1-2. (a) Hikwalaho ka yini swi nga hlamarisi leswi Yesu a hi nyikeke ndlela yo olova yo tsundzuka rifu rakwe? (b) Hi tihi timfanelo ta Yesu leti hi nga ta bula ha tona?

XANA u nga swi kota ku hlamusela leswaku ku endleka yini eXitsundzuxweni xa rifu ra Kreste xa lembe na lembe? A swi kanakanisi leswaku vo tala va hina ha swi tsundzuka leswi endlekaka hi nkarhi wa Xilalelo xa Hosi. Hikwalaho ka yini? Hikuva xiendlakalo xexo a xi rharhangananga. Hambiswiritano, lexi i xiendlakalo xa nkoka. Hi nga ha tivutisa, ‘Hikwalaho ka yini xiendlakalo lexi xi nga rharhangananga?’

² Hi nkarhi wa vutirheli byakwe bya laha misaveni, Yesu a tiviwa hi ku dyondzisa tidyondzo ta nkoka ta ntiyiso hi ndlela yo olova, leyi nga erivaleni ni leyi twisisekaka. (Mat. 7:28, 29) Hilaha ku fanaka, u hi nyike ndlela yo olova kambe leyi nga ya nkoka yo endla Xitsundzuxo * xa rifu rakwe. A hi xi kambisiseni hi vukheta xiendlakalo xexo xa Xitsundzuxo swin’we ni swilo swin’wana leswi Yesu a swi vuleke ni ku swi endla. Hi ta swi twisisa kahle leswaku hakunene Yesu wa titsongahata, u ni xivindzi ni rirhandzu naswona hi ta dyondza ndlela leyi hi nga n’wi tekelelaka ha yona.

3. Hilaha swi vuriweke hakona eka Matewu 26:26-28, xana Yesu u simeke Xitsundzuxo xakwe hi ndlela yihi yo olova naswona swilo swimbirhi leswi a swi tirhiseke swi fanekisela yini?

³ Yesu a ri ni vaapostola vakwe vo tshembeka va 11, loko a simeka Xitsundzuxo xa rifu rakwe. U tirhise swakudya swa Paseka leswi  a va ri na swona leswaku a endla Xitsundzuxo xo olova. (Hlaya Matewu 26:26-28.) U tirhise xinkwa xo kala comela ni vhinyo leswi a va ri na swona. Yesu u byele vaapostola vakwe leswaku swilo sweswo swimbirhi swi fanekisela miri wakwe lowu hetisekeke swin’we ni ngati yakwe, leswi a ri ekusuhi ni ku swi nyikela hikwalaho ka vona. Kumbexana a swi nga va hlamarisi vaapostola leswi xiendlakalo lexi xa nkoka, lexintshwa a xi olova. Hikwalaho ka yini?

4. Ndzayo leyi Yesu a yi nyikeke Marta yi hi pfuna njhani ku twisisa leswaku hikwalaho ka yini Yesu a endle xiendlakalo xexo xa Xitsundzuxo xi olova?

⁴ A hi anakanyisiseni hileswi endlekeke eka tin’hweti ti nga ri tingani Yesu a nga si endla Xitsundzuxo, hi lembe ra vunharhu ra vutirheli byakwe bya laha misaveni, loko a endzele vanghana vakwe lavakulu, ku nga Lazaro, Marta na Mariya. Loko a ri kwalaho, Yesu u sungule ku va dyondzisa. Marta a a ri kona, kambe a kavanyetiwa hi ku lunghiselela muendzi wakwe la xiximekaka swakudya swo tala. Loko Yesu a vona leswi, u lulamise Marta hi musa ni ku n’wi pfuna a vona leswaku a hi mikarhi hinkwayo ku lavekaka swakudya swo tala. (Luka 10:40-42) Yesu u tirhise ndzayo yoleyo loko ku sele tiawara ti nga ri tingani leswaku a nyikela hi vutomi byakwe leswaku byi va xitlhavelo. U endle leswaku xiendlakalo xexo xa Xitsundzuxo xi olova. Xana leswi swi hi dyondzisa yini hi Yesu?

5. Xana xiendlakalo lexi xo olova xi hi dyondzisa yini hi Yesu naswona sweswo swi fambisana njhani na Vafilipiya 2:5-8?

⁵ Yesu a a titsongahata eka hinkwaswo leswi a swi vula ni ku swi endla. Hikwalaho a swi hlamarisi leswi Yesu a kombiseke ku titsongahata hi vusiku byo hetelela a ri laha misaveni. (Mat. 11:29) A a swi tiva leswaku a a ri ekusuhi ni ku nyikela xitlhavelo lexikulu ematin’wini ya vanhu nileswaku Yehovha a a ta n’wi pfuxa leswaku a ta va hosi etilweni. Hambileswi a swi tiva sweswo, a nga lavanga leswaku xiendlakalo xo tsundzuka rifu rakwe ku va nchumu lowu rharhanganeke. Ematshan’weni ya sweswo, u byele vadyondzisiwa vakwe leswaku va fanele va tsundzuka rifu rakwe kan’we hi lembe hi ndlela yoleyo yo olova. (Yoh. 13:15; 1 Kor. 11:23-25) Xiendlakalo xexo xo olova xi kombisa leswaku Yesu a a nga ri munhu loyi a tinyungubyisaka. Swa hi tsakisa ku tiva leswaku ku titsongahata i yin’wana ya timfanelo ta nkoka leti Hosi ya hina ya le tilweni yi nga na tona.—Hlaya Vafilipiya 2:5-8.

6. Hi nga ku tekelela njhani ku titsongahata ka Yesu loko hi langutane ni miringo?

⁶ Hi nga ku tekelela njhani ku titsongahata ka Yesu? Hi ku  rhangisa swilaveko swa van’wana. (Filp. 2:3, 4) Ehleketa hi vusiku byo hetelela loko Yesu a ri laha misaveni. Yesu a a swi tiva leswaku ku nga ri khale a a ta dlayiwa hi ndlela yo vava kambe a a karhatekile swinene hi vaapostola vakwe vo tshembeka lava a va ta va ni gome hikwalaho ka yena. Hikwalaho, hi vusiku byakwe byo hetelela u tinyike nkarhi wo va dyondzisa, a va khutaza ni ku va tiyisekisa. (Yoh. 14:25-31) Yesu u kombise leswaku a a karhateka hi swilaveko swa van’wana ku tlula swa yena. Hakunene u hi vekele xikombiso lexinene!

7. Xana Yesu u kombise xivindzi hi ndlela yihi endzhakunyana ko simeka Xilalelo xa Hosi?

⁷ Endzhakunyana ka loko Yesu a simeke Xilalelo xa Hosi, u kombise xivindzi lexi hlamarisaka. Njhani? Yesu u endle ku rhandza ka Tata wakwe hambileswi a a swi tiva leswaku ku endla tano a swi ta endla leswaku a dlayiwa ku fana ni xigevenga. (Mat. 26:65, 66; Luka 22:41, 42) Yesu u tshame a tshembekile hi ku helela leswaku a yisa ku dzuneka evitweni ra Yehovha, a seketela vulawuri bya Xikwembu ni ku pfulela vanhu lava hundzukeke ndlela yo kuma vutomi lebyi nga heriki. Hi nkarhi lowu fanaka, Yesu u pfune valandzeri vakwe leswaku va kota ku langutana ni leswi a swi ta endleka ku nga ri khale.

8. (a) I yini leswi Yesu a swi byeleke vaapostola vakwe vo tshembeka? (b) Xana vadyondzisiwa va Yesu va xi tekelele njhani xikombiso xakwe xo kombisa xivindzi endzhaku ka loko a file?

⁸ Yesu u tlhele a kombisa xivindzi hi ku anakanya hi swilaveko swa vaapostola vakwe vo tshembeka, ematshan’weni yo ehleketa hileswi a swi ta n’wi humelela. Xilalelo xa Hosi lexi a xi simekeke endzhaku ko hlongola Yudasi, a xi ta tsundzuxa lava a va ta va valandzeri vakwe lava totiweke lava a va ta vuyeriwa eka ngati ya Yesu leyi halatiweke ni ku va xiphemu xa ntwanano lowuntshwa. (1 Kor. 10:16, 17) Leswaku Yesu a  pfuna valandzeri vakwe va tshama va tshembekile leswaku va ta va na yena etilweni, u va byele leswi yena ni Tata wakwe va swi languteleke eka vona. (Yoh. 15:12-15) Nakambe Yesu u byele vaapostola vakwe hi miringo leyi a yi ta va wela. U va khutaze ku landzela xikombiso lexi a va vekeleke xona, hi ku vula a ku “tiyani timbilu!” (Yoh. 16:1-4a, 33) Endzhaku ka malembe yo hlaya, vadyondzisiwa va Yesu va hambete va landzela xikombiso xakwe xa ku tinyiketela ni ku kombisa xivindzi. Va hambete va seketelana eka miringo yo hambanahambana hambileswi sweswo swi endleke leswaku va xanisiwa.—Hev. 10:33, 34.

9. Hi nga xi tekelela njhani xikombiso xa Yesu xo kombisa xivindzi?

⁹ Ninamuntlha, hi landzela xikombiso xa Yesu xo kombisa xivindzi. Hi xikombiso, swi lava xivindzi leswaku hi pfuna vamakwerhu lava xanisiwaka hikwalaho ka ripfumelo. Mikarhi yin’wana vamakwerhu va nga ha pfaleriwa ekhotsweni swi nga fanelanga. Loko sweswo swi endleka, hi fanele hi endla hinkwaswo leswi hi nga swi kotaka leswaku hi va seketela, ku katsa ni ku va vulavulela. (Filp. 1:14; Hev. 13:19) Ndlela yin’wana ya ku kombisa xivindzi i ku hambeta hi chumayela “hi vurhena.” (Mint. 14:3) Ku fana na Yesu, hi tiyimisele ku chumayela rungula ra Mfumo, hambiloko vanhu va hi kaneta ni ku hi xanisa. Hambiswiritano, mikarhi yin’wana hi nga ha titwa hi nga ri na xivindzi. Hi nga endla yini?

10. Eka mavhiki ma nga ri mangani emahlweni ka Xitsundzuxo, hi fanele hi endla yini naswona hikwalaho ka yini?

¹⁰ Leswaku hi va ni xivindzi hi fanele hi anakanya hi ntshembo lowu gandzelo ra nkutsulo ra Kreste ri endleke leswaku hi va na wona. (Yoh. 3:16; Efe. 1:7) Eka mavhiki ma nga ri mangani emahlweni ka Xitsundzuxo, hi kuma nkarhi wo kombisa ku tlangela ka hina nkutsulo. Hi nkarhi wolowo, hlaya tindzimana ta Bibele ta Xitsundzuxo ni ku anakanyisisa hi swiendlakalo swa le kusuhi ni ku dlayiwa ka Yesu. Kutani  loko hi hlengeletanile eka Xilalelo xa Hosi, hi ta wu twisisa kahle nkoka wa swifanekiselo swa Xitsundzuxo ni gandzela ro hlawuleka leri swi ri fanekiselaka. Loko hi swi twisisa kahle leswi Yesu na Yehovha va hi endleleke swona ni ndlela leyi hina swin’we ni maxaka ya hina hi vuyeriwaka ha yona, ntshembo wa hina hi vumundzuku wu ta tiya naswona hi ta susumeteleka ku tiyisela ku ya fika emakumu hi xivindzi.—Hev. 12:3.

11-12. Ku fikela sweswi hi dyondze yini?

¹¹ Ku fikela sweswi, hi dyondze leswaku Xilalelo xa Hosi xi hi tsundzuxa gandzelo ra nkoka ni timfanelo leti xiyekaka ta Yesu, ku nga ku titsongahata ni xivindzi. Hakunene ha swi tlangela leswi Yesu a kombisaka timfanelo teto tanihi Muprista wa hina Lonkulu loyi a nga etilweni, loyi a hi kombelelaka! (Hev. 7:24, 25) Leswaku hi kombisa ku tlangela swi suka embilwini, hi fanele hi va kona eka Xitsundzuxo xa rifu ra Yesu, hilaha a hi leriseke hakona. (Luka 22:19, 20) Hi endla sweswo hi siku leri fambisanaka na Nisani 14, leyi ku nga siku ra nkoka swinene elembeni.

¹² Eka xiendlakalo xo olova xa Xilalelo xa Hosi hi tlhela hi dyondza mfanelo yin’wana leyi susumeteleke Yesu leswaku a hi fela. Loko a ri laha misaveni, a tiveka hikwalaho ka mfanelo leyi. Hi yihi mfanelo ya kona?

13. Xana Yohane 15:9 na 1 Yohane 4:8-10 ti ri hlamusela njhani rirhandzu leri Yehovha na Yesu va ri kombiseke naswona i vamani lava vuyeriwaka eka rirhandzu ra vona?

¹³ Hinkwaswo leswi Yesu a swi endleke swi yi kombise hi ku helela ndlela leyi Yehovha a hi rhandzaka ha yona. (Hlaya Yohane 15:9; 1 Yohane 4:8-10.) Xa nkoka swinene, Yesu u susumeteleke ku nyikela hi vutomi byakwe hikwalaho ka hina. Ku nga khathariseki leswaku hi vatotiwa kumbe hi va “tinyimpfu tin’wana,” ha vuyeriwa eka rirhandzu leri Yehovha swin’we ni N’wana wakwe va hi kombiseke rona hikwalaho ka gandzelo rero. (Yoh. 10:16; 1 Yoh. 2:2) Nakambe ehleketa hi swilo leswi tirhisiwaka eka Xitsundzuxo, swi kombisa rirhandzu leri Yesu a rhandzaka vadyondzisiwa vakwe ha rona nileswaku wa va anakanyela. Hi ndlela yihi?

14. Yesu u swi kombise hi ndlela yihi leswaku u rhandza vadyondzisiwa vakwe?

¹⁴ Yesu u kombise rirhandzu eka valandzeri vakwe lava totiweke hi ku simeka xiendlakalo xo olova xa Xitsundzuxo lexi a va fanele va xi endla. Loko nkarhi wu ri karhi wu famba, vadyondzisiwa volavo lava totiweke a va fanele va endla Xitsundzuxo lembe ni lembe naswona sweswo a va swi endla loko va ri eka swiyimo swo hambanahambana, ku katsa ni le khotsweni. (Nhlav. 2:10) Xana va swi kotile ku yingisa Yesu? Ina!

15-16. Xana van’wana va swi kotise ku yini ku endla Xilalelo xa Hosi hambiloko va ri eka swiyimo swo tika?

¹⁵ Vakreste va hambete va endla Xitsundzuxo xa rifu ra Yesu ku sukela eka Vakreste vo sungula ku ta fikela namuntlha. Va landzele ndlela leyi Xilalelo xa Hosi a xi fanele xi endliwa ha yona hilaha va nga kotaka hakona hambiloko va ri eka swiyimo swo tika. Xiya swikombiso leswi landzelaka. Loko Makwerhu Harold King a pfaleriwe a ri yexe ekhotsweni ra le China u boheke ku lava ndlela yo endla Xitsundzuxo. U lunghiselele swifanekiselo swa Xitsundzuxo exihundleni, hi ku tirhisa leswi a a ri na swona. U tlhele a lavisisa siku leri Xitsundzuxo a xi fanele xi endliwa ha rona. Loko nkarhi wa Xitsundzuxo wu fikile, hambileswi a a ri wexe u yimbelerile, a khongela ni ku nyikela mbulavulo wa Matsalwa.

¹⁶ Hi lexi xikombiso xin’wana. Ntlawa wa vamakwerhu va xisati lava a va pfaleriwe ekampeni ya nxaniso hi nkarhi wa Nyimpi ya Vumbirhi ya Misava, va veke vutomi bya vona ekhombyeni leswaku va endla Xilalelo xa Hosi. Leswi ku tirhisiwaka swilo leswi oloveke loko ku endliwa Xitsundzuxo, va swi kotile ku xi endla exihundleni. Va te: “Hi rhendzele xitulu lexi a hi xi phutsele hi lapi ro basa lexi ehenhla ka xona a ku ri ni vhinyo ni xinkwa. Hi tirhise khandlhela ku voninga  kamara hikuva rivoni ra gezi a ri ta endla leswaku vanhu va vona leswi hi swi endlaka. . . . Hi hlambanyele Tata wa hina hi ku phindhaphindha leswaku a hi ta tirhisa matimba ya hina hinkwawo leswaku hi vangamisa vito Rakwe ro kwetsima.” Mawaku ripfumelo ronghasi leri va ri kombiseke! Wa nga vona rirhandzu leri Yesu a ri kombiseke hi ku endla leswaku hi kota ku endla Xitsundzuxo hambiloko hi ri eka swiyimo swo tika!

17. Hi swihi swivutiso leswi hi nga tivutisaka swona?

¹⁷ Loko Xitsundzuxo xi ri karhi xi tshinela, hi nga tivutisa swivutiso leswi landzelaka: ‘Ndzi nga n’wi tekelela njhani Yesu eku kombiseni ka rirhandzu? Xana ndzi rhangisa swilaveko swa vagandzerikulorhi eka swa mina? Xana ndzi langutele leswaku vamakwerhu va endla leswi nga riki ematimbeni ya vona kumbe ndza ku xiya ku tsana ka vona?’ Onge mikarhi hinkwayo hi nga tekelela Yesu kutani hi kombisa “ntlhaveko wa xinakulobye.”—1 Pet. 3:8.

18-19. (a) I yini leswi hi nga tiyisekaka ha swona? (b) U tiyimisele ku endla yini?

¹⁸ Xilaveko xo endla Xitsundzuxo xa rifu ra Kreste a xi nge vi hilaha ku nga heriki. Loko Yesu a “fika” hi nkarhi wa nhlomulo lowukulu, u ta hlengeleta masalela ya “vahlawuriwa va yena” leswaku va ya etilweni kutani Xitsundzuxo a xi nge he endliwi.—1 Kor. 11:26; Mat. 24:31.

¹⁹ Hambiloko Xitsundzuxo xi nga ha endliwi, ha tiyiseka leswaku vanhu va Yehovha va ta tsundzuka xiendlakalo lexi xo olova tanihi xikombiso xa ku titsongahata, xivindzi ni rirhandzu lerikulu leri tshameke ri kombisiwa hi munhu. Enkarhini wolowo, a swi kanakanisi leswaku lava tshameke va va kona eka xiendlakalo lexi xo hlamarisa va ta byela lava nga ta va va hanya hi nkarhi wolowo leswaku na vona va vuyeriwa. Kambe leswaku nisweswi hi vuyeriwa eka xiendlakalo lexi, hi fanele tiyimisela ku tekelela ku titsongahata, xivindzi ni rirhandzu leswi Yesu a swi kombiseke. Loko hi endla tano, hi nga tiyiseka leswaku Yehovha u ta hi katekisa.—2 Pet. 1:10, 11.