Timbanga Leti Vangiweke Hi Nyimpi

KHALE ka socha leri lweke Nyimpi ya Vumbirhi ya Misava ri te: “Enyimpini a ku na tinghwazi. Ku na lava hluriwaka ntsena.” Vo tala va nga pfumelelana na yena. Vuyelo bya nyimpi byi tsema nhlana; vahluri ku katsa ni lava va hluriweke va kuma vuyelo byo vava. Hambi loko nyimpi se yi herile, timiliyoni ta vanhu ti ya emahlweni ti xanisiwa hi timbanga to chavisa leti vangiweke hi nyimpi.

I timbanga ta muxaka muni? Nyimpi yi nga dlaya vunyingi bya vaaki, yi siya ku ri ni vanhu vo tala lava feriweke hi vatswari ni tinoni. Vaponi vo tala va langutana ni timbanga to chavisa ta le mirini ni swivati swa le mianakanyweni. Timiliyoni ta vanhu ti nga ha siyiwa ti pfumala kumbe ti boheka ku va vahlapfa. Xana hi nga ri anakanya rivengo ni gome leswi faneleke swi dzikile etimbilwini ta lava va poneke tinyimpi teto?

Timbanga Leti Mpfempfaka

Timbanga leti vangiweke hi nyimpi etimbilwini ta vanhu ti ya emahlweni ti mpfempfa hambiloko nyimpi se yi ri ni nkarhi yi herile, swibalesa swi nga ha twali ni masocha ma tlhelele ekaya. Xitukulwana lexi landzelaka xi nga ha va ni xikhomela xa maxangu emakhorhweni ya timbilu ta xona. Hi ndlela leyi timbanga ta nyimpi yin’we ti nga va tona ti vangaka nyimpi leyi nga ta tlhandlama.

Hi xikombiso, Ntwanano wa Versailles, lowu sayiniweke hi 1919 leswaku ku herisiwa Nyimpi yo Sungula ya Misava ximfumo, wu simeke xiyimo lexi vaaki va Jarimani va xi tekeke xi ri xa tihanyi ni xa ku rihisela. Hi ku ya hi The Encyclopædia Britannica, marito ya ntwanano “ma vangele xikhomela eka Majarimani kutani ma hoxe xandla eka ku navela ku rihisela.” Endzhaku ka malembe, “xikhomela xa ntwanano wa ku rhula xi nyike Hitler xivangelo xo sungula ha xona” naswona a ku ri xin’wana xa swivangelo leswi vangeleke leswaku ku va ni Nyimpi ya Vumbirhi ya Misava.

Nyimpi ya Vumbirhi ya Misava yi sungule ePoland kutani yi hangalaka yi ya katsa ni Matiko ya Balkan. Timbanga ta nyimpi ya rixaka exifundzheni xolexo leti veke kona hi va-1940 hi tona ti nga vangela nyimpi eMatikweni ya Balkan hi va-1990. Phepha-hungu ra le Jarimani leri nge Die Zeit, ri te: “Rivengo ni ku rihisela ka tihanyi swi hundzuke ntlhamu lowu wachukeke ku ta fikela esikwini ra hina.”

Kunene loko vanhu va ta kota ku hanya hi ku rhula, timbanga leti vangiweke hi nyimpi ti fanele ti horisiwa. Xana swi nga endliwa njhani sweswo? Xana ku nga endliwa yini leswaku ku susiwa rivengo ni gome? I mani la nga horisaka timbanga leti vangiweke hi nyimpi?

[Mimfungho ya Vini va Swifaniso eka tluka 3]

U.S. Coast Guard photo; UN PHOTO 158297/J. Isaac