Nhlangano Wa Misava Lowu Sirhelelaka Vana wu vula leswaku, “lembe ni lembe, vana lava lavaka ku ringana timiliyoni tinharhu va fa va nga si heta ni n’wheti va velekiwile, va dlayiwa hi mavabyi lawa ma nga tshungulekaka. Vana lava tlulaka 30 wa tiphesente eka nhlayo yoleyo va fa hi siku leri va velekiweke ha rona.”

Vandla ra Rihanyo ra le Nghilandhi, ri vika leswaku hi 2011, eswifundzheni swa 15 swa le London ku ve ni ku andza ka nhlayo ya vanhu lava dlayiweke hi nthyakiso wa moya. Lexi hlamarisaka, hi leswaku ku hambana ni mafurha laman’wana, dizele a ku vuriwa leswaku a yi na khombo naswona a yi wu thyakisi ngopfu moya. Kambe 91 wa tiphesente ta nthyakiso wa moya eswifundzheni sweswo wu huma eka timovha leti tirhisaka dizele.

Ndzavisiso lowu endliweke hi 2013 hi Nhlangano lowu kambisisaka Mavonelo ya Vanhu, wu vika leswaku kwalomu ka 52 wa tiphesente ta vanhu va le Rhaxiya lava nghenaka Kereke ya Orthodox, va vula leswaku a va si tshama va hlaya Bibele naswona 28 wa tiphesente ta vona va vula leswaku a va tali ku khongela.

Bangi ya Misava yi vika leswaku, nkwetlembetano lowu nga kona emapurasini wu endla leswaku ku nga vi na ntshovelo wo tala naswona sweswo swi endla leswaku vusweti byi andza swinene. Emisaveni hinkwayo hafu ya mapurasi lama nga rimiwangiki ma kumeka eAfrika, ku nga mapurasi lawa hi ku leha ma ringanaka 202 wa timiliyoni ta ti hektara, laha ku vuriwaka leswaku ma nga endla ntshovelo lowu ringanaka 25 wa tiphesente loko mo rimiwa hinkwawo.

Tiyunivhesiti ni swikolo swo tala swi le ku siveni ka swipele hi ti-tablet leti nga ni tiprogreme to hlayanyana ni swilo swin’wana. Mhaka leyi vanhu vo tala va ti vutisaka yona hi leswaku ku cinca koloko ku nga va ku durha ku fikela kwihi.