1. Hi yihi mfanelo yin’wana leyi rhandzekaka swinene ya vumunhu bya Yesu? Hlamusela.

MFANELO yin’wana leyi rhandzekaka swinene ya vumunhu bya Yesu i vuswikoti byakwe bya ku twisisa swiphiqo leswi hina vanhu lava nga hetisekangiki hi nga na swona. Loko Yesu a ri laha misaveni a “[tsaka] ni vanhu lava tsakaka” ni ku “rila ni vanhu lava rilaka.” (Rhom. 12:15) Hi xikombiso, loko vadyondzisiwa vakwe va 70 va vuya va tsakile endzhaku ko chumayela hi ndlela leyi humelelaka, Yesu u “[tsakisise] hi moya lowo kwetsima.” (Luka 10:17-21) Hi hala tlhelo, loko Yesu a vona gome leri maxaka ya Lazaro a ma ri na rona hikwalaho ka rifu rakwe, u “[konye] emoyeni, a karhateka.”—Yoh. 11:33.

2. I yini leswi pfuneke Yesu leswaku a kombisa ntlhaveko wa xinakulobye eka vanhu?

² I yini leswi pfuneke wanuna loyi, la hetisekeke leswaku a va ni tintswalo ni ntwelavusiwana loko a tirhisana ni vanhu lava nga hetisekangiki? Xo sungula, Yesu a rhandza vanhu. Hilaha swi boxiweke hakona eka xihloko lexi hundzeke, a a “rhandza . . . vana va vanhu.” (Swiv. 8:31) Leswi a a rhandza vanhu, u susumeteleke ku lava ku yi tiva kahle ndlela leyi vanhu va ehleketaka ha yona. Muapostola Yohane u te: “A a swi tiva leswi nga emunhwini.” (Yoh. 2:25) Yesu a ri ni ntwelavusiwana lowukulu eka vanhu. Vanhu a va swi xiya leswaku wa va rhandza naswona va yingisele rungula ra Mfumo. Loko na hina hi ri ni ntwelavusiwana wo tano, hi ta kota ku pfuna vanhu lava hi va chumayelaka.—2 Tim. 4:5.

3-4. (a) Loko hi ri ni ntlhaveko wa xinakulobye, hi ta titwa njhani hi ntirho wa hina wo chumayela? (b) Hi ta dyondza yini eka xihloko lexi?

³ Muapostola Pawulo a a swi tiva leswaku u ni vutihlamuleri byo chumayela naswona swi tano ni le ka hina. (1 Kor. 9:16) Hambiswiritano, loko hi ri ni ntlhaveko wa xinakulobye, hi ta chumayela hileswi hi rhandzaka vanhu, ku nga ri hi leswi hi bohekaka. Hi ta chumayela  hileswi hi khathalaka hi vanhu ni hileswi hi lavaka ku va pfuna. Ha swi tiva leswaku “ku nyika swi tisa ntsako lowukulu ku tlula ku amukela.” (Mint. 20:35) Loko hi chumayela hileswi hi lavaka ku pfuna vanhu, hi ta tiphina.

⁴ Eka xihloko lexi, hi ta dyondza ndlela leyi hi nga wu kombisaka ha yona ntlhaveko wa xinakulobye ensin’wini. Xo sungula hi ta dyondza swo karhi eka ndlela leyi Yesu a a titwa ha yona hi vanhu. Kutani hi ta dyondza tindlela ta mune leti hi nga tekelelaka xikombiso xakwe ha tona.—1 Pet. 2:21.

5-6. (a) I vamani lava Yesu a va kombiseke ntlhaveko wa xinakulobye? (b) Hi laha swi profetiweke ha kona eka Esaya 61:1, 2, hikwalaho ka yini Yesu a va twele vusiwana vanhu lava a va chumayela?

⁵ Ehleketa hi xikombiso xa ndlela leyi Yesu a wu kombiseke ha yona ntlhaveko wa xinakulobye. Eka xiendlakalo xin’wana, Yesu ni vadyondzisiwa vakwe a va karhele hikuva a va ri karhi va chumayela mahungu lamanene va nga wisi. A va nga ri na wona hambi “nkarhi wo . . . dya swakudya.” Kutani Yesu u teke vadyondzisiwa vakwe va “ya enhoveni” leswaku va ya “wisanyana.” Hambiswiritano, ntshungu wu ye laha Yesu ni vadyondzisiwa vakwe a va ya kona. Loko Yesu a fika kutani a wu vona, u titwe njhani naswona u endle yini? U “wu [twele] vusiwana *, hikuva a wu fana ni tinyimpfu leti nga riki na murisi. Hiloko a sungula ku wu dyondzisa swilo swo tala.”—Mar. 6:30-34.

⁶ Xiya leswaku hikwalaho ka yini Yesu a va twele vusiwana kumbe a ve ni ntlhaveko wa xinakulobye eka vanhu volavo. U xiye leswaku vanhu volavo a va “fana ni tinyimpfu leti nga riki na murisi.” Kumbexana Yesu u xiye leswaku van’wana va vona a va ri swisiwana naswona a va tirha hi matimba leswaku va wundla mindyangu ya vona. Kumbexana van’wana a va ri ni gome hikwalaho ko feriwa hi swirho swa mindyangu ya vona. Loko swi ri tano, Yesu a xi twisisa xiyimo xa vona. Hilaha swi boxiweke hakona eka xihloko lexi hundzeke, swi nga endleka leswaku Yesu u tshame a  va ni swiphiqo swo tano na yena. Yesu a a khathala hi vanhu van’wana naswona a a lava ku va chavelela.—Hlaya Esaya 61:1, 2.

7. Hi nga xi tekelela njhani xikombiso xa Yesu?

⁷ Hi dyondza yini eka xikombiso xa Yesu? Ku fana na Yesu, na hina hi hanya ni vanhu lava “[fanaka] ni tinyimpfu leti nga riki na murisi.” Va ni swiphiqo swo tala. Kambe hina hi ni rungula ra Mfumo leri nga va pfunaka. (Nhlav. 14:6) Hikwalaho hi tekelela N’wini wa hina naswona hi chumayela mahungu lamanene hikuva hi “ni nsovo [ntwelavusiwana] eka loyi a pfumalaka ni loyi a nga xisiwana.” (Ps. 72:13) Hi va twela vusiwana vanhu naswona hi lava ku va pfuna.

8. Hi yihi ndlela yin’wana leyi hi nga kombisaka ntlhaveko wa xinakulobye ha yona ensin’wini? Vula xikombiso.

⁸ I yini lexi nga ta hi pfuna hi kombisa ntlhaveko wa xinakulobye eka lava hi va chumayelaka? Hi lava ku tiveka exiyin’weni xa vanhu lava hi hlanganaka na vona ensin’wini kutani hi va khoma hi ndlela leyi a hi ta lava ku khomiwa ha yona loko a hi ri eka xiyimo xa vona. * (Mat. 7:12) A hi kambisiseni tindlela ta mune leti hi nga swi endlaka ha tona. Xo sungula, ehleketa hi swilaveko swa munhu un’wana ni un’wana. Hi nga fanisa leswi hi swi endlaka loko hi chumayela ni leswi dokodela a swi endlaka leswaku a kota ku pfuna vavabyi. Dokodela loyi a nga ni vuswikoti u anakanya hi swilaveko swa muvabyi un’wana ni un’wana. U vutisa swivutiso a tlhela a yingiserisisa loko muvabyi a ri karhi a hlamusela ndlela leyi a titwaka ha yona. Ematshan’weni yo nyika muvabyi mirhi yo sungula leyi a yi ehleketaka, dokodela a nga teka nkarhi a ri karhi a xiyisisa leswi endlekaka eka muvabyi kutani a n’wi nyika vutshunguri lebyi faneleke. Hilaha ku fanaka, a hi fanelanga hi tirhisa xingheniso xin’we xo sungula mabulo eka munhu un’wana ni un’wana loyi hi hlanganaka na yena ensin’wini. Ematshan’weni ya sweswo, hi fanele hi ringeta ku twisisa swiyimo ni mavonelo ya munhu un’wana ni un’wana.

9. I yini leswi hi faneleke hi swi papalata? Hlamusela.

⁹ Loko u hlangana na munhu ensin’wini, u fanele u papalata ku ehleketa leswaku u tiva swiyimo swakwe kumbe leswi a swi pfumelaka ni leswaku hikwalaho ka yini a pfumela eka swona. (Swiv. 18:13) Ematshan’weni ya sweswo, vutisa swivutiso hi vutlhari leswaku u ta tiva swo karhi hi munhu yoloye ni leswi a swi pfumelaka. (Swiv. 20:5) Loko swi tolovelekile eka ndhavuko wa n’wina, n’wi vutise hi ntirho wakwe, ndyangu wakwe, ndlela leyi a kuleke ha yona ni ndlela leyi a titwaka ha yona ha swona. Loko hi vutisa swivutiso, hi va pfumelela va hi byela leswaku hikwalaho ka yini hi fanele hi va byela mahungu lamanene. Loko se hi swi tivile, hi ta kota ku kombisa ntlhaveko wa xinakulobye ni ku va pfuna hi ku ya hi xilaveko xa vona hilaha Yesu a endleke hakona.—Ringanisa 1 Vakorinto 9:19-23.

10-11. Hi yihi ndlela ya vumbirhi leyi boxiwaka eka 2 Vakorinto 4:7, 8 leyi hi nga kombisaka ntlhaveko wa xinakulobye ha yona? Vula xikombiso.

 ¹⁰ Xa vumbirhi, ringeta ku ehleketa leswaku va hanya vutomi bya njhani. Mikarhi yin’wana, hi nga twisisa xiyimo xa vona. Phela a hi hetisekanga, na hina hi na swiphiqo. (1 Kor. 10:13) Ha swi tiva leswaku vutomi bya tika emisaveni leyi. Hi kota ku tiyisela hileswi hi pfuniwaka hi Yehovha. (Hlaya 2 Vakorinto 4:7, 8.) Kambe ehleketa hi lava nga riki na byona vuxaka bya le kusuhi na Yehovha, swi fanele swi va tikela ngopfu ku hanya emisaveni leyi handle ko pfuniwa hi yena. Ku fana na Yesu, hi va twela vusiwana kutani hi lava ku va byela “mahungu lamanene ya leswo antswa.”—Esa. 52:7.

¹¹ Ehleketa hi xikombiso xa makwerhu Sergey. Loko a nga si dyondza Bibele, a miyele ngopfu naswona a ri ni tingana. A swi nga n’wi oloveli ku vulavula ni vanhu van’wana. Hi ku famba ka nkarhi, u pfumele ku dyondzeriwa Bibele. Sergey u ri: “Loko ndzi ri karhi ndzi dyondza Bibele, ndzi dyondze leswaku Vakreste va boheka ku byela van’wana leswi va swi dyondzeke eBibeleni. A ndzi tibyela leswaku a ndzi nge swi koti ku endla tano.” Hambiswiritano, u sungule ku ehleketa hi lava nga si tshamaka va dyondza Bibele kutani u xiye leswaku va fanele va hanya vutomi byo tika hikuva a va n’wi tivi Yehovha. U engete a ku: “Swilo leswintshwa leswi ndzi swi dyondzeke swi ndzi tisele ntsako lowukulu ni ku rhula. Ndzi swi xiyile leswaku vanhu van’wana na vona va fanele va dyondza leswi ndzi swi dyondzeke eBibeleni.” Loko Sergey a sungula ku va ni ntlhaveko wa xinakulobye eka vanhu, u swi xiyile leswaku u sungula ku va ni xivindzi xo chumayela. Sergey u ri: “Lexi ndzi hlamariseke swinene hileswaku ku byela van’wana hi Bibele swi endle leswaku ndzi nga ha vi na tingana. Swi tlhele swi tiyisa ripfumelo ra mina.” *

12-13. Hikwalaho ka yini hi fanele hi va lehisela mbilu lava hi va dyondzisaka ensin’wini? Nyika xikombiso.

¹² Xa vunharhu, va lehisele mbilu lava u va dyondzisaka. Tsundzuka, swi nga endleka va nga si tshama va ehleketa hi tidyondzo ta Bibele leti hi ti tivaka kahle. Nakambe vo tala va rhandza  vukhongeri bya vona. Swi nga endleka va teka vukhongeri bya vona ku ri byona byi va hlanganisaka ni ndyangu wa vona, ndhavuko ni vanhu va laha va tshamaka kona. Hi nga va pfuna njhani?

¹³ Ehleketa hi xikombiso lexi: I yini lexi endliwaka loko buloho ra khale ri onhakile naswona ri lava ku lunghisiwa? Hakanyingi buloho lerintshwa ri akiwa lera khale ri ri karhi ri tirhisiwa. Loko se buloho lerintshwa ri herile, lera khale ra mbundzumuxiwa. Hilaha ku fanaka, loko hi nga si va khutaza ku tshika tidyondzo ta vukhongeri leti va ti rhandzaka, hi fanele hi sungula hi va pfuna va tiva ni ku rhandza tidyondzo letintshwa ta Bibele. Hi kona va nga ta kota ku tshika tidyondzo ta vona ta khale. Swi nga ha teka nkarhi leswaku hi pfuna vanhu va endla ku cinca ko tano.—Rhom. 12:2.

14-15. Hi nga va pfuna njhani vanhu lava nga tiveki nchumu hi ntshembo wo hanya hilaha ku nga heriki emisaveni leyi nga paradeyisi? Vula xikombiso.

¹⁴ Loko hi va lehisela mbilu vanhu lava hi va chumayelaka, a hi nge languteli leswaku va twisisa kumbe ku amukela tidyondzo ta Bibele ro sungula loko va titwa. Ematshan’weni ya sweswo, ntlhaveko wa xinakulobye wu endla leswaku hi va pfuna ku twisisa leswi Bibele yi swi dyondzisaka hakatsongotsongo. Hi xikombiso, ehleketa hi ndlela leyi hi nga n’wi pfunaka ha yona munhu leswaku a twisisa ntshembo wo hanya hilaha ku nga heriki emisaveni leyi nga paradeyisi. Vo tala a va tivi nchumu hi dyondzo leyi. Swi nga endleka va pfumela leswaku loko munhu a fa a nge he tlheli a hanya. Kumbe va ehleketa leswaku vanhu hinkwavo lavanene va ya etilweni. Hi nga va pfuna njhani?

¹⁵ Hi leyi ndlela yin’wana leyi makwerhu un’wana a yi tirhisaka ku pfuna vanhu va twisisa dyondzo yoleyo. U sungula hi ku hlaya Genesa 1:28. Kutani a vutisa n’wini wa muti leswaku Xikwembu a xi lava vanhu va hanya kwihi naswona a xi lava va hanya vutomi bya njhani. Vo tala va hlamula va ku: “Kwala misaveni naswona a xi lava va tiphina hi vutomi.” Endzhaku ka sweswo, makwerhu u hlaya Esaya 55:11 kutani a vutisa loko xikongomelo xa Xikwembu xi cincile. Hakanyingi, n’wini wa muti u ta ku a xi si cinca. Eku heteleleni, makwerhu u hlaya Pisalema 37:10, 11 kutani a vutisa leswaku vumundzuku bya vanhu byi ta va njhani. Hi ku tirhisa Bibele hi ndlela leyi, u pfune vanhu vo hlayanyana ku twisisa leswaku Xikwembu xa ha lava leswaku vanhu lavanene va hanya hilaha ku nga heriki emisaveni leyi nga Paradeyisi.

16-17. Loko u ri karhi u ehleketisisa hi Swivuriso 3:27, hi tihi tindlela tin’wana leti hi nga kombisaka ntlhaveko wa xinakulobye ha tona? Vula xikombiso.

¹⁶ Xa vumune, ehleketa hileswi u nga swi endlaka leswaku u kombisa vanhu leswaku wa khathala hi vona. Hi xikombiso, u ta endla yini loko u fika hi nkarhi lowu nga riki wunene eka n’wini wa muti? U nga kombela ku rivaleriwa kutani u n’wi tshembisa leswaku u ta vuya hi nkarhi lowu faneleke. A hi nge n’wini wa muti u lava ku endleriwa xintirhwana xo karhi. Kumbe a hi nge munhu loyi a vabyaka kumbe loyi a dyuhaleke naswona a nga swi kotiki ku huma ekaya u lava u n’wi endlela swo karhi kumbe u n’wi yela exitolo.  Eka swiyimo swo tano, hi nga ha pfuna munhu yoloye.—Hlaya Swivuriso 3:27.

¹⁷ Makwerhu un’wana wa xisati u ve ni vuyelo lebyinene endzhaku ko endla xiendlo xa musa lexi a xi vonaka xi nga ri xa nkoka. Hikwalaho ko susumetiwa hi ntlhaveko wa xinakulobye, u tsalele ndyangu lowu a wa ha ku feriwa hi n’wana papila. Papila rero a ri katse ni tindzimana ta Bibele leti chavelelaka. Xana ndyangu wolowo wu titwe njhani hi papila rolero? Manana loyi a feriweke u tsale a ku: “Tolo a ndzi karhatekile swinene. Papila ra wena ri hi pfune ngopfu. Ndzi ri tlangela swinene papila ra wena hikuva ri hi chavelerile swinene. Tolo ndzi hlaye papila ra wena ku tlula ka 20. Ni sweswi ndza ha hlamarisiwa hi ndlela leyi papila ra wena ri ndzi chaveleleke ha yona. Ndzi nkhensa ndzi vuyelela.” A swi kanakanisi leswaku hi ta va ni vuyelo lebyinene loko hi ringeta ku twisisa ndlela leyi vanhu lava xanisekaka va titwaka ha yona kutani hi ringeta ku va pfuna.

18. Hilaha swi boxiweke ha kona eka 1 Vakorinto 3:6, 7, i yini leswi hi faneleke hi swi tsundzuka loko hi ri ensin’wini naswona hikwalaho ka yini?

¹⁸ I ntiyiso leswaku hi lava ku endla leswi nga ematimbeni ya hina loko hi ri ensin’wini. Ha katseka eku pfuneni ka vanhu leswaku va dyondza hi Xikwembu kambe a hi hina lava endlaka ntirho lowukulu. (Hlaya 1 Vakorinto 3:6, 7.) I Yehovha loyi a endlaka leswaku vanhu va ta eka yena. (Yoh. 6:44) Eku heteleleni, leswaku munhu u ta amukela kumbe ku ala mahungu lamanene swi titshege hi xiyimo xa mbilu yakwe. (Mat. 13:4-8) Tsundzuka, vanhu vo tala a va ri amukelanga rungula ra Yesu, hambileswi a ri Mudyondzisi lonkulu ku tlula hinkwavo lava tshameke va hanya! Hikwalaho, a hi fanelanga hi hela matimba loko vanhu vo tala lava hi ringetaka ku va pfuna va nga yingisi rungula ra hina.

19. Hi byihi vuyelo lebyinene lebyi hi nga ta va na byona loko hi kombisa ntlhaveko wa xinakulobye ensin’wini?

¹⁹ Hi ta va ni vuyelo lebyinene loko hi kombisa ntlhaveko wa xinakulobye ensin’wini. Hi ta tiphina swinene ensin’wini. Hi ta kuma ntsako lowukulu lowu tisiwaka hi ku nyika. Hi endla leswaku swi va olovela vanhu lava nga “ni mboyamelo lowunene eka vutomi lebyi nga heriki” ku amukela mahungu lamanene. (Mint. 13:48) Hikwalaho “loko ntsena hi ri ni nkarhi lowunene wa swona, a hi endleleni hinkwavo leswi nga swinene.” (Gal. 6:10) Hi ta kuma ntsako hikwalaho ko yisa ku dzuneka eka Tata wa hina wa le tilweni.—Mat. 5:16.