LANGUTELO RA BIBELE
Ku Basa
Xana Xikwembu xi ni mhaka ni ku basa ka hina?
“A hi tibasiseni eka swilo hinkwaswo leswi nyamisaka nyama ni moya.”—2 Vakorinto 7:1.
LESWI BIBELE YI SWI VULAKA
Muvumbi wa hina wa hi rhandza naswona u lava leswaku hi tiphina nkarhi wo leha hi vutomi hi ri ni rihanyo lerinene. Xikwembu xi ri: “Onge mbilu ya wena yi nga hlayisa swileriso swa mina, hikuva u ta engeteriwa masiku yo leha, malembe ya vutomi ni ku rhula.” (Swivuriso 3:1, 2) Ndlela leyi Xikwembu xi va rhandzaka ha yona vanhu yi vonake kahle eka milawu leyi a xi yi nyike Vaisrayele, leyi a yi katsa ni nkongomiso wo karhi loko swi ta emhakeni ya ku basa ni ku ya exihambukelweni. (Deteronoma 23:12-14) Loko Vaisrayele va yingisa milawu yoleyo leyi a yi nga tiki, a va va ni rihanyo lerinene naswona a va sirheleleka eka mavabyi lawa a ma karhata matiko man’wana yo tanihi Egipta lawa a ma nga ri na yona milawu yoleyo ya nkoka.—Deteronoma 7:12, 15.
Hilaha ku fanaka ninamuntlha, vanhu lava “[tibasisaka] eka swilo hinkwaswo leswi nyamisaka nyama,” leswi katsaka mikhuva yo biha yo tanihi ku dzaha, ku dakwa, ni ku tirhisa swidzidziharisi, va sirheleleka eka mavabyi lama vavisaka miri, miehleketo ni ku fa va ha ri vatsongo. Leswi hi ntolovelo hi tshamaka ni vanhu van’wana, hi ta va hi kombisa leswaku ha va anakanyela loko hi yingisa milawu ya Xikwembu leyi fambisanaka ni ku basa.—Marka 12:30, 31.
Xana Xikwembu xi ni mhaka malunghana ni ku basa emahanyelweni ni le vugandzerini?
“Dlayani swirho swa miri wa n’wina . . . malunghana ni vumbhisa, thyaka, ku navela ka vuxaka bya rimbewu, ku navela loku vavisaka, ni ku tshwa, ku nga ku gandzela swifaniso swa hava. Hikwalaho ka swilo sweswo vukarhi bya Xikwembu bya ta.”—Vakolosa 3:5, 6.
LESWI BIBELE YI SWI VULAKA
Hilaha swi vuriweke hakona eku sunguleni, Bibele yi hi khutaza leswaku hi “[tibasisa] eka swilo hinkwaswo leswi nyamisaka nyama ni moya.” Enkarhini wa Yesu Kreste, vanhu vo tala ku katsa ni varhangeri va vukhongeri bya Xiyuda, va endle matshalatshala lamakulu leswaku va tibasisa emirini kambe va honise milawu leyi a yi vulavula hi ku basa emahanyelweni ni le vugandzerini. (Marka 7:1-5) Leswaku a va lulamisa Yesu u te: “A ku na nchumu xa le handle lexi nghenaka eka munhu lexi nga n’wi nyamisaka, leswi xi . . . nghenaka emarhumbyini ya yena, xi humela enkululweni.” U tlhele a ku: “Leswi humaka eka munhu hi swona leswi nyamisaka munhu. Hikuva endzeni, etimbilwini ta vanhu, hi kona laha ku humaka ku anakanya ko biha: vumbhisa, vukhamba, ku dlaya hi vomu, vuoswi, ku navela, swiendlo swa vuhomboloki, vuxisi, ku tikhoma ko biha, tihlo ro xondzolota, . . . ku pfumala ku anakanyela. Swilo leswi hinkwaswo . . . swi nyamisa munhu.”—Marka 7:18-23.
Hi ku ya hi Yesu, vanhu lava tekaka ku basa emirini tanihi mhaka ya nkoka swinene kambe va honisa milawu ya Xikwembu loko swi ta emhakeni ya ku basa emahanyelweni ni le vugandzerini, va fana ni tikhapu leti baseke ehandle kambe ti thyakile endzeni.—Matewu 23:25, 26.
Xana milawu ya Bibele ya tika?
“Ku rhandza Xikwembu, hi kona ku hlayisa swileriso swa xona; kasi loko swi ri swileriso swa xona a swi tiki.”—1 Yohane 5:3.
LESWI BIBELE YI SWI VULAKA
Mikiya 6:8 yi ri: “Xana Yehovha u kombela leswaku u n’wi tlherisela yini, loko ku nga ri ku kombisa vululami ni ku rhandza musa ni ku titsongahata loko u famba ni Xikwembu xa wena?” Xana xexo a hi xikombelo lexi kombisaka ku anakanyela? Ku engetela kwalaho, Muvumbi wa hina u lava leswaku hi n’wi yingisa swi suka embilwini. Loko hi endla tano, hi ta tiphina swinene. (Pisalema 40:8) Loko hi endla xihoxo, hi nga kuma nchavelelo eka Xikwembu tanihi leswi xi nga ni tintswalo. “Kukota loko tatana a kombisa tintswalo eka vana vakwe, Yehovha u kombise tintswalo eka lava va n’wi chavaka. Hikuva yena u ku tiva kahle ku vumbeka ka hina, wa tsundzuka leswaku hi ntshuri,” kumbe leswaku hi tsanile naswona a hi hetisekanga.—Pisalema 103:13, 14.
Hi ku katsakanya, milawu ya Xikwembu leyi vulavulaka hi ku basa emirini, emahanyelweni ni le vugandzerini, yi kombisa tintswalo ni ndlela leyi xi hi rhandzaka ha yona. Ku tiyimisela ka hina ku yingisa milawu leyi, swi kombisa ndlela leyi hi xi rhandzaka ha yona ni leswaku hi tlharihile.
U Nga Ha Tsakela
XIHONDZO XO RINDZA
Xikwembu Xi Ri Yini Hi Ku Dzaha?
Leswi Bibele yi nga vulavuriki hi fole, hi ta swi tiva njhani leswaku Xikwembu xi ri yini hi ku dzaha?
XIHONDZO XO RINDZA
Bibele Yi Hundzula Vutomi—October 2012
Xana swi tise ku yini leswaku vanhu vambirhi va tshika mikhuva ya vona yo biha, leyi katsaka byala ni swidzidziharisi, va va ni ntsako wa xiviri?
XALAMUKA!
Sirhelela Rihanyo Ra Wena
Magoza yo olova yo tisirhelela ma nga ku pfuna leswaku u papalata mavabyi yo tala ni ntshikilelo ku katsa ni ku tlangisa nkarhi ni mali.
