1, 2. (a) Hi wihi ntirho lowu Yesu a wu teka wu ri wa nkoka naswona hikwalaho ka yini? (b) Hi fanele hi endla yini leswaku hi va “vatirhi-kulobye ni Xikwembu” lava nga ni vuswikoti?

YESU KRESTE a ri muvatli ni mudyondzisi. (Mar. 6:3; Rhom. 15:8) A yi endla kahle mintirho leyi hayimbirhi. Tanihi muvatli, u dyondze ku swi tirhisa kahle switirhisiwa wa muvatli, leswaku a endla nchumu wo karhi lowu nga tirhisiwaka. Tanihi mudyondzisi wa mahungu lamanene, a byi tirhisa kahle vutivi byakwe bya Matsalwa leswaku a pfuna vanhu va twisisa ntiyiso lowu nga eRitweni ra Xikwembu. (Mat. 7:28; Luka 24:32, 45) Loko Yesu a ri ni malembe ya 30, u tshike ku va muvatli hikuva a swi tiva leswaku ku va mudyondzisi wa Rito ra Xikwembu i ntirho wa nkoka swinene. U vule leswaku ku chumayela mahungu lamanene ya Mfumo wa Xikwembu i xin’wana xa swivangelo leswi endleke leswaku Xikwembu xi n’wi rhumela emisaveni. (Mat. 20:28; Luka 3:23; 4:43) Evuton’wini bya Yesu, ntirho wo chumayela a wu ri wa nkoka swinene naswona a lava leswaku ni van’wana va wu endla.—Mat. 9:35-38.

² Hambileswi hi nga riki vavatli kambe a swi kanakanisi leswaku hi vadyondzisi va mahungu lamanene. Ntirho lowu i wa nkoka hikuva wu hi endla hi va “vatirhi-kulobye ni Xikwembu.” (1 Kor. 3:9; 2 Kor. 6:4) Hi pfumelelana ni leswi mupisalema a swi vuleke, “mongo wa rito ra  [Yehovha] i ntiyiso.” (Ps. 119:159, 160) Hikwalaho, hi fanele hi tiyiseka leswaku hi ri “tamela khwatsi rito ra ntiyiso” loko hi chumayela. (Hlaya 2 Timotiya 2:15.) Leswaku hi endla tano, hi fanele hi ya emahlweni hi antswisa vutshila bya hina byo tirhisa Bibele, ku nga xitirhisiwa xa nkoka xo dyondzisa ntiyiso malunghana na Yehovha, Yesu ni Mfumo. Nhlengeletano ya Yehovha yi hi endlele switirhisiwa leswi nga hi pfunaka, leswi hi faneleke hi tolovelana na swona leswaku hi va vachumayeri va mahungu lamanene lava nga ni vuswikoti. Hi swi vitana Switirhisiwa Swo Pfuneta Ku Dyondzisa.

3. Leswi makumu ma nga kwala nyongeni, xikongomelo xa hina ku fanele ku va yini naswona Mintirho 13:​48 yi hi pfuna njhani?

³ Hi nga ha tivutisa leswaku hikwalaho ka yini swi vitaniwa Switirhisiwa Swo Pfuneta Ku Dyondzisa ku nga ri Switirhisiwa Swo Pfuneta Ku Chumayela. Ku “chumayela” swi vula ku twarisa rungula; kambe ku “dyondzisa” swi vula ku nghenisa vutivi embilwini ya munhu leswaku a ta kota ku tirhisa leswi a swi dyondzaka. Leswi makumu ma nga kwala nyongeni, xikongomelo xa hina ku fanele ku va ku sungula tidyondzo ta Bibele ni ku dyondzisa vanhu ntiyiso lowu nga eBibeleni. Leswi swi vula leswaku hi fanele hi tikarhatela ku lavisisa lava nga ni “mboyamelo lowunene eka vutomi lebyi nga heriki” kutani hi va pfuna leswaku va va Vakreste.—Hlaya Mintirho 13:44-48.

4. Hi nga swi kotisa ku yini ku tiva lava nga ni “mboyamelo lowunene eka vutomi lebyi nga heriki” naswona hi nga va kuma njhani?

⁴ Hi nga swi kotisa ku yini ku tiva lava nga ni “mboyamelo lowunene eka vutomi lebyi nga heriki”? Hi ku chumayela, hilaha Vakreste va lembexidzana ro sungula a va endla hakona. Hi fanele hi landzela xileriso xa Yesu lexi nge: “Emutini kumbe eximutanini xin’wana ni xin’wana lexi mi nga ta nghena eka xona, lavisisani loyi swi n’wi fanelaka.” (Mat. 10:11) A hi swi langutelanga leswaku vanhu lava nga tshembekiki, lava tikukumuxaka kumbe lava nga riki na mhaka na Xikwembu va amukela mahungu lamanene. Hi lavisisa vanhu lava titsongahataka, lava tshembekaka ni lava navelaka ku tiva Xikwembu. Hi nga fanisa ntirho wa hina ni lowu Yesu a wu endla loko a ri muvatli, a lavisisa timhandzi letinene to endla fenichara, mavanti, majoko ni swin’wana. Kutani loko a kume mhandzi leyinene, a a ta teka mathulusi ya yena ni ku tirhisa vuswikoti byakwe byo vatla leswaku a endla nchumu wo karhi. Hi fanele hi endla leswi fanaka loko hi ri karhi hi pfuna vanhu lava nga ni timbilu letinene leswaku va va vadyondzisiwa.—Mat. 28:19, 20.

5. I yini leswi hi faneleke hi swi tiva hi Switirhisiwa Swo Pfuneta Ku Dyondzisa leswi hi nga na swona? Kombisa. (Vona swifaniso leswi nga eku sunguleni.)

⁵ Thulusi yin’wana ni yin’wana leyi nga ebokisini yi ni ntirho wa yona. Anakanya hi mathulusi lama Yesu a a ma tirhisa tanihi muvatli. * A ta lava mathulusi yo fungha, yo tsema, yo boxa, yo vatla, yo feyila ni yo boha swiphemu leswi tsemiweke leswaku swi va nchumu wun’we. Hilaha ku fanaka, Switirhisiwa Swo Pfuneta Ku Dyondzisa swi ni mintirho yo hambanahambana. Kutani a hi kambisiseni switirhisiwa leswi hi nyikiweke swona, ni ku xiya ndlela leyi hi nga swi tirhisaka ha yona.

6, 7. (a) U ma tirhise njhani makhadi yo nghena eka jw.org? (b) Xirhambo lexi hi xi tirhisaka ku rhambela vanhu eminhlanganweni xi tirha hi tindlela tihi timbirhi?

⁶ Makhadi Yo Nghena Eka Jw.org. Lawa i makhadi ya nkoka lama hi nga ma tirhisaka leswaku va hi tiva ni ku va kongomisa eka website ya hina, laha va nga dyondzaka swo tala hi ntirho wa hina ni ku tlhela va kombela dyondzo ya Bibele. Ku fikela sweswi, vanhu vo tlula 400 000 va kombele ku dyondzeriwa Bibele eka website ya jw.org naswona siku na siku ku amukeriwa swikombelo swa vanhu va madzana! I swa nkoka leswaku hi tshama  hi ri ni makhadi yo nghena eka jw.org leswaku hi ta chumayela loko hi pfulekeriwa hi nkarhi.

⁷ Swirhambo. Xirhambo lexi hi xi tirhisaka ku rhambela vanhu eminhlanganweni xi tirha hi tindlela timbirhi. Xi ri: “Wa rhambiwa leswaku u dyondza Bibele ni Timbhoni ta Yehovha.” Xi tlhela xi ringanyeta leswaku u nga ta “eminhlanganweni ya hina” “kumbe u dyondzeriwa Bibele.” Xitirhisiwa lexi xi pfuna vanhu leswaku va hi tiva ni ku tlhela xi rhamba vanhu lava “khathalaka hi xilaveko xa vona xa moya” leswaku va dyondza Bibele na hina. (Mat. 5:3) Entiyisweni, vanhu va ntshunxekile ku ta eminhlanganweni ya hina hambiloko va nga yi amukeli dyondzo ya Bibele. Hikwalaho loko va ta eminhlanganweni, va ta twa leswi hi swi dyondzaka eBibeleni.

8. I swa nkoka ku fikela kwihi leswaku vanhu va ta eminhlanganweni ya hina hambi ko va kan’we ntsena? Vula xikombiso.

⁸ Hi fanele hi hambeta hi rhamba vanhu leswaku va ta eminhlanganweni ya hina hambi vo ta kan’we ntsena. Hikwalaho ka yini? Hikuva va ta swi xiya leswaku hi dyondzisa ntiyiso hi Xikwembu ni leswaku Babilona Lonkulu a nga na byona vutivi hi Xikwembu. (Esa. 65:13) Hi xikombiso, Ray na Linda, vatekani van’wana va le United States, va vone ku hambana loku eka malembe yo hlaya lama hundzeke. Va endle xiboho xo sungula ku ya ekerekeni. A va tshemba leswaku Xikwembu xi kona naswona a va lava ku va ni vuxaka na xona kutani va sungule ku endzela kereke yin’wana ni yin’wana ya le ndhawini ya ka vona. Endhawini ya ka vona ku ni tikereke to tala to hambanahambana. Ku ni swilo swimbirhi leswi a va swi languterile ekerekeni leyi a va ta yi hlawula. Xo sungula, va fanele ku va va dyondze swo karhi loko kereke yi huma, naswona xa vumbirhi swirho swa kereke swi fanele swi hanya hi ndlela leyi faneleke vagandzeri va Xikwembu. Endzhaku ko ya etikerekeni to hambanahambana ku ringana malembe yo tala a va kumanga nchumu xo khomeka. A va nga dyondzanga nchumu etikerekeni naswona swirho swa kereke a swi ambala hi ndlela leyi nga xiximekiki. Loko va huma ekerekeni yo hetelela, Linda u tiyele entirhweni kasi Ray u ye ekaya. Loko Ray a ri endleleni u vone Holo ya Mfumo kutani a ku, ‘Ndzi fanele ndzi nghena na laha ndzi vona leswi endlekaka.’ A swi kanakanisi leswaku u tsakele leswi a swi voneke! Vanhu hinkwavo lava a va ri eHolweni ya Mfumo a va ri na xinghana naswona a va ambale hi ndlela leyi xiximekaka. Ray u fike a tshama eka switulu swa le mahlweni naswona u swi tsakerile leswi a swi dyondzeke! Leswi swi fana ni leswi muapostola Pawulo a swi vuleke loko a vulavula hi wanuna la teke eminhlanganweni ya Vukreste ro sungula kutani a ku: “Xikwembu xi le xikarhi ka n’wina hakunene.” (1 Kor. 14:23-25) Ku sukela siku rero, Ray u hambete a va kona eminhlanganweni Sonto wun’wana ni wun’wana naswona endzhakunyana a va kona ni le xikarhi ka vhiki. Linda na yena u sungule ku va kona eminhlanganweni naswona havumbirhi bya vona va sungule ku dyondzeriwa Bibele kutani va khuvuriwa va ri ni malembe ya kwalomu ka 70.

9, 10. (a) Hikwalaho ka yini swi olova ku tirhisa swiphephana? (b) Hlamusela ndlela yo tirhisa xiphephana lexi nge Mfumo Wa Xikwembu I Yini?

⁹ Swiphephana. Hi ni swiphephana swa nhungu, leswi hi nga swi tirhisaka hi ku olova leswaku hi sungula mabulo. Ku sukela loko swi humesiwile hi 2013, se ku kandziyisiwe kwalomu ka ntlhanu wa tibiliyoni! Lexi tsakisaka hi leswaku loko u kala u kota ku fambisa xiphephana xin’we, u ta swi kota ku fambisa ni leswin’wana hikuva swi endliwe hi ndlela leyi fanaka. Hambiswiritano, u nga xi tirhisa njhani leswaku u sungula bulo?

¹⁰ A hi nge u hlawule ku tirhisa xiphephana lexi nge Mfumo Wa Xikwembu I Yini? Komba munhu xivutiso xa xifunengeto, loko u ri karhi u n’wi vutisa u ku: “Xana u tshame u tivutisa leswaku i yini Mfumo wa Xikwembu? Xana u nga vula leswaku i . . . ?” Kutani u n’wi kombela leswaku a hlawula nhlamulo eka swivutiso swinharhu leswi nga eka xifunengeto. U nga n’wi byeli leswaku  nhlamulo yakwe yi hoxile kumbe i yinene kambe pfula eka “Leswi Bibele Yi Swi Vulaka” eka xiphephana xolexo kutani u bula na yena hi matsalwa lama kombisiweke, Daniyele 2:44 na Esaya 9:6. Loko swi koteka, u nga ha katsa ni rungula rin’wana leri nga eka tluka rolero. Gimeta hi ku n’wi komba xivutiso lexi nge: “Xana vutomi byi ta va njhani ehansi ka Mfumo wa Xikwembu?” lexi nga eka tluka ro hetelela eka nhlokomhaka leyi nge, “Xivutiso Xo Anakanyisisa Ha Xona.” U nga xi hlamuli xivutiso xexo kambe xi tirhise ku endla riendzo ro vuyela. Loko u vuya, u nga n’wi komba dyondzo 7 eka broxara ya Mahungu Lamanene Lama Humaka Eka Xikwembu!, ku nga xitirhisiwa xin’wana xo sungula tidyondzo ta Bibele.

11. Xana timagazini ta hina ti endliwa hi xikongomelo xihi naswona i yini leswi hi faneleke hi swi tiva ha tona?

¹¹ Timagazini. Xihondzo xo Rindza ni Xalamuka! swi kandziyisiwe ni ku hundzuluxeriwa ku tlula timagazini hinkwato emisaveni. Leswi ti tivekaka emisaveni hinkwayo, nhlokomhaka ya xifunengeto yi endleriwe ku koka rinoko ra vanhu hinkwavo. Hi fanele hi ti tirhisa leswaku vanhu va ta kota ku xiya swilo swa nkoka evuton’wini. Hi fanele hi tiva leswaku magazini wun’wana ni wun’wana wu tsaleriwe vamani, leswaku hi ta kota ku wu nyika vanhu lava faneleke.

12. (a) Xana Xalamuka! yi tsaleriwe vamani naswona hi xihi xikongomelo xa yona? (b) U xi tirhise njhani hi ndlela leyi vuyerisaka xitirhisiwa lexi?

¹² Xalamuka! yi tsaleriwe vahlayi lava nga riki na vutivi bya Bibele kumbe lava tivaka switsongo. Swi nga ha endleka va nga tivi nchumu hi tidyondzo ta Vukreste, kumbe va nga byi tshembi vukhongeri kumbexana va nga swi tivi nileswaku Bibele ya pfuna. Hikwalaho, xikongomelonkulu xa Xalamuka! i ku tiyisekisa muhlayi leswaku ku ni Xikwembu. (Rhom. 1:20; Hev. 11:6) Yi tlhela yi pfuna muhlayi a va ni ntshembo wa leswaku Bibele “hakunene [i] rito ra Xikwembu.” (1 Tes. 2:13) Tinhlokomhaka tinharhu ta swifunengeto ta 2018 hi leti nge: “Ndlela Yo Kuma Ntsako,” “Swilo Swa 12 Leswi Nga Endlaka Leswaku Mindyangu Yi Tsaka” ni leyi nge “Leswi Nga Pfunaka Lava Feriweke.”

13. (a) Xana nkandziyiso wa Xihondzo xo Rindza xa vanhu hinkwavo wu tsaleriwe vamani? (b) U xi tirhise njhani hi ndlela leyi vuyerisaka xitirhisiwa lexi?

¹³ Xihondzo xo Rindza xa vanhu hinkwavo, xi tsaleriwe vanhu lava pfumelaka eka Xikwembu ni le ka Rito ra xona leswaku va xi tiva ku antswa. Hambileswi va nga ni vutivinyana bya Bibele kambe a va swi twisisi kahle leswi yi swi dyondzisaka. (Rhom. 10:2; 1 Tim. 2:3, 4) Tinhlokomhaka tinharhu ta swifunengeto ta 2018 ti hlamula swivutiso leswi nge: “Xana Bibele Ya Ha Pfuna Ninamuntlha,” “Xana Vumundzuku Byi Ku Khomele Yini?” ni lexi nge “Xana Xikwembu Xi Ni Mhaka Na Wena?”

14. (a) Hi xihi xikongomelo xa tivhidiyo ta hina ta mune leti nga xiphemu xa Switirhisiwa Swo Pfuneta Ku Dyondzisa? (b) Xana u vone vuyelo byihi loko u komba vanhu tivhidiyo leti?

¹⁴ Tivhidiyo. Enkarhini wa Yesu, muvatli a nga ri na michini. Namuntlha, vavatli va tirhisa michini yo saha, yo borha, yo feyila, yo belela ni swin’wana. Ku engetela eka minkandziyiso ya hina, hi ni tivhidiyo ta mune leti nga xiphemu xa switirhisiwa swo pfuneta ku dyondzisa leti nge: Ha Yini U Fanele U Dyondza Bibele?, Ku Endliwa Yini Eholweni Ya Mfumo? ni leyi nge Hina Timbhoni Ta Yehovha Hi Vamani? Tivhidiyo leti nga tluliki timinete timbirhi ti nga tirhisiwa eka riendzo ro sungula. Tivhidiyo to leha ti nga tirhisiwa eka maendzo yo vuyela ni le ka lava nga ni nkarhi. Tivhidiyo ti nga khutaza vanhu leswaku va amukela dyondzo ya Bibele ni ku ta eminhlanganweni.

15. Kombisa vuyelo lebyi vaka kona loko vanhu va hlalela tivhidiyo ta hina hi ririmi ra vona.

¹⁵ Hi xikombiso, makwerhu un’wana wa xisati u hlangane na wansati loyi a humaka eMicronesia  loyi a vulavulaka Xiyapesi, hiloko a n’wi komba vhidiyo leyi nge, Ha Yini U Fanele U Dyondza Bibele? hi ririmi ra yena. Loko vhidiyo yi ri karhi yi tlanga, hi ku hlamala wansati loyi u te: “Hakunene leri i ririmi ra mina, swa hlamarisa! Ndza swi twa leswaku ndlela leyi a vulavulaka ha yona u huma laha ndzi humaka kona. U ba Xiyapesi thwii!” Endzhaku ka sweswo u vule leswaku u ta hlaya minkandziyiso ni ku hlalela tivhidiyo eka jw.org hi ririmi ra yena. (Ringanisa Mintirho 2:8, 11.) Xiya xikombiso xin’wana. Makwerhu un’wana wa le United States u rhumele ntukulu wakwe loyi a tshamaka etikweni rin’wana linki ya vhidiyo yoleyo hi ririmi rakwe. Endzhaku ko yi hlalela u rhumele makwerhu loyi imeyili a ku: “Ndzi khumbiwe swinene hi marito lama nge, misava hinkwayo yi lawuriwa hi lowo homboloka. Ndzi kombele ku dyondzeriwa Bibele.” Ntukulu wakwe u tshama laha ntirho wa hina wu yirisiweke!

16. Hlamusela xikongomelo xa broxara leyi nge: (a) Yingisa Xikwembu Kutani U Hanya Hilaha Ku Nga Heriki. (b) Mahungu Lamanene Lama Humaka Eka Xikwembu! (c) I Vamani Lava Endlaka Ku Rhandza Ka Yehovha Namuntlha?

¹⁶ Tibroxara. U nga n’wi dyondzisa njhani Bibele munhu loyi a nga swi kotiki ku hlaya kumbe loyi u nga riki na minkandziyiso hi ririmi rakwe? Tirhisa broxara leyi nge, Yingisa Xikwembu Kutani U Hanya Hilaha Ku Nga Heriki. * Broxara leyi nge, Mahungu Lamanene Lama Humaka Eka Xikwembu! yi pfuna ku sungula tidyondzo ta Bibele. N’wi kombe tinhlokomhaka ta 14 leti kumekaka eka tluka ro hetelela kutani u n’wi kombela leswaku a hlawula leyi a yi tsakelaka. Kutani u sungula dyondzo hi ku tirhisa nhlokomhaka leyi a yi hlawuleke. Xana u tshame u swi ringeta loko u endla riendzo ro vuyela? Broxara ya vunharhu hi leyi nge, I Vamani Lava Endlaka Ku Rhandza Ka Yehovha Namuntlha? Yi endleriwe ku pfuna vanhu leswaku va tiva nhlengeletano ya hina. Leswaku u kota ku yi tirhisa kahle eka dyondzo yin’wana ni yin’wana ya Bibele, vona Xiyimiso Xa Mihlangano Xa Mahanyelo Ni Ntirho Wa Hina Wo Chumayela xa March 2017.

17. (a) Hi xihi xikongomelo xa tibuku to dyondzisa Bibele? b) I yini leswi languteriweke eka lava lavaka ku khuvuriwa naswona hikwalaho ka yini?

¹⁷ Tibuku. Loko se u sungule dyondzo ya Bibele hi broxara, u nga cincela eka buku leyi nge, I Yini Leswi Hi Nga Swi Dyondzaka eBibeleni? nkarhi wihi na wihi. Buku leyi yi pfuna munhu leswaku a tiva tidyondzo ta xisekelo ta Bibele. Loko xichudeni xi hetile Buku yoleyo naswona xi endla nhluvuko hambeta u dyondza na xona hi ku tirhisa buku leyi nge Tihlayiseni eRirhandzwini Ra Xikwembu. Buku leyi yi ta pfuna xichudeni leswaku xi hanya hi misinya ya milawu ya Bibele. Tsundzuka leswaku swichudeni swi fanele swi hambeta swi dyondza tibuku letimbirhi ku kondza swi ti heta hambiloko se swi khuvuriwile. Leswi swi ta pfuna swichudeni leswaku swi va ni ripfumelo leri tiyeke.—Hlaya Vakolosa 2:6, 7.

18. (a) 1 Timotiya 4:​16 yi hi khutaza leswaku hi endla yini tanihi vadyondzisi va rito ra Xikwembu naswona ku ta va ni vuyelo byihi? (b) Hi xihi xikongomelo xa hina xo tirhisa Switirhisiwa Swo Pfuneta Ku Dyondzisa?

¹⁸ Tanihi Timbhoni ta Yehovha hi byarhisiwe “ntiyiso wa mahungu . . . lamanene” lama nga ta pfuna vanhu leswaku va kuma vutomi lebyi nga heriki. (Kol. 1:5. hlaya 1 Timotiya 4:16.) Hikwalaho ka sweswo, hi nyikiwe Switirhisiwa Swo Pfuneta Ku Dyondzisa. (Vona bokisi leri nge “ Switirhisiwa Swo Pfuneta Ku Dyondzisa.”) Onge hi nga swi tirhisa kahle switirhisiwa leswi. Loko muhuweleri a kuma munhu la tsakelaka u ta tihlawulela xitirhisiwa lexi a lavaka ku xi tirhisa. Xikongomelo xa hina a hi ku phakela vanhu mikandziyiso, hikwalaho a hi nge yi siyi eka vanhu lava nga tsakeriki. Xikongomelo xa hina i ku pfuna vanhu lava titsongahataka, lava navelaka ku tiva Xikwembu ni lava nga ni “mboyamelo lowunene eka vutomi lebyi nga heriki” leswaku va va vadyondzisiwa.—Mint. 13:48; Mat. 28:19, 20.