“U nga tshuki u tiendlela xifaniso lexi vatliweke kumbe xivumbeko lexi fanaka ni xilo xihi ni xihi lexi nga ehenhla ematilweni kumbe lexi nga ehansi emisaveni kumbe ematini ehansi ka misava. U nga tshuki u swi nkhinsamela kumbe u yengiwa ku swi tirhela.”—Eksoda 20:4, 5.

Matsalwa ya Xiheveru lama tivekaka tanihi Testamente ya Khale ma swi sola ku gandzela swifaniso

LESWI VANHU VA SWI VULAKA

New Catholic Encyclopedia, yi vula leswaku Vayuda a va ri ni swifaniso swo tala leswi a swi fambisana ni vugandzeri bya vona “naswona swifaniso leswi a swi xiximiwa swi tlhela swi gandzeriwa.” * Hi xikombiso, endzeni ka Encyclopedia yoleyo ku ni swifaniso swo tala leswi vatliweke swa mihandzu, swiluva ni swiharhi leswi khaviseke tempele ya le Yerusalema.—1 Tihosi 6:18; 7:36.

LESWI U FANELEKE U SWI TIVA

Ku hambana ni leswi New Catholic Encyclopedia yi swi vulaka, Vayuda vo tshembeka a va nga swi gandzeli swifaniso leswi vatliweke leswi a swi ri etempeleni. Entiyisweni, a ku kona eBibeleni laha hi hlayaka hi leswaku Vaisrayele vo tshembeka va gandzele swifaniso.

LESWI BIBELE YI SWI VULAKA

Hi ku tirhisa muprofeta Esaya, Xikwembu xi te: “Ku vangama ka mina a ndzi ku nyiki un’wana, ni ku dzunisa ka mina a ndzi ku nyiki swifaniso leswi vatliweke.”—Esaya 42:8.

“Tempele ya Xikwembu yi ni ntwanano wihi ni swifaniso swa hava? . . . Tshikani ku khumba xilo lexi nga basangiki.”—2 Vakorinto 6:16, 17.

“Vakreste vo sungula a va ta va va yi arile mianakanyo yo veka swifaniso ekerekeni, naswona ku swi nkhinsamela kumbe ku swi khongela a va ta swi teka tanihi ku gandzela swifaniso.”—History of the Christian Church

LESWI VANHU VA SWI VULAKA

New Catholic Encyclopedia yi ri: “A swi kanakanisi leswaku Vakreste vo sungula a va swi tirhisa swifaniso evugandzerini bya vona. Emabakweni ya Vakreste ku ni swifaniso swo tala swa Vakreste vo sungula. . . . Hambi ku ri swifaniso swa khale swi khavise makamara yo kwetsima laha a va gandzela kona ni laha a va lahla vanhu kona.” *

LESWI U FANELEKE U SWI TIVA

Swifaniso swa khale leswi kumiweke emabakweni wolawo, lawa vanhu a va lahliwa eka wona a swi ri swa lembe ra vu-200. Swi kumiwe endzhaku ka loko Yesu se a ri na kwalomu ka 200 wa malembe a file. Xisweswo, leswi New Catholic Encyclopedia yi swi vulaka “vugandzeri byo sungula bya Vakreste” a hi byona vugandzeri byo sungula bya Vakreste, lebyi a byi endliwa hi vadyondzisiwa va hi lembe-xidzana ro sungula ni lebyi ku vulavuriwaka ha byona eMatsalweni ya Vukreste ya Xigriki, lama tivekaka hi leswaku i Testamente Leyintshwa. Mhaka ya leswaku swifaniso swo tano a swi ri emabakweni, yi kombisa leswaku hi va-1200, vanhu lava tivulaka Vakreste se a va tekelele mikhuva ya vuhedeni ya ku tirhisa swifaniso, kumbexana a va lava ku tikokela valandzeri. *

LESWI BIBELE YI SWI VULAKA

“Balekelani ku gandzela swifaniso swa hava.”—1 Vakorinto 10:14.

“Tivoneleni swifaniso.”—1 Yohane 5:21.

Bibele a yi wu seketeli mukhuva wa ku tirhisiwa ka swifaniso loko ku gandzeriwa. Hikwalaho ka sweswo, Timbhoni ta Yehovha a ti swi gandzeli swifaniso kumbe ku va ni swifaniso swa vukhongeri emakaya ya tona kumbe etindhawini leti ti gandzelaka eka tona

LESWI VANHU VA SWI VULAKA

New Catholic Encyclopedia yi ri: “Leswi vugandzeri lebyi endliwaka eka xifaniso byi fikaka eka munhu loyi ku gandzeriwaka yena, swi vula leswaku xifaniso xi nga gandzeriwa tanihi lexi yimelaka munhu loyi a gandzeriwaka.”

LESWI U FANELEKE U SWI TIVA

Loko Yesu a dyondzisa valandzeri vakwe ku khongela, a nga va byelanga leswaku va tirhisa swifaniso. Mhaka ya leswaku ku fanele ku tirhisiwa xifaniso loko ku gandzeriwa Xikwembu xa ntiyiso a yi tsariwanga eMatsalweni ya Vukreste ya Xigriki.

LESWI BIBELE YI SWI VULAKA

“U fanele ku gandzela Yehovha Xikwembu xa wena, naswona u fanele ku endlela yena ntsena ntirho wo kwetsima.”—Matewu 4:10.