LESWI hi hanyaka eminkarhini yo tika, hi fanele hi tirha hi matimba leswaku hi va ni ku rhula. Hambiloko hi ri ni ku rhula, swi nga ha lava hi tirha hi matimba leswaku hi tshama hi ri na kona. I yini leswi Rito ra Xikwembu ri swi vulaka leswi nga hi pfunaka leswaku hi kuma ku rhula ka ntiyiso? Naswona hi nga va pfuna njhani van’wana leswaku va endla leswi fanaka?

Hi va hi ri ni ku rhula ka ntiyiso loko hi titwa hi sirhelelekile naswona hi ri ni ku rhula ka mianakanyo. Nakambe, hi fanele hi va ni vuxaka lebyinene ni van’wana. Xa nkoka ngopfu, hi fanele hi tlhela hi tikarhatela ku va ni vuxaka bya le kusuhi na Xikwembu. Hi nga swi endlisa ku yini sweswo?

Loko hi yingisa swileriso ni misinya ya milawu ya Yehovha yo lulama, hi kombisa leswaku ha n’wi tshemba naswona hi navela ku va ni vuxaka lebyinene na yena. (Yer. 17:7, 8; Yak. 2:22, 23) Hilaha ku fanaka, na yena u ta tshinela ekusuhi na hina kutani a hi katekisa hi ku hi nyika ku rhula ka ntiyiso. Esaya 32:17 yi ri: “Kutani ntirho wa ku lulama ka ntiyiso wu ta va ku rhula; kasi vutirheli bya ku lulama ka ntiyiso, byi ta va ku miyela ni nsirhelelo hilaha ku nga riki na makumu.” Hi ta kuma ku rhula ka ntiyiso loko hi yingisa Yehovha ku suka embilwini.—Esa. 48:18, 19.

Hi tlhela hi pfuniwa leswaku hi va ni ku rhula, hi nyiko leyi hlamarisaka leyi humaka eka Tata wa hina wa le tilweni, ku nga moya lowo kwetsima.—Mint. 9:31.

Muapostola Pawulo u boxe ku rhula tanihi mfanelo ya vunharhu ya “mihandzu ya moya.” (Gal. 5:22, 23) Leswi ku rhula ka ntiyiso ku humesiwaka hi moya wa Xikwembu, hi fanele hi wu pfumelela leswaku wu hi pfuna hi va ni ku rhula. A hi kambisiseni tindlela timbirhi leti moya wa Xikwembu wu nga hi pfunaka ha tona leswaku hi kuma ku rhula.

 Xo sungula, leswaku hi va ni ku rhula hi fanele hi hlaya Rito ra Xikwembu leri huhuteriweke nkarhi na nkarhi. (Ps. 1:2, 3) Loko hi ri karhi hi anakanyisisa hi rungula ra le Bibeleni, moya wa Xikwembu wu hi pfuna leswaku hi twisisa ndlela leyi Yehovha a anakanyaka ha yona eka swiyimo swo hambanahambana. Hi xikombiso, hi ta tiva leswaku i yini lexi endlaka leswaku a tshama a ri na ku rhula ni leswaku hikwalaho ka yini ku rhula ku ri ka nkoka eka yena. Loko hi tirhisa leswi hi swi dyondzaka eRitweni ra Xikwembu, hi ta va ni ku rhula ka ntiyiso evuton’wini bya hina.—Swiv. 3:1, 2.

Xa vumbirhi, hi fanele hi khongelela moya lowo kwetsima wa Xikwembu. (Luka 11:13) Yehovha u hi tshembisa leswaku loko hi kombela mpfuno wakwe, ‘ku rhula ka Xikwembu loku tlulaka miehleketo hinkwayo ku ta rindza timbilu ta hina ni matimba ya hina ya mianakanyo ha Kreste Yesu.’ (Filp. 4:6, 7) Loko hi titshega hi moya wa Yehovha, Xikwembu xa hina xi hi nyika ku rhula ka miehleketo loku kumiwaka ntsena hi lava va nga na vuxaka lebyinene na xona.—Rhom. 15:13.

Xana van’wana va swi tirhise njhani switsundzuxo leswi, swa le Matsalweni kutani va endla ku cinca ko karhi, loku endleke leswaku va va ni ku rhula na Yehovha swin’we ni vanhu van’wana?

Eka mavandlha ya Vakreste namuntlha, ku ni van’wana lava a va ‘tala ku hlundzuka,’ lava sweswi va anakanyelaka, va nga ni musa, va lehisaka mbilu naswona va tirhisanaka ni van’wana hi ku rhula. * (Swiv. 29:22) Xiya ntiyiso wa mhaka yoleyo eka vahuweleri vambirhi va Mfumo, lava pfuniweke leswaku va hlula ku hlundzuka kutani va tikarhatela ku va ni ku rhula ni vanhu van’wana.

Leswi David a ri na langutelo ro biha, a nga vulavurisani kahle ni vanhu van’wana. Loko a nga si tinyiketela eka Xikwembu, hakanyingi a nga hanyisani kahle ni vanhu van’wana naswona a tirhisa marito yo tlhava loko a vulavurisana ni vandyangu wakwe. Hi ku famba ka nkarhi, David u hundzukile kutani a va munhu wo rhula. I yini lexi n’wi pfuneke leswaku a va munhu wo rhula? U ri: “Ndzi sungule ku tirhisa misinya ya milawu ya Bibele, naswona sweswo swi endle leswaku ndyangu wa mina wu sungula ku ndzi xixima.”

Ndlela leyi Rachel a kurisiweke ha yona yi ve ni  nkucetelo wo biha eka yena. U ri: “Ni sweswi ndza ha lwisana ni ku hlundzuka hikuva ndzi kulele endyangwini lowu ku hlundzuka a ku ri tshamelo maxelo.” I yini lexi n’wi pfuneke leswaku a va munhu wo rhula? U hlamula a ku: “Ndzi pfuniwe hi ku khongela eka Yehovha.”

David na Rachel ko va swikombiso swimbirhi leswi kombaka leswaku loko hi tirhisa misinya ya milawu ya le Matsalweni ni ku kombela Xikwembu leswaku xi hi nyika moya wa xona, hi nga swi kota ku va ni ku rhula. Swi le rivaleni leswaku, hambi leswi hi hanyaka emisaveni yo homboloka, hi nga swi kota ku va ni ku rhula loku nga ta endla leswaku hi kota ku hanyisana kahle ni mindyangu ya hina swin’we ni Vakreste kulobye. Hikwalaho, Yehovha u hi khutaza a ku, “vanani ni ku rhula ni vanhu hinkwavo.” (Rhom. 12:18) Xana sweswo swa koteka naswona hi ta vuyeriwa hi yini loko hi tikarhatela ku va ni ku rhula ni van’wana?

Loko hi chumayela, hi rhamba vanhu leswaku va ta vuyeriwa eka rungula ra ku rhula ra Mfumo wa Xikwembu. (Esa. 9:6, 7; Mat. 24:14) Lexi tsakisaka, vo tala va angule hi ndlela leyinene. Hikwalaho ka sweswo, a va ha hlundzukisiwi kumbe ku hetiwa matimba hi swilo leswi va swi vonaka swi humelela. Ematshan’wini ya sweswo, se va ni ntshembo wa xiviri hi vumundzuku naswona va susumeteleka ‘ku lwela ku kuma ku rhula, ni ku ku landzelela.’—Ps. 34:14.

Hambiswiritano, van’wana a va nga ri tsakeli rungula ra hina eku sunguleni. (Yoh. 3:19) Nilokoswiritano, hi ku pfuniwa hi moya wa Xikwembu, hi va byela mahungu lamanene hi ku rhula ni hi xichavo. Hi ndlela yoleyo, hi va hi landzela xileriso xa Yesu loko hi ri ensin’wini lexi nga eka Matewu 10:11-13 laha a vuleke a ku: “Loko mi nghena endlwini, xewetani va ndyangu; kutani loko yindlu ya kona swi yi fanela, ku rhula loku mi yi navelelaka kona a ku ve eka yona; kambe loko swi nga yi faneli, ku rhula ka n’wina a ku tlhelele eka n’wina.” Loko hi landzela xitsundzuxo xa Yesu, hi ta huma hi ri na ku rhula ka hina ni ku tlhela hi va ni ntshembo wo pfuna munhu yoloye enkarhini lowu taka.

Hi nga tlhela hi endla leswaku ku va ni ku rhula loko hi vulavurisana ni vatirhela mfumo hi xichavo ku katsa ni lava lwisanaka na ntirho wa hina. Hi xikombiso, mfumo wun’wana wa le Afrika wu ale ku hi nyika mpfumelelo wo aka Tiholo ta Mfumo hikwalaho ka xihlawuhlawu. Leswaku mhaka yoleyo yi tlhantlhiwa hi ndlela yo rhula, makwerhu un’wana loyi a nga tshama a tirha tanihi murhumiwa etikweni rero u averiwe leswaku a endzela Khomixinara Nkulu wa tiko rero, eLondon le Nghilandhi. A fanele a byela Khomixinara yaloye hi ntirho wo rhula lowu endliwaka hi Timbhoni ta Yehovha etikweni rakwe. Xana ku ve ni vuyelo byihi?

Loko murhumiwa loyi a hlamusela u te: “Loko ndzi fika ehofisini ya Khomixinara, hi ku xiya ndlela leyi loyi a tirhaka ku amukela vaendzi a ambaleke ha yona, ndzi nambe ndzi swi xiya leswaku u huma eka rixaka rin’wana leri ndzi dyondzeke ririmi ra rona. Kutani ndzi n’wi pfuxele hi ririmi rakwe. Hi ku hlamala u te, ‘Xana ndzi nga ku pfuna hi yini?’ Hi moya wo rhula ndzi n’wi byele leswaku ndzi kombela ku vona Khomixinara Nkulu. U bele Khomixinara riqingho, loyi a teke a ta hlangana na mina kutani a ndzi xeweta hi ririmi ra kwalaho. Endzhaku ka sweswo, u rhiye ndleve loko ndzi ri karhi ndzi n’wi hlamusela hi ntirho wo rhula lowu endliwaka hi Timbhoni.”

Ndlela ya xichavo leyi makwerhu a hlamuseleke ha yona, yi cince ndlela leyi hoxeke leyi Khomixinara a wu teka ha yona ntirho wa hina. Hi ku famba ka nkarhi, mfumo wa tiko rero ra le Afrika wu nyike Timbhoni mpfumelelo wo aka. Anakanya ndlela leyi vamakwerhu a va tsake ha yona loko va twa sweswo! Hakunene, ku komba van’wana xichavo swi ni vuyelo byo tala lebyinene ku katsa ni ku rhula.

Namuntlha, vanhu va Yehovha va tiphina hi paradeyisi ya moya leyi nga ni ku rhula. Na wena u nga hoxa xandla eka ku rhula koloko, hi ku tikarhatela ku va ni mfanelo leyi ya mihandzu ya moya evuton’wini bya wena. Xa nkoka swinene, u ta tsakisa Yehovha naswona u ta tiphina hi ku rhula hilaha ku nga heriki emisaveni leyintshwa ya Xikwembu.—2 Pet. 3:13, 14.