1-2. (a) I yini leswi Yehovha a swi vonaka loko vanhu va timiliyoni va hlengeletanile leswaku va tsundzuka Xilalelo xa Hosi? (Vona xifaniso xa xifunengeto.) (b) Hi ta tlhuvutsa yini eka xihloko lexi?

EHLEKETA hi leswi Yehovha a swi vonaka loko vanhu va timiliyoni emisaveni hinkwayo va hlengeletanile leswaku va tsundzuka Xilalelo xa Hosi. A nga voni ntshungu ntsena kambe u vona munhu un’wana ni un’wana loyi a nga kona. Hi xikombiso, wa va vona lava vaka kona lembe ni lembe. Exikarhi ka vona, ku nga ha va ku ri ni lava teke hambiloko va xanisiwa hi ndlela ya tihanyi. Van’wana a va vi kona nkarhi na nkarhi eka mihlangano yin’wana kambe va vona swi ri swa nkoka ku va kona eXitsundzuxweni. Nakambe, Yehovha wa va vona lava teke eXitsundzuxweni ro sungula, kumbexana hi leswi va lavaka ku vona leswi endlekaka.

² Hakunene Yehovha wa tsaka loko a vona vanhu vo tala eXitsundzuxweni. (Luka 22:19) Hambiswiritano, Yehovha a nga tsakisiwi hi ku tala ka vanhu ntsena. U tsakisiwa swinene hi swivangelo leswi va susumetelaka leswaku va va kona. Eka xihloko lexi, hi ta tlhuvutsa xivutiso xa nkoka swinene lexi nge: Hikwalaho ka yini hi fanele hi va kona eka xiendlakalo xa lembe ni lembe xa Xitsundzuxo hi tlhela hi va kona ni le ka mihlangano ya vhiki ni vhiki, leyi Yehovha a yi lunghiseleleke lava n’wi rhandzaka?

3-4. (a) Hikwalaho ka yini hi ya emihlanganweni? (b) Loko hi va kona emihlanganweni hi va hi kombisa yini? (c) Hi ku ya hileswi tsariweke eka 1 Vakorinto 11:23-26, hikwalaho ka yini hi fanele hi nga xwi eXitsundzuxweni?

³ Xivangelonkulu lexi endlaka hi ya emihlanganweni, hi leswi ku nga xiphemu xa vugandzeri bya hina. Hi tlhela hi ya eka yona hi leswi hi dyondzisiwaka hi Yehovha. Vanhu lava va tikukumuxaka a va pfumeli leswaku va lava ku dyondzisiwa swo karhi. (3 Yoh.  9)  Ku hambana ni sweswo, hi swi langutela hi mahlongati ku leteriwa hi Yehovha swin’we ni nhlengeletano leyi a yi tirhisaka.—Esa. 30:20; Yoh. 6:45.

⁴ Ku va kona ka hina emihlanganweni swi kombisa leswaku ha titsongahata naswona hi tiyimisele ku dyondzisiwa. Hi vusiku bya Xitsundzuxo xa rifu ra Yesu, hi va eka xiendlakalo lexi hi leswi hi bohekaka ni hi leswi hi ku titsongahata hi yingisaka xileriso xa Yesu lexi nge: “Tshamani mi ri karhi mi endla leswi leswaku mi ndzi tsundzuka.” (Hlaya 1 Vakorinto 11:23-26.) Nhlangano wolowo, wu endla leswaku ntshembo wa hina hi vumundzuku wu tiya wu tlhela wu hi tsundzuxa ndlela leyi Yehovha a hi rhandzaka ha yona. Hambiswiritano, Yehovha wa swi tiva leswaku hi lava ku khutaziwa ni ku tiyisiwa nkarhi na nkarhi. U hi lunghiselela mihlangano vhiki na vhiki a tlhela a hi khutaza leswaku hi va kona eka yona. Ku titsongahata ku endla leswaku hi yingisa. Hi heta nkarhi wo tala hi ri karhi hi lunghiselela mihlangano ni ku va kona eka yona.

5. Hikwalaho ka yini vanhu lava va titsongahataka va angula eka xirhambo xa Yehovha?

⁵ Lembe rin’wana ni rin’wana, vanhu vo tala lava titsongahataka va amukela xirhambo xa Yehovha leswaku a va dyondzisa. (Esa. 50:4) Va sungula hi ku va kona eXitsundzuxweni kutani va va kona ni le ka mihlangano yin’wana. (Zak. 8:20-23) Hinkwerhu hi tsakisiwa hi ku leteriwa ni ku kongomisiwa hi Yehovha, “mupfuni wa [hina] ni muponisi wa [hina].” (Ps. 40:17) Mawaku ndlela leyi swi nga swa nkoka ha yona ku amukela xirhambo xa leswaku hi ta dyondzisiwa hi Yehovha na hi Yesu, N’wana la rhandzekaka eka yena.—Mat. 17:5; 18:20; 28:20.

6. Ku titsongahata ku pfune wanuna un’wana leswaku a ta eXitsundzuxweni hi ndlela yihi?

⁶ Lembe rin’wana ni rin’wana, hi endla matshalatshala leswaku hi rhamba vanhu vo tala leswaku va ta eXitsundzuxweni xa rifu ra Yesu. Vanhu vo tala lava titsongahataka va vuyeriwile hikwalaho ko amukela xirhambo lexi. Xiya xikombiso lexi. Eka malembe yo hlaya lama hundzeke, wanuna un’wana u amukele xirhambo xa Xitsundzuxo kambe u byele makwerhu loyi a n’wi nyikeke xona leswaku a nge swi koti ku ta. Hambiswiritano, hi vusiku bya Xitsundzuxo, makwerhu loyi u hlamale ngopfu loko a vona wanuna luya a nghena eHolweni ya Mfumo. Wanuna loyi u tsakisiwe swinene hi ndlela leyi va n’wi amukeleke ha yona, leswi endleke leswaku a sungula ku ta ni le ka mihlangano yin’wana ya vhiki na vhiki. Entiyisweni, eka lembe rero hinkwaro u xwe kanharhu ntsena emihlanganweni. I yini lexi endleke leswaku a endla xiboho xo va kona eka mihlangano hinkwayo? Ku titsongahata ku endle leswaku a cinca miehleketo yakwe. Makwerhu loyi a n’wi rhambeke u te, “I wanuna wo titsongahata swinene.” Handle ko kanakana, Yehovha u koke wanuna loyi leswaku a ta N’wi gandzela, sweswi i makwerhu la khuvuriweke.—2 Sam. 22:28; Yoh. 6:44.

7. Leswi hi swi dyondzaka emihlanganweni ni leswi hi swi hlayaka eBibeleni swi nga hi pfuna njhani leswaku hi titsongahata?

⁷ Leswi hi swi dyondzaka emihlanganweni ni leswi hi swi hlayaka eBibeleni, swi nga hi pfuna leswaku hi titsongahata. Eka mavhiki ma nga ri mangani ku nga si fika Xitsundzuxo, hakanyingi mihlangano ya hina yi dzika eka xikombiso lexi Yesu a hi vekeleke xona ni ndlela leyi a kombiseke ku titsongahata hi ku nyikela hi vutomi byakwe tanihi nkutsulo. Nakambe loko ka ha sale masiku leswaku ku va Xitsundzuxo hi khutaziwa ku hlaya tindzimana ta Bibele leti vulavulaka hi leswi endlekeke Yesu a nga si dlayiwa ku fikela loko a pfuxiwa. Leswi hi swi dyondzaka eka mihlangano yoleyo ni leswi hi swi hlayaka eka tindzimana teto ta Bibele, swi kurisa ku khensa ka hina xitlhavelo lexi Yesu a hi endleleke xona. Hi susumeteleka ku tekelela ku titsongahata kakwe ni ku endla ku rhandza ka Yehovha, hambiloko swi tika.—Luka 22:41, 42.

8. Yesu u xi kombise njhani xivindzi?

⁸ Hi tlhela hi ringeta ku tekelela Yesu hi ku kombisa xivindzi. Anakanya hi xivindzi lexi a xi kombiseke eka masiku ma nga ri mangani a nga si dlayiwa. A a swi tiva leswaku valala va yena a va ri kusuhi ni ku n’wi khomisa tingana, va n’wi ba, va tlhela va n’wi dlaya. (Mat. 20:17-19) Nilokoswiritano, a tiyimisele ku langutana ni rifu. Loko nkarhi wu fika u byele vaapostola vakwe vo tshembeka, lava a va ri na yena eGetsemani a ku: “Pfukani, a hi fambeni. Maswivo! Muxengi wa mina u tshinele.” (Mat. 26:36, 46) Loko ntshungu lowu hlomeke wu ta ku ta n’wi khoma, u yime emahlweni ka wona, a titivisa kutani a lerisa masocha leswaku ma tshika vaapostola vakwe va famba. (Yoh. 18:3-8) Mawaku xivindzi xonghasi lexi Yesu a xi kombiseke! Namuntlha, Vakreste lava totiweke ni lava tinyimpfu tinwana va tikarhatela ku tekelela Yesu hi ku kombisa xivindzi. Njhani?

9. (a) Hikwalaho ka yini swi nga ha lavaka xivindzi leswaku hi kota ku ya emihlanganweni nkarhi na nkarhi? (b) Xikombiso xa hina lexinene xi nga va khumba njhani vamakwerhu lava nga ekhotsweni hikwalaho ka ripfumelo ra vona?

⁹ Loko hi ri ehansi ka swiyimo swo tika, swi nga ha lava hi kombisa xivindzi leswaku hi kota ku va kona emihlanganweni nkarhi na nkarhi. Vamakwerhu van’wana va va kona emihlanganweni hambiloko va ri ni gome, va kanetiwa kumbe va ri ni swiphiqo swa rihanyo. Van’wana hi xivindzi va va kona emihlanganweni ku nga khathariseki nkaneto lowu humaka eka swirho swa ndyangu kumbe valawuri va mfumo. Anakanya hi ndlela leyi xikombiso xa hina xi va khumbaka ha yona vamakwerhu lava nga emakhotsweni hikwalaho ka ripfumelo ra vona. (Hev. 13:3) Loko va twa leswaku hi ya emahlweni hi tirhela Yehovha ku nga khathariseki ku nonon’hweriwa, ripfumelo ra vona ra tiya naswona va tiyimisela ku tshama va tshembekile ni ku va ni xivindzi. Muapostola Pawulo u tshame a va eka xiyimo lexi fanaka. Loko a ri ekhotsweni eRhoma, a tsaka loko a twa leswaku vamakwavo vakwe va tirhela Xikwembu hi ku tshembeka. (Filp. 1:3-5, 12-14) Pawulo u tsale papila rakwe leri yaka eka Vaheveru loko a ri ekusuhi ni ku ntshunxiwa kumbe endzhakunyana ko ntshunxiwa ekhotsweni. Eka papila rero u khutaze Vakreste volavo vo tshembeka leswaku “rirhandzu ra [vona] ra vumakwerhu a ri ye emahlweni” naswona va nga fularheli ku hlangana swin’we.—Hev. 10:24, 25; 13:1.

10-11. (a) I vamani lava hi nga va rhambaka leswaku va ta eXitsundzuxweni? (b) Vaefesa 1:7 yi nyika xivangelo xihi xo va hi rhamba vanhu eXitsundzuxweni?

¹⁰ Hi va hi kombisa xivindzi loko hi rhamba maxaka, vatirhikulorhi ni vaakelani leswaku va ta eXitsundzuxweni. Hikwalaho ka yini hi va rhamba? Hi swi tlangela swinene leswi Yehovha na Yesu va hi endleleke swona lerova hi susumeteleka ku rhamba van’wana leswaku va va kona eXitsundzuxweni. Hi lava leswaku na vona va dyondza ndlela leyi va nga vuyeriwaka ha yona eka ‘musa lowu nga faneriwiki’ hi ku tirhisa nkutsulo.—Hlaya Vaefesa 1:7; Nhlav. 22:17.

¹¹ Loko hi kombisa xivindzi hi ku va kona emihlanganweni, hi va hi kombisa ni mfanelo yin’wana ya nkoka leyi Xikwembu ni N’wana wa xona va yi kombisaka hi tindlela to hlamarisa.

12. (a) Mihlangano ya hina yi ri kurisa njhani rirhandzu leri hi nga na rona eka Yehovha na Yesu? (b) Xana 2 Vakorinto 5:14, 15 yi hi khutaza ku endla yini leswaku hi tekelela Yesu?

¹² Rirhandzu leri hi nga na rona eka Yehovha na Yesu ri hi susumetela leswaku hi ya emihlanganweni. Leswi hi swi dyondzaka emihlanganweni swi kurisa rirhandzu ra hina eka Yehovha ni N’wana wakwe. Phela loko hi ri emihlanganweni hi tshamela ku tsundzuxiwa leswi va hi endleleke swona. (Rhom. 5:8) Xitsundzuxo xi hi tsundzuxa hi ndlela yo hlawuleka leswaku va hi rhandza ngopfu, va rhandza ni vanhu lava nga wu twisisiki nkoka wa nkutsulo. Ku kombisa leswaku ha wu tlangela nkutsulo, hi ringeta ku tekelela Yesu eka mahanyelo ya hina ya siku ni siku. (Hlaya 2 Vakorinto 5:14, 15.) Nakambe timbilu ta hina ti hi susumetela ku dzunisa Yehovha hi leswi a hi nyikeke nkutsulo. Ndlela yin’wana leyi hi nga n’wi dzunisaka ha yona emihlanganweni, i ku nyikela tinhlamulo leti humaka embilwini.   

13. Hi nga kombisa rirhandzu ra hina eka Yehovha ni N’wana wakwe hi ndlela yihi? Hlamusela.

¹³ Hi nga kombisa rirhandzu ra hina eka Yehovha ni N’wana wakwe hi ku tiyimisela ku titsona swo karhi. Hi fanele hi titsona swo karhi leswaku hi va kona emihlanganweni. Hakanyingi mavandlha yo tala ma khoma mihlangano ya le xikarhi ka vhiki loko hi karhele nimadyambu. Nakambe nhlangano wun’wana wu khomiwa hi mahelovhiki loko vanhu van’wana va wisile. Xana Yehovha wa swi vona leswaku hi ya emihlanganweni hambiloko hi karhele? Ina! Entiyisweni, Yehovha wa ma tlangela matshalatshala hinkwawo lama hi ma endlaka leswaku hi va kona emihlanganweni.—Mar. 12:41-44.

14. Xana Yesu u hi vekele xikombiso xo kombisa rirhandzu ra ku tinyiketela hi ndlela yihi?

¹⁴ Yesu u hi vekele xikombiso xo kombisa rirhandzu ra ku tinyiketela. U endle tano hi ku tiyimisela ku fela vadyondzisiwa vakwe ni hi ku rhangisa swilaveko swa van’wana evuton’wini byakwe. Hi xikombiso, a hlangana ni vadyondzisiwa vakwe hambiloko a karhele kumbe a ri ni gome. (Luka 22:39-46) A tiyimisele ku pfuna van’wana, ku nga ri ku vuyeriwa eka vona. (Mat. 20:28) Loko hi rhandza Yehovha ni vamakwerhu, hi ta endla matshalatshala leswaku hi va kona eka Xilalelo xa Hosi swin’we ni le ka mihlangano hinkwayo ya vandlha.

15. I vamani lava ngopfungopfu hi lavaka ku va pfuna?

¹⁵ Hi swirho swa vandlha rin’we ntsena ra  Vakreste va ntiyiso lava nga ni vun’we naswona hi rhandza ku heta nkarhi hi ri karhi hi rhamba van’wana leswaku va ta tiphina na hina. Hambiswiritano, hi swi rhandza swinene ku pfuna “lava nga swin’we na hina eripfumelweni” lava se va holeke. (Gal. 6:10) Hi kombisa leswaku ha va rhandza hi ku va khutaza ku ta emihlanganweni, ngopfungopfu eXitsundzuxweni. Ku fana na Yehovha na Yesu, hi tsaka ngopfu loko makwerhu la holeke a tlhelela eka Yehovha, Tata wa hina ni Murisi wa hina wa rirhandzu.—Mat. 18:14.

16. (a) Hi nga khutazana njhani naswona mihlangano ya hina yi ta hi pfuna njhani? (b) Hikwalaho ka yini lowu wu ri nkarhi lowunene elembeni leswaku hi tsundzuka marito ya Yesu lama kumekaka eka Yohane 3:16?

¹⁶ Eka mavhiki lama landzelaka, rhamba vanhu vo tala hilaha u nga kotaka hakona leswaku va va kona eXitsundzuxweni hi Ravuntlhanu nimadyambu, April 19, 2019. (Vona bokisi leri nge, “ Xana U Ta Va Rhamba?”) Eka lembe leri, onge hi nga tikarhatela ku khutaza van’wana hi ku va vekela xikombiso xo va kona eka mihlangano hinkwayo leyi Yehovha a hi lunghiselelaka yona. Leswi misava leyi yi fikaka emakumu, mihlangano yi ta hi pfuna leswaku hi tshama hi titsongahatile, hi ri na xivindzi ni rirhandzu. (1 Tes. 5:8-11) Hi timbilu ta hina hinkwato, a hi kombiseni ndlela leyi hi titwaka ha yona hi leswi Yehovha ni N’wana wakwe va hi kombiseke rirhandzu ronghasi!—Hlaya Yohane 3:16.