Akekani Hi Rirhandzu
Akekani Hi Rirhandzu
“U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo.”—MATEWU 22:37.
1. (a) Hi swihi swilo swin’wana swa moya leswi Mukreste a swi hlakulelaka? (b) Hi yihi mfanelo ya Vukreste ya nkoka swinene, naswona ha yini yi ri ya nkoka?
MUKRESTE u hlakulela swilo swo tala swa moya leswaku a ta va mutirheli la pfunaka. Buku ya Swivuriso yi kandziyisa leswaku vutivi, ku twisisa ni vutlhari i swa nkoka. (Swivuriso 2:1-10) Muapostola Pawulo u bule hi xilaveko xa ripfumelo leri tiyeke ni ntshembo lowukulu. (Varhoma 1:16, 17; Vakolosa 1:5; Vaheveru 10:39) Ku tiyisela ni ku tikhoma, na kona i ka nkoka. (Mintirho 24:25; Vaheveru 10:36) Hambiswiritano, ku ni nchumu wun’wana lowu loko wu nga ri kona, wu hungutaka nkoka wa timfanelo letin’wana naswona wu nga ha ti endla ti nga pfuni nchumu. Nchumu wolowo i rirhandzu.—1 Vakorinto 13:1-3, 13.
2. Yesu u wu kombise njhani nkoka wa rirhandzu, naswona sweswo swi tlakusa swivutiso swihi?
2 Yesu u kombise nkoka wa rirhandzu loko a ku: “Hinkwavo va ta tiva leswaku mi vadyondzisiwa va mina, loko mi rhandzana.” (Yohane 13:35) Leswi rirhandzu ri hlawulaka Vakreste va ntiyiso, hi fanele hi tivutisa swivutiso swo tanihi leswi nge, Rirhandzu i yini? Ha yini ri ri ra nkoka swinene lerova Yesu a kala a vula leswaku, ehenhla ka swilo hinkwaswo, ri hlawula vadyondzisiwa va yena? Hi nga ri hlakulela njhani rirhandzu? Hi fanele hi rhandza vamani? A hi kambisiseni swivutiso leswi.
Rirhandzu I Yini?
3. Rirhandzu ri nga hlamuseriwa hi ndlela yihi, naswona ha yini ri katsa mianakanyo ni mbilu?
3 Nhlamuselo yin’wana ya rirhandzu i ‘ku titwa u ri kusuhi kumbe u tsakela swinene vanhu van’wana.’ I mfanelo leyi susumetelaka vanhu leswaku va endlela van’wana swilo leswinene, minkarhi yin’wana va titsona swilo swo tala ngopfu. Rirhandzu, hilaha ri hlamuseriwaka hakona eBibeleni, ri katsa mianakanyo ni mbilu. Mianakanyo kumbe vutlhari swi tirha swinene hikuva munhu loyi a rhandzaka van’wana u endla tano hi xikongomelo, wa swi xiya leswaku yena ni vanhu van’wana lava a va rhandzaka, va ni ku tsana ko karhi swin’we ni timfanelo letinene. Vutlhari byi tirha ngopfu tanihi leswi ku nga ni lava Mukreste a va rhandzaka—minkarhi yin’wana, kumbexana a lwisana ni mboyamelo wa yena wa ntumbuluko—hikuva wa swi tiva leswaku loko a hlaya Bibele, yi vula leswaku Xikwembu xi lava leswaku a endla tano. (Matewu 5:44; 1 Vakorinto 16:14) Hambiswiritano, rirhandzu entiyisweni ri huma embilwini. Rirhandzu ra xiviri hilaha swi andlariweke hakona eBibeleni a ri humi emianakanyweni ntsena. Ri katsa ku tshembeka swinene ni ku susumetiwa hi mintlhaveko.—1 Petro 1:22.
4. Rirhandzu i xiboho lexi nga ni matimba swinene hi ndlela yihi?
4 Vanhu lava nga ni vutianakanyi a va swi koti ku va ni vuxaka bya rirhandzu ra ntiyiso, hikuva munhu loyi a rhandzaka van’wana u lunghekele ku rhangisa swilaveko swa van’wana emahlweni ka swa yena. (Vafilipiya 2:2-4) Marito ya Yesu lama nge “ku nyika swi tisa ntsako lowukulu ku tlula ku amukela” i ya ntiyiso ngopfu-ngopfu loko ku nyika ka kona ku susumetiwa hi rirhandzu. (Mintirho 20:35) Rirhandzu i xiboho lexi nga ni matimba swinene. (Vakolosa 3:14) Hakanyingi ri katsa vunghana, kambe swiboho swa rirhandzu swi tiye ku tlula swa vunghana. Vuxaka lebyi nga kona exikarhi ka wanuna ni nsati wa yena minkarhi yin’wana byi hlamuseriwa tanihi rirhandzu; hambiswiritano, rirhandzu leri Bibele yi hi khutazaka ku ri hlakulela ra tiyisela swinene ku tlula ku koka mahlo. Loko mpatswa wu rhandzana hakunene, wu tshama swin’we hambiloko vuxaka bya le mirini byi nga ha koteki hikwalaho ka ku tsana ka vudyuhari kumbe hikwalaho ka ku va un’wana wa vona a lamarile.
Rirhandzu—Mfanelo Ya Nkoka
5. Ha yini rirhandzu ri ri mfanelo ya nkoka eka Mukreste?
5 Ha yini rirhandzu ri ri mfanelo ya nkoka eka Mukreste? Xo sungula, hikuva Yesu u lerise valandzeri va yena ku rhandzana. U te: “Mi vanakulorhi va mina loko mi endla leswi ndzi mi lerisaka swona. Ndzi mi lerisa swilo leswi, leswaku mi rhandzana.” (Yohane 15:14, 17) Xa vumbirhi, leswi Yehovha a nga ni mfanelo ya rirhandzu, hi fanele hi n’wi tekelela tanihi leswi hi nga vagandzeri va yena. (Vaefesa 5:1; 1 Yohane 4:16) Bibele yi vula leswaku ku nghenisa vutivi hi Yehovha na Yesu swi vula vutomi lebyi nga heriki. Hi nga vurisa ku yini leswaku hi tiva Xikwembu loko hi nga ringeti ku fana na xona? Muapostola Yohane u te: “Loyi a nga riki na rirhandzu a nga tivi Xikwembu, hikuva Xikwembu i rirhandzu.”—1 Yohane 4:8.
6. Rirhandzu ri nga hi pfuna njhani evuton’wini bya hina?
6 Rirhandzu i ra nkoka hikwalaho ka xivangelo xa vunharhu: Ri hi pfuna ku ringanisela eka timhaka to hambana-hambana ta vutomi bya hina naswona ri engetela nsusumeto lowunene eka leswi hi swi endlaka. Hi xikombiso, i swa nkoka ku hambeta hi nghenisa vutivi bya Rito ra Xikwembu. Eka Mukreste, vutivi byo tano byi fana ni swakudya. Byi n’wi pfuna leswaku a kula a va la wupfeke naswona a endla swilo hi ku pfumelelana ni ku rhandza ka Xikwembu. (Pisalema 119:105; Matewu 4:4; 2 Timotiya 3:15, 16) Hambiswiritano, Pawulo u tsundzuxile: “Vutivi bya tikukumuxa, kambe rirhandzu ra aka.” (1 Vakorinto 8:1) E-e, a ku na lexi hoxeke hi vutivi lebyi kongomeke. Xiphiqo xi le ka hina—hi ni mboyamelo wa vudyoho. (Genesa 8:21) Loko nsusumeto wa rirhandzu wa ku ringanisela wu nga ri kona, vutivi byi nga endla munhu a tikukumuxa, a titeka a antswa ku tlula van’wana. Sweswo a swi nge humeleli loko entiyisweni a susumetiwa hi rirhandzu. “Rirhandzu . . . a ri tikurisi, a ri tikukumuxi.” (1 Vakorinto 13:4) Mukreste loyi a susumetiwaka hi rirhandzu a nga tikukumuxi hambiloko a ri ni vutivi lebyi enteke. Rirhandzu ri n’wi endla a titsongahata naswona ri n’wi sivela ku lava ku tiendlela vito.—Pisalema 138:6; Yakobo 4:6.
7, 8. Rirhandzu ri hi pfunisa ku yini leswaku hi yisa nyingiso wa hina eka swilo swa nkoka ngopfu?
7 Pawulo u tsalele Vafilipiya a ku: “Leswi ndzi hambetaka ndzi swi khongelela hi leswi, leswaku rirhandzu ra n’wina ri ya ri andza ngopfu hi vutivi lebyi kongomeke ni ku twisisa loku heleleke; leswaku mi tiyiseka hi swilo swa nkoka swinene.” (Vafilipiya 1:9, 10) Rirhandzu ra Vukreste ri ta hi pfuna leswaku hi landzela xikhutazo lexi xo tiyiseka hi swilo swa nkoka swinene. Hi xikombiso, xiya marito ya Pawulo lama yaka eka Timotiya: “Loko munhu un’wana ni un’wana a lwela ku fikelela ntirho wa ku va mulanguteri, u navela ntirho lowunene.” (1 Timotiya 3:1) Hi lembe ra ntirho ra 2000, nhlayo ya mavandlha emisaveni hinkwayo yi engeteleke hi 1 502 leswi endleke ntsengo lowuntshwa wa 91 487. Hikwalaho, ku ni xilaveko lexikulu xa vakulu lava engetelekeke, naswona lava va fikelelaka lunghelo leri va fanele va bumabumeriwa.
8 Hambiswiritano, lava va fikelelaka malunghelo ya vulanguteri va ta hlayisa ku ringanisela lokunene loko va tsundzuka xikongomelo xa lunghelo rolero. Ku va ni vulawuri kumbe ndhuma a hi nchumu wa nkoka. Vakulu lava tsakisaka Yehovha va susumetiwa hi ku n’wi rhandza ni ku rhandza vamakwavo. A va lavi ndhuma kumbe vulawuri. Endzhaku ka ku va muapostola Petro a tsundzuxe vakulu va vandlha leswaku va tshama va ri ni langutelo lerinene, u kandziyise xilaveko xa “mianakanyo yo titsongahata.” U tsundzuxe vanhu hinkwavo va le vandlheni a ku: “Titsongahateni ehansi ka voko ra matimba ra Xikwembu.” (1 Petro 5:1-6) Un’wana ni un’wana la endlaka nhluvuko, u endla kahle loko a anakanya hi xikombiso xa vakulu va ntsandza-vahlayi lava nga kona emisaveni hinkwayo lava tirhaka hi matimba, va titsongahata, xisweswo va va nkateko emavandlheni ya vona.—Vaheveru 13:7.
Nsusumeto Lowunene Wu Hi Pfuna Ku Tiyisela
9. Ha yini Vakreste va tshama va ri karhi va anakanya hi mikateko leyi Yehovha a va tshembiseke yona?
9 Nkoka wa ku susumetiwa hi rirhandzu wu voniwa ni hi ndlela yin’wana. Lava va hambetaka va tinyiketele eka Xikwembu hikwalaho ka rirhandzu, Bibele yi va tshembisa mikateko leyi fuweke sweswi ni mikateko yo hlamarisa swinene enkarhini lowu taka. (1 Timotiya 4:8) Mukreste loyi a swi tshembaka swinene switshembiso leswi, naswona a khorwisekaka leswaku Yehovha i “muhakeri wa lava va [n’wi] lavaka hi mbilu hinkwayo” u kota ku yima a tiyile eripfumelweni. (Vaheveru 11:6) Vo tala va hina hi navela ku hetiseka ka switshembiso swa Xikwembu naswona hi vula marito lama vuriweke hi muapostola Yohane lama nge: “Amen! Tana, Hosi Yesu.” (Nhlavutelo 22:20) Ina, ku anakanyisisa hi mikateko leyi hi nga ta yi kuma loko ho tshembeka swi hi nyika matimba leswaku hi tiyisela, tanihi leswi Yesu a koteke ku tiyisela hikwalaho ka ku anakanya hi “ntsako lowu a wu vekiwe emahlweni ka yena.”—Vaheveru 12:1, 2.
10, 11. Xana ku susumetiwa hi rirhandzu ku hi pfuna njhani leswaku hi tiyisela?
10 Kambe, ku vuriwa yini hiloko hi tirhela Yehovha ntsena leswaku hi ta hanya emisaveni leyintshwa? Kutani hi nga hela mbilu hi ku olova kumbe hi nga eneriseki loko swilo swi nonon’hwa kumbe swi nga endleki hilaha a hi langutele hakona kumbe hi nkarhi lowu a hi anakanya wona. Hi nga va ekhombyeni ra ku khukhuleka. (Vaheveru 2:1; 3:12) Pawulo u vulavule hi khale ka nakulobye wa yena loyi a a vuriwa Demasi, loyi a n’wi fularheleke. Ha yini? Hikuva ‘a a rhandza mafambiselo ya swilo ya sweswi.’ (2 Timotiya 4:10) Un’wana ni un’wana loyi a tirhaka a ri ni swivangelo swa vutianakanyi u le khombyeni ro endla leswi fanaka. Va nga ha kokiwa hi malunghelo ya sweswi lama kumekaka emisaveni sweswi kutani va rivala hi mikateko leyi taka, va nga swi lavi ku titsona swo karhi.
11 Hambileswi swi nga swinene naswona swi nga swa ntumbuluko ku navela ku kuma mikateko ya le nkarhini lowu taka ni ku tshemba leswaku hi ta ntshunxiwa emiringweni, rirhandzu ri aka ku tlangela ka hina ka swilo leswi swi faneleke swi va swa nkoka evuton’wini bya hina. Lexi nga xa nkoka ngopfu i ku rhandza ka Yehovha, ku nga ri ka hina. (Luka 22:41, 42) Ina, rirhandzu ra hi aka. Ri hi endla hi eneriseka hi ku rindzela Xikwembu xa hina hi ku lehisa mbilu, hi eneriseka hi mikateko yihi na yihi leyi xi hi nyikaka yona naswona hi tiyiseka leswaku hi nkarhi lowu faneleke hi ta kuma xin’wana ni xin’wana lexi xi hi tshembiseke xona—ni leswi engetelekeke. (Pisalema 145:16; 2 Vakorinto 12:8, 9) Sweswi, rirhandzu ri hi pfuna ku hambeta hi tirha handle ka vutianakanyi hikuva “rirhandzu . . . a ri lavi leswi vuyerisaka rona ntsena.”—1 Vakorinto 13:4, 5.
Vakreste Va Fanele Va Rhandza Vamani?
12. Hi ku ya hi Yesu, i vamani lava hi faneleke hi va rhandza?
12 Loko Yesu a tshaha swivulwa swimbirhi leswi humaka eka Nawu wa Muxe, u nyikele nawu malunghana ni lava hi faneleke hi va rhandza. U te: “U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo,” naswona “U fanele u rhandza warikwenu kukota loko u tirhandza.”—Matewu 22:37-39.
13. Hi nga dyondza ku rhandza Yehovha hi ndlela yihi, hambileswi hi nga taka hi nga n’wi voni?
13 Hi ku ya hi marito ya Yesu, swi le rivaleni leswaku xa nkoka swinene i ku rhandza Yehovha. Hambiswiritano, a hi tswariwi hi ri ni rirhandzu lerikulu hi Yehovha. Hi fanele hi ri hlakulela. Loko hi sungula ku twa hi ta yena, hi kokeriwe eka yena hikwalaho ka leswi hi swi tweke. Hakatsongo-tsongo, hi dyondze hi ndlela leyi a lunghiseleleke vanhu misava ha yona. (Genesa 2:5-23) Hi dyondze hi ndlela leyi a tirhisaneke ha yona ni vanhu, a nga hi fularhelanga loko xidyoho xi hlasela vanhu vo sungula, kambe u teke magoza yo hi ponisa. (Genesa 3:1-5, 15) U tirhisane hi tintswalo ni lava a va tshembeka, naswona eku heteleleni u nyikele hi N’wana wa yena la tswariweke a ri swakwe leswaku hi ta rivaleriwa swidyoho swa hina. (Yohane 3:16, 36) Vutivi lebyi engetelekaka byi endle leswaku ku tlangela ka hina Yehovha ku kula. (Esaya 25:1) Hosi Davhida u vule leswaku a a rhandza Yehovha hikwalaho ka nkhathalelo wa Yena wa rirhandzu. (Pisalema 116:1-9) Namuntlha, Yehovha wa hi khathalela, wa hi kongomisa, wa hi tiyisa a tlhela a hi khutaza. Loko hi ya hi dyondza ha yena ngopfu, rirhandzu ra hina ha yena ra kula.—Pisalema 31:23; Sofaniya 3:17; Varhoma 8:28.
Hi Nga Ri Kombisa Njhani Rirhandzu Ra Hina?
14. Hi nga swi kombisa hi ndlela yihi leswaku rirhandzu ra hina eka Xikwembu i ra xiviri?
14 Ina, vo tala emisaveni hinkwayo va vula leswaku va rhandza Xikwembu, kambe ndlela leyi va hanyaka ha yona yi kanetana ni leswi va swi vulaka. Hi nga swi tivisa ku yini leswaku ha n’wi rhandza hakunene Yehovha? Hi nga vulavula na yena hi xikhongelo hi n’wi byela ndlela leyi hi titwaka ha yona. Naswona hi nga endla swilo hi ndlela leyi kombisaka rirhandzu ra hina. Muapostola Yohane u te: “Mani na mani la hlayisaka rito ra [Xikwembu], entiyisweni rirhandzu ra Xikwembu ri hetisekisiwile eka munhu yoloye. Hi ku endla leswi hi va ni vutivi bya leswaku hi ni vun’we na yena.” (1 Yohane 2:5; 5:3) Nakambe, Rito ra Xikwembu ri hi byela leswaku hi hlangana swin’we hi tlhela hi hanya vutomi lebyi baseke, lebyinene. Hi papalata vukanganyisi, hi vulavula ntiyiso, naswona mianakanyo ya hina yi tshama yi tengile. (2 Vakorinto 7:1; Vaefesa 4:15; 1 Timotiya 1:5; Vaheveru 10:23-25) Hi kombisa rirhandzu hi ku pfuna hi swilo leswi vonakaka eka lava pfumalaka. (1 Yohane 3:17, 18) Naswona a hi tshiki ku byela van’wana malunghana na Yehovha. Sweswo swi katsa ku hlanganyela eku chumayeleni ka mahungu lamanene ya Mfumo emisaveni hinkwayo. (Matewu 24:14; Varhoma 10:10) Ku yingisa Rito ra Xikwembu eka swilo swo tano i vumbhoni bya leswaku rirhandzu ra hina eka Yehovha i ra xiviri.
15, 16. Ku rhandza Yehovha ku va khumbe njhani vanhu vo tala n’wexemu?
15 Ku rhandza Yehovha swi pfuna vanhu leswaku va endla swiboho leswinene. N’wexemu, rirhandzu rolero ri susumetele vanhu va 288 907 leswaku va nyiketela vutomi bya vona eka yena naswona va kombisa xiboho xolexo hi ku khuvuriwa ematini. (Matewu 28:19, 20) Ku tinyiketela ka vona a ku ri ni xikongomelo. A ku kombisa ku hundzuka ka vona evuton’wini. Hi xikombiso, Gazmend a a ri mutlangi wa ndhuma wa basketball le Albania. Yena ni nsati wakwe va dyondze Bibele ku ringana malembe yo tala, naswona ku nga khathariseki swihinga leswi a va ri na swona va hetelele va faneleka ku va vahuweleri va Mfumo. N’wexemu, Gazmend u khuvuriwile, a a ri un’wana wa vanhu va 366 lava khuvuriweke eAlbania hi lembe ra ntirho ra 2000. Phepha-hungu ri tsale xihloko malunghana na yena, ri ku: “Vutomi bya yena byi ni xikongomelo, naswona hikwalaho ka leswi, yena ni ndyangu wa yena va tiphina swinene hi vutomi. Eka yena, xa nkoka a ka ha ri ku vona leswaku u kuma swilo swo tanihi kwihi, kambe, i ku vona leswaku a nga pfuna vanhu van’wana ku fikela kwihi.”
16 Hilaha ku fanaka, makwerhu wa xisati loyi a ha ku khuvuriwaka loyi a tirhaka ekhampanini ya petirolo le Guam u nyikiwe lunghelo leri a ri ri ndzingo eka yena. Endzhaku ka ku tlakusiwa swinene entirhweni, u hetelele a nyikiwe lunghelo ro va xandla xa muungameri wa xisati wo sungula ematin’wini ya khampani yoleyo. Kambe, se a a nyiketele vutomi bya yena eka Yehovha. Endzhaku ko kanela ni nuna wa yena, makwerhu loyi lontshwa wa xisati u ale lunghelo rero, naswona ku ri na sweswo u hlele ku nga tirhi nkarhi hinkwawo leswaku a ta endla nhluvuko wa ku va phayona, leswi vulaka mutirheli wa nkarhi hinkwawo. Ku rhandza Yehovha ku n’wi susumetele ku va phayona ematshan’weni yo hlongorisa timali ta misava leyi. Kahle-kahle, rirhandzu ro tano ri susumetele vanhu va 805 205 emisaveni hinkwayo leswaku va hlanganyela eka swivumbeko swo hambana-hambana swa vutirheli bya vuphayona hi lembe ra ntirho ra 2000. Maphayona wolawo ma kombise rirhandzu ni ripfumelo ra wona hakunene!
Ku Susumeteleka Ku Rhandza Yesu
17. I xikombiso xihi xa rirhandzu lexi hi xi vonaka eka Yesu?
17 Yesu i xikombiso lexi hlamarisaka xa munhu loyi a susumetiweke hi rirhandzu. Loko a nga si va munhu wa nyama, u rhandze Tata wa yena a tlhela a rhandza ni vanhu. Tanihi ximunhuhatwa xa vutlhari u te: “Hi nkarhi wolowo a ndzi ri etlhelo ka [Yehovha] ndzi ri mutirhi la nga ni vuswikoti, a ndzi ri munhu loyi a n’wi rhandzaka hilaha ku hlawulekeke siku ni siku, mina ndzi tsakile emahlweni ka yena nkarhi hinkwawo, ndzi tsakile hikwalaho ka tiko leri noneke ra misava yakwe, naswona swilo leswi a ndzi swi rhandza a swi ri ni vana va vanhu.” (Swivuriso 8:30, 31) Rirhandzu ra Yesu ri n’wi susumetele ku siya ndhawu ya yena ya le tilweni ivi a velekiwa tanihi ricece leri nga pfuniki nchumu. U lehise mbilu a tlhela a va ni musa eka vanhu lava titsongahataka a tlhela a xanisiwa hi valala va Yehovha. Eku heteleleni, u fele vanhu hinkwavo emhandzini ya nxaniso. (Yohane 3:35; 14:30, 31; 15:12, 13; Vafilipiya 2:5-11) Mawaku xikombiso lexinene xa nsusumeto lowunene!
18. (a) Hi ku hlakulela njhani ku rhandza Yesu? (b) Hi swi kombisa njhani leswaku hi rhandza Yesu?
18 Loko vanhu va timbilu letinene va hlaya marungula ya vutomi bya Yesu eka Tievhangeli ivi va anakanyisisa hi mikateko yo tala leyi tisiweke hi ntila wa yena wo tshembeka, leswi swi endla leswaku rirhandzu leri va n’wi rhandzaka ha rona ri kula eka vona. Hina namuntlha hi fana ni lava Petro a vulavuleke ha vona a ku: “Hambileswi mi nga si tshamaka mi n’wi vona [Yesu], ma n’wi rhandza.” (1 Petro 1:8) Rirhandzu ra hina ri vonaka loko hi va ni ripfumelo eka yena ivi hi tekelela vutomi bya yena bya ku tinyikela. (1 Vakorinto 11:1; 1 Vatesalonika 1:6; 1 Petro 2:21-25) Hi April 19, 2000, vanhu va 14 872 086 va tsundzuxiwe hi swivangelo swa hina swo rhandza Yesu loko va ri eXitsundzuxweni xa lembe na lembe xa rifu ra yena. Yoleyo a yi ri nhlayo leyikulu hakunene! Naswona swi nyika matimba ku tiva leswaku vanhu vo tala swinene va tsakela ku ponisiwa hi gandzelo ra Yesu! I ntiyiso, ha akiwa hi ku va Yehovha na Yesu va hi rhandzile na hina hi tlhela hi va rhandza.
19. I swivutiso swihi leswi vulavulaka hi rirhandzu leswi nga ta kambisisiwa exihlokweni lexi landzelaka?
19 Yesu u vule leswaku hi fanele hi rhandza Yehovha hi timbilu ta hina hinkwato, mimoya-xiviri ya hina hinkwayo, mianakanyo ya hina hinkwayo ni hi matimba ya hina hinkwawo. Kambe u tlhele a vula leswaku hi fanele hi rhandza vaakelani va hina kukota loko hi tirhandza. (Marka 12:29-31) Xana ku katseka na vamani? Naswona ku rhandza vaakelani swi hi pfuna njhani leswaku hi tshama hi ri karhi hi ringanisela hi tlhela hi va ni nsusumeto lowu faneleke? Swivutiso leswi swi ta kambisisiwa exihlokweni lexi landzelaka.
Wa Tsundzuka Xana?
• Ha yini rirhandzu ri ri mfanelo ya nkoka?
• Hi nga dyondza ku rhandza Yehovha hi ndlela yihi?
• Ndlela leyi hi tikhomaka ha yona yi swi kombisa njhani leswaku hi rhandza Yehovha?
• Hi ku kombisa njhani ku rhandza ka hina Yesu?
[Swivutiso Swa Dyondzo]
[Swifaniso eka tluka 10]
Rirhandzu ri hi susumetela ku rindzela ku ntshunxiwa hi ri karhi hi lehisa mbilu
[Xifaniso eka tluka 12]
Gandzelo lerikulu ra Yesu ri hi susumetela ku n’wi rhandza