambe a va ‘lemukanga nchumu.’—2 Petro 2:5; Matewu 24:39.

Xivangelo.

Yehovha u te: “Makumu ya nyama hinkwayo ma fikile emahlweni ka mina, hikuva misava yi tale madzolonga hikwalaho ka vona.”—Genesa 6:13.

Nsirhelelo eka vagandzeri vakwe lava yingisaka.

Yehovha u nyike Nowa swiletelo leswi nga ni vuxokoxoko byo tala malunghana ni ku akiwa ka ngalava leyi a yi ta n’wi ponisa eka Ndhambi. ‘U ponile swin’we ni lava a va ri na yena engalaveni.’—Genesa 7:23.

Xilemukiso.

Loko Yehovha Xikwembu a nga si tisa dyandza lerikulu eIsrayele, muprofeta wakwe Eliya u tivise vanhu a ku: “A ku nge vi na mberha kumbe mpfula loko ku nga ri hi xileriso xa rito ra [Xikwembu]!”—1 Tihosi 17:1.

Xivangelo.

Yehovha u teke goza rero hileswi Vaisrayele a va gandzela Bali, xikwembu xa mavunwa. Loko Eliya a va hlamusela u te: “N’wina mi siye swileriso swa Yehovha mi landzela Vabali.”—1 Tihosi 18:18.

Nsirhelelo eka vagandzeri vakwe lava yingisaka.

Yehovha u nyike vagandzeri vakwe lava yingisaka swakudya hi nkarhi wa dyandza.—1 Tihosi 17:6, 14; 18:4; 19:18.

Namuntlha, ku hava vumbhoni lebyi kombisaka leswaku Xikwembu xi tirhisa timhangu ta ntumbuluko leswaku xi xupula vanhu. Tanihi leswi Yehovha a nga Xikwembu xa vululami, a nga si tshama a “kukula wo lulama swin’we ni wo homboloka.” (Genesa 18:23, 25) U pfule tindlela  to sirhelela malandza yakwe lama n’wi yingisaka. Namuntlha timhangu ta ntumbuluko a ti hlawuli munhu, ti wela vavanuna, vavasati ni vana.

Swi le rivaleni leswaku timhangu ta ntumbuluko ta namuntlha a ti fani ni leti nga eMatsalweni leti tirhisiweke hi Xikwembu leswaku xi xupula vanhu. Ku engetela kwalaho, timhangu leti ta ntumbuluko a ti fambisani nikatsongo ni timfanelo ta xona. Yakobo 1:13 yi vula leswaku Xikwembu a xi ringi vanhu hi swilo swo biha naswona 1 Yohane 4:8 yi katsakanya vumunhu bya xona hi marito lawa: “Xikwembu i rirhandzu.” Kutani a xi fanelanga xi voniwa nandzu hikwalaho ka maxangu lama welaka vanhu lava nga riki na nandzu, lama vangiwaka hi swidzedze, ku tsekatseka ka misava ni timhangu tin’wana to tano leti vaka kona minkarhi yin’wana. Xana timhangu to tano ti ta kala ti hela?

A ku nga ri xikongomelo xa Yehovha Xikwembu leswaku vanhu va weriwa hi timhangu ta ntumbuluko. Ku rhandza kakwe hileswaku vanhu va hanya hilaha ku nga heriki emisaveni leyi nga ni ku rhula. Hilaha a endleke hakona enkarhini wa Nowa, u ta nghenelela etimhakeni ta misava leswaku a herisa vubihi. Kutani ku fana ni le nkarhini lowu hundzeke, Yehovha Xikwembu u le ku twariseni ka xilemukiso emisaveni hinkwayo leswaku a va pfulela ndlela vanhu lava lavaka ku ponisiwa.—Pisalema 37:9, 11, 29; Matewu 24:14.