Timbhoni Ta Yehovha Ti Ya eMahlweni Hi Ku Khorwiseka Loku Tiyeke!

Xiviko Xa Nhlangano Wa Lembe Ni Lembe

EMASIKWINI lawa ma taleke ku kanakana hi tlhelo ra vukhongeri, Timbhoni ta Yehovha ti tikombisa ti ri Vakreste lava nga ni ku khorwiseka loku tiyeke. Leswi swi hlamuseriwe kahle eka nhlangano wa lembe ni lembe wa Watch Tower Bible and Tract Society of Pennsylvania, lowu a wu khomeriwe eHolweni ya Nhlengeletano ya Timbhoni ta Yehovha eJersey City, New Jersey, hi Mugqivela, October 7, 2000. *

Eka marito ya yena yo pfula, mutshama-xitulu, ku nga John E. Barr, xirho xa Huvo leyi Fumaka ya Timbhoni ta Yehovha, u te: “Exikarhi ka vanhu va magidi ya timiliyoni lava nga laha misaveni, ha swi tiva naswona ha pfumela leswaku N’wana wa Yehovha la rhandzekaka, Kreste Yesu, se u vekiwile exiluvelweni ematilweni, u fuma exikarhi ka valala va yena.” Vumbhoni bya ku khorwiseka koloko loku tiyeke byi kombisiwe eka swiviko swa tsevu leswi humaka emisaveni hinkwayo.

Ku Hlula Vungoma Hi Ntiyiso Wa Bibele eHaiti

Vungoma byi tolovelekile eHaiti. Muungameri wa Komiti ya Rhavi John Norman u te: “Hi ntolovelo, vanhu va tirhisa vungoma leswaku va tisirhelela.” N’anga yin’wana ya xintima yi sungule ku kanakana endzhaku ka loko yi tsemeke nenge emhangwini. Yi tivutisile, ‘Xana leswi swi nga endlekisa ku yini eka mina loko ndzi sirheleriwe hi mimoya?’ Ku fana ni van’wana vo tala, wanuna loyi u dyondzisiwe ntiyiso hi Timbhoni ta Yehovha naswona u pfuniwile leswaku a hambana ni vungoma. Ntshembo wa leswaku ku ta va ni ku andza eHaiti wu tikombe kahle loko nhlayo ya vanhu lava veke kona eXitsundzuxweni xa rifu ra Kreste hi April 19, 2000, yi yi tlule ka mune nhlayo ya vahuweleri va Mfumo etikweni rero.

Ku Hiseka eNsin’wini Leyikulu Ya Le Korea

Le Korea, Timbhoni ta Yehovha leti endlaka 40 wa tiphesente ti le ntirhweni wa nkarhi hinkwawo. Muungameri wa Komiti ya Rhavi, ku nga Milton Hamilton u te: “Leswi hi nga ni vuthu leri lerikulu, nsimu ya hina leyi nga ni vanhu lava tlulaka 47 wa timiliyoni yi hlanganisiwa kan’we hi n’hweti.” Ku ni ku andza lokukulu emavandlheni lawa ku vulavuriwaka ririmi ra mavoko. Exifundzheni xin’wana xa lava vulavulaka ririmi ra mavoko, ku fambisiwa tidyondzo ta le kaya ta Bibele ta 800. Leswi swi vula leswaku muhuweleri ha un’we u fambisa dyondzo yin’we. Lexi vavisaka hi leswaku vamakwerhu va xinuna lavatsongo va ha ri ekhotsweni hikwalaho ka vukala-tlhelo. Hambiswiritano, Vakreste lava vo tshembeka va xiximiwa naswona hi xitalo va nyikiwa mintirho leyi lavaka munhu wo tshembeka.

 Ku Langutana Ni Xilaveko Xa Ku Andza eMexico

Nhlohlorhi ya vahuweleri va Mfumo va 533-665 va vike ntirho wa nsimu eMexico hi August 2000. Vanhu lava tlulaka volavo kanharhu va ve kona eXitsundzuxweni. Muungameri wa Komiti ya Rhavi, Robert Tracy u te: “Xikongomelo xa hina lembe leri i ku aka 240 wa Tiholo tin’wana ta Mfumo.” U engetele hi ku: “Hambiswiritano, ha ha lava leti engetelekeke.”

Vantshwa lava nga Timbhoni ta Yehovha eMexico i xikombiso lexinene. Mufundhisi wa Khatoliki u vule leswi landzelaka malunghana ni muntshwa un’wana: “Ndzi nga rhandza ku va ni un’wana wo fana na yena eka valandzeri va mina. Ndzi xixima vanhu lava hi ku tiyimisela ka vona ni ku tirhisa ka vona Bibele hi vutlhari. Va yimelele Xikwembu, hambiloko vutomi bya vona byi ri ekhombyeni.”

Vutshembeki Ku Nga Khathariseki Mpfilumpfilu Lowu Nga Kona Le Sierra Leone

Ku sukela hi April 1991, loko ku tlhekeka nyimpi ya xin’wana-manana eSierra Leone, magidi ya vanhu ma dlayiwile, ma vavisiwa kumbe ma lamatiwa. Muungameri wa Komiti ya Rhavi, Bill Cowan u te: “Nyimpi ni maxangu swi khumbe vanhu hi ndlela leyikulu. Vo tala lava a va nga ri na mhaka ni rungula ra hina sweswi va yingisela hi vurhon’wana. Swi tolovelekile ku vona vanhu va titela hi voxe eTiholweni ta Mfumo leswaku va ta yingisa minhlangano ro sungula. Hakanyingi vamakwerhu va yimisiwa endleleni kutani vanhu va kombela ku fambiseriwa dyondzo ya Bibele.” Ku nga khathariseki leswi vanhu va yimeke hi nenge wun’we etikweni, ntirho wo chumayela hi Mfumo wu humesa mihandzu eSierra Leone.

Tsima Lerikulu Ro Aka eAfrika Dzonga

Sweswi ku ni xilaveko xa Tiholo ta Mfumo ta magidi ensin’wini leyi khathaleriwaka hi hofisi ya rhavi ra Afrika Dzonga. Se ku akiwe madzana ya tiholo. Xirho xa Komiti ya Rhavi, John Kikot xi te: “Ematshan’wini yo hlanganyela emikhukhwini kumbe ehansi ka murhi, hilaha a swi endliwa hakona eku sunguleni vamakwerhu va kota ku hlanganyela endhawini leyinene leyi nga ni switulu leswi faneleke. Hambileswi to tala ta Tiholo leti ta Mfumo ti nga ta xiyimo xa le hansi, hi xitalo ti vonakala ti ri miako leyi nga ni xindzhuti endhawini yoleyo. Etindhawini tin’wana, ku kumeke leswaku endzhaku ko aka Holo ya Mfumo nhlayo ya vahuweleri yi va yi engetelekile swinene eka lembe leri tlhandlamaka.”

Xitukulwana Lexintshwa Xa Timbhoni eUkraine

Hi lembe ra ntirho ra 2000, tiko leri ri ve ni nhlohlorhi ya vahuweleri va 112 720. Ku tlula 50 000 wa vanhu lava va dyondze ntiyiso wa Bibele emalembeni ya ntlhanu lama hundzeke. Muungameri wa Komiti ya Rhavi, John Didur u te: “Entiyisweni, Yehovha u kurise xitukulwana lexintshwa xa vantshwa va Timbhoni leswaku xi twarisa vito ra yena!” U engetele hi ku: “Emalembeni mambirhi lama hundzeke, hi fambise timagazini to tlula 50 wa timiliyoni—ku nga nhlayo leyi ringanaka ni vaaka-tiko. Nh’weti yin’wana ni yin’wana, hi xiringaniso hi kuma gidi ra mapapila lama humaka eka vanhu lava tsakelaka va kombela rungula leri engetelekeke.”

Swilo Swin’wana Leswi Tsakiseke eXiyimisweni

Daniel Sydlik, xirho xa Huvo leyi Fumaka, u nyikele nkulumo leyi kokaka nyingiso. Xihloko lexi nge, “Ndlela Leyi Huvo Leyi Fumaka Yi Hambanaka Ha Yona Ni Vandla Ra Swa Nawu,” lexi nga eka magazini lowu, xi sekeriwe eka rungula rero leri pfulaka mahlo.

Theodore Jaracz wa Huvo leyi Fumaka u nyikele nkulumo leyi tlhontlhaka mianakanyo leyi nga ni xihloko lexi nge, “Valanguteri Ni Malandza Ya Vutirheli Va Vekiwa Hi Ndlela Ya Le Tilweni.” Xin’wana xa swihloko leswi nga eka magazini lowu, xi sekeriwe eka nhloko-mhaka leyi.

Nakambe eka nhlangano wa lembe na lembe a ku ri ni nkulumo leyi nyanyulaka leyi nyikeriweke hi xirho xa Huvo leyi Fumaka, ku nga David Splane leyi sekeriweke ka ndzimana ya lembe ya 2001. Nkulumo leyi a yi sekeriwe emaritweni ya muapostola Pawulo, lama nge: “Mi yima mi hetiseka naswona mi va ni ku khorwiseka loku tiyeke hi ku rhandza ka Xikwembu hinkwako.” (Vakolosa 4:12) Timbhoni ta Yehovha emisaveni hinkwayo ti tiyimisele ku endla sweswo loko ti ri karhi ti chumayela mahungu lamanene ya Mfumo wa Xikwembu hi ku tshembeka emisaveni hinkwayo.—Matewu 24:14.

[Nhlamuselo ya le hansi]