1. Hi va navelela yini maxaka ya hina?

PAULINE * u ri: “Loko ndzi dyondza ntiyiso a ndzi navela ku va ni ndyangu wa mina hinkwawo eParadeyisini. A ndzi swi navela ngopfu ku tirhela Yehovha swin’we ni nuna wa mina Wayne ni xijahatana xa hina.” Xana u ni maxaka lama nga si n’wi tivaka Yehovha ni ku n’wi tirhela? Loko swi ri tano, u nga ha va u titwa hi ndlela leyi Pauline a a titwa ha yona hi maxaka yakwe.

2. I swivutiso swihi leswi hi nga ta swi kambisisa eka xihloko lexi?

² A hi nge ma sindzisi maxaka ya hina leswaku ma amukela mahungu lamanene, kambe hi nga ma pfuna leswaku ma ehleketisisa hi leswi Bibele yi swi vulaka. (2 Tim. 3:14, 15) Hikwalaho ka yini hi fanele hi chumayela maxaka ya hina? Hikwalaho ka yini hi fanele hi va ni ntwelavusiwana? Hi nga endla yini leswaku hi pfuna maxaka ya hina leswaku ma rhandza Yehovha ku fana na hina? Xana hinkwerhu evandlheni hi nga pfuna njhani?

3. Hi ku ya hi 2 Petro 3:9, hikwalaho ka yini hi fanele hi chumayela maxaka ya hina?

³ Ku nga ri khale Yehovha u ta herisa misava leyi. Ku ta pona lava nga ni “mboyamelo lowunene eka vutomi lebyi nga heriki.” (Mint. 13:48) Hi heta nkarhi wo tala hi ri karhi hi chumayela vanhu lava hi nga va tiviki emugageni wa ka hina hikwalaho swa twala ku va hi navela leswaku maxaka ya hina ma tirhela Yehovha swin’we na hina. Yehovha Tata wa hina “a nga naveli leswaku ku lova  ni un’we kambe u navela leswaku [vanhu hinkwavo va] hundzuka.”—Hlaya 2 Petro 3:9.

4. Hi nga tikuma hi endla xihoxo xihi loko hi chumayela maxaka?

⁴ Hi fanele hi tsundzuka leswaku ku ni ndlela leyinene ni leyi nga riki yinene, yo byela van’wana hi rungula ra ku ponisiwa. Hi xikombiso, hi nga vulavula hi musa loko hi chumayela vanhu lava hi nga va tiviki, kambe loko hi chumayela maxaka ya hina hi va byeletela kunene!

5. I yini leswi hi faneleke hi swi tsundzuka loko hi ringeta ku chumayela maxaka ya hina?

⁵ Vo tala va hina loko hi tsundzuka ndlela leyi hi chumayeleke maxaka ya hina ha yona, ha tisola naswona hi vona onge a swi ta antswa loko a hi va chumayele hi ndlela yin’wana. Muapostola Pawulo u nyike Vakreste ndzayo a ku: “Marito ya n’wina a ma ve ni nsovo nkarhi hinkwawo, ma lungiwe hi munyu, leswaku mi tiva ndlela leyi mi faneleke ku hlamula un’wana ni un’wana ha yona.” (Kol. 4:5, 6) I swa nkoka ku tsundzuka ndzayo leyi loko hi chumayela maxaka ya hina. Hikuva swi nga ha endleka hi va hlundzukisa ematshan’weni yo va pfuna.

6-7. Vula xikombiso lexi kombisaka leswaku i swa nkoka ku va ni ntwelavusiwana eka nuna kumbe nsati loyi a nga riki Mbhoni.

⁶ Vana ni ntwelavusiwana. Pauline loyi a boxiweke eku sunguleni u ri: “Eku sunguleni mina ni nkatanga a hi nga ha buli hi swilo swin’wana, a ndzi lava leswaku hi bula hi Xikwembu ni hi Bibele ntsena. A hi nga buli hi leti na letiya!” Kambe nuna wa Pauline a a nga tivi swo tala hi Bibele naswona a nga swi twisisi leswi nsati wakwe a vulavula hi swona. Wayne a vona onge Bibele se ya n’wi pengisa nsati wakwe! A vilerisiwa hileswaku nsati wakwe u joyine ntlawa lowu nga ni khombo lowu nga ta n’wi hambukisa.

⁷ Pauline wa pfumela leswaku a a heta nkarhi wo tala a xuxa ni vamakwerhu, kasi hi  mahelovhiki a tlhela a heta nkarhi na vona eminhlanganweni, ensin’wini hambi ku ri ku hungasa na vona. Pauline u ri: “Mikarhi yin’wana loko Wayne a vuya ekaya, a kuma hi nga ri kona.” Swi le rivaleni leswaku Wayne a biwa hi xivundza loko a kuma nsati wakwe a nga ri kona. A a nga va tivi vanhu lava nsati wakwe a heta nkarhi na vona naswona a vona onge vanghana va yena lavantshwa se a va ri va nkoka ngopfu eka nsati wakwe ku tlula yena. Wayne u xungete nsati wakwe hi ku n’wi byela leswaku u ta n’wi tshika. Xana ti kona tindlela tin’wana leti Pauline a ta va a kombise ntwelavusiwana ha tona?

8. Hi ku ya hi 1 Petro 3:1, 2, i yini leswi nga endleka maxaka ya hina ma navela ku dyondza?

⁸ Va vekele xikombiso. Hakanyingi swiendlo swa hina swi vula swo tala eka maxaka ya hina ku tlula leswi hi va byelaka swona. (Hlaya 1 Petro 3:1, 2.) Pauline u hetelele a yi xiyile mhaka leyi. U ri: “A ndzi swi tiva leswaku Wayne wa hi rhandza naswona a a nga lavi ku ndzi tshika. Kambe ndlela leyi a ndzi xungeteke ha yona yi ndzi pfule mahlo kutani ndzi sungula ku swi vona leswaku ndzi fanele ndzi endla swilo hi ndlela ya Yehovha. Ematshan’wini yo vulavula ngopfu, mahanyelo ya mina hi wona a ma fanele ma va xikombiso lexinene.” Pauline u tshike ku sindzisa nuna wakwe ku vulavula na yena hi Bibele, kutani va sungula ku bula hi timhaka leti tolovelekeke ta siku na siku. Wayne u sungule ku vona nsati wakwe a va munhu wo rhula naswona xijahatana xa vona xi sungule ku yingisa ni ku va ni mahanyelo lamanene. (Swiv. 31:18, 27, 28) Loko Wayne a vona ndlela leyi Bibele yi hundzulaka ndyangu wakwe ha yona, u sungule ku tsakela Rito ra Xikwembu.—1 Kor. 7:12-14, 16.

9. Hikwalaho ka yini hi fanele hi ya emahlweni hi pfuna maxaka ya hina?

⁹ U nga tshiki ku pfuna maxaka ya wena. Yehovha  u hi vekela xikombiso. U nyika vanhu nkarhi wo yingisa mahungu lamanene “hi ku phindhaphindha” leswaku va ta kuma vutomi lebyi nga heriki. (Yer. 44:4 nwt) Muapostola Pawulo u byele Timotiya leswaku a ya emahlweni a pfuna van’wana. Hikwalaho ka yini? Hikuva loko a endla tano, u ta tiponisa swin’we ni lava va n’wi yingisaka. (1 Tim. 4:16) Ha ma rhandza maxaka ya hina naswona hi navela leswaku ma kuma vutivi lebyi nga eRitweni ra Xikwembu. Marito ni mahanyelo ya Pauline swi pfune ndyangu wakwe. Sweswi va tirhela Yehovha swin’we va tsakile. Havumbirhi bya vona i maphayona naswona Wayne i nkulu evandlheni.

10. Hikwalaho ka yini hi fanele hi lehisa mbilu?

¹⁰ Lehisa mbilu. Loko hi sungula ku hanya hi milawu ya Xikwembu swi nga ha ma tikela maxaka ya hina ku twisisa leswi hi swi pfumelaka. Hakanyingi, lexi va rhangaka va xi xiya hileswaku a ha ha katseki eka minkhuvo ya vona ya vukhongeri hambi ku ri ku nghenelela eka tipolitiki. Maxaka man’wana ma nga hi hlundzukela. (Mat. 10:35, 36) Kambe a hi fanelanga hi ma lahlela mavoko. Loko hi tshika ku va pfuna leswaku va twisisa leswi hi swi pfumelaka hi ta va hi va avanyisa leswaku a swi va faneli ku kuma vutomi lebyi nga heriki. Yehovha a nga hi nyikanga ntirho wo avanyisa vanhu, ntirho wolowo u wu nyike Yesu. (Yoh. 5:22) Loko hi lehisa mbilu maxaka ya hina va nga hetelela va swi tsakela ku yingisa rungula ra hina.—Vona bokisi leri nge, “ Dyondzisa Hi Ku Tirhisa Website Ya Hina.”

11-13. I yini leswi u swi dyondzaka eka ndlela leyi Alice a tirhisaneke ni vatswari vakwe ha yona?

¹¹ Vana ni musa kambe u va ni vuxiyaxiya. (Swiv. 15:2) Xiya xikombiso xa Alice. Loko a dyondza ntiyiso a tshama ekule ni vatswari vakwe lava nga pfumeliki eka Xikwembu naswona va rhandzaka tipolitiki. U vone leswaku swa antswa a hatla a va byela timhaka to tsakisa leti a ti dyondzaka. Alice u ri: “Loko u nga va byeli to ho suka hi leswi u swi pfumelaka ni leswi se u swi endlaka, swi ta va hlundzukisa ngopfu siku va swi twaka.” U tsalele vatswari vakwe mapapila, a va vutisa leswi va swi ehleketaka hi timhaka to karhi ta le Bibeleni leti a a tshemba leswaku va ta ti tsakela, to tanihi rirhandzu. (1 Kor. 13:1-13) U rhange hi ku nkhensa vatswari vakwe leswi va nga n’wi kurisa kahle a tlhela a va rhumela ni tinyiko. Loko a va endzerile ekaya, a a gingiriteka a pfuna mana wakwe hi mitirho ya le kaya. Eku sunguleni, a yi va tsakisanga vatswari vakwe mhaka ya vukhongeri byakwe lebyintshwa.

¹² Loko Alice a ri ekaya a hamba a hlaya Bibele tanihi ntolovelo. U ri: “Ku hlaya ka mina ku pfune manana leswaku a twisisa ndlela leyi Bibele yi nga ya nkoka ha yona eka mina.” Tata wakwe u ehlekete ku dyondza swo karhi hi Bibele leswaku a ta twisisa leswi cinceke n’wana wakwe, a lava ku xopaxopa swihoxo eka yona. Alice u ri: “Ndzi nyike papa Bibele, ndzi n’wi tsalela ni rungula eka yona.” Ku humelele yini? Ematshan’weni yo kuma swihoxo, tata wa Alice u khumbiwe ngopfu hi leswi a swi hlayeke eBibeleni.

¹³ Hi fanele hi tiyisa voko kambe hi va ni vuxiyaxiya hambiloko hi ri ehansi ka swiyimo swo tika. (1 Kor. 4:12b) Hi xikombiso, Alice u boheke ku tiyisela ku kanetiwa hi mana wakwe. U ri: “Loko ndzi khuvuriwa, mama u ndzi vule ‘n’wana wo biha.’” Alice u endle njhani? U ri: “Ematshan’weni yo tshika ku vulavula hi vukhongeri bya mina lebyintshwa, ndzi n’wi hlamusele leswaku ndzi endle xiboho xo va Mbhoni ya Yehovha hambi ko ba lexi dumaka. Ndzi n’wi byele leswaku a nga chavi ndza n’wi rhandza swinene. Hiloko hi rila, ivi ndzi n’wi swekela swakudya swo xawula. Ku sukela kwalaho, mama u swi xiyile leswaku Bibele a yi ndzi endla munhu lonene.”

14. Hikwalaho ka yini hi nga fanelanga hi cinca xiboho lexi hi xi endleke xa ku tirhela Yehovha hikwalaho ka maxaka ya hina?

¹⁴ Maxaka ya hina ma nga ha hlwela ku swi twisisa leswaku ku tirhela Yehovha i swa nkoka ku  fikela kwihi eka hina. Hi xikombiso, loko Alice a endle xiboho xo phayona ku nga ri ku dyondzela ntirho wo karhi lowu vatswari vakwe a va lava leswaku a wu dyondzela, mana wakwe u tlhele a rila. Kambe Alice u tiyise voko. Alice u ri: “Loko wo pfumelela maxaka ya wena ma ku cincisa xiboho xo karhi lexi u nga xi endla, ma ta tolovela ivi ma ku cincisa swiboho swa wena ni le timhakeni tin’wana. Kambe loko u va ni musa, kambe u nga debyisi voko, maxaka ya wena man’wana ma ta ku yingisa.” Leswi hi leswi endlekeke emhakeni ya Alice. Vatswari vakwe sweswi i maphayona naswona tata wakwe i nkulu evandlheni.

15. Hi ku ya hi Matewu 5:14-16 na 1 Petro 2:12, ‘mitirho leyinene’ yi nga ma pfuna njhani maxaka ya hina?

¹⁵ Yehovha u kokela vanhu eka yena hi ku va endla va vona ‘mintirho leyinene’ ya malandza yakwe. (Hlaya Matewu 5:14-16; 1 Petro 2:12.) Loko nuna wa wena kumbe nsati wa wena a nga ri Mbhoni ya Yehovha, xana va kona vamakwerhu, lava a va tivaka evandlheni ra n’wina? Pauline loyi a boxiweke eku sunguleni u rhambe vamakwerhu ekaya leswaku nuna wakwe Wayne a ta va tiva. Loko Wayne a tsundzuka leswaku makwerhu un’wana u n’wi pfune njhani ku twisisa leswaku Timbhoni ta Yehovha i vanhu va njhani, u ri: “U teke siku entirhweni leswaku a ta hlalela ntlangu wa bolo na mina. Hiloko ndzi tibyela ndzi ku, ‘Wa fana ni vanhu van’wana!’”

16. Hikwalaho ka yini hi fanele hi rhamba maxaka ya hina emihlanganweni ya vandlha?

¹⁶ Ndlela yin’wana leyinene yo pfuna maxaka ya hina i ku va rhamba emihlanganweni ya vandlha. (1 Kor. 14:24, 25) Nhlangano wo sungula lowu Wayne a yeke eka wona i Xitsundzuxo hikuva a chayisile entirhweni naswona mbulavulo  wa kona a wu komile. U ri: “A ndzi nga swi twisisi leswi xivulavuri a xi vulavula ha swona, kambe ndzi tsundzuka ntsena leswaku vanhu va kona a va ri ni xinghana. Va ndzi amukele hi mandla mambirhi, va ndzi qhavula hi rirhandzu. Ndzi vhele ndzi swi vona leswaku i vanhu va kahle.” A ku ri ni ndyangu wun’wana lowu a wu n’wi rhandza ngopfu Pauline, a va n’wi tlakulela n’wana loko va ri emihlanganweni ni le nsin’wini. Eku heteleleni loko Wayne a endle xiboho xo lava ku tiva swo tala hi vukhongeri bya Pauline lebyintshwa, u kombele ku dyondzeriwa Bibele hi nuna wa kona.

17. I yini leswi hi nga fanelangiki hi titwa nandzu hikwalaho ka swona, naswona hikwalaho ka yini hi nga fanelanga hi tshika ku pfuna maxaka ya hina?

¹⁷ Ha tshemba leswaku hi ku famba ka nkarhi maxaka ya hina hinkwawo ma ta tirhela Yehovha swin’we na hina. Hambiloko hi endla matshalatshala yo pfuna maxaka ya hina leswaku va va malandza ya Yehovha, swi nga endleka va nga pfumeli. Loko swi ri tano, a hi fanelanga hi titwa nandzu hikwalaho ka xiboho xa vona. Phela a hi nge va sindzisi leswaku va pfumela leswi hi swi pfumelaka. Hambiswiritano, u nga yi tekeli ehansi ndlela leyi mahanyelo ya wena ma nga va pfunaka ha yona maxaka ya wena loko ma ku vona u tirhela Yehovha u tsakile. Ma boxe eswikhongelweni swa wena. U vulavula na wona hi vutlhari. U nga tshiki ku ma pfuna! (Mint. 20:20) Yehovha u ta ma katekisa matshalatshala ya wena. Loko maxaka ya wena ma hlawula ku ku yingisa, ma ta ponisiwa!