Xana Rirhandzu Ra Wena Ri Aname Ku Fikela Kwihi?

“U fanele u rhandza warikwenu kukota loko u tirhandza.”—MATEWU 22:39.

1. Loko hi rhandza Yehovha, ha yini hi fanele hi tlhela hi rhandza varikwerhu?

LOKO Yesu a vutisiwe leswaku hi xihi xileriso lexikulu ku tlula hinkwaswo, u te: “U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo.” Kutani u tshahe xileriso xa vumbirhi lexi yelanaka ni xo sungula a ku: “U fanele u rhandza warikwenu kukota loko u tirhandza.” (Matewu 22:37, 39) Ina, ku rhandza warikwenu i mfungho wa Mukreste. Kunene, loko hi rhandza Yehovha hi fanele hi rhandza varikwerhu. Ha yini? Hikuva hi kombisa ku rhandza ka hina Xikwembu hi ku yingisa Rito ra xona, naswona Rito ra xona ri hi lerisa ku rhandza varikwerhu. Hikwalaho, loko hi nga rhandzi vamakwerhu, ku rhandza ka hina Xikwembu a ku nge vi loku humaka embilwini.—Varhoma 13:8; 1 Yohane 2:5; 4:20, 21.

2. Hi fanele hi rhandza warikwerhu hi rirhandzu ra muxaka muni?

² Loko Yesu a vule leswaku hi fanele hi rhandza varikwerhu, a a nga vulavuli hi vunghana ntsena. Kambe a a vulavula hi rirhandzu leri hambaneke ni leri nga kona hi ntumbuluko emindyangwini kumbe exikarhi ka wanuna ni wansati. A a vulavula hi muxaka wa rirhandzu lowu Yehovha a nga na rona hi malandza ya yena lama tinyiketeleke ni leri ma n’wi rhandzaka ha rona. (Yohane 17:26; 1 Yohane 4:11, 19) Mutsari la nga Muyuda—loyi hi ku ya hi matwisiselo ya Yesu, a a vulavula hi vutlhari—u pfumelelane na Yesu leswaku ku rhandza Xikwembu ku fanele ku va “hi mbilu hinkwayo ni hi ku twisisa hinkwako ni hi ntamu hinkwawo.” (Marka 12:28-34) A a vurisile. Rirhandzu leri Mukreste a ri hlakulelaka ro rhandza Xikwembu ni warikwavo ri katsa mintlhaveko ya hina ni vutlhari bya hina. Ri huma embilwini ivi ri kongomisiwa hi mianakanyo.

3. (a) Yesu u n’wi dyondzise njhani “wanuna un’wana loyi a a ri ni vutivi bya Nawu” leswaku u fanele a va ni langutelo leri anameke malunghana ni loyi a nga warikwavo? (b) Xifaniso xa Yesu xi tirha njhani eka Vakreste namuntlha?

 ³ Hilaha Luka a vuleke hakona, loko Yesu a vule leswaku hi fanele hi rhandza warikwerhu, “wanuna un’wana loyi a a ri ni vutivi bya Nawu” u n’wi vutise, a ku: “Xana kahle-kahle warikwerhu i mani?” Yesu u n’wi hlamule hi ku tirhisa xifaniso. Wanuna un’wana u biwile, a tekeriwa swilo swa yena ivi a siyiwa etlhelo ka ndlela a ri kusuhi ni ku fa. Ku rhange ku hundza muprista ivi ku landzela Mulevhi. Havumbirhi bya vona va n’wi papalatile. Eku heteleleni ku te Musamariya, a vona wanuna la vavisekeke, a n’wi pfuna hi musa lowukulu. Eka lavanharhu, i mani loyi a a ri warikwavo eka wanuna la vavisiweke? Nhlamulo a yi ri erivaleni. (Luka 10:25-37) Wanuna loyi a a ri ni vutivi bya Nawu u fanele a hlamarisiwe hi ku twa Yesu a vula leswaku Musamariya a nga va warikwavo lonene ku tlula muprista ni Mulevhi. Entiyisweni, Yesu a a pfuna wanuna yoloye leswaku a rhandza warikwavo hi ndlela leyikulu ngopfu. Vakreste na vona va rhandza van’wana hi ndlela yoleyo. Anakanya hi vanhu hinkwavo lava va va rhandzaka.

Rirhandzu eNdyangwini

4. Mukreste u fanele a rhanga a kombisa rirhandzu kwihi?

⁴ Vakreste va rhandza swirho swa mindyangu ya vona—vavasati va rhandza vanuna va vona, vavanuna va rhandza vasati va vona, vatswari va rhandza vana va vona. (Eklesiasta 9:9; Vaefesa 5:33; Tito 2:4) I ntiyiso, emindyangwini yo tala ku ni swiboho swa rirhandzu ra ntumbuluko. Hambiswiritano, swiviko swa ku hahluka ka vukati, ku khomiwa hi ndlela yo biha ka vanghana va vukati ni vana lava tshikiweke kumbe lava khomiwaka hi ndlela yo biha, swi kombisa leswaku ndyangu wu le hansi ka ntshikilelo namuntlha, naswona mintlhaveko ya ntumbuluko ya mindyangu a yi nge swi koti ku yi hlanganisa. (2 Timotiya 3:1-3) Leswaku vutomi bya vona bya ndyangu byi humelela kahle, Vakreste va fanele va va ni muxaka wa rirhandzu lowu Yehovha na Yesu va nga na wona.—Vaefesa 5:21-27.

5. Xana vatswari va lava mpfuno eka mani loko va kurisa vana va vona, naswona byi ve byihi vuyelo bya vo tala?

⁵ Vatswari lava nga Vakreste va teka vana va vona va ri lava khomisiweke vona hi Yehovha, naswona va lava mpfuno eka yena leswaku va kurisa vana va vona. (Pisalema 127:3-5; Swivuriso 22:6) Hi ndlela yoleyo va hlakulela rirhandzu ra Vukreste, leri va pfunaka ku hlayisa vana va vona eka minkucetelo leyi onhaka leyi vantshwa va nga welaka eka yona. Hikwalaho, vatswari vo tala lava nga Vakreste va ve ni ntsako lowu fanaka ni wa manana un’wana wa le Netherlands. Endzhaku ko vona n’wana wa yena a khuvuriwa—ku nga un’wana wa vanhu va 575 lava khuvuriweke eNetherlands n’wexemu—u tsale leswi landzelaka: “Sweswi vuvekisi bya mina bya malembe ya 20 lama hundzeke byi ndzi vuyerisile. Nkarhi ni matimba hinkwawo—swin’we ni ku vaviseka, matshalatshala ni nhlomulo—se ndzi swi rivele.” U tsake ngopfu leswi n’wana wa yena a tihlawuleleke ku tirhela Yehovha. Nhlohlorhi ya vahuweleri va 31 089 lava vikeke eNetherlands n’wexemu va katsa vo tala lava dyondzeke ku rhandza Yehovha eka vatswari va vona.

6. Xana rirhandzu ra Vukreste ri nga pfuna njhani ku tiyisa xiboho xa vukati?

⁶ Pawulo u vule leswaku rirhandzu “i xiboho lexi hetisekeke xa vun’we,” naswona ri nga sirhelela vun’we bya vukati ni le minkarhini yo nonon’hwa. (Vakolosa 3:14, 18, 19; 1 Petro 3:1-7) Loko wanuna wa le Rurutu, ku nga xihlala lexitsongo lexi nga eka mpfhuka wa kwalomu ka 700 wa tikhilomitara ku suka eTahiti, a sungule ku dyondza Bibele ni Timbhoni ta Yehovha, nsati wa yena u n’wi kanete swinene. Eku heteleleni, nsati loyi u teke vana, a siya nuna ivi a ya tshama eTahiti. Hambiswiritano, nuna loyi u kombise rirhandzu ra yena hi ku n’wi rhumela mali nkarhi ni nkarhi a tlhela a n’wi bela riqingho a vutisa loko ku ri ni lexi yena kumbe vana a va xi pfumala. Hikwalaho u endle leswi a nga swi kotaka leswaku a hetisisa ndzhwalo wa yena wa Vukreste. (1 Timotiya 5:8) A a tshamela ku khongela leswaku ndyangu wa yena wu tlhela wu vuyelelana, kutani eku heteleleni nsati wa yena u vuyile. Loko a vuyile, nuna wa yena u n’wi khome hi “rirhandzu, ku tiyisela, moya wo rhula.” (1 Timotiya 6:11) Hi 1998 wanuna loyi u khuvuriwile naswona endzhakunyana u khape-khape hi ntsako loko nsati wa yena a pfumele ku dyondza Bibele. Dyondzo yoleyo a yi ri yin’wana ya leta 1 351 leti fambisiweke n’wexemu ensin’wini leyi khathaleriwaka hi rhavi ra le Tahiti.

7. Hi ku ya hi wanuna un’wana wa le Jarimani, i yini lexi tiyiseke vukati bya yena?

⁷ Le Jarimani wanuna un’wana a a lwa ni nsati  wa yena hileswi a tsakela ntiyiso wa Bibele, naswona wanuna loyi a a khorwisekile leswaku Timbhoni ta Yehovha a ti lava ku n’wi kanganyisa. Hambiswiritano, endzhakunyana u tsalele Mbhoni leyi yi rhangeke yi vulavula ni nsati wa yena, a ku: “Ndza nkhensa ku va u hlanganise nsati wa mina ni Timbhoni ta Yehovha. Eku sunguleni, a ndzi karhatekile hikuva a ndzi twe swilo swo tala swo biha malunghana na tona. Kambe sweswi leswi se ndzi yeke eminhlanganweni ni nsati wa mina, ndza swi xiya leswaku a ndzi hoxisile. Ndza swi tiva leswaku ndzi twa ntiyiso, naswona wu endle vukati bya hina byi tiya swinene.” Timbhoni ta Yehovha ta 162 932 ta le Jarimani—ni ta 1 773 leti nga le swihlaleni leswi khathaleriwaka hi rhavi ra le Tahiti—ti ni mindyangu leyi hlanganisiweke hi rirhandzu ra vukwembu.

Ku Rhandza Vamakwerhu Lava Nga Vakreste

8, 9. (a) I mani loyi a hi dyondzisaka ku rhandza vamakwerhu, naswona rirhandzu ri hi susumetela ku endla yini? (b) Nyika xikombiso xa ndlela leyi rirhandzu ri nga pfunaka vamakwerhu ha yona leswaku va seketelana.

⁸ Pawulo u byele Vakreste va le Tesalonika a ku: “N’wina mi dyondzisiwa hi Xikwembu leswaku mi rhandzana.” (1 Vatesalonika 4:9) Ina, lava va “dyondzisiwaka hi Yehovha” va rhandzana. (Esaya 54:13) Rirhandzu ra vona ri kombisiwa hi swiendlo, hilaha Pawulo a kombiseke hakona loko a te: “Tirhelanani tanihi mahlonga hi rirhandzu.” (Vagalatiya 5:13; 1 Yohane 3:18) Hi xikombiso, leswi va swi endla hi ku endzela vamakwerhu lava vabyaka, va khutaza lava karhatekeke va tlhela va seketela lava tsaneke. (1 Vatesalonika 5:14) Rirhandzu ra hina ra Vukreste leri humaka embilwini ri hoxa xandla eka ku kula ka paradeyisi ya hina ya moya.

⁹ Le Vandlheni ra Ancón—rin’wana ra mavandlha ya 544 ya le Ecuador—vamakwerhu va kombise rirhandzu ra vona hi ku pfunana. Swiphiqo swa timali swi va siye va nga ri na ntirho kumbe miholo, hikwalaho vahuweleri va bohe ku hlengeleta mali hi ku xavisela vaphasi va tinhlampfi va kwalaho swakudya loko va muka emakaya endzhaku ko phasa vusiku hinkwabyo. Va khomisanile, ku katsa ni vana. A va boheka ku sungula hi 1:00 nimixo leswaku hi 4:00 nimixo swakudya swi va swi lunghile loko vaphasi va tinhlampfi va muka. Mali leyi hlengeletiweke hi vamakwerhu yi aviwile hi ku ya hi swilaveko swa vona. Ku pfunana koloko ku kombise rirhandzu ra xiviri ra Vukreste.

10, 11. Hi nga ri kombisa njhani rirhandzu eka vamakwerhu lava hi nga si tshamaka hi va vona?

¹⁰ Hambiswiritano, rirhandzu ra hina a hi ri  kombisi Vakreste lava hi va tivaka ntsena. Muapostola Petro u te: “Rhandzani nhlengeletano ya vamakwenu hinkwayo.” (1 Petro 2:17) Hi rhandza vamakwerhu hinkwavo hikuva i vagandzeri-kulorhi va Yehovha Xikwembu. Minkarhi ya swiphiqo yi nga hi nyika lunghelo ro kombisa rirhandzu leri. Hi xikombiso, hi lembe ra ntirho ra 2000, tindhambhi letikulu ti hlasele tiko ra Mozambhiki, naswona nyimpi ya xin’wana-manana leyi nga heriki le Angola yi siye vo tala va ri evuswetini lebyikulu. Nhlayo leyikulu ya vamakwerhu va 31 725 eMozambhiki ni va 41 222 va le Angola va khumbiwe hi swiendlakalo leswi. Hikwalaho, Timbhoni ta le Afrika Dzonga ti rhumele swilo swo tala leswaku ti hunguta nhlomulo wa vamakwavo va le matikweni wolawo. Ku tiyimisela ka vona ku nyikela ‘leswi va seleke na swona’ eka vamakwavo lava pfumalaka swi kombise rirhandzu ra vona.—2 Vakorinto 8:8, 13-15, 24.

¹¹ Rirhandzu ri tlhela ri voniwa loko vamakwerhu va le matikweni yo tala va humesa minyikelo leswaku ku ta akiwa Tiholo ta Mfumo ni Tiholo ta Nhlengeletano ematikweni lama pfumalaka. Xikombiso lexi nga kona i xa le Solomon Islands. Hambileswi ku nga ni madzolonga yo tala, le Solomon Islands vahuweleri va engeteleke hi tiphesente ta tsevu n’wexemu, ku va ni nhlohlorhi ya 1 697. Va hlele ku aka Holo ya Nhlengeletano. Hambileswi vanhu vo tala lava tshamaka exihlaleni xolexo a va baleka va huma eka xona, vatirhi vo tirhandzela va tile va huma eAustralia leswaku va ta pfuneta entirhweni wo aka. Eku heteleleni, vatirhi vo tirhandzela va boheke ku famba, kambe va fambe se va letele vamakwerhu va kwalaho ku hetisa masungulo ya holo. Muako lowu tlhantlheleriweke wa holo wu rhumeriwile wu huma hi le Australia, kutani ku hetiwa ka muako lowu wo saseka wa vugandzeri—kasi miako yo tala kwalaho yi lo tshikiwa yi nga hetiwanga—ku ta va vumbhoni lebyinene evitweni ra Yehovha ni le ka rirhandzu ra vamakwerhu.

Ha Va Rhandza Vanhu Lava Nga eMisaveni, Ku Fana Ni Xikwembu

12. Hi n’wi tekelela njhani Yehovha hi langutelo ra hina eka lava va nga riki vapfumeri-kulorhi?

¹² Xana hi rhandza ndyangu wa hina ni vamakwerhu ntsena? A hi nge endli tano loko hi ri “vatekeleri va Xikwembu.” Yesu u te: “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” (Vaefesa 5:1; Yohane 3:16) Ku fana na Yehovha Xikwembu, hi kombisa vanhu hinkwavo rirhandzu—ku katsa ni lava nga riki vapfumeri-kulorhi. (Luka 6:35, 36; Vagalatiya 6:10) Emhakeni leyi ngopfu-ngopfu, hi chumayela mahungu lamanene ya Mfumo hi tlhela hi byela van’wana hi xiendlo lexikulu xa Xikwembu xa rirhandzu lexi endliweke hikwalaho ka vona. Leswi swi nga endla leswaku un’wana ni un’wana la yingisaka a ponisiwa.—Marka 13:10; 1 Timotiya 4:16.

13, 14. Hi yihi mintokoto yin’wana ya vamakwerhu lava kombiseke rirhandzu eka vanhu lava nga riki Timbhoni, hambiloko minkarhi yin’wana swi nonon’hwa?

¹³ Anakanya hi mune wa vatirheli lava nga maphayona yo hlawuleka le Nepal. A ma averiwe ku ya tirha edorobeni leri nga edzonga-vupela-dyambu bya tiko leri, naswona eka malembe ya ntlhanu lama hundzeke, va kombise rirhandzu ra vona hi ku nyikela vumbhoni handle ko hela mbilu edorobeni rolero ni le swimitanini swa le kulenyana. Leswaku va hlanganisa nsimu ya vona, hakanyingi va famba tiawara to tala hi swikanyakanya laha mumu wa kona wu vavulaka ku tlula 40°C. Rirhandzu ra vona ni “ku tiyisela entirhweni lowu nga wunene” swi tswale mihandzu leyinene hi ku vumbiwa ka ntlawa wa dyondzo ya buku eka swin’wana swa swimitana swoleswo. (Varhoma 2:7) Hi March 2000, a ku te vanhu va 32 va ta yingisela nkulumo ya le rivaleni leyi a yi nyikeriwa hi mulanguteri wa xifundzha. Nepal yi ve ni nhlohlorhi ya vahuweleri va 430 n’wexemu—ku andza hi tiphesente ta kaye. Swi le rivaleni leswaku Yehovha u katekisa ku hiseka ni rirhandzu ra vamakwerhu va le tikweni rero.

¹⁴ Le Colombia maphayona yo hlawuleka ya xinkarhana ma ye eka Maindiya ya Mawayuu ma ya chumayela. Leswaku va kota ku va chumayela, va boheke ku dyondza ririmi ra vona, kambe ku tsakela ka vona ka rirhandzu ku hakeriwile hi ku va ku te vanhu va 27 enkulumeni ya le rivaleni hambileswi mpfula a yo halaka kunene. Ku hiseka hikwalaho ka rirhandzu ko fana ni loku kombisiweke hi maphayona lawa ku hoxe xandla eka ku andza hi tiphesente ta ntlhanu eColombia ni le ka nhlohlorhi ya vahuweleri va 107 613. Le Denmark makwerhu wa xisati la dyuhaleke a a lava ku byela van’wana mahungu lamanene, kambe a a lamarile.  Handle ko hela matimba, u tsalele vanhu lava tsakelaka mapapila. Sweswi, u tsalelana ni vanhu va 42 naswona u fambisa tidyondzo ta Bibele ta 11. I un’wana wa vahuweleri lava fikeleleke nhlohlorhi ya 14 885 lava vikeke eDenmark n’wexemu.

Rhandza Valala Va Wena

15, 16. (a) Yesu u vule leswaku rirhandzu ra hina ri fanele ri anama ku fikela kwihi? (b) Vamakwerhu lava nga ni vutihlamuleri va tirhisane njhani hi rirhandzu ni munhu loyi a tsale swihehlo swa mavunwa malunghana ni Timbhoni ta Yehovha?

¹⁵ Yesu u byele wanuna loyi a a tiva Nawu leswaku Musamariya a nga tekiwa tanihi warikwavo. Edyondzweni yakwe ya le Ntshaveni, Yesu u te: “Mi swi twile leswaku ku vuriwe va ku, ‘U fanele u rhandza warikwenu u venga nala wa wena.’ Hambiswiritano, mina ndzi ri eka n’wina: Hambetani mi rhandza valala va n’wina, mi khongelela lava mi xanisaka; leswaku mi tikombisa mi ri vana va Tata wa n’wina la nge matilweni.” (Matewu 5:43-45) Hambiloko munhu un’wana a hi kaneta, hi ringeta ku “hambeta [hi] hlula swo biha hi leswinene.” (Varhoma 12:19-21) Loko swi koteka, hi avelana na yena rifuwo ra hina ra risima swinene, ku nga ntiyiso.

¹⁶ Le Ukraine xihloko lexi a xi ri eka phepha-hungu leri nge Kremenchuk Herald xi vulavule hi Timbhoni ta Yehovha tanihi mpambukwa lowu nga ni khombo. Mhaka leyi a yi nga ri matlangwana hikuva le Yuropa van’wana va vulavula hi ndlela yoleyo hi Timbhoni ta Yehovha leswaku va khorwisa vanhu leswaku mintirho ya Timbhoni yi fanele yi hikiwa kumbe yi yirisiwa. Hikwalaho, ku yiwe eka mutsari wa xihloko xexo ivi a komberiwa ku kandziyisa phepha-hungu leri lulamisaka xihloko xexo. U pfumerile, kambe loko xi humesiwa, u tsale marito lama nge xihloko xo sungula a xi ri ntiyiso. Hikwalaho vamakwerhu lava nga ni vutihlamuleri va tlhelele eka yena va ri ni rungula leri engetelekeke. Eku heteleleni, mutsari u swi xiyile leswaku xihloko xo sungula a xi hoxile, kutani a tsala xin’wana a kombela ndzivalelo. Ku tirhisana na yena hi ku kongoma ni hi tintswalo a ku ri ndlela ya rirhandzu yo tamela xiyimo lexi, naswona swi tise vuyelo lebyinene.

Hi Nga Ri Hlakulela Njhani Rirhandzu?

17. I yini lexi kombisaka leswaku a swi nge olovi minkarhi hinkwayo ku tirhisana ni van’wana hi rirhandzu?

¹⁷ Loko n’wana a velekiwa, vatswari va sungula ku n’wi rhandza hi nkarhi wolowo. Ku tirhisana ni vanhu lavakulu hi rirhandzu a hi minkarhi hinkwayo swi nga swa ntumbuluko. Hi yona mhaka leyi Bibele yi tshamelaka ku hi byela leswaku hi rhandzana—i nchumu lowu hi faneleke hi wu hlakulela. (1 Petro 1:22; 4:8; 1 Yohane 3:11) Yesu a a swi tiva leswaku rirhandzu ra hina ri ta ringiwa loko  a vule leswaku hi fanele hi rivalela vamakwerhu “ka 77.” (Matewu 18:21, 22) Pawulo na yena u hi khutaze leswaku hi ‘hambeta hi lehiselana mbilu.’ (Vakolosa 3:12, 13) A swi hlamarisi leswi hi byeriwaka leswaku: “Lavisisani rirhandzu”! (1 Vakorinto 14:1) Hi nga swi endlisa ku yini sweswo?

18. I yini lexi nga ta hi pfuna ku hlakulela ku rhandza van’wana?

¹⁸ Xo sungula, minkarhi hinkwayo hi nga tsundzuka rirhandzu leri hi nga na rona ha Yehovha Xikwembu. Rirhandzu leri hi rona ri hi susumetaka swinene leswaku hi rhandza varikwerhu. Ha yini? Hikuva loko hi endla tano, sweswo swi kombisa kahle leswi Tata wa hina wa le tilweni a nga xiswona, naswona swi tisa ku vangama ni ku dzuneka eka yena. (Yohane 15:8-10; Vafilipiya 1:9-11) Xa vumbirhi, hi nga ringeta ku vona swilo hi ndlela leyi Yehovha a swi vonaka ha yona. Nkarhi wun’wana ni wun’wana loko hi dyoha, hi dyohela Yehovha; kambe, u tshama a ri karhi a hi rivalela naswona u hambeta a hi rhandza. (Pisalema 86:5; 103:2, 3; 1 Yohane 1:9; 4:18) Loko hi hlakulela langutelo ra Yehovha, hi ta susumeteleka ku rhandza van’wana ni ku va rivalela. (Matewu 6:12) Xa vunharhu, hi nga tirhisana ni van’wana hi ndlela leyi hi lavaka va tirhisana na hina ha yona. (Matewu 7:12) Leswi hi nga hetisekangiki, hi tshama hi ri karhi hi lava ku rivaleriwa. Hi xikombiso, loko hi vula swilo leswi tlhavaka van’wana, hi tshemba leswaku va ta tsundzuka leswaku un’wana ni un’wana u tshamela ku dyoha hi ririmi ra yena. (Yakobo 3:2) Loko hi lava van’wana va tirhisana na hina hi rirhandzu, hi fanele hi tirhisana na vona hi rirhandzu.

19. Hi nga wu lava njhani mpfuno wa moya lowo kwetsima loko hi hlakulela rirhandzu?

¹⁹ Xa vumune, hi nga lava mpfuno wa moya lowo kwetsima hikuva rirhandzu i wun’wana wa mihandzu ya moya. (Vagalatiya 5:22, 23) Vunghana, ku twelana ka ndyangu ni rirhandzu ra vanhu lava tekaneke hakanyingi hi tswariwa na swona. Kambe hi lava mpfuno wa moya wa Yehovha leswaku hi hlakulela rirhandzu leri Yehovha a nga na rona, rirhandzu leri nga xiboho lexi hetisekeke xa vun’we. Hi nga lava mpfuno wa moya lowo kwetsima hi ku hlaya Bibele leyi huhuteriweke. Hi xikombiso, loko hi dyondza hi ta vutomi bya Yesu, hi ta vona ndlela leyi a tirhisaneke ha yona ni vanhu naswona hi nga dyondza ku n’wi tekelela. (Yohane 13:34, 35; 15:12) Ku engetela kwalaho, hi nga kombela moya lowo kwetsima wa Yehovha, ngopfu-ngopfu eka swiyimo leswi swi endlaka swi hi tikela ku kombisa rirhandzu. (Luka 11:13) Eku heteleleni, hi nga hambeta hi ri ni rirhandzu loko hi namarhela vandlha ra Vukreste. Ku va ni vamakwerhu lava nga ni rirhandzu swi hi pfuna ku hlakulela rirhandzu.—Swivuriso 13:20.

20, 21. I xikombiso xihi xa rirhandzu lexi Timbhoni ta Yehovha ti xi kombiseke hi lembe ra ntirho ra 2000?

²⁰ N’wexemu, ku ve ni nhlohlorhi ya vahuweleri va mahungu lamanene va 6 035 564 emisaveni hinkwayo. Timbhoni ta Yehovha ti hete tiawara ta 1 171 270 425 ti lavana ni vanhu leswaku ti ta va byela mahungu lamanene. I rirhandzu leri endleke leswaku ti tiyisela mumu, mpfula ni xirhami loko ti ri karhi ti endla ntirho lowu. I rirhandzu leri ti susumeteleke ku vulavula ni vadyondzi-kulobye exikolweni ni vatirhi-kulobye ni ku ya vulavula ni vanhu lava ti nga va tiviki eswitarateni ni le tindhawini tin’wana. Vo tala va vanhu lava Timbhoni ti va endzeleke a va nga tsakeli, kasi va nga ri vangani va kanetile. Hambiswiritano, van’wana va kombise ku tsakela, lerova ku endliwe maendzo yo vuyela ya 433 454 049 ku tlhela ku fambisiwa tidyondzo ta Bibele ta 4 766 631. *

²¹ Wa nga vona ku kombisiwa ka rirhandzu loku Timbhoni ta Yehovha ti ku kombiseke eka Xikwembu xa tona ni le ka varikwavo! Rirhandzu rolero a ri nge pfuki ri horile. Ha tiyiseka leswaku hi lembe ra ntirho ra 2001 ku ta va ni vumbhoni lebyikulu lebyi nyikeriwaka evanhwini. Onge Yehovha a nga hambeta a katekisa vagandzeri va yena lava tshembekaka ni lava hisekaka loko va ri karhi va ‘endla timhaka ta vona hi rirhandzu’!—1 Vakorinto 16:14.

[Nhlamuselo ya le hansi]

Xana U Nga Hlamusela?

• Loko hi rhandza varikwerhu hi tekelela mani?

• Rirhandzu ra hina ri fanele ri anama ku fikela kwihi?

• Hi yihi mintokoto yin’wana leyi kombisaka rirhandzu ra Vukreste?

• Hi nga ri hlakulela njhani rirhandzu ra Vukreste?

[Swivutiso Swa Dyondzo]

 [Chati eka tluka 18-21]

XIVIKO XA LEMBE RA NTIRHO RA 2000 XA TIMBHONI TA YEHOVHA EMISAVENI HINKWAYO

[Swifaniso eka tluka 15]

Rirhandzu ra Vukreste ri nga hlanganisa ndyangu

[Swifaniso eka tluka 17]

Rirhandzu ri hi susumetela ku byela van’wana hi ntshembo wa hina