MUVHUMBHI wa ta maxelo u pompola ndlela leyi maxelo ma nga ta va xiswona. U vona xidzedze lexikulu lexi kongomaka endhawini leyi nga ni vaaki vo tala. Leswi a khathalaka hi vuhlayiseki bya vanhu, u endla matshalatshala yo va lemukisa ka ha ri ni nkarhi.

Hilaha ku fanaka, namuntlha Yehovha u lemukisa vanhu hinkwavo hi ta “xidzedze” lexi nga ni khombo, ku tlula swidzedze hinkwaswo leswi va tshameke va twa hi swona eka ta maxelo. U swi endla njhani leswi? Hi swi tiva njhani leswaku u nyika vanhu nkarhi lowu eneleke wo hundzuka? Leswaku hi kuma nhlamulo, a hi rhangeni hi kambisisa ndlela leyi Yehovha a lemukiseke vanhu ha yona enkarhini lowu hundzeke.

EBibeleni, Yehovha u lemukise vanhu hi “swidzedze” kumbe vuavanyisi byo hambanahambana lebyi a byi ta wela vanhu hinkwavo lava bakanyaka milawu yakwe hi vomu. (Swiv. 10:25; Yer. 30:23) Mikarhi hinkwayo a va lemukisa ka ha ri ni nkarhi ni ku va byela leswi va faneleke va swi endla ku kombisa leswaku va n’wi yingisa. (2 Tih. 17:12-15; Neh. 9:29, 30) Hakanyingi, a a tirhisa malandza yakwe yo tshembeka leswaku a lemukisa vanhu hi ta vuavanyisi byakwe ni ku va pfuna va teka goza hi ku hatlisa.—Amo. 3:7.

Un’wana wa malandza wolawo yo tshembeka i Nowa. Hi xivindzi, u hete malembe yo tala a ri karhi a lemukisa vanhu lava a va tikhome ku biha ni lava a va vanga madzolonga hi ta Ndhambi leyi a yi ta kukula misava hinkwayo. (Gen. 6:9-13, 17) U tlhele a va byela leswi a va fanele va swi endla leswaku va ta pona, hi yona mhaka a vitaniwaka “muchumayeri wa leswo lulama.”—2 Pet. 2:5.

Kambe vanhu va le mahlweni ka Ndhambi, va ri be hi makatla rungula leri Nowa a va byeleke rona leri a ri huma eka Xikwembu. Va swi veke erivaleni leswaku a va nga ri na ripfumelo. Hikwalaho, va file loko Ndhambi “yi fika yi va kukula hinkwavo.” (Mat. 24:39; Hev. 11:7) Loko Ndhambi yi sungula, a va nga ta vula leswaku Xikwembu a xi va lemukisanga.

Mikarhi yin’wana, Yehovha a a lemukisa vanhu ku sale nkarhi wutsongo leswaku va weriwa hi “xidzedze” xa vuavanyisi byakwe. Nilokoswiritano, a tiyiseka leswaku vanhu volavo va kuma nkarhi lowu eneleke wo teka goza. Hi xikombiso, u lemukise Vaegipta va khale ka ha ri mahlweni hi ta makhombo ya khume lama va weleke. Yehovha u rhume Muxe na Aroni leswaku va ya lemukisa Faro ni malandza yakwe hi ta khombo ra vunkombo ra xihangu lexikulu. Leswi xihangu a xi ta sungula hi xamundzuku xa kona, xana Xikwembu xi va nyike nkarhi lowu eneleke wo lava vutumbelo? Bibele yi ri: “Un’wana ni un’wana la chavaka rito ra Yehovha exikarhi ka malandza ya Faro a balekisa malandza ya yena ni swifuwo swa yena etindlwini, kambe un’wana ni un’wana la nga vekangiki mbilu yakwe leswaku yi xixima rito ra Yehovha, a tshika malandza yakwe ni swifuwo swakwe enhoveni.” (Eks. 9:18-21) Swi le rivaleni leswaku Yehovha u va lemukise ka ha ri ni nkarhi naswona lava va yingiseke xilemukiso xexo va ponile.

Hilaha ku fanaka, Faro ni malandza yakwe va lemukisiwile khombo ra vukhume ri nga si fika. Kambe hi vuphukuphuku, va xi be hi makatla xilemukiso xexo. (Eks. 4:22, 23) Hikwalaho ka sweswo, mativula ya vona ma file. Wa nga vona khombo ronghasi! (Eks. 11:4-10; 12:29) Xana a va ta va va swi kotile ku papalata khombo rero? Ina! Hi ku hatlisa Muxe u lemukise Vaisrayele hi ta khombo ra vukhume leri a ri ri kwala nyongeni, a tlhela a va byela leswi va faneleke va swi endla leswaku va ta ponisa mindyangu ya vona. (Eks. 12:21-28) Xana i vangani vanhu lava yingiseke xilemukiso xexo? Van’wana va vula leswaku vanhu va timiliyoni tinharhu, lava a va katsa Vaisrayele ni “ntlawa wun’wana  lowukulu” wa vanhu lava a va nga ri Vaisrayele swin’we ni Vaegipta van’wana, va pone vuavanyisi bya Xikwembu kutani va huma aEgipta.—Eks. 12:38.

Hilaha se hi swi voneke hakona, mikarhi hinkwayo Yehovha u nyika vanhu nkarhi lowu eneleke wa leswaku va yingisa swilemukiso swakwe. (Det. 32:4) Hikwalaho ka yini Xikwembu xi endla tano? Muapostola Petro u vule leswaku Yehovha “a nga naveli leswaku ku lova ni un’we kambe u navela leswaku hinkwenu mi hundzuka.” (2 Pet. 3:9) Swi lo tlangandla, leswaku Xikwembu xa khathala hi vanhu. A xi lava leswaku va hundzuka va yingisa xilemukiso xa xona va nga si weriwa hi vuavanyisi bya xona.—Esa. 48:17, 18; Rhom. 2:4.

Ninamuntlha, vanhu hinkwavo va fanele va yingisa xilemukiso lexi twarisiwaka emisaveni hinkwayo. Loko Yesu a ha ri laha misaveni, u lemukise vanhu leswaku misava leyi yi ta lovisiwa hi nkarhi wa “nhlomulo lowukulu.” (Mat. 24:21) Hi ku tirhisa vuprofeta, u hlamusele vuxokoxoko lebyi a byi ta pfuna valandzeri vakwe va kota ku vona loko nkarhi wa vuavanyisi se wu ri kwala nyongeni. Yesu u profete hi swiendlakalo swa nkoka leswi nga eku hetisekeni emisaveni hinkwayo namuntlha.—Mat. 24:3-12; Luka 21:10-13.

Hi ku fambisana ni vuprofeta byebyo, Yehovha u lava leswaku vanhu va n’wi yingisa. U lava leswaku vanhu lava n’wi yingisaka, va tiphina hi vutomi sweswi ni hi mikateko yo tala swinene enkarhini lowu taka emisaveni leyintshwa yo lulama. (2 Pet. 3:13) Leswaku Yehovha a pfuna vanhu va va ni ripfumelo eka switshembiso swakwe, u endle leswaku ku chumayeriwa “mahungu lamanene ya Mfumo,” lawa Yesu a profeteke leswaku ma ta “chumayeriwa emisaveni hinkwayo leyi akiweke leswaku byi va vumbhoni ematikweni hinkwawo.” (Mat. 24:14) Xikwembu xi hlengelete vagandzeri va xona va ntiyiso leswaku va “chumayela” rungula ra xona ematikweni ya kwalomu ka 240. Yehovha u lava leswaku vanhu vo tala va yingisa xilemukiso xexo kutani va baleka “xidzedze” lexi nga eku teni xa vuavanyisi byakwe byo lulama.—Sof. 1:14, 15; 2:2, 3.

Swi le rivaleni leswaku Yehovha u lemukisa vanhu ka ha ri ni nkarhi naswona u va nyika nkarhi lowu eneleke wo hundzuka. Hi ni vumbhoni byo tala lebyi tiyisekisaka mhaka leyi. Kambe xivutiso xa nkoka hi lexi nge: Xana vanhu va ta xi yingisa xilemukiso xa Xikwembu ka ha ri ni nkarhi? Leswi hi nga vayimeri va Xikwembu, onge hi nga ya emahlweni hi pfuna vanhu vo tala hilaha hi nga kotaka hakona leswaku va ta pona loko ku lovisiwa misava leyi.