Leswaku u tikambela, ehleketa hi swiendlakalo leswi landzelaka leswi ngo anakanyiwa.

I mani loyi a wu ta vula leswaku u humelerile eka vanhu lava?

• ALEX

  Alex u ni bindzu. U tshembekile, i munhu wa migingiriko naswona wa xixima. Bindzu rakwe ri famba kahle hikwalaho ka sweswo yena ni ndyangu wakwe va hanya emafurheni.

• CAL

  Cal u ni bindzu leri fanaka ni ra Alex naswona u endla mali yo tala ku tlula Alex. Hambiswiritano, leswaku a kota ku endla mali yo tala, u tirha a nga wisi naswona u ni mavabyi yo tala.

• JANET

  Janet i xichudeni lexa ha riki exikolweni xa le hansi lexi dyondzaka hi ku tiyimisela naswona u rhandza ku dyondza. Hikwalaho ka sweswo, u pasela ehenhla.

• ELLEN

  Ellen u pasela ehenhla ku tlula Janet kambe wa kopela loko a tsala xikambelo naswona a nga xi rhandzi xikolo.

Loko wo vula leswaku Cal na Ellen, kumbe vanhu lava mune hinkwavo, a va humelerile, swi nga ha endleka a wu ta va u pima ku humelela hi vuyelo bya vona ntsena, ku nga khathariseki ndlela leyi va byi kumeke ha yona vuyelo bya kona.

Hi hala tlhelo, loko wo hlawula Alex na Janet ntsena, swi nga ha endleka u pima ku humelela hikwalaho ka vumunhu bya munhu ni ku tiyimisela kawe loko a tirha. Swa twala ku endla tano. Xiya swikombiso leswi landzelaka:

• Hi swihi swilo swa nkoka leswi nga ta vuyerisa Janet nkarhi wo leha—hi leswi a paselaka ehenhla kumbe hi leswi hi ntumbuluko a rhandzaka ku dyondza?

• Hi swi swilo leswi nga swa nkoka eka vana va Alex—hi leswi va hanyaka emafurheni kumbe hi leswi va nga ni tatana loyi a hetaka nkarhi wakwe wo tala na vona?

Ntiyiso wa mhaka hi lowu: Ku humelela loku nga riki ka xiviri ku sekeriwe emianakanyweni; ku humelela ka xiviri ku sekeriwe eka ku rhangisa swilo swa nkoka.