1-2. Hikwalaho ka yini Yesu a karhatekile?

HI SIKU rakwe ro hetelela a ri munhu wa nyama, Yesu a karhatekile. Vanhu vo homboloka a va ta n’wi xanisa ni ku n’wi dlaya hi ndlela ya tihanyi. Kambe Yesu a a nga karhatiwi ntsena hileswi a ri ekusuhi ni ku dlayiwa. A n’wi rhandza swinene Tata wakwe naswona a lava ku n’wi tsakisa. Yesu a swi tiva leswaku loko o kota ku tshama a tshembekile kukondza a fa eka ndzingo lowu a wu ri ekusuhi ni ku n’wi wela, a ta susa swisandzu evitweni ra Yehovha. Nakambe Yesu a rhandza vanhu naswona a swi tiva leswaku hi ta va ni ntshembo wo hanya hilaha ku nga heriki ntsena loko a tshama a tshembekile eka Yehovha kukondza a fa.

² Hambileswi Yesu a ri ehansi ka ntshikilelo lowukulu, a ri ni ku rhula. U byele vaapostola vakwe a ku: “Ndzi mi nyika ku rhula ka mina.” (Yoh. 14:27) A ri ni “ku rhula ka Xikwembu,” ku nga ku rhula loku munhu a vaka na kona hi leswi a nga ni vuxaka lebyinene na Yehovha. Ku rhula koloko ku pfune Yesu leswaku a nga vileli.—Filp. 4:6, 7.

3. I yini leswi hi nga ta swi kambisisa eka xihloko lexi?

³ Ku hava ni un’we wa hina loyi a nga xanisekaka ku fana na Yesu kambe hinkwavo lava n’wi landzelaka va ta weriwa hi miringo. (Mat. 16:24, 25; Yoh. 15:20) Naswona ku fana na Yesu, mikarhi yin’wana hi ta titwa hi karhatekile. Hi nga endla yini leswaku hi papalata ku vilela ngopfu kutani hi lahlekeriwa hi ku rhula ka mianakanyo? A hi kambisiseni swilo swinharhu leswi Yesu a swi endleke hi nkarhi wa vutirheli byakwe bya laha misaveni kutani hi vona ndlela leyi hi nga n’wi tekelelaka ha yona loko hi weriwa hi miringo.

4. U ri karhi u ehleketa hi 1 Vatesalonika 5:17, vula swikombiso leswi kombisaka leswaku Yesu u khongele ko tala hi siku rakwe ro hetelela laha misaveni?

⁴ Hlaya 1 Vatesalonika 5:17. Yesu u khongele ko tala hi siku rakwe ro hetelela a nga si fa. Loko a simeka xitsundzuxo xa rifu rakwe, u khongelele xinkwa ni vhinyo. (1 Kor. 11:23-25) Loko va nga si suka laha a va endle Paseka kona, u khongele swin’we ni vadyondzisiwa vakwe. (Yoh. 17:1-26) Loko yena ni vadyondzisiwa vakwe va fika eNtshaveni ya Mitlhwari, u khongele hi ku phindhaphindha. (Mat. 26:36-39, 42, 44) Marito yo hetelela lama Yesu a ma vuleke loko a nga si fa a ku ri xikhongelo. (Luka 23:46) Yesu u khongele eka Yehovha malunghana ni xin’wana ni xin’wana lexi endlekeke hi siku ro hetelela ra vutomi byakwe.

5. Hikwalaho ka yini vaapostola va tsandzeke ku va ni xivindzi?

⁵ Xivangelo xin’wana lexi endleke Yesu a kota ku tiyisela ndzingo hileswi a khongela nkarhi na nkarhi a kombela Tata wakwe leswaku a n’wi pfuna. Hi hala tlhelo, vaapostola va tsandzekile ku phikelela exikhongelweni hi vusiku byebyo. Hikwalaho ka sweswo va tsandzeke ku va ni xivindzi loko va langutana ni ndzingo. (Mat. 26:40, 41, 43, 45, 56) Loko hi weriwa hi miringo, hi ta tshama hi tshembekile ntsena loko hi landzela xikombiso xa Yesu kutani hi “hambeta [hi] khongela.” I yini leswi hi nga swi khongelelaka?

6. Xana ripfumelo ri ta hi pfuna njhani leswaku hi tshama hi ri ni ku rhula?

⁶ Hi nga khongela eka Yehovha leswaku a hi “[nyika] ripfumelo leri engetelekeke.” (Luka 17:5; Yoh. 14:1) Hi fanele hi va ni ripfumelo hikuva Sathana u ta ringa hinkwavo lava landzelaka Yesu. (Luka 22:31) Xana ripfumelo ri ta hi pfuna njhani ku va lava rhuleke loko hi tshamela ku va ni swiphiqo? Endzhaku ko endla matshalatshala hinkwawo leswaku hi hlula swiphiqo,  ripfumelo ri ta hi pfuna leswaku hi tshika ku vilela hikuva ha swi tiva leswaku Yehovha u ta swi lulamisa hi nkarhi lowu faneleke. Hi ta va ni ku rhula ka miehleketo ni mbilu hileswi hi tshembaka leswaku wa swi tiva leswi a faneleke a swi endla ku tlula hina.—1 Pet. 5:6, 7.

7. I yini leswi u swi dyondzaka eka marito ya Robert?

⁷ Xikhongelo xi hi pfuna leswaku hi tshama hi ri ni ku rhula ka mianakanyo ku nga khathariseki miringo leyi yi hi welaka. Xiya xikombiso xa Robert, nkulu loyi sweswi a nga emalembeni ya va 80. U ri: “Ndzayo leyi nga eka Vafilipiya 4:6, 7 yi ndzi pfune ku langutana ni miringo yo tala evuton’wini bya mina. Ndzi tshame ndzi va ni swiphiqo swa timali. Nakambe ndzi tshame ndzi tekeriwa lunghelo ro va nkulu.” I yini leswi pfuneke Robert leswaku a tshama a ri ni ku rhula ka mianakanyo? U ri: “Loko ndzi sungula ku vilela a ndzi namba ndzi khongela. Loko ndzi khongela nkarhi na nkarhi naswona hi mbilu hinkwayo a ndzi titwa ndzi ri na ku rhula.”

8. Hilaha swi tsariweke hakona eka Yohane 8:29, hi xihi xivangelo xin’wana lexi endleke leswaku Yesu a va ni ku rhula ka mianakanyo?

⁸ Hlaya Yohane 8:29. Hambiloko Yesu a ri karhi a xanisiwa a a ri ni ku rhula ka mianakanyo hikuva a swi tiva leswaku u tsakisa Tata wakwe. U tshame a ri karhi a yingisa hambiloko mikarhi yin’wana swi n’wi tikela ku endla tano. A rhandza Tata wakwe naswona ku tirhela Yehovha a ku ri swa nkoka swinene evuton’wini byakwe. Loko a nga si ta laha misaveni a ri “mutirhi la nga ni vuswikoti” eka Xikwembu. (Swiv. 8:30) Loko a ha ri laha misaveni a hisekela ku dyondzisa van’wana hi Tata wakwe. (Mat. 6:9; Yoh. 5:17)  Sweswo a swi endla leswaku Yesu a tsaka swinene.—Yoh. 4:34-36.

9. Hikwalaho ka yini hi va ni ku rhula ka mianakanyo loko hi khomeka hi ntirho wo chumayela?

⁹ Hi nga tekelela Yesu hi ku yingisa Yehovha naswona “nkarhi hinkwawo [hi] va ni swo tala swo swi endla entirhweni wa Hosi.” (1 Kor. 15:58) Loko hi “khomeka ngopfu” entirhweni wo chumayela, hi ta va ni langutelo lerinene hi swiphiqo swa hina. (Mint. 18:5) Hi xikombiso, lava hi hlanganaka na vona ensin’wini hakanyingi va ni swiphiqo swo tala ku tlula swa hina. Kambe loko va dyondza ku rhandza Yehovha ni ku tirhisa ndzayo yakwe, vutomi bya vona byi ya byi antswa kutani va va lava tsakeke. Nkarhi na nkarhi loko hi vona sweswo swi endleka ha tiyiseka leswaku Yehovha u ta hi khathalela. Ku tiyiseka ko tano ku hi pfuna leswaku hi va ni ku rhula ka mianakanyo. Makwerhu wa xisati loyi a titwa a ri xikangalafula naswona a tshikilelekile ku ringana nkarhi wo leha u vone sweswo swi ri ntiyiso. U ri: “Loko ndzi khomeka evutirhelini ndzi kota ku lawula ndlela leyi ndzi titwaka ha yona naswona ndza tsaka. Ndzi ehleketa leswaku sweswo swi vangiwa hi leswi loko ndzi ri ensin’wini ndzi titwaka ndzi ri ekusuhi swinene na Yehovha.”

10. I yini leswi u swi dyondzaka eka marito ya Brenda?

¹⁰ Nakambe ehleketa hi xikombiso xa makwerhu wa xisati Brenda. Yena swin’we ni n’wana wakwe va khomiwe hi vuvabyi lebyi nga tshungulekiki (multiple sclerosis). Brenda u boheka ku famba hi xitulu xa lava lamaleke naswona a nga na matimba. Mikarhi yin’wana u chumayela hi yindlu na yindlu kambe hakanyingi u chumayela hi mapapila. U ri: “Endzhaku ka loko ndzi twisise ni ku tlhela ndzi amukela leswaku vuvabyi bya mina a byi nge tshunguriwi emisaveni leyi, ndzi sungule ku khomeka hi ku helela hi ntirho wo chumayela. Entiyisweni, ku chumayela swi ndzi endla ndzi nga tshameli ku ehleketa hi swiphiqo swa mina. Kambe swi endla leswaku ndzi ehleketa hi ku pfuna vanhu lava ndzi vulavurisanaka na vona ensin’wini ya hina. Nakambe swi endla leswaku mikarhi hinkwayo ndzi ehleketa hi ntshembo lowu ndzi nga na wona hi vumundzuku.”

11-13. (a) Xana vaapostola ni van’wana va endle yini leswi kombisaka leswaku a va ri vanghana va ntiyiso va Yesu? (b) Xana vanghana va Yesu va endle leswaku a titwa njhani?

¹¹ Nkarhi hinkwawo lowu Yesu a wu heteke a ri karhi a chumayela, vaapostola vakwe a va ri vanghana vakwe va ntiyiso. Vunghana bya vona a byi fana ni leswi hlamuseriwaka eka xivuriso xa Bibele lexi nge: “Ku ni munghana la namarhelaka ku tlula makwavo.” (Swiv. 18:24) Vanghana vo tano a va ri va risima eka Yesu. Hi nkarhi wa vutirheli byakwe ku hava ni un’we wa vamakwavo vakwe va nyama loyi a ri ni ripfumelo eka yena. (Yoh. 7:3-5) Siku rin’wana maxaka yakwe ma kale ma ehleketa leswaku wa penga. (Mar. 3:21) Ku hambana na vona, Yesu u byele vaapostola vakwe vo tshembeka hi vusiku lebyi a dlayiweke hi byona a ku: “Hi n’wina mi khomeleleke swin’we na mina emiringweni ya mina.”—Luka 22:28.

¹² Mikarhi yin’wana vaapostola a va n’wi khomisa tingana Yesu kambe u swi be hi makatla swihoxo swa vona, hi ku xiya leswaku a va ri ni ripfumelo eka yena. (Mat. 26:40; Mar. 10:13, 14; Yoh. 6:66-69) Hi vusiku byo hetelela a nga si dlayiwa, Yesu u byele vavanuna volavo vo tshembeka a ku: “Ndzi mi vitane vanakulorhi, hikuva swilo hinkwaswo leswi ndzi swi tweke eka Tatana ndzi mi tivise swona.” (Yoh. 15:15) A swi kanakanisi leswaku vanghana va Yesu a va ri xikhutazo lexikulu eka yena. Yesu u tsakisiwe ngopfu hi leswi va n’wi pfuneke evutirhelini byakwe.—Luka 10:17, 21.

¹³ Ku engetela eka vaapostola, Yesu a ri ni vanghana van’wana, vavanuna ni vavasati, lava n’wi pfuneke entirhweni wo chumayela ni hi tindlela tin’wana. Van’wana va n’wi rhambe  emakaya ya vona leswaku va ta dya na yena swakudya. (Luka 10:38-42; Yoh. 12:1, 2) Van’wana a va famba na yena ni ku avelana swilo swa vona na yena. (Luka 8:3) Yesu a ri ni vanghana lavanene hikuva na yena a ri munghana lonene eka vona. U va endlele swilo leswinene naswona a nga langutelanga leswaku va n’wi endlela leswi va nga ta tsandzeka ku swi endla. Hambileswi Yesu a hetisekile, a swi tlangela ku seketeriwa hi vanghana vakwe lava a va nga hetisekanga. Hi nga tiyiseka leswaku va n’wi pfunile leswaku a tshama a ri ni ku rhula ka miehleketo.

14-15. Hi nga endla yini leswaku hi kuma vanghana lavanene naswona va nga hi pfuna njhani?

¹⁴ Vanghana lavanene va ta hi pfuna leswaku hi tshama hi tshembekile eka Yehovha. Ndlela leyinene yo kuma vanghana lavanene i ku va munghana lonene. (Mat. 7:12) Hi xikombiso, Bibele yi hi khutaza ku tirhisa nkarhi ni matimba ya hina leswaku hi pfuna van’wana, ngopfungopfu lava “pfumalaka.” (Efe. 4:28) Xana u nga ehleketa hi loyi u nga n’wi pfunaka evandlheni ra ka n’wina? Loko ku ri ni makwerhu la nga swi kotiki ku suka ekaya hi leswi a dyuhaleke kumbe a vabyaka, xana u nga n’wi yela exitolo? Xana u nga pfuna ndyangu lowu nga ni swiphiqo swa timali hi ku wu nyika swakudya? Loko u kota ku tirhisa website ya jw.org^® na app ya JW Library^®, xana u nga pfuna van’wana evandlheni ra ka n’wina leswaku va kota ku yi tirhisa? Loko hi khomeka hi ku pfuna van’wana, hakanyingi hi ta va lava tsakeke.—Mint. 20:35.

¹⁵ Vanghana va hina va ta hi seketela loko hi weriwa hi miringo naswona va ta hi pfuna hi tshama hi ri ni ku rhula ka mianakanyo. Ku fana ni leswi Elihu a yingiseleke loko Yobo a n’wi byela hi miringo yakwe, na hina vanghana va hina va ta hi pfuna hi ku hi yingisela loko hi va byela  ndlela leyi hi titwaka ha yona. (Yobo 32:4) A hi fanelanga hi langutela leswaku vanghana va hina va hi tekela swiboho kambe hi ta va hi tlharihile loko hi yingisela switsundzuxo swa vona leswi sekeriweke eBibeleni. (Swiv. 15:22) Ku fana ni leswi Hosi Davhida hi ku titsongahata a amukeleke ku pfuniwa hi vanghana vakwe, a hi fanelanga hi ala loko vanghana va hina va hi pfuna. (2 Sam. 17:27-29) Hakunene vanghana vo tano lavanene i nyiko leyi humaka eka Yehovha.—Yak. 1:17.

16. Hi ku ya hi va Vafilipiya 4:6, 7, hi yihi ndlela yin’we ntsena leyi hi nga vaka ni ku rhula ha yona? Hlamusela.

¹⁶ Hlaya Vafilipiya 4:6, 7. Hikwalaho ka yini Yehovha a hi byela leswaku hi nga va ni ku rhula loku a ku nyikaka vanhu “ha Kreste Yesu”? Hikuva hi nga kota ku va ni ku rhula ka miehleketo ni mbilu ntsena loko hi twisisa ni ku va ni ripfumelo eka xiphemu lexi Yesu a nga na xona eka xikongomelo xa Xikwembu. Hi xikombiso, hikwalaho ka xitlhavelo xa Yesu xa nkutsulo hi nga rivaleriwa swidyoho swa hina hinkwaswo. (1 Yoh. 2:12) Sweswo swa hi chavelela hakunene! Leswi a nga Hosi ya Mfumo wa Xikwembu, Yesu u ta herisa ku xaniseka hinkwako loku Sathana ni misava yakwe va hi vangeleke kona. (Esa. 65:17; 1 Yoh. 3:8; Nhlav. 21:3, 4) Sweswo swi endla hi va ni ntshembo wo tsakisa! Hambileswi Yesu a hi nyikeke ntirho wo tika, u na hina, wa hi seketela emasikwini lawa yo hetelela. (Mat. 28:19, 20) Hakunene sweswo swi endla hi va ni xivindzi! Ku chaveleriwa, ntshembo, ni xivindzi i swilo swa nkoka leswi hi swi lavaka leswaku hi ta va ni ku rhula ka miehleketo.

17. (a) Xana Mukreste a nga tshama a ri ni ku rhula ka mianakanyo hi ndlela yihi? (b) Hilaha swi tshembisiweke hakona eka Yohane 16:33, hi ta kota ku endla yini?

¹⁷ U nga va ni ku rhula ka mianakanyo hi ndlela yihi loko u ri karhi u tshikileriwa hi miringo? U nga endla tano hi ku tekelela swilo leswi Yesu a swi endleke. Xo sungula, khongela naswona u ya emahlweni u khongela ku nga khathariseki leswi endlekaka. Xa vumbirhi, yingisa Yehovha naswona u chumayela hi ku hiseka hambiloko swi tika ku endla tano. Xa vunharhu, titshege hi vanghana va wena leswaku va ku pfuna loko u weriwa hi miringo. Kutani ku rhula ka Xikwembu ku ta rindza mianakanyo ni mbilu ya wena. Ku fana na Yesu, u ta hlula ndzingo wun’wana ni wun’wana.—Hlaya Yohane 16:33.