SWI nga ha endleka leswaku Vabaka, lava nakambe va vuriwaka Vamanghimani, hi vona vaaki vo sungula va le Cameroon. Kutani hi va-1500, ku fike Maputukezi. Endzhaku ka malembe ya madzana, rixaka rin’wana ra Mamoslem leri vuriwaka Vafulani, ri teke ndhawu ya le n’walungwini wa Cameroon. Namuntlha, vaaki va le Cameroon lava endlaka 40 wa tiphesente va tivula Vakreste, lava endlaka 20 wa tiphesente i Mamoslem naswona lava kholwaka eka vukhongeri bya xintu va endla 40 wa tiphesente.

Vanhu lava tshama ematiko-xikaya ya le Cameroon va dume hi malwandla. N’wini wa muti u xeweta vaendzi ni ku va rhurhela endlwini, laha a fikaka a va nyika mati ni swakudya. Loko vaendzi va ala ku dya swakudya leswi va nyikiwaka swona swi tekiwa ku ri ku sandza n’wini wa muti, kasi loko va swi dya swi tekiwa ku ri ku n’wi fundzha.

Mabulo ma sunguriwa hi ku xeweta swirho swa ndyangu ni ku swi vutisa leswaku swi pfuke njhani. Nakambe  i ndhavuko wa vona ku vutisa leswaku swifuwo swi njhani. Joseph, loyi a nga muaka-tiko wa Cameroon u ri: “Loko muendzi se a famba, a swi ringananga ku vula leswaku ‘Famba kahle.’ Hi ntolovelo, n’wini wa muti wa n’wi humesa va ri karhi va tidyela mabulo. Kutani loko va fike kun’wana, u ta n’wi lela ivi a tlhelela ekaya. Muendzi loyi a nga humesiwiki a nga ha titwa onge a nga rhandziwi.”

Loko vanghana va ri eku dyeni tanihi ntlawa, minkarhi yin’wana va nga dya swin’we eka puleti yin’we naswona minkarhi yin’wana va nga dya hi mavoko. Le Cameroon, ku dya swin’we i xikombiso lexi nga ni matimba swinene xa vun’we. Entiyisweni, minkarhi yin’wana ku dya swin’we a swi endleriwa ku hlanganisa vanhu lava tlulaneke milenge. Kutani hi ndlela yo karhi, ku dya swakudya swin’we i ndlela yo vula mi ku, “Se hi rivalelanile.”