1-2. (a) Ku nga ri khale matiko ma ta endla xitiviso xihi? (b) Hi swihi swivutiso leswi nga ta hlamuriwa?

EHLEKEA hi ndlela leyi matiko ma nga ta titwa ha yona loko ma ta va ma endle xitiviso lexi ku nga khale xi rindzeriwile lexi nge, “ku rhula ni nsirhelelo.” Ma ta ti ba xifuva hi ku vula leswaku se ku ni ku rhula ni nsirhelelo emisaveni. Ma ta tibyela leswaku se ma swi kotile ku tlhantlha swiphiqo hinkwaswo emisaveni. Kambe a ma nge swi koti ku lawula leswi nga ta humelela! Hikwalaho ka yini? Bibele yi profete leswaku “ndzoviso wa xitshuketa wu ta [ma] wela hi xihatla . . . naswona a [ma] nge baleki nikatsongo.”—1 Tes. 5:3.

² Ku ni swivutiso swa nkoka leswi lavaka ku hlamuriwa leswi nge: Ku ta endleka yini hi nkarhi wa “nhlomulo lowukulu”? Yehovha u ta lava leswaku hi endla yini hi nkarhi wolowo? Hi fanele hi endla yini sweswi leswaku hi ta kota ku tshama hi tshembekile hi nkarhi wa nhlomulo lowukulu?—Mat. 24:21.

3. Hi ku ya hi Nhlavutelo 17:5, 15-18, Xikwembu xi ta n’wi lovisa njhani “Babilona Lonkulu”?

³ Hlaya Nhlavutelo 17:5, 15-18. “Babilona Lonkulu” u ta lovisiwa! Kambe hilaha se hi vuleke hakona, matiko a ma nge swi koti ku lawula leswi nga ta humelela hi nkarhi wolowo. Hikwalaho ka yini? Hikuva ‘Xikwembu xi ta swi nghenisa etimbilwini ta wona leswaku ma endla miehleketo ya xona.’ Hi yihi miehleketo ya kona? I ya ku lovisa vukhongeri hinkwabyo bya mavunwa ku  katsa ni Vujagana. * Xikwembu xi ta nghenisa miehleketo ya xona etimbilwini ta “timhondzo ta khume” ni le ka “xivandzana xa muvala wa ribungu.” Timhondzo ta khume ti yimela mifumo hinkwayo ya tipolitiki leyi seketelaka “xivandzana,” ku nga Nhlangano wa Matiko. (Nhlav. 17:3, 11-13; 18:8) Nhlomulo lowukulu wu ta sungula loko mifumo yoleyo ya tipolitiki yi hlasela vukhongeri bya mavunwa. Swi ta endleka hi xitshuketa naswona swi ta chavisa swinene.

4. (a) I yini leswi matiko ma nga ta tiyimelela hi swona loko ma hlasela vukhongeri bya mavunwa? (b) Khale ka swirho swa vukhongeri byebyo swi ta endla yini?

⁴ A hi swi tivi leswaku matiko ma ta tiyimelela ma ku yini loko ma hlasela Babilona Lonkulu. Kumbexana ma ta ku vukhongeri hi byona lebyi endlaka ku nga vi na ku rhula naswona byi hoxa nhompfu eka swa tipolitiki. Kumbe ma vula leswaku mihlangano yoleyo ya vukhongeri yi ni rifuwo ro tala swinene. (Nhlav. 18:3, 7) Leswi a swi vuli swona leswaku swirho hinkwaswo swa vukhongeri lebyi swi ta lovisiwa. Ematshan’weni ya sweswo, matiko ma ta herisa mihlangano ya vukhongeri. Loko mihlangano yoleyo yi herisiwile, khale ka swirho swa yona swi ta swi xiya leswaku vafundhisi a vo swi dyelela ntsena naswona a swi nge he lavi ku twa nchumu hi vukhongeri byebyo.

5. I yini leswi Yehovha a swi tshembiseke mayelana ni nhlomulo lowukulu naswona hikwalaho ka yini?

⁵ Bibele a yi boxi leswaku swi ta teka nkarhi wo tanihi kwihi ku lovisiwa ka Babilona Lonkulu kambe lexi hi xi tivaka hi leswaku swi ta endleka hi xihatla. (Nhlav. 18:10, 21) Yehovha u tshembisa leswaku u ta “hungutanga masiku wolawo” ya nhlomulo lowukulu leswaku ku ta pona “vahlawuriwa” vakwe ni vukhongeri bya ntiyiso. (Mar. 13:19, 20) Kambe Yehovha u ta lava leswaku hi endla yini hi nkarhi wa nhlomulo lowukulu ni wa nyimpi ya Armagedoni?

6. Hikwalaho ka yini swi nga enelanga ku tihambanisa ntsena ni vukhongeri bya mavunwa?

⁶ Hilaha hi dyondzeke hakona eka nhlokomhaka leyi hundzeke, Yehovha u lava leswaku  vagandzeri vakwe va tihambanisa na Babilona Lonkulu. Kambe ku na swo tala leswi hi faneleke hi swi endla ku tlula ku tihambanisa ni vukhongeri bya mavunwa ntsena. Hi fanele hi seketela vugandzeri bya ntiyiso, ku nga ku gandzela Yehovha. Twana tindlela timbirhi leti hi nga swi endlaka ha tona leswi.

7. (a) Hi nga endla yini ku kombisa leswaku hi yingisa milawu ya Yehovha ya mahanyelo? (b) Vaheveru 10:24, 25 yi wu kandziyisa njhani nkoka wo hlengeletana swin’we, ngopfungopfu sweswi?

⁷ Xo sungula, hi fanele hi yingisa milawu ya Yehovha ya mahanyelo. A hi fanelanga hi amukela milawu ya mahanyelo ya misava leyi. Hi xikombiso, a hi ku amukeli ku tikhoma ko biha hi tlhelo ra masangu ka muxaka wun’wana ni wun’wana, ku katsa ni ku tekana ka vanhu va rimbewu leri fanaka hambi ku ri ku tekelela mahanyelo ya vona. (Mat. 19:4, 5; Rhom. 1:26, 27) Xa vumbirhi, hi fanele hi ya emahlweni hi gandzela swin’we ni Vakrestekulorhi. Hi endla leswi kun’wana ni kun’wana laha hi nga kona, ku nga va eHolweni ya Mfumo, emakaya ya vamakwerhu kumbe hi hlangana swin’we exihundleni. Hambi ko ba lexi dumaka, a hi nge wu tshiki mukhuva wa hina wa ku hlengeletana leswaku hi gandzela swin’we. Hi fanele hi hlengeletana “hilaha ku engetelekeke ngopfu tanihi leswi [hi] vonaka siku ri tshinela.”—Hlaya Vaheveru 10:24, 25.

8. Rungula leri hi ri chumayelaka ri ta cinca hi ndlela yihi enkarhini lowu taka?

⁸ Hi nkarhi wa nhlomulo lowukulu rungula leri hi ri chumayelaka ri ta cinca. Sweswi, hi chumayela mahungu lamanene ya Mfumo naswona hi tikarhatela ku endla vadyondzisiwa. Kambe hi nkarhi wolowo, hi ta chumayela rungula leri nga ni khombo ku fana ni xihangu. (Nhlav. 16:21) Kumbexana hi ta chumayela vanhu hi va byela leswaku ku lovisiwa ka Sathana se ku fikile. Ku nga ri khale, hi ta ri tiva rungula leri hi nga ta ri chumayela ni ndlela leyi hi nga ta ri chumayela ha yona. Xana hi ta tirhisa tindlela leti a hi chumayela ha tona ku sukela khale? Kumbexana hi ta tirhisa tindlela tin’wana? Hi ta vona hi swona. Ku nga khathariseki ndlela leyi hi nga ta yi tirhisa, hi ta va ni nkateko wo twarisa rungula ra Yehovha ra vuavanyisi!—Ezek. 2:3-5.

9. Matiko ma ta angula njhani eka rungula ra hina kambe i yini leswi hi tiyisekaka ha swona?

⁹ Rungula ra hina ri ta hlundzukisa matiko naswona ma ta ringeta ku herisa ntirho wa hina wo chumayela hi ku helela. Leswi Yehovha a hi seketelaka entirhweni wa hina wo chumayela namuntlha ni hi karhi wolowo u ta hi seketela. Ha tiyiseka leswaku Yehovha u ta hi nyika matimba ya ku endla ku rhandza kakwe.—Mik. 3:8.

10. Hilaha ku profetiweke hakona eka Luka 21:25-28, vanhu vo tala va ta angula njhani hi nkarhi wa nhlomulo lowukulu?

¹⁰ Hlaya Luka 21:25-28. Hi nkarhi wa nhlomulo lowukulu, vanhu vo tala va ta tsemeka nhlana loko va vona swilo leswi a va tibyela leswaku swi ta tshama hilaha ku nga heriki swi lovisiwa. Va ta twa ku ‘vava’ swinene naswona va ta khomiwa hi rhumbyana hikwalaho ko ehleketa leswaku va ta lovisiwa hi nkarhi wa khombo ro chavisa ku tlula hinkwawo lama tshameke ma va kona. (Sof. 1:14, 15) Enkarhini wolowo, malandza ya Yehovha na wona ma ta koka exilogweni. Leswi hi nga riki xiphemu xa misava, hi ta xanisiwa swinene. Hi ta boheka ku hanya hi nga ri na swona swilo swin’wana swa nkoka leswi hi swi lavaka.

11. (a) I yini lexi nga ta endla leswaku Timbhoni ta Yehovha ti hlaseriwa? (b) Hikwalaho ka yini hi nga fanelanga hi chava nhlomulo lowukulu?

¹¹ Vanhu lava vukhongeri bya vona byi herisiweke, va ta hlundzuka hikwalaho ka leswi vukhongeri bya Timbhoni ta Yehovha byi nga herisiwangiki. Va ta kombisa ku hlundzuka ka vona  etindhawini hinkwato, ku katsa ni le ka social media. Matiko swin’we ni mufumi wa wona Sathana, ma ta hi venga hikwalaho ka leswi vukhongeri bya hina byi nga herisiwangiki. Ma ta va ma tsandzekile ku fikelela xikongomelo xa wona xo herisa vukhongeri hinkwabyo laha misaveni. Hikwalaho ka sweswo, ma ta hi tshwukisela mahlo. Hi nkarhi wolowo, matiko ma ta va Gogo wa Magogo. * Ma ta hlengeletana leswaku ma hlasela vanhu va Yehovha hi ndlela ya tihanyi. (Ezek. 38:2, 14-16) Swi nga hi vilerisa ku ehleketa hi leswi nga ta endleka hi nkarhi wolowo tanihi leswi hi nga tiviki vuxokoxoko hinkwabyo bya swilo leswi nga ta endleka. Kambe leswi hi tiyisekaka ha swona hi leswi: A hi fanelanga hi chava nhlomulo lowukulu. Yehovha u ta hi nyika swiletelo leswi nga ta hi ponisa. (Ps. 34:19) Hi ta ‘yima hi ololoka ivi hi tlakusa tinhloko ta hina’ hikuva hi ta swi xiya leswaku ku ‘kutsuriwa ka hina ku tshinele.’ *

12. “Hlonga ro tshembeka ni ro tlhariha,” ri hi pfuna njhani leswaku hi tshama hi lunghekele swiendlakalo swa nkarhi lowu taka?

¹² “Hlonga ro tshembeka ni ro tlhariha,” ra hi hlomisa leswaku hi ta tshama hi tshembekile hi nkarhi wa nhlomulo lowukulu. (Mat. 24:45) Ri hi hlomisa hi tindlela to tala. Hi xikombiso, ehleketa hi tinhlengeletano ta hina ta swifundzha leti fikeke hi nkarhi ta 2016 ku ya eka 2018. Tinhlengeletano teto, ti hi pfunile leswaku hi hlakulela timfanelo leti nga ta hi pfuna tanihi leswi siku ra Yehovha ri nga kwala nyongeni. A hi tlheleni hi bula katsongo hi timfanelo teto.

13. Hi nga ku tiyisa njhani ku tshembeka ka hina eka Yehovha naswona hikwalaho ka yini hi fanele hi endla tano sweswi?

¹³ Ku tshembeka: Nhlokomhaka ya nhlengeletano xifundzha ya 2016 a yi ku “Tshama U Tshembekile Eka Yehovha!” Nhlengeletano yoleyo yi hi pfunile hi xiya leswaku loko hi ri ni vuxaka lebyinene na Yehovha, hi ta tshama hi tshembekile eka yena. Hi dyondze leswaku hi nga tshinela eka Yehovha hi ku khongela swi suka embilwini ni hi ku dyondza Rito rakwe. Loko hi endla tano, hi ta va ni matimba yo tiyisela miringo hinkwayo leyi hi nga langutanaka na yona. Leswi misava ya Sathana yi nga ta lovisiwa ku nga ri khale, hi ta langutana ni miringo yo tika swinene, leyi nga ta ringa ku tshembeka ka hina eka Xikwembu ni Mfumo wa xona. Vanhu va ta ya mahlweni va hi hlekula. (2 Pet. 3:3, 4) Leswi swi ta vangiwa hileswi hi nga seketeliki nchumu eka mifumo ya tipolitiki. Hi fanele hi tiyisa ku tshembeka ka hina sweswi leswaku hi ta kota ku tshama hi tshembekile hi nkarhi wa nhlomulo lowukulu.

14. (a) Hi kwihi ku cinca loku nga ta va kona mayelana ni vamakwerhu lava hi rhangelaka laha misaveni? (b) Hikwalaho ka yini swi ta lava hi tshembeka hi nkarhi wolowo?

¹⁴ Hi nkarhi wa nhlomulo lowukulu, ku ta va ni ku cinca eka vamakwerhu lava hi rhangelaka laha misaveni. Hi nkarhi wolowo, vatotiwa hinkwavo lava nga ta va va ha ri laha misaveni, va ta hlengeleteriwa ku ya etilweni leswaku va ya katseka enyimpini ya Armagedoni. (Mat. 24:31; Nhlav. 2:26, 27) Leswi swi vula leswaku Huvo leyi Fumaka yi ta va yi nga ha ri kona laha misaveni. Kambe ntshungu lowukulu wa ha ta tama wu hlelekile. Vamakwerhu van’wana va tinyimpfu tin’wana hi vona lava nga ta rhangela. Hi fanele hi kombisa ku tshembeka ka hina hi ku seketela vamakwerhu lava ni ku yingisa nkongomiso lowu va nga ta hi nyika wona lowu humaka  eka Xikwembu. Ku pona ka hina swi titshege hi ku yingisa nkongomiso lowu va nga ta hi nyika wona!

15. I yini xi nga hi pfunaka leswaku hi nga tshiki ku tiyisela naswona hikwalaho ka yini swi ri swa nkoka ku tiyisela sweswi?

¹⁵ Ku tiyisela: Nhlokomhaka ya nhlengeletano ya xifundzha ya 2017 a yi ku “U Nga Karhali!” Nhlengeletano yoleyo yi hi pfunile leswaku hi nga tshiki ku tiyisela loko hi langutana ni miringo. Hi dyondze leswaku ku tiyisela ka hina a ku titsheganga hi swiyimo swo karhi. Hi nga kota ku tiyisela ntsena loko hi titshega hi Yehovha. (Rhom. 12:12) Tsundzuka xitshembiso xa Yesu lexi nge: “Loyi a [tiyiseleka] ku fika emakumu hi yena la nga ta ponisiwa.” (Mat. 24:13) Xitshembiso lexi xi vula leswaku hi fanele hi tshama hi tshembekile, ku nga khathariseki swiyimo hinkwaswo leswi hi langutanaka na swona. Loko hi kota ku tiyisela miringo sweswi, hi ta swi kota ku tiyisela ni hi nkarhi wa nhlomulo lowukulu.

16. I yini lexi endleka hi va ni xivindzi naswona hi nga xi tiyisa njhani xivindzi xa hina sweswi?

¹⁶ Xivindzi: Nhlokomhaka ya nhlengeletano ya xifundzha ya 2018 a yi ku “Vana Ni Xivindzi!” Nhlengeletano yoleyo yi hi pfunile hi xiya leswaku ku va ni xivindzi a swi titsheganga hi vuswikoti bya hina. Ku fana ni ku tiyisela, leswaku hi va ni xivindzi hi fanele hi titshega hi Yehovha? I yini leswi nga hi pfunaka leswaku hi kota ku titshega hi Yehovha? I ku hlaya Rito rakwe siku ni siku ni ku anakanyisisa hi ndlela leyi a va poniseke ha yona vanhu vakwe enkarhini lowu hundzeke. (Ps. 68:20; 2 Pet. 2:9) Loko matiko ma hi hlasela hi nkarhi wa nhlomulo lowukulu, hi fanele hi va ni xivindzi hi tlhela hi titshega hi Yehovha ku tlula rini na rini. (Ps. 112:7, 8; Hev. 13:6) Loko hi titshega hi Yehovha sweswi, hi ta va ni xivindzi xo langutana ni nhlaselo wa Gogo. *

17. Hikwalaho ka yini hi nga fanelanga hi chava Armagedoni? (Vona xifaniso xa xifunengeto.)

¹⁷ Hilaha swi kombisiweke hakona eka nhlokomhaka leyi hundzeke, vo tala va hina hi velekiwe ni ku kula hi nkarhi wa masiku ya makumu. Kambe ha tshemba leswaku hi ta pona hi nkarhi wa nhlomulo lowukulu. Nyimpi ya Armagedoni  yi ta herisa misava leyi lawuriwaka hi Sathana hi ku helela. Kambe a hi fanelanga hi chava. Hikwalaho ka yini? Hikuva leyi i nyimpi ya Xikwembu. (Swiv. 1:33; Ezek. 38:18-20; Zak. 14:3) Yesu Kreste hi yena loyi a nga ta rhangela vuthu ra nyimpi hi ku kongomisiwa hi Yehovha. U ta tirha swin’we ni vatotiwa lava pfuxiweke ni timiriyadi ta tintsumi. Va ta lwa na Sathana, madimona yakwe ni mavuthu yakwe ya laha misaveni.—Dan. 12:1; Nhlav. 6:2; 17:14.

18. (a) I yini leswi Yehovha a hi tiyisekisaka ha swona? (b) Nhlavutelo 7:9, 13-17, yi ku pfuna njhani leswaku u langutela vumundzuku handle ko chava?

¹⁸ Yehovha wa hi tiyisekisa, u ri: “Tlhari rihi ni rihi leri nga ta endleriwa ku ku hlasela a ri nge humeleli.” (Esa. 54:17) “Ntshungu lowukulu” lowu gandzelaka Yehovha hi ku tshembeka wu ta pona hi nkarhi wa “[nhlomulo] lowukulu!” Wu ta ya emahlweni wu endlela Yehovha ntirho wo kwetsima. (Hlaya Nhlavutelo 7:9, 13-17.) Hakunene Bibele ya hi tiyisekisa leswaku hi ta pona hi nkarhi wa nhlomulo lowukulu! Ha swi tiva leswaku “Yehovha wa n’wi hlayisa lowo tshembeka.” (Ps. 31:23) Vanhu hinkwavo lava rhandzaka Yehovha va tlhela va n’wi gandzela, va ta khana loko va n’wi vona a vangamisa vito rakwe leri kwetsimaka.—Ezek. 38:23.

19. Hi yihi mikateko leyi hi nga ta tiphina ha yona enkarhini lowu taka?

¹⁹ Ehleketa hi ndlela leyi 2 Timotiya 3:2-5, a yi ta hlayeka ha yona loko a yi vulavula hi vanhu va le misaveni leyintshwa lava nga ta ka va nga ha kuceteriwi hi Sathana. (Vona bokisi leri nge “ Ndlela Leyi Vanhu Va Nga Ta Va Ha Yona Hi Nkarhi Wolowo.”) Makwerhu George Gangas, * loyi a ri xirho xa Huvo leyi Fumaka, u te: “Mayana ndlela leyi misava yi nga ta tsakisa ha yona loko vanhu hinkwavo se va vitanana vamakwavo! Ku nga ri khale u ta kuma nkateko wo ya hanya emisaveni leyintshwa. U ta hanya ntsena loko Yehovha a ha hanya. Hi ta hanya hilaha ku nga heriki.” Ntshembo lowu wu tiyisa nhlana hakunene!