1. Hi ni xivangelo xihi xo tsaka?

VONA ndlela leyi swi tsakisa ha yona, ku vona ku andza loku nga kona exikarhi ka vanhu va Yehovha! N’wexemu hi fambise tidyondzo ta Bibele leti tlulaka 10 000 000. Leswi swi kombisa leswaku malandza ya Xikwembu ma pfumelela ku voninga ka wona ku vonakala. Nakambe anakanya hi timiliyoni ta vanhu lava tsakelaka lava veke kona eXitsundzuxweni. Va dyondze hi rirhandzu leri Xikwembu xi hi kombiseke rona hi ku hi nyika nkutsulo.—1 Yoh. 4:9.

2, 3. (a) Hi xihi xihinga lexi nga hi siveriki ku voninga “kukota mavoningo”? (b) Hi ta kambisisa yini eka xihloko lexi?

² Emisaveni hinkwayo, vanhu va Yehovha va vulavula tindzimi to hambanahambana. Hambiswiritano, leswi a swi hi siveli leswaku hi dzunisa Tata wa hina Yehovha hi vun’we. (Nhlav. 7:9) Ku nga khathariseki ririmi leri hi ri vulavulaka kumbe laha hi tshamaka kona, hi nga voninga “kukota mavoningo emisaveni.”—Filp. 2:15.

³ Ku andza loku hi ku vonaka ni vun’we lebyi hi tiphinaka ha byona ku katsa ni langutelo ro rindza leri hi tikarhatelaka ku ri hlayisa, swi yisa ku dzuneka eka Yehovha. Eka xihloko lexi, hi ta kambisisa ndlela leyi sweswo swi kotekaka ha yona.—Hlaya Matewu 5:14-16.

4, 5. (a) Ku engetela eka ntirho wo chumayela, hi nga voninga hi ndlela yihi? (b) Hi byihi vuyelo lebyi hi nga vaka na byona loko hi n’wayitela? (Vona xifaniso lexi nga eku sunguleni.)

⁴ ‘A ku na munhu la nga vulaka leswaku wa tshembeka eka Hosi emasikwini lama seleke ya makumu . . . handle ka loko a pfumelela ku voninga kakwe ku vonakala.’ Wolawo i marito lama kumekaka eka nhlokomhaka leyi nge, “Light in the Darkness,” leyi humesiweke eka Xihondzo xo Rindza xa Xinghezi xa June 1, 1925. Xihloko xexo xi te: ‘Munhu u fanele a endla tano hi ku chumayela mahungu lamanene eka vanhu hinkwavo ni hi ku hanya hi ku pfumelelana ni tindlela ta ku vonakala.’ Swi le rivaleni leswaku ndlela yin’wana leyi hi voningaka ha yona, i ku chumayela mahungu lamanene ni ku endla vadyondzisiwa. (Mat. 28:19, 20) Ku engetela kwalaho, hi nga vangamisa Yehovha hi mahanyelo ya hina ya Vukreste. Vini va miti ni lava hi hlanganaka na vona va ma xiya matikhomelo ya hina. Ku n’wayitela ka hina ni maxewetelo ya hina ku nga va byela leswaku hi vanhu va njhani ni leswaku hi gandzela Xikwembu xa njhani.

⁵ Yesu u byele vadyondzisiwa vakwe a ku: “Loko mi nghena endlwini, xewetani va ndyangu.” (Mat. 10:12) Laha Yesu ni vaapostola a va tala ku chumayela kona, a swi tolovelekile leswaku vanhu va amukela vanhu lava nga va tiveki emakaya ya vona. Kambe a swi tano etindhawini to tala namuntlha. Hambiswiritano, loko u kombisa xinghana loko u ri karhi u hlamusela xivangelo xo va endzela, va nga ha ntshunxeka ivi va ku yingisela. Hakanyingi swa pfuna ku sungula hi ku n’wayitela. Sweswo swi tlhela swi pfuna ni le ka vamakwerhu lava chumayelaka hi ku tirhisa xigolonyana xa minkandziyiso. Loko u ri karhi u chumayela hi ndlela yoleyo, u ta xiya leswaku hakanyingi vanhu va angula kahle loko u n’wayitela ni ku va xeweta. Swi nga ha va susumetela ku ta va ta teka minkandziyiso ya hina. Ku n’wayitela ka wena ku nga tlhela ku ku pfuna leswaku u sungula bulo.

6. Vadyuhari van’wana lava tekaneke va wu ndlandlamuxe njhani ntirho wa vona wo chumayela?

⁶ Vadyuhari van’wana lava tekaneke va le Nghilandhi a va ha chumayeli hi xitalo hi yindlu ni yindlu hikwalaho ka mavabyi. Va endle xiboho xo voninga va ri ehandle ka muti wa vona. Va veka minkandziyiso ya Bibele etafuleni hi nkarhi lowu vatswari va landzaka vana exikolweni lexi nga ekusuhi ni muti wa vona. Vatswari vo tala va teke tibuku ta, Swivutiso Leswi Vantshwa Va Swi Vutisaka—Tinhlamulo Leti Tirhaka tivholumo 1 na 2 na tibroxara. Makwerhu wa xisati wa le vandlheni ra vona la nga phayona u tile a ta tirha na vona. Ku n’wayitela ka phayona rolero ni matshalatshala ya vadyuhari volavo swi susumetele mutswari un’wana leswaku a amukela dyondzo ya Bibele.

7. U nga va pfuna njhani vanhu lava ha ku fikaka endhawini ya ka n’wina?

⁷ Emalembeni ya sweswinyana, vanhu vo tala va balekele ematikweni man’wana. I yini leswi u nga swi endlaka leswaku u pfuna vanhu volavo leswaku va tiva Yehovha ni xikongomelo xakwe? Xo sungula, hikwalaho ka yini u nga dyondzi ku xeweta hi ririmi leri vulavuriwaka hi vanhu lava ha ku fikaka endhawini ya ka n’wina? JW Language app, yi nga ku pfuna leswaku u kota ku endla tano. Nakambe, hikwalaho ka yini u nga dyondzi swiga swi nga ri swingani leswi nga ta pfuxa ku tsakela ka vona? Kutani u nga ha va kongomisa eka jw.org naswona u va komba tivhidiyo ni minkandziyiso yo hambanahambana leyi nga kona hi ririmi ra vona.—Det. 10:19.

8, 9. (a) Hi pfuniwa njhani eka minhlangano ya le xikarhi ka vhiki? (b) Xana vatswari va nga va pfuna njhani vana leswaku va hlamula eminhlanganweni?

⁸ Hikwalaho ka rirhandzu, Yehovha u hi lunghiselele Nhlangano Wa Mahanyelo Ni Ntirho Wo Chumayela leswaku hi ta va vachumayeri lava humelelaka. Swiletelo leswi hi swi kumaka eka nhlangano wolowo swi endla leswaku swi hi olovela ku  endla maendzo yo vuyela ni ku fambisa tidyondzo ta Bibele.

⁹ Vo tala lava taka eminhlanganweni ya hina va xiye leswaku ni vana va hlamula. Vatswari, pfunani vana va n’wina leswaku va voninga hi ku va dyondzisa ku hlamula hi marito ya vona. Tinhlamulo ta vona to koma, leti humaka embilwini mikarhi yin’wana ti susumetele lava teke eminhlanganweni leswaku va va Vakreste.—1 Kor. 14:25.

10. Xana vugandzeri bya ndyangu byi kondletela vun’we hi ndlela yihi?

¹⁰ Ndlela yin’wana yo pfumelela ku voninga ka wena ku vonakala, i ku kondletela vun’we endyangwini ni le vandlheni ra ka n’wina. Ndlela yin’wana leyi vatswari va nga endlaka leswi ha yona, i ku va ni Vugandzeri bya Ndyangu nkarhi ni nkarhi. Vo tala va katsa ni ku hlalela Vuhaxi bya JW hi siku ro karhi enh’wetini. Endzhaku ko hlalela nongonoko lowu, swi nga va njhani loko mo bula hi ndlela leyi mi nga swi tirhisaka ha yona leswi mi swi dyondzeke? Loko vatswari va ri karhi va fambisa vugandzeri bya ndyangu va fanele va tsundzuka leswaku nkongomiso lowu vana va wu lavaka, a wu nge fani ni lowu laviwaka hi vantshwa. Kombisa ndlela leyi xirho xin’wana ni xin’wana endyangwini xi nga swi tirhisaka ha yona leswi xi swi dyondzaka.—Ps. 148:12, 13.

11-13. Xana hinkwerhu hi nga kondletela vun’we hi ndlela yihi evandlheni naswona hi nga va pfuna njhani van’wana ku endla leswi fanaka?

¹¹ Xana vantshwa va nga kondletela vun’we hi ndlela yihi evandlheni kutani va khutaza van’wana ku endla leswi fanaka? Loko u ri muntshwa, hikwalaho ka yini u nga tivekeli pakani yo khathala hi lava dyuhaleke? U nga ha va kombela va ku hlamusela leswi va pfuneke leswaku va hambeta va tirhela Yehovha. Leswi va nga ta ku byela swona swi ta ku khutaza naswona wena na vona mi ta hambeta mi khutaza lava taka eminhlanganweni. Nakambe hinkwerhu hi nga tiyimisela ku amukela lava taka eminhlanganweni eHolweni ya Mfumo. Loko u endla tano, u ta va u kondletela vun’we naswona u nga ha khutaza vaendzi leswaku na vona va navela ku va xiphemu xa vandlha ra Xikwembu. Matshalatshala ya wena ma nga katsa ku xeweta vaendzi u ri karhi u n’wayitela kumbexana hambi ku ri ku va pfuna va kuma ndhawu yo tshama. Ringeta ku va tivisa eka van’wana leswaku va titwa va amukelekile.

¹² Loko u averiwe ku fambisa nhlangano wa ntirho wa nsimu, u nga pfuna vadyuhari leswaku va hlanganyela eku chumayeleni. Tiyiseka leswaku va ni nsimu leyi va nga kotaka ku  ya tirha eka yona. Eka swiyimo swin’wana, swi nga ha lava leswaku u va avela ku tirha ni muntshwa la nga ta va seketela. Nakambe u nga ha tlhela u kombisa ku anakanyela eka lava nga kotiki ku endla swo tala hikwalaho ka mavabyi ni swiyimo swin’wana. Entiyisweni, ku anakanyela ni ku twisisa ka n’wina ku nga pfuna lavakulu ni lavatsongo, lava nga ni ntokoto ni lava nga riki na ntokoto leswaku va chumayela mahungu lamanene hi ku hiseka.—Lev. 19:32.

¹³ Mupisalema u susumeteleke ku vula a ku: “Mawaku ndlela leyi swi nga swinene ha yona ni ku tsakisa ha yona loko vamakwavo va tshama swin’we hi vun’we!” (Hlaya Pisalema 133:1, 2.) Loko Vaisrayele va ri swin’we ni vagandzeri van’wana va Yehovha, a va vuyeriwa eka nkucetelo lowunene wa van’wana. A swi fana ni mafurha yo tota lama a ma phyuphyisa ni ku tsakisa. Hikwalaho ka yini u nga tikarhateli ku kondletela vun’we exikarhi ka vamakwerhu? Loko ku ri leswi u nga eku swi endleni, wa bumabumeriwa. Xana u nga ‘ndlandlamuka,’ leswi vulaka ku swi endla hilaha ku engetelekeke naswona u swi endla nkarhi ni nkarhi?—2 Kor. 6:11-13.

14. Xana u nga endla yini leswaku u pfuna vaakelani va wena ku dyondza Bibele?

¹⁴ Xana u nga engetela matshalatshala lama u ma endlaka yo pfuna vaakelani va wena ku dyondza Bibele? Marito ni swiendlo swa wena swa musa swi nga susumetela muakelani leswaku a lava ku dyondza Bibele. Tivutise: ‘Xana vaakelani va mina va ndzi tiva ndzi ri munhu wa njhani? Xana kaya ra mina ri tshama ri basile leswaku ri va xikombiso lexinene eka vaakelani? Xana ndzi va wo rhanga ku pfuna van’wana?’ Loko u ri karhi u bula ni Vakreste van’wana, va kombele va ku byela ndlela leyi mahanyelo ya vona lamanene ni swiendlo swa musa swi ma khumbeke ha yona maxaka ya vona, vaakelani, vatirhikulobye kumbe swichudenikolobye. Hakanyingi u ta twa mintokoto leyi tsakisaka.—Efe. 5:9.

15. Hikwalaho ka yini swi ri swa nkoka leswaku hi tshama hi rindzile?

¹⁵ Langutelo ra hina i ra nkoka loko hi ri karhi hi tikarhatela ku pfumelela ku voninga ka hina ku vonakala. Hi ku phindhaphindha, Yesu u khutaze vadyondzisiwa vakwe a ku: “Tshamani mi rindzile.” (Mat. 24:42; 25:13; 26:41) Swi le rivaleni leswaku loko hi tshemba leswaku “nhlomulo lowukulu” wa ha ri ekule ni leswaku a wu nge fiki ha ha hanya, a hi nge xi voni xilaveko xo hisekela ntirho wo chumayela. (Mat. 24:21) Ematshan’weni yo va hi voninga eka vaakelani va hina, hi nga ha tsana kumbe hi tshika ku tirhela Yehovha.

16, 17. I yini leswi u nga swi endlaka leswaku u tshama u rindzile?

¹⁶ Leswi mikarhi leyi yo tika yi yaka yi nyanya ku biha, i swa nkoka leswaku hinkwerhu hi tshama hi rindzile. Loko Yehovha a teka goza, ku ta va ku ri nkarhi lowu faneleke. A hi kanakani hi sweswo. (Mat. 24:42-44) Kambe sweswi, hi fanele hi lehisa mbilu hi ku tshama hi rindzile. Hlaya Rito ra Xikwembu siku ni siku naswona u xalamuka eswikhongelweni. (1 Pet. 4:7) Tekelela swikombiso swa vamakwerhu lava swi kombisaka hi vutomi bya vona leswaku va tsakela ku tshama va rindzile ni leswaku va pfumelela ku voninga ka vona ku vonakala. Xikombiso xin’wana lexinene xi kumeka eka xihloko lexi nge: “Ku Heta Malembe Ya 70 Ndzi Khome Nguvu Ya Muyuda,” lexi nga eka Xihondzo xo Rindza xa April 15, 2002, matluka 18-21.

¹⁷ Tshama u khomekile hi mitirho leyinene naswona u tikarhatela ku va ni vanghana lavanene. Sweswo swi ta endla leswaku u va ni ntsako naswona u ta vona nkarhi wu famba hi ku hatlisa. (Efe. 5:16) Eka malembe ya dzana lama hundzeke, vamakwerhu a va tshama va khomekile naswona va fikelele swo tala. Kambe namuntlha hi ku kongomisiwa hi voko ra Yehovha, hi fikelela swo tala swinene. Hi pfumelela ku voninga ka hina ku vonakala ku tlula rini na rini.

18, 19. Vakulu va vandlha va nga hi pfuna njhani leswaku hi xalamuka ni ku va lava hisekaka? Kombisa.

 ¹⁸ Swi tiyisa ripfumelo ku tiva leswaku ku nga hetiseki ka hina a ku hi siveli ku tirhela Yehovha. Hikwalaho, hi fanele hi kombisa ku tlangela lunghiselelo ra Yehovha ra “tinyiko leti nga vanhu,” ku nga vakulu va vandlha. (Hlaya Vaefesa 4:8, 11, 12.) Loko nkulu a ku endzela, tirhisa nkarhi wolowo leswaku u vuyeriwa eka vutlhari ni switsundzuxo swakwe.

¹⁹ Vatekani van’wana va le Nghilandhi lava a va ri ni swiphiqo, va kombele mpfuno eka vakulu vambirhi. Nsati wa kona a a twa onge nuna wakwe a nga byi hetisisi vutihlamuleri byakwe byo rhangela evugandzerini. Nuna wakwe u vule leswaku a nga na vuswikoti byo dyondzisa naswona a a nga ma endli malunghiselelo ya vugandzeri bya ndyangu bya nkarhi ni nkarhi. Vakulu va bule na vatekani volavo hi xikombiso xa Yesu. A a khathalela swilaveko swa vadyondzisiwa vakwe. Kutani vakulu va kombele nuna wa kona leswaku a tekelela Yesu. Va khutaze nsati wa kona leswaku a lehisa mbilu. Vakulu va tlhele va nyika vatekani volavo swiringanyeto leswi pfunaka swa ndlela leyi va nga khomisanaka ha yona leswaku va va ni vugandzeri bya ndyangu swin’we ni vana va vona vambirhi. (Efe. 5:21-29) Hi ku famba ka nkarhi, vakulu volavo va bumabumele nuna wa kona hikwalaho ka matshalatshala lama a ma endleke. Va tlhele va n’wi khutaza leswaku a phikelela ni ku titshega hi moya lowo kwetsima leswaku wu n’wi pfuna a kota ku rhangela evugandzerini tanihi nhloko ya ndyangu. Ku khathala ni nseketelo lowu vakulu va wu kombeke ndyangu lowu, swi wu pfune leswaku wu pfumelela ku voninga ka wona ku vonakala.

20. I yini leswi u nga swi langutelaka loko u ri karhi u pfumelela ku voninga ka wena ku vonakala?

²⁰ Mupisalema u yimbelele a ku: “Wa tsaka un’wana ni un’wana la chavaka Yehovha la fambaka etindleleni takwe.” (Ps. 128:1) U ta va ni ntsako hilaha ku engetelekeke, loko u pfumelela ku voninga ka wena ku vonakala hi ku pfuna van’wana leswaku va ta gandzela Xikwembu, hi ku tikhoma hi ndlela leyi kondletelaka vun’we ni ku tshama u rindzile. Van’wana va ta yi vona mitirho ya wena leyinene naswona vo tala va ta susumeteleka ku vangamisa Tata wa hina.—Mat. 5:16.