Hi ku ya hi Vandla ra Rihanyo ra Misava Hinkwayo (World Health Organization), vamanana va fanele va sungula ku mamisa vana va vona ku nga si hundza awara a velekiwile naswona n’wana u fanele a mamisiwa ku ringana tin’hweti ta tsevu. Kambe Nkwama wa Vana wa Nhlangano wa Matiko lowu vuriwaka United Nations Children’s Fund wa le Vuxeni ni le Dzongeni wa Afrika, wu vula leswaku swinavetiso leswi yengaka vanhu swi ya emahlweni swi vula leswaku “meleke wa le bodlheleni wu kahle ku fana ni wa manana.”

LESWI BIBELE YI SWI VULAKA: “Un’wana ni un’wana la nga riki na ntokoto u pfumela rito rin’wana ni rin’wana, kambe lowo tlhariha u xiyisisa magoza yakwe.”—Swivuriso 14:15.

Valavisisi va le Montreal va vule leswaku vana lava vatswari va vona va va khomaka hi voko ra nsimbi, va tala ku nyuhela ku tlula vana lava vatswari va vona va ringaniselaka emhakeni yo tshinya.

XANA A WU SWI TIVA? Ndlela leyinene yo kurisa vana i khale yi tsariwile eBibeleni.—Vakolosa 3:21.

Vulavisisi lebyi endliweke hi mindyangu ya Madutch laha vatswari havambirhi va tirhaka, byi vule leswaku vatswari lava nga tirhiki ntirho wo tihanyisa loko va ri ekaya, va va ni vuxaka lebyinene ni vana va vona ku tlula vatswari lava pfumelelaka ntirho wa vona wu va kavanyeta ekaya. Hi xikombiso, ku hlamula riqingho ra mhaka leyi fambisanaka ni ntirho wo tihanyisa swi nga kavanyeta nkarhi lowu a wu fanele u wu heta u ri ni vana va wena.

LESWI U FANELEKE U SWI TSUNDZUKA: “Xin’wana ni xin’wana xi ni nkarhi wa xona.”—Eklesiasta 3:1.