I “Murhi eNkaveni Wa Wena”

KU PFUMERIWA leswaku mavabyi yo tala ya vanhu ma vangiwa hi mintshikilelo ya mintlhaveko yo tanihi ku chava, nhlomulo, mavondzo, xikhomela, rivengo ni ku tivona nandzu. Hikwalaho ka leswi, ma chavelela hakunene marito ya Bibele lama nge ‘ku chava Yehovha’ i “murhi enkaveni wa wena ni ku phyuphya emarhambyini ya wena”!—Swivuriso 3:7, 8.

Marhambu hi wona ma tiyisaka miri. Hikwalaho, Bibele yi tirhisa rito ‘marhambu’ hi ndlela yo gega, yi vula munhu—ngopfu-ngopfu leswi hi khumbiwaka hi mintlhaveko leyi enteke. Kambe, xana ku chava Yehovha i “murhi enkaveni wa wena” hi ndlela yihi?

Swidyondzi swa Bibele swi ni mavonelo yo hambana malunghana ni ku boxiwa ka ‘nkava’ endzimaneni leyi. Muhlamuseri un’wana u vula leswaku leswi wu nga “exikarhi ka miri,” ‘nkava’ wu nga ha va wu yimela swirho hinkwaswo swa nkoka. Xidyondzi xin’wana xi ringanyeta leswaku rito ‘nkava’ ri nga ha vula xinkavana, hilaha ri tirhisiweke hakona eka Ezekiyele 16:4. Loko swi ri tano, Swivuriso 3:8 yi nga ha va yi kandziyisa xilaveko xa hina xa ku titshega hi ku helela hi Xikwembu—ku fana ni leswi mbungu lowu nga kotiki ku endla nchumu wu titshegeke hi ku helela hi mana wa wona leswaku wu kuma swakudya. Nilokoswiritano, mavonelo man’wana ma kombisa leswaku laha rito ‘nkava’ ri nga ha va ri vula tinyama ni misiha ya miri. Eka mongo wa ndzimana leyi, swi nga ha endleka leswaku swirho leswi swi hambanisiwa ni ‘marhambu’—swiaki leswi tiyeke swinene swa miri.

Ku nga khathariseki leswaku swi vula yini, ku ni nchumu wun’we lowu tiyeke: Ku kombisa xichavo swinene eka Yehovha i ndlela ya vutlhari. Ku pfumelelana ni mimpimanyeto ya Xikwembu swi nga hoxa xandla eka ku hlayiseka ka hina emirini sweswi. Ku tlula kwalaho, ku nga endla leswaku hi tsakeriwa hi Yehovha, leswi nga ta endla leswaku hi kuma vutomi lebyi nga heriki hi ri ni rihanyo leri hetisekeke—emirini ni le mintlhavekweni—emisaveni ya yena leyintshwa leyi taka.—Esaya 33:24; Nhlavutelo 21:4; 22:2.

[Mfungho wa Vini va Xifaniso eka tluka 32]

Dr. G. Moscoso/SPL/Photo Researchers