Mabel wa le Argentina, a a ri ni rihanyo lerinene naswona a a ri muolori wa marhambu ni misiha (physiotherapist). Hi 2007 u sungule ku titwa a karhala ni ku pandziwa hi nhloko siku ni siku. U ri: “Ndzi ye eka madokodela yo hlayanyana ndzi tlhela ndzi ringeta vutshunguri hinkwabyo kambe a swi pfunanga nchumu.” Eku heteleleni Mabel, u nghenisiwe eka muchini (lowu vuriwaka MRI) leswaku a kamberiwa nhloko hiloko ku kumiwa leswaku u ni tshumba ebyongweni. U tlhele a ku: “A ndzi tsemeke nhlana, a ndzi nga tshembi leswaku hakunene a ndzi hanya ndzi ri ni vuvabyi lebyi dlayaka enhlokweni ya mina.

“Hambiswiritano, a ndzi nga si swi twisisa kahle leswaku xiyimo xa mina a xi bihe ku fikela kwihi kukondza ndzi endliwa vuhandzuri. Loko ndzi pfuka endzhaku ko endliwa vuhandzuri, a ndzi tsandzeka ni ku tshukatshukisa miri. A ndzi etlela ndzi langute ehenhla. Loko ndzi nga si endliwa vuhandzuri a ndzi kota ku tiendlela xin’wana ni xin’wana, kambe hi xinkarhana a ndzi nga ha koti ku endla nchumu. Loko ndzi ri exibedlhele a ndzi tshama ndzi pfilunganyekile ni ku beriwa pongo hi michini ya kwalaho, tialamu ta xilamulela-mhangu ni ku konya ka vavabyi van’wana. Ku twa ku vava a ku ri ntshamela-maxelo.

“Namuntlha ndzi titwa ndzi antswa. Ndza swi kota ku ti fambela handle ko pfuniwa hi munhu. Kambe a ndzi voni kahle naswona misiha ya mina a yi tirhi kahle.”

Tshama u ri ni langutelo lerinene. Bibele eka Swivuriso 17:22 yi ri: “Mbilu leyi tsakeke i muhanyisi lonene, kambe moya lowu tshovekeke wu omisa marhambu.” Mabel u ri: “Loko ndzi ri karhi ndzi hlakarhela a ndzi langutana ni mintlhontlho leyi vavabyi lava a ndzi va tshungula a va langutana na yona. Vutiolori lebyi a ndzi komberiwe ku byi endla a byi vava swinene naswona minkarhi yin’wana a ndzi ehleketa ku byi tshika. Kambe ndzi tiyiserile kutani ndzi tshika ku ehleketa hi ku va ndzi tshika ku endla vutiolori byebyo hikuva a byi ta ndzi pfuna swinene.”

Vana ni ntshembo leswaku u ta kota ku tiyisela. Mabel u ri: “Ku dyondza Bibele, swi endle ndzi twisisa leswaku ha yini ku humelela makhombo. Nakambe a ndzi swi tiva leswaku loko siku rin’wana ni rin’wana ri hundza, hi va hi tshinela ekusuhi swinene ni nkarhi lowu switlhavi swi nga ta ka swi nga ha vi kona hi ku helela.” *

Tsundzuka leswaku Xikwembu xa khathala hi wena. (1 Petro 5:7) Mabel u tsundzuka ndlela leyi ku tiva mhaka leyi swi n’wi khutazeke ha yona u ri: “Loko va ndzi yisa eka vuhandzuri, ndzi vone ntiyiso wa Esaya 41:10 laha Xikwembu xi nge: ‘U nga chavi, hikuva ndzi na wena.’ Ndzi titwe ndzi ri ni ku rhula ka mianakanyo hi ku tiva leswaku Yehovha Xikwembu u ni mhaka ni leswi ndzi humeleleke.”

Xana a wu swi tiva? Bibele yi dyondzisa leswaku nkarhi wa ta lowu vanhu va nga ta ka va nga ha karhatiwi hi vuvabyi.—Esaya 33:24; 35:5, 6.