Xana u yi hlaye hi vukheta minkandziyiso ya sweswinyana ya Xihondzo xo Rindza? A hi vone loko u ta swi kota ku hlamula swivutiso leswi landzelaka:

Hi swihi swiringanyeto swa mune leswi nga hi pfunaka ku antswisa ndlela leyi hi yimbelelaka ha yona?

Hi nga tlakusela buku ya tinsimu ehenhla kutani hi ololoxa nhloko. Hi fanele hi hefemula kahle. Loko hi wu pfula swinene nomu ni ku yimbelela hi rito ra le henhla, hi ta kota ku yimbelela hi ndlela leyi twakalaka.— w17.11, tl. 5.

I yini leswi hi tsakisaka hi tindhawu leti miti ya vutumbelo a yi ri eka tona eIsrayele swin’we ni magondzo lama a ma ya eka yona?

A ku ri ni miti ya tsevu ya vutumbelo leyi a yi hangalakile etikweni hinkwaro, ni magondzo lama a ma lunghisiwe kahle lama a ma ya eka yona. Munhu a ta kuma vutumbelo hi ku hatlisa.—w17.11, tl. 14.

Hikwalaho ka yini nyiko ya Xikwembu ya nkutsulo ha Yesu, yi ri nyiko leyinene ku tlula hinkwato leti hi nga nyikiwaka tona?

Yi enerisa ku navela ka hina ko hambeta hi hanya naswona yi enerisa xilaveko xa hina xo lava ku ntshunxiwa eka xidyoho ni rifu. Leswi Xikwembu xi rhandzaka vana va Adamu, xi nyikele hi Yesu leswaku a va nkutsulo eka hina loko ha ha ri vadyohi.—wp17.6, matl. 6-7.

Hi swi tivisa ku yini leswaku Pisalema 118:22 yi kombetela eka ku pfuxiwa ka Yesu?

Yesu u bakanyiwile tanihi Mesiya a tlhela a dlayiwa. Leswaku a va “nhloko ya yinhla,” a fanele a pfuxiwa eku feni.—w17.12, matl. 9-10.

Xana ndyangu lowu Mesiya a ta velekiwa eka wona a swi lava leswaku wu huma eka ntlhandlamano wa mindyangu ya vana va mativula?

A swi nga bohi leswaku munhu a va mativula leswaku a ta va kokwa wa Mesiya. Davhida a nga ri n’wana wa mativula wa Yese kambe Mesiya u tswariwe endyangwini wa Davhida.—w17.12, matl. 14-15.

Hi yihi misinya yin’wana ya milawu ya le Bibeleni leyi tirhaka etimhakeni ta swa vutshunguri?

Eka Nawu lowu a wu nyikiwe Muxe, a swi nga pfumeleriwi leswaku vanhu lava nga ni vuvabyi lebyi tlulelaka va tshama ni vanhu van’wana. Vanhu a va fanele va hlamba endzhaku ko khumba ntsumbu. Nawu a wu swi vurile leswaku thyaka ra munhu ri fanele ri seleteriwa. N’wana wa mufana a a fanele a yimbisiwa loko a ri ni masiku ya nhungu, leswi a swi ri swinene tanihi leswi wolowo ku nga nkarhi lowu ngati yi kotaka ku mpfempfa kahle.—wp18.1, tl. 7.

Hikwalaho ka yini swi nga hoxanga leswaku Vakreste va tirhandza?

Hi fanele hi rhandza warikwerhu hilaha hi tirhandzaka ha kona. (Mar. 12:31) Vavanuna va fanele va “rhandza vasati va vona ku fana ni mimiri ya vona.” (Efe. 5:28) I ntiyiso leswaku munhu a nga ha tirhandza hi ndlela leyi hundzeletiweke.—w18.01, tl. 23.

I yini leswi hi nga swi endlaka leswaku hi kula hi tlhelo ra moya?

Hi fanele hi dyondza Rito ra Xikwembu hi tlhela hi anakanyisisa hi rona naswona hi hanya hi leswi hi swi dyondzaka. Hi fanele hi pfumelela moya lowo kwetsima leswaku wu kongomisa mianakanyo ni timbilu ta hina naswona hi amukela ku pfuniwa hi van’wana.—w18.02, tl. 26.

Hikwalaho ka yini hi nga fanelanga hi langutela leswaku vangoma lava tirhisaka swilo swa le mpfhukeni ni vavhumbhi va hi byela hi vumundzuku?

Ku ni swivangelo swo tala kambe xivangelo lexikulu hi leswaku Bibele ya swi sola swiendlo sweswo hinkwaswo.—wp18.2, matl. 4-5.

Hi rihi langutelo leri hi faneleke hi va na rona loko hi rhamberiwe eswakudyeni?

Loko hi amukele xirhambo, hi fanele hi tshembeka. (Ps. 15:4) A hi fanelanga hi cinca, hi nga ha yi, ku nga ri na xivangelo lexi twalaka. Swi nga ha endleka leswaku loyi a ku rhambeke a tirhe hi matimba ku lunghiselela swakudya.—w18.03, tl. 18.

Vakulu ni malandza ya vutirheli va nga dyondza yini eka Timotiya?

Timotiya a khathala swinene hi vanhu naswona a rhangisa ntirho wo chumayela. A a tirha hi matimba entirhweni wo kwetsima naswona a tirhisa leswi a swi dyondzeke. U ye emahlweni a tiletela ni ku titshega hi moya wa Yehovha. Vakulu ni van’wana va nga tekelela xikombiso xakwe.—w18.04, matl. 13-14.