“Ndzi pfilunganyekile, ndzi nkhinsame ngopfu; ndzi famba-fambe siku hinkwaro ndzi hlunamile.”—Pisalema 38:6.

LESWI VAKAMBISISI VA SWI VULAKA

Nkarhi ni nkarhi munhu un’wana ni un’wana u titwa a hele matimba, kambe ku va ni gome i vuvabyi lebyi tshamaka byi ri kona eka vutomi bya munhu bya siku ni siku. Swi fanele swi xiyiwa leswaku a hi vativi hinkwavo va pfumelelanaka eka leswi gome ra “ntumbuluko” ri nga swona nileswaku ntshikilelo lowu nga “vuvabyi” i yini. Nilokoswiritano, i swinene ku vula leswaku vanhu van’wana va titwa va tshikilelekile swinene, minkarhi yin’wana sweswo swi endla va titwa va nga pfuni nchumu naswona va titwa va ri ni nandzu lowukulu.

LESWI BIBELE YI SWI VULAKA

Bibele yi vulavula hi vavanuna ni vavasati vo tala lava tshameke va titwa va hele matimba. Hi xikombiso, Hana u twe “moya-xiviri wakwe . . . wu vaviseke ngopfu,” ku nga xiga lexi hundzuluxeriweke xi va “ku tshoveka mbilu” ni ku “tshikileleka swinene.” (1 Samuwele 1:10) Siku rin’wana muprofeta Eliya u ve ni gome lerikulu lerova u khongele eka Xikwembu leswaku xi teka vutomi bya yena!—1 Tihosi 19:4.

Vakreste va lembe-xidzana ro sungula a va lerisiwe leswaku va “[vulavula] hi ku chavelela eka mimoya-xiviri leyi karhatekeke.” (1 Vatesalonika 5:14) Hi ku ya hi buku yin’wana, xiga lexi nge “mimoya-xiviri leyi karhatekeke” xi nga ha vula “vanhu lava tshikileriweke swa xinkarhana hi vutomi.” Swi le rivaleni leswaku hambi ku ri vavanuna ni vavasati vo tshembeka va le minkarhini ya Bibele minkarhi yin’wana a va titwa va tshikilelekile.

“Ntumbuluko hinkwawo wu hambeta wu konya ni ku vaviseka swin’we.”—Varhoma 8:22.

LESWI BIBELE YI SWI VULAKA

Bibele yi dyondzisa leswaku vuvabyi i vuyelo bya ku xandzuka ka mpatswa wa vanhu vo sungula. Hi xikombiso, Pisalema 51:5 yi ri: “Hi switlhavi swa ku veleka ndzi velekiwe ndzi ri ni xidyoho, naswona manana u ndzi tikile exidyohweni.” Nakambe Varhoma 5:12 yi vula leswaku “leswi xidyoho xi ngheneke emisaveni hi munhu un’we [munhu wo sungula, Adamu], ni rifu hikwalaho ka xidyoho, xisweswo rifu ri tlulele vanhu hinkwavo hikuva hinkwavo va dyohile.” Hikwalaho ka leswi hi tswariweke hi nga hetisekanga hikwalaho ka Adamu, hinkwerhu ha vabya enyameni ni le mintlhavekweni. Hikwalaho ka sweswo, Bibele yi vula leswaku “ntumbuluko hinkwawo wu hambeta wu konya ni ku vaviseka swin’we.” (Varhoma 8:22) Hambiswiritano, Bibele yi tlhela yi hi nyika ntshembo lowu ku nga riki na dokodela la nga hi nyikaka wona, ku nga xitshembiso xa Xikwembu xa misava leyintshwa ya ku rhula laha mavabyi hinkwawo ku katsa ni ntshikilelo swi nga ta va swi herisiwile.—Nhlavutelo 21:4.

“Yehovha u le kusuhi ni lava va tshovekeke mbilu; ni lava va pfotlokeke emoyeni wa va ponisa.”—Pisalema 34:18.

LEXI ENDLAKA MHAKA LEYI YI VA YA NKOKA

A hi minkarhi hinkwayo u nga lawulaka swiyimo swa wena, naswona swilo swo biha swi ta ku khumba minkarhi yin’wana. (Eklesiasta 9:11, 12) Nilokoswiritano, ku ni swilo swo karhi leswi pfunaka leswi u nga swi endlaka leswaku mianakanyo leyi hoxeke yi nga lawuli vutomi bya wena.

LESWI BIBELE YI SWI VULAKA

Bibele ya pfumela leswaku lava va vabyaka va lava dokodela. (Luka 5:31) Kutani loko u karhatiwa hi vuvabyi bya ku pfilunganyeka ka mianakanyo, a swi bihanga ku lava vutshunguri. Bibele yi tlhela yi kandziyisa nkoka wa xikhongelo. Hi xikombiso, Pisalema 55:22 yi ri: “Lahlela ndzhwalo wa wena eka Yehovha, u ta ku seketela. A nge pfuki a pfumerile leswaku la lulameke a tsekatseka.” Xikhongelo a ko va ndlela leyi nga endlaka leswaku u titwa u antswa; i ku vulavurisana hi ku kongoma na Yehovha Xikwembu, loyi a nga “le kusuhi ni lava va tshovekeke mbilu.”—Pisalema 34:18.

U nga ha tlhela u pfuneka loko u phofulela munghana wa wena lonkulu ta le mbilwini. (Swivuriso 17:17) Daniela loyi a nga Mbhoni ya Yehovha u ri: “Mbhoni-kulorhi yi ndzi khutaze leswaku ndzi vulavula hi ntshikilelo wa mina. Hambileswi a ndzi papalata mabulo yo tano ku ringana malembe yo tala, ndzi hatle ndzi swi xiya leswaku leswi hi swona leswi a ndzi swi lava ku sukela khale. Ndzi hlamarisiwe hi ndlela leyi ndzi titweke ha yona endzhaku ka sweswo.”