“NTSHOVELO i wukulu, kambe vatirhi a hi vangani. Hikokwalaho kombelani N’wini wa ntshovelo leswaku a rhumela vatirhi entshovelweni wa yena.” (Luka 10:2) Marito lawa, lama vuriweke hi Yesu kwalomu ka malembe ya 2 000 lama hundzeke, ma xi hlamusela kahle xiyimo lexi nga kona eMyanmar. Hikwalaho ka yini? EMyanmar ku ni vahuweleri va kwalomu ka 4 200 lava chumayelaka mahungu lamanene eka vanhu va 55 wa timiliyoni.

Hambiswiritano, “N’wini wa ntshovelo,” Yehovha, u khumbe timbilu ta vamakwerhu va madzana leswaku va suka ematikweni yo hambanahambana va ta etikweni leri, leri nga eDzongavuxa bya Asia leswaku va ta pfuneta entshovelweni. I yini lexi va endleke va suka etikweni ra vona? Va pfuniwe njhani leswaku va kota ku rhurha? Naswona hi yihi mikateko leyi va tiphinaka ha yona? A hi voneni.

Kazuhiro, loyi a nga phayona ra le Japani, u tshame a tlatlalatiwa hi vuvabyi bya switshetshela, a titivala kutani a tsutsumerisiwa exibedlhele. Dokodela u n’wi byele leswaku a nga fanelanga a chayela movha ku ringana malembe mambirhi. Sweswo swi n’wi hete matimba Kazuhiro. U tivutise a ku: ‘Ndzi ta swi kotisa ku yini ku hambeta ndzi endla ntirho lowu ndzi wu rhandzaka wa vuphayona?’ U khongele swi huma embilwini a kombela Yehovha leswaku a n’wi pfuna a kota ku hambeta a phayona.

Kazuhiro u ri: “Endzhaku ka nh’weti, munghana wa mina la phayonaka eMyanmar u twe hi ta khombo leri ndzi weleke. U ndzi fonerile a ku: ‘Laha Myanmar vanhu vo tala va famba hi bazi. Loko wo ta laha, u ta swi kota ku ya emahlweni ni ntirho wo phayona hambiloko u nga ri na movha!’ Kutani ndzi vutise dokodela loko xiyimo xa mina xi ta ndzi pfumelela ku ya eMyanmar. Ndzi hlamarile loko dokodela a ndzi hlamula a ku: ‘Dokodela wa byongo wa le Myanmar u le ndleleni yo ta laha Japani sweswi. Ndzi ta ku hlanganisa na yena. Loko wo tshuka u wa nakambe u ta ku pfuna.’ Ndzi teke nhlamulo ya dokodela yi ri nhlamulo leyi humaka eka Yehovha.”

Handle ko dya nkarhi, Kazuhiro u rhumele imeyili eka rhavi ra le Myanmar a va tivisa leswaku yena ni nsati wakwe va navela ku ya phayona etikweni rero. Endzhaku ka masiku ya ntlhanu ntsena, rhavi ri hlamule ri ku: “Tanani, hi lava maphayona yo tala!” Hikwalaho, Kazuhiro ni nsati wakwe Mari, va xavise timovha ta vona naswona endzhaku ko kuma tivhisa va xave mathikithi ya  xihahampfhuka. Sweswi, va tiphina hi ku tirha ni ntlawa wa ririmi ra mavoko ra le Mandalay. Kazuhiro u ri: “Ntokoto lowu wu tiyise ntshembo wa hina eka xitshembiso xa Xikwembu, lexi kumekaka eka Pisalema 37:5 leyi nge: ‘Andlala ndlela ya wena eka Yehovha, u n’wi tshemba, yena u ta teka goza.’”

Hi 2014, Timbhoni ta Yehovha ta le Myanmar ti ve ni lunghelo ro khoma nhlengeletano yo hlawuleka. Vanhu vo tala lava humaka ematikweni mambe va ve kona enhlengeletanweni leyi. Un’wana wa vona i makwerhu wa xisati la vuriwaka Monique la nga ni malembe ya 35 la humaka eUnited States, u ri: “Loko ndzi huma enhlengeletanweni yoleyo, ndzi khongele eka Yehovha mayelana ni leswi ndzi nga ta swi endla hi vutomi bya mina. Ndzi tlhele ndzi bula ni vatswari va mina hi tipakani ta mina to tirhela Yehovha. Hinkwerhu hi pfumelelanile leswaku ndzi fanele ndzi tlhelela eMyanmar, kambe swi ndzi tekele nkarhi naswona ndzi khongele ko tala ndzi nga si teka xiboho xo rhurha.” Monique u hlamusela xivangelo xa kona.

U ri: “Yesu u khutaze valandzeri vakwe leswaku va ‘hlayela ntsengo.’ Hikwalaho ndzi tivutise ndzi ku: ‘Xana ndzi na wona ntsengo lowu ringaneke? Xana ndzi ta kota ku tihanyisa etikweni rolero handle ko heta nkarhi wo tala entirhweni wo tihanyisa?’ Sweswo swi ndzi pfune ndzi xiya leswaku a ndzi nga ri na mali leyi ringaneke leswaku ndzi kota ku rhurhela eMyanmar.” Loko swi ri tano, u swi kotise ku yini ku rhurha eku heteleleni?—Luka 14:28.

Monique u ri: “Siku rin’wana muthori wa mina u kombele ku ndzi vona. A ndzi chuhile hikuva a ndzi ehleketa leswaku ndzi heleriwe hi ntirho. Kambe a lava ku ndzi khensa hileswi ndzi endlaka ntirho lowunene. U ndzi byele leswaku ndzi ta kuma bonasi, lexi ndzi tsakiseke a ku ri mali leyi a ndzi yi lava leswaku ndzi ta kota ku fikelela pakani ya mina!”

Monique u sungule ku phayona eMyanmar ku sukela hi December 2014. Xana sweswi u titwa njhani leswi a phayonaka laha ku nga ni xilaveko lexikulu? U ri: “Laha ndza tiphina hi ntirho wo chumayela. Sweswi ndzi fambisa tidyondzo ta Bibele tinharhu. Un’wana eka swichudeni swa mina u ni malembe ya 67. Mikarhi hinkwayo loko a ndzi xeweta wa n’wayitela ni ku ndzi angarha. Endzhaku ka loko a dyondze leswaku vito ra Xikwembu i Yehovha a nga ha tikoti hi ku tsaka. U te: ‘I ro sungula evuton’wini bya mina ndzi twa leswaku vito ra Xikwembu i Yehovha. Wena, u fana ni n’wana eka mina kambe u ndzi dyondzise nchumu wa nkoka swinene ku tlula leswi ndzi tshameke ndzi swi dyondza.’ Loko ndzi twa sweswo na mina a ndzi xiririka mihloti ya ntsako. Mitokoto yo fana na leyi, yi endla leswaku ku tirha laha ku nga ni xilaveko lexikulu swi tsakisa.” Monique wa ha ku ya eXikolweni Xa Vachumayeri Va Mfumo.

Xin’wana lexi hlohloteleke van’wana ku ta eMyanmar i Buku Ya Lembe Ya Timbhoni Ta Yehovha Ya 2013 leyi a yi vulavula hi tiko rolero. Makwerhu wa xisati Li, loyi a nga ni malembe ya va-30 u huma eDzongavuxa bya Asia. Hambileswi a a tirha, buku ya lembe yi endle leswaku a anakanyisisa hi ku ya phayona eMyanmar. “Loko ndzi ye enhlengeletanweni yo hlawuleka eYangon hi 2014, ndzi hlangane ni vatekani lava teke ku ta tirha laha ku nga ni xilaveko lexikulu ensin’wini ya Xichayina kwale Myanmar. Leswi ndzi vulavulaka Xichayina, ndzi endle xiboho xo rhurhela eMyanmar leswaku ndzi ya pfuneta ntlawa wolowo wa Xichayina. Ndzi fike ndzi hlangana na Monique kutani hi ye hi ya tirhela eMandalay. Yehovha u hi pfune hi kuma ntirho wo tirha masiku yo karhi ntsena evhikini tanihi mathicara exikolweni xin’we naswona hi kume ndhawu yo tshama ekusuhi ni kwalaho. Hambileswi ku hisaka kambe ndza tiphina hi ntirho wo chumayela endhawini leyi. Vanhu vo tala va le Myanmar a va fuwanga kambe va xixima van’wana naswona va tinyika nkarhi wo yingisela mahungu lamanene. Swa tsakisa ku vona ndlela leyi Yehovha a hatlisisaka ntirho wo chumayela ha yona. Ndza tiyiseka leswaku i ku rhandza ka Yehovha leswaku ndzi va laha Mandalay.”

Vo tala lava tirhaka laha ku nga ni xilaveko lexikulu va xiye leswaku xikhongelo xa pfuna. Anakanya hi Jumpei la nga ni malembe ya 37, ni nsati wakwe Nao lava nga ni malembe ya 35. A va ri eka vandlha ra ririmi ra mavoko eJapani. Hikwalaho ka yini va rhurhele eMyanmar? Jumpei u ri: “I khale mina ni nkatanga hi ri ni pakani yo tirha laha ku nga ni xilaveko lexikulu etikweni rin’wana. A ku ri na makwerhu un’wana evandlheni ra hina ra ririmi ra mavoko eJapani loyi a rhurheleke eMyanmar. Hambileswi a hi nga ri na mali yo tala, hi May 2010 hi rhurhele eMyanmar. Vamakwerhu va le Myanmar va hi amukele hi mandla mambirhi!” Xana Jumpei u titwa njhani hi nsimu ya ririmi ra mavoko ya le Myanmar? U ri, “Ku ni vanhu vo tala lava tsakelaka. Vini va miti va tsaka swinene loko hi va komba tivhidiyo ta ririmi ra mavoko. Ha tsaka leswi hi endleke xiboho xo ta tirhela Yehovha laha!”

Xana Jumpei na Nao a va tihanyisa njhani? “Endzhaku ka malembe manharhu hi ri eMyanmar, se a hi nga ha ri na mali leyi ringaneke leyi a hi ta hakela ha yona ndhawu yo tshama eka lembe leri landzelaka. Hi khongele ko tala swi huma embilwini. Hi kume papila leri humaka erhavini hi nga swi langutelanga, ra xiavelo xo tirha tanihi maphayona yo hlawuleka ya nkarhinyana! A hi tshemba Yehovha naswona a nga hi tshikanga. U hi khathalele hi tindlela hinkwato.” Jumpei na Nao na vona va ha ku ya eXikolweni Xa Vachumayeri Va Mfumo.

I yini lexi susumeteleke Simone, makwerhu la nga ni malembe ya 43 la humaka eItaly ni nsati wakwe Anna, la nga ni malembe ya 37 la humaka eNew Zealand, leswaku va rhurhela eMyanmar? Anna u hlamula a ku: “I Buku Ya Lembe Ya 2013 leyi a yi vulavula hi tiko ra Myanmar.” Simone u ri: “Ku tirha eMyanmar i lunghelo lerikulu. Swa olova ku hanya eMyanmar naswona ndzi kota ku tirhisa nkarhi wo tala entirhweni wa Yehovha. Swa tsakisa ku vona ndlela leyi Yehovha a hi khathalelaka ha yona loko hi ri karhi hi tirha ensin’wini leyi nga ni xilaveko lexikulu.” (Ps. 121:5) Anna u ri: “A ndzi si tshama ndzi va ni ntsako hi ndlela leyi. A hi na swilo swo tala. Ndzi heta nkarhi wo tala ndzi ri na nkatanga naswona sweswo swi endla leswaku rirhandzu ra hina ri kula. Hi tlhele hi kuma vanghana lavantshwa. Vanhu va laha a va ti vengi Timbhoni naswona vo tala va tsakela rungula ra hina!” Hi tindlela tihi?

Anna u ri: “Siku rin’wana ndzi chumayele xichudeni xa le yunivhesiti emakete naswona hi hlele ku tlhela hi hlangana. Loko hi hlangana a xi te ni munghana wa xona. Loko hi tlhela hi hlangana a xi te ni van’wana. Endzhakunyana xi te ni van’wana vo tala. Sweswi ndzi dyondza na ntlhanu wa vona.” Simone u ri: “Vanhu va le nsin’wini leyi va ni xinghana naswona va rhandza ku tiva. Vo tala va tsakela rungula ra hina. Kambe a hi na wona nkarhi lowu ringaneke wo va pfuna.”

Kambe i yini leswi lavekaka loko u lava ku rhurhela eMyanmar? Mizuho, wa le Japani, u ri: “Mina na nuna wa mina Sachio, i khale hi navela ku ya tirha laha ku nga ni xilaveko lexikulu etikweni rin’wana. Kambe a hi ta ya kwihi? Endzhaku ko hlaya mitokoto leyi khumbaka mbilu eka Buku Ya Lembe ya 2013 leyi vulavulaka hi tiko ra Myanmar, hi sungule ku tivutisa loko hi ta swi kota ku  ya tirhela eMyanmar.” Sachio u engeta a ku: “Hi endle xiboho xo endzela dorobankulu ra Myanmar ku nga Yangon ku ringana vhiki leswaku hi ya kambela tiko hi ndlela yo fanekisela. Vhiki rero a ri enerile leswaku hi endla xiboho xo rhurhela kona.”

Rodney ni nsati wakwe Jane, lava humaka eAustralia, lava nga emalembeni ya va-50, ku katsa ni jaha ra vona Jordan ni ntombhi ya vona Danica, va tirhela laha ku nga ni xilaveko lexikulu eMyanmar ku sukela hi 2010. Rodney u ri: “Hi khumbiwe hi vanhu lava nga ni ndlala yo lava ku tiva Xikwembu. Ndzi khutaza mindyangu yin’wana leswaku yi anakanya hi ku ya tirha endhawini yo fana na Myanmar.” Hikwalaho ka yini? “Ntokoto lowu, wu endle leswaku vuxaka bya hina na Yehovha tanihi ndyangu byi kula! Vantshwa vo tala va khomeke ngopfu hi tifoni, timovha, mitirho ni swin’wana. Kasi vana va hina va khomeke hi ku dyondza marito lamantshwa lama va nga ta ma tirhisa ensin’wini. Va tikarhatela ku dyondza ndlela yo hlamulana ni vanhu lava nga tolovelanangiki ni Bibele, ndlela yo hlamula eminhlanganweni ya vandlha naswona va khomeke na hi mitirho yin’wana leyi fambisanaka ni vugandzeri bya hina.”

Oliver, makwerhu loyi a nga ni malembe ya 37 loyi a humaka eUnited States, u hlamusela xivangelo lexi endlaka a bumabumela ntirho lowu, u ri: “Ku tirhela Yehovha ndzi ri ekule ni le kaya swi ndzi tisele mikateko yo tala. Ku va ekule ni le kaya swi ndzi pfune leswaku ndzi titshemba ni ku tshemba Yehovha ku nga khathariseki swiyimo leswi ndzi langutanaka na swona. Ku tirha swin’we ni vanhu lava ndzi nga va tivi, lava rhandzaka Yehovha ku fana na mina, swi endle ndzi swi vona leswaku a xi kona emisaveni lexi nga fanisiwaka ni Mfumo wa Xikwembu.” Ninamuntlha Oliver ni nsati wakwe Anna va ha ya emahlweni va tirha hi ku hiseka ensin’wini ya Xichayina.

Trazel, makwerhu wa xisati la nga ni malembe ya 52, loyi a humaka eAustralia, u sungule ku tirhela eMyanmar ku sukela hi 2004. U ri: “Ndzi khutaza hinkwavo lava swiyimo swa vona swi va pfumelelaka leswaku va ya tirha laha ku nga ni xilaveko lexikulu. Ndzi swi vonile leswaku loko u navela ku ya pfuna, Yehovha u ta katekisa matshalatshala ya wena. A ndzi nga tshembi leswaku ndzi ta hanya vutomi byo tsakisa hi ndlela leyi. Ndzi hanya vutomi byo tsakisa ni lebyi enerisaka.”

Onge mintokoto yo tsakisa ya vamakwerhu lava tirhelaka laha ku nga ni xilaveko lexikulu eMyanmar, yi nga ku susumetela ku pfuna vanhu va timbilu letinene lava nga ensin’wini leyi nga si tshamaka yi tirhiwa. Entiyisweni, lava tirhaka laha ku nga ni xilaveko lexikulu va le ku huweleleni, va ri, “Pelela eMyanmar u ta hi pfuna!”