“Un’wana ni un’wana la tshamelaka ku languta wansati lerova a n’wi navela, ana se u endle vuoswi na yena embilwini yakwe.”—Matewu 5:28.

HA YINI MHAKA LEYI YI RI YA NKOKA?

Namuntlha swifaniso swa timhaka ta masangu swi rhandziwa hi vanhu vo tala swinene naswona swi kumeka hi ku olova ku tlula rini na rini. Loko u lava ku tsakisa Xikwembu ni ku hanya vutomi lebyi tsakisaka, u fanele u tiva ndlela leyi xi titwaka ha yona hi swifaniso sweswo.

LESWI BIBELE YI SWI VULAKA

Bibele a yi vulavuli hi ku kongoma hi swifaniso sweswo. Kambe ku swi langutisa swi lwisana hi ku kongoma ni milawu yo tala ya Bibele.

Hi xikombiso, Bibele yi lemukisa leswaku loko wanuna loyi a tekeke a ‘tshamela ku languta wansati’ loyi a nga riki nsati wa yena naswona a navela ku etlela na yena, swi nga n’wi susumetela ku endla vuoswi. Yinhla leyi nga eka ndzimana leyi ya tirha eka munhu un’wana ni un’wana loyi a “tshamelaka ku languta” swifaniso sweswo hi xikongomelo xo lava ku endla vuoswi, ku nga khathariseki leswaku u nghenele vukati kumbe a nga byi nghenelanga. Swi le rivaleni leswaku mukhuva wo tano a wu amukeleki eka Xikwembu.

“Dlayani swirho swa miri wa n’wina . . . malunghana ni vumbhisa, thyaka, ku navela ka vuxaka bya rimbewu, ku navela loku vavisaka, ni [makwanga].”—Vakolosa 3:5.

LESWI VANHU VA SWI VULAKA

Valavisisi van’wana a va pfumeli leswaku ku langutisa swifaniso swa timhaka ta masangu swi susumetela vanhu ku endla vumbhisa. Kambe, xana ku swi langutisa swi hoxile hambiloko swi nga va susumeteli vanhu ku endla vumbhisa?

LESWI BIBELE YI SWI VULAKA

Bibele yi vula leswaku “mafenya lama thyakeke” i nchumu lowu nga amukelekiki. (Vaefesa 5:3, 4) Kutani swifaniso swa timhaka ta masangu swi nga amukeleka njhani? Namuntlha swifaniso sweswo swi katsa tivhidiyo leti rhekhodiweke ta vanhu lava endlaka vumbhisa hi ku kongoma, vusodoma ni mixaka yo hambana-hambana ya vuoswi. Hikwalaho, swi le rivaleni leswaku ku hlalela swifaniso swo tano leswi kombisaka swiendlo leswi thyakeke swa timhaka ta masangu swi xi hlundzukisa ngopfu Xikwembu ku tlula mafenya lama thyakeke.

Vakambisisi va hambeta va njhekanjhekisana hileswaku vanhu lava langutisaka swifaniso sweswo a swi talanga ku va va susumeteleka ku endla leswi va swi vonaka eka swona. Kambe Bibele yi seketela mhaka ya leswaku ku swi langutisa swi dlaya vuxaka lebyi munhu a nga na byona ni Xikwembu naswona swa xi hlundzukisa swinene. Xisweswo, Bibele yi nyikela ndzayo leyi: “Hikokwalaho, dlayani swirho swa miri wa n’wina . . . malunghana ni vumbhisa, thyaka [ni] ku navela ka vuxaka bya rimbewu.” (Vakolosa 3:5) Kutani lava swi langutisaka va pfuxa ku navela ko biha ni ku ku pfurhetela ematshan’weni yo va va ku dlaya.

“Lavani leswinene, ku nga ri leswo biha . . . Vengani leswo biha, mi rhandza leswinene.”—Amosi 5:14, 15.

LESWI BIBELE YI SWI VULAKA

Bibele yi vulavula hi vanhu lava nga madlakuta, swidakwa ni makhamba, lava va koteke ku tshika mahanyelo ya vona yo biha. (1 Vakorinto 6:9-11) Va swi kotise ku yini? Va dyondze ku venga leswo biha hi ku tirhisa switsundzuxo leswi nga eRitweni ra Xikwembu.

Ku anakanyisisa swinene hi vuyelo byo biha bya mukhuva lowu, lowu godzombelaka swi nga pfuna munhu ku dyondza ku venga swifaniso sweswo. Nkambisiso wun’wana wa sweswinyana lowu kandziyisiweke hi Yunivhesiti ya Utah State wu kombise leswaku van’wana lava langutaka swifaniso sweswo va khomiwa hi “ntshikilelo wa mianakanyo, va tihambanisa ni vanhu van’wana, vukati bya vona bya hahluka” naswona va va ni swiphiqo swin’wana. Ku engetela kwalaho, hilaha swi boxiweke hakona eku sunguleni, ku langutisa swifaniso sweswo swi ni vuyelo byin’wana lebyi nga ni khombo swinene hikuva swi hlundzukisa Xikwembu. Swi endla leswaku vanhu va nga vi vanghana va Muvumbi wa vona.

Bibele yi nga hi pfuna leswaku hi dyondza ku rhandza leswinene. Loko hi hambeta hi hlaya Bibele, hi ta ya hi yi rhandza swinene milawu ya yona ya mahanyelo. Rirhandzu rero ri ta hi pfuna leswaku hi lwisana ni mukhuva wo langutisa swifaniso swa timhaka ta masangu naswona hi ta titwa ku fana ni mupisalema, loyi a tsaleke a ku: “A ndzi nge veki nchumu lowu nga pfuniki nchumu emahlweni ka mahlo ya mina.”—Pisalema 101:3.