Haaretz.com yi vika leswaku vana lava “velekiwaka ni vulema lebyi a byi ta va byi voniwile hi nkarhi wa ku kamberiwa ka vona loko va ha ri ekhwirini” a va nge he ma mangaleli madokodela hileswi ma pfumeleleke vamana wa vona leswaku va va veleka. Hambiswiritano, vatswari va nga mangalela madokodela leswaku ma va hakela “mali yo tala leyi va yi tirhiseke ku kurisa n’wana loyi a lamaleke ni ku khathalela swilaveko swakwe vutomi hinkwabyo” hileswi ma nga va lemukisangiki hi ta vulema byebyo.

EAustralia, mimpatswa ya nhungu eka ya khume yi tshama swin’we emahlweni ko va yi tekana hi nawu.

Nkambisiso lowu humesiweke hi Ndzawulo ya Rihanyo ya le Greece wu kombisa leswaku nhlayo ya ku tidlaya ka vanhu eGreece yi andze hi tiphesente ta 40 etin’hwetini ta ntlhanu to sungula ta 2011 loko yi pimanisiwa ni ya tin’hweti leti fanaka ta 2010. Nhlayo ya ku tidlaya ka vanhu yi andze hi nkarhi wa ku wa ka ikhonomi loku sunguleke hi 2011.

Natural Resources Defense Council yi vula leswaku swakudya leswi lavaka ku ringana 40 wa tiphesente swa tlangisiwa etikweni rero. Hi xikombiso, ku ringanyetiwa leswaku swibyariwa leswi ringanaka nkombo wa tiphesente a swi tshoveriwi emasin’wini, swakudya leswi ringanaka 17 wa tiphesente leswi vanhu va swi xavaka etirhesiturente ni le tikhefini va swi siya va nga swi dyanga naswona mindyangu yi lahla swakudya swa kwalomu ka 25 wa tiphesente leswi yi swi xavaka.

EMadagascar, ka ha ku kumiwa lumpfana leritsongo swinene ku tlula hinkwawo emisaveni. Man’wana ya malumpfana lawa ya buraweni lama kulaka ku fikela eka timilimitara ta 29, ma nga ringana ni n’wala wa rintiho ra munhu. Kambe ma nga ha va ekhombyeni ro heriseriwa makumu hileswi ndhawu leyi ma tshamaka eka yona yi nga eku onhiweni.