Lavani Yehovha Ri Nga Si Fika Siku Ra Ku Hlundzuka Ka Yena
Lavani Yehovha Ri Nga Si Fika Siku Ra Ku Hlundzuka Ka Yena
“Lavani Yehovha . . . Lavani ku lulama, lavani ku rhula. Kumbexana mi nga tumbetiwa esikwini ra ku hlundzuka ka Yehovha.”—SOFANIYA 2:3.
1. A byi ri njhani vumoya bya Vayuda loko Sofaniya a sungula ntirho wa yena wo profeta?
SOFANIYA u sungule ntirho wa yena wo profeta enkarhini wo nonon’hwa ematin’wini ya Yuda. Tiko a ri horile emoyeni. Ematshan’weni yo tshemba Yehovha, vanhu volavo a va lava nkongomiso eka vaprista va vuhedeni ni le ka vangoma va swilo swa le mpfhukeni. Vugandzeri bya Bali swin’we ni mihivahivana ya byona ya vuswikoti byo veleka a swi tinyike matimba etikweni. Varhangeri va tiko—tihosana, vanhu lava tlakukeke ni vaavanyisi—a va tshikilela vanhu lava a va fanele va va sirhelela. (Sofaniya 1:9; 3:3) A swi hlamarisi leswi Yehovha a boheke ku ‘tshambuluta voko ra yena’ leswaku a lovisa Yuda na Yerusalema!—Sofaniya 1:4.
2. Hi wihi ntshembo lowu malandza lama tshembekaka ya Xikwembu a ma ri na wona eYuda?
2 Hambileswi xiyimo a xi bihile, ntshembo a wa ha ri kona. Yosiya, n’wana wa Amoni se a a ri hosi. Hambileswi Yosiya a ha ri xifanyetana, a a rhandza Yehovha hi mbilu ya yena hinkwayo. Loko hosi leyintshwa a yi lo tlherisela vugandzeri lebyi tengeke etikweni ra Yuda, sweswo a swi ta va xikhutazo eka vanhu va nga ri vangani lava a va ha tirhela Xikwembu hi ku tshembeka! Van’wana a va ta susumeteleka ku va joyina kutani va sirheleriwa hi siku ra ku hlundzuka ka Yehovha.
Leswi Munhu A A Fanele A Swi Endla Leswaku A Sirheleriwa
3, 4. Hi swihi swilaveko swinharhu leswi munhu a faneleke a swi fikelela leswaku a sirheleriwa “esikwini ra ku hlundzuka ka Yehovha”?
3 Xana vanhu van’wana a va ta sirheleriwa hi siku ra ku hlundzuka ka Yehovha? Ina, loko ntsena vo fikelela swilaveko swinharhu leswi hlamuseriweke eka Sofaniya 2:2, 3. Loko hi ri karhi hi hlaya tindzimana leti, a hi swi xiyisiseni kahle swilaveko leswi. Sofaniya u tsarile: “Nawu wu nga si tswala nchumu, siku ri nga si hundza kukota mungu, ku hlundzuka lokukulu ka Yehovha ku nga si mi wela, siku ra ku hlundzuka ka Yehovha ri nga si mi fikela, lavani Yehovha, n’wina hinkwenu lavo rhula va misava, n’wina lava mi hanyeke hi ku landza xiboho xa Yena xa vuavanyisi. Lavani ku lulama, lavani ku rhula. Kumbexana mi nga tumbetiwa esikwini ra ku hlundzuka ka Yehovha.”
4 Kutani, leswaku munhu a sirheleriwa, a a fanele a (1) lava Yehovha, (2) a lava ku lulama ni ku (3) lava ku rhula. Namuntlha, hi fanele hi swi tekela enhlokweni swilaveko leswi. Ha yini? Hikuva tanihi leswi tiko ra Yuda ni ra Yerusalema ma langutaneke ni siku ra ku tihlamulela hi lembe-xidzana ra vunkombo B.C.E., matiko ya Vujagana—kahle-kahle, vanhu hinkwavo vo homboloka—ma kongome esikwini leri Yehovha Xikwembu a nga ta humesa xigwevo xakwe eka “nhlomulo lowukulu” lowu taka. (Matewu 24:21) Un’wana ni un’wana loyi a lavaka ku ponisiwa enkarhini wolowo u fanele a teka goza leri faneleke sweswi. Njhani? Hi ku lava Yehovha, a lava ku lulama ni ku lava ku rhula ka ha ri ni nkarhi!
5. I yini lexi katsekaka eku ‘laveni ka Yehovha’ namuntlha?
5 U nga ha ku: ‘Ndzi Mbhoni ya Yehovha leyi tinyiketeleke yi tlhela yi khuvuriwa. Xana a ndzi si swi fikelela swilaveko sweswo?’ Kahle-kahle, ku katseka swo tala ku tlula ku tinyiketela eka Yehovha. Tiko ra Israyele a ri ri leri tinyiketeleke, kambe enkarhini wa Sofaniya vanhu va Yuda a va nga hanyi hi ku pfumelelana ni ku tinyiketela koloko. Hikwalaho, tiko rolero ri hetelele ri lahliwile. ‘Ku lava Yehovha’ namuntlha swi katsa ku tshama hi ri ni vuxaka na yena swin’we ni nhlengeletano ya yena ya laha misaveni. Swi vula ku tiva ndlela leyi Xikwembu xi ti langutaka ha yona timhaka ni ku anakanyela ndlela leyi xi titwaka ha yona. Hi lava Yehovha loko hi dyondza Rito ra yena hi vukheta, hi anakanyisisa ha rona hi tlhela hi tirhisa ndzayo ya rona evuton’wini. Loko hi ri karhi hi lava nkongomiso wa Yehovha hi xikhongelo lexi humaka embilwini hi tlhela hi landzela nkongomiso wa moya wa yena lowo kwetsima, hi va ni vuxaka lebyikulu na yena naswona hi susumeteleka ku n’wi tirhela ‘hi mbilu ya hina hinkwayo, moya-xiviri wa hina hinkwawo ni hi matimba ya hina lamakulu hinkwawo.’—Deteronoma 6:5; Vagalatiya 5:22-25; Vafilipiya 4:6, 7; Nhlavutelo 4:11.
6. Hi nga ku ‘lava njhani ku lulama,’ naswona ha yini sweswo swi koteka hambi ku ri emisaveni leyi?
6 Xilaveko xa vumbirhi lexi boxiweke eka Sofaniya 2:3 i ku ‘lava ku lulama.’ Vo tala va hina hi endle mindzulamiso ya nkoka leswaku hi ta fanelekela nkhuvulo wa Vukreste, kambe hi fanele hi hambeta hi seketela mimpimanyeto leyinene ya Xikwembu evuton’wini bya hina hinkwabyo. Van’wana lava sunguleke kahle emhakeni leyi va pfumele ku thyakisiwa hi misava. A swi olovi ku lava ku lulama, hikuva hi rhendzeriwe hi vanhu lava tekaka ku tikhoma loko biha hi tlhelo ra rimbewu, ku hemba ni swidyoho swin’wana swi nga ri nchumu. Kambe, ku navela lokukulu ko tsakisa Yehovha ku nga hlula mboyamelo wihi na wihi wo lava ku amukeriwa hi misava hi ku ringeta ku tifanisa na yona. Tiko ra Yuda ri lahlekeriwe hi ku tsakeriwa hi Xikwembu hikwalaho ko tekelela matiko lawa a ma vandzamane na rona lama nga chaviki Xikwembu. Kutani, ematshan’weni yo tekelela misava, a hi veni “vatekeleri va Xikwembu,” hi hlakulela “vumunhu lebyintshwa lebyi tumbuluxiweke hi ku ya hi ku rhandza ka Xikwembu hi ku lulama ka ntiyiso ni vutshembeki.”—Vaefesa 4:24; 5:1.
7. ‘Ku lulama hi nga ku lava’ hi ndlela yihi?
7 Yinhla ya vunharhu leyi boxiwaka eka Sofaniya 2:3 hi leswaku loko hi lava ku tumbetiwa esikwini ra vukarhi ra Yehovha, hi fanele hi ‘lava ku rhula.’ Siku ni siku hi hlangana ni vavanuna, vavasati ni vantshwa lava nga rhulangiki. Eka vona, ku va ni moya wo rhula swi kombisa ku tsana. Ku titsongahata va ku teka ku ri ku tsana lokukulu. Va lava swilo hi ku sindzisa, va ni vutianakanyi naswona va tshemba mianakanyo ya vona ntsena, va pfumela leswaku “timfanelo” ta vona vini ni leswi va swi rhandzaka swi fanele swi tekeriwa enhlokweni ku nga khathariseki leswaku swi va koxa yini. A swi ta vava hakunene loko van’wana va vanhu lava nga ni langutelo ro tano a vo hi tluleta rona! Lowu i nkarhi wa ku ‘lava ku rhula.’ Njhani? Hi ku titsongahata eka Xikwembu, hi ku titsongahata hi amukela ndzayo ya xona naswona hi pfumelelana ni ku rhandza ka xona.
Ha Yini Ku Vuriwa Leswaku “Kumbexana”?
8. I yini lexi kombisiwaka hi ku tirhisiwa ka rito “kumbexana” eka Sofaniya 2:3?
8 Xiya leswaku Sofaniya 2:3 yi ri: “Kumbexana mi nga tumbetiwa esikwini ra ku hlundzuka ka Yehovha.” Ha yini ku tirhisiwa rito “kumbexana” loko ku vulavuriwa hi “lavo rhula va misava”? Vanhu lavo rhula va teke magoza lamanene, kambe a va nga fanelanga va titshemba. A va nga si ri heta pfhumba ra vutomi bya vona hi ku tshembeka. Kumbexana van’wana va vona a va ta wela exidyohweni. Swi tano ni le ka hina. Yesu u te: “Loyi a tiyiseleke ku fika emakumu hi yena la nga ta ponisiwa.” (Matewu 24:13) Ina, ku ponisiwa esikwini ra ku hlundzuka ka Yehovha swi titshege hi ku hambeta ka hina hi endla leswinene ematihlweni ya yena. Xana hi leswi u tiyimiseleke swona hi mbilu hinkwayo?
9. I magoza wahi lamanene lama tekiweke hi Hosi Yosiya lontsongo?
9 Handle ko kanakana, hi ku pfumelelana ni marito ya Sofaniya, Hosi Yosiya u susumeteleke ku ‘lava Yehovha.’ Matsalwa ma ri: “Hi lembe ra vunhungu ra ku fuma kakwe, loko [Yosiya] a ha ri mufana [wa malembe ya kwalomu ka 16 hi vukhale], a sungula ku lava Xikwembu xa Davhida tata wakwe.” (2 Tikronika 34:3) Yosiya u hambete a ‘lava ni ku lulama,’ hikuva ha hlaya: “Hi lembe ra vu-12 [loko Yosiya a ri ni malembe ya kwalomu ka 20 hi vukhale] a sungula ku basisa Yuda na Yerusalema hi ku susa tindhawu leti tlakukeke ni timhandzi to kwetsima ni swifaniso leswi vatliweke ni swifaniso leswi endliweke hi ku n’okisiwa. Ku tlula kwalaho, va hirimuxe tialitari ta Vabali emahlweni ka yena.” (2 Tikronika 34:3, 4) Yosiya u tlhele a ‘lava ni ku rhula,’ hi ku titsongahata a tsakisa Yehovha hi ku susa vugandzeri bya swifaniso swa hava ni mikhuva yin’wana ya vukhongeri bya mavunwa etikweni. Vanhu van’wana vo rhula va fanele va tsake swinene loko ku herisiwa swilo leswi!
10. Ku humelele yini eYuda hi 607 B.C.E., kambe i vamani lava sirheleriweke?
10 Vayuda vo tala va tlhelele eka Yehovha hi nkarhi wa ku fuma ka Yosiya. Hambiswiritano, endzhaku ka ku fa ka hosi, vo tala va tlhelele etindleleni ta vona ta khale—emikhuveni leyi yi nga amukelekiki nikatsongo eka Xikwembu. Hilaha Yehovha a leriseke hakona, Vababilona va hlule tiko ra Yuda ivi va lovisa ntsindza wa rona, ku nga Yerusalema, hi 607 B.C.E. Kambe, ntshembo a wa ha ri kona. Muprofeta Yeremiya, Ebedi-meleke lowa Muetiyopiya, vatukulu va Yonadabu ni van’wana lava a va tshembekile eka Xikwembu va tumbetiwile hi siku rolero ra ku hlundzuka ka Yehovha.—Yeremiya 35:18, 19; 39:11, 12, 15-18.
Valala Va Xikwembu—Va Swi Xiya!
11. Ha yini ku ri ntlhontlho ku tshama hi tshembekile eka Xikwembu namuntlha, kambe, xana valala va vanhu va Yehovha va ta va va endla kahle loko va anakanya hi yini?
11 Loko ha ha rindzele siku ra ku hlundzuka ka Yehovha leswaku a ta herisa mafambiselo lawa yo homboloka, hi “langutana ni miringo yo hambana-hambana.” (Yakobo 1:2) Ematikweni yo hlayanyana lama vulaka leswaku ma ni ntshunxeko wa vugandzeri, vafundhisi lava nga ni matimba ya ku lawula, va kucetele valawuri va tiko leswaku va xanisa vanhu va Xikwembu hi tihanyi. Vanhu lavo homboloka va hehla Timbhoni ta Yehovha, va ti vula “mpambukwa lowu nga ni khombo.” Xikwembu xa swi vona swiendlo swa vona—kutani xi ta va xupula. Valala va xona va ta va va endla kahle loko va anakanya hi leswi endlekeke eka valala va khale va vanhu va xona vo tanihi Vafilisita. Vuprofeta bya kona byi ri: “Loko ku ri Gaza, wu ta va muti lowu tshikiweke; Axikeloni wu ta va rhumbi. Loko ku ri Axidodo, wu ta hlongoriwa ninhlikanhi lowukulu; kasi loko ku ri Ekroni, wu ta simuriwa.” Miti ya Vafilisita leyi a yi ri eGaza, eAxikeloni, eAxidodo na le Ekroni a yi ta lovisiwa.—Sofaniya 2:4-7.
12. Ku humelele yini hi tiko ra Filisita, Mowabu ni ra Amone?
12 Vuprofeta lebyi byi ya emahlweni: “Ndzi wu twile ndzhukano wa Mowabu ni nhlambha ya vana va Amone, leyi va rhukaneke vanhu va mina ha yona kutani va hambeta va tikukumuxa ku lwa ni ndhawu ya vona.” (Sofaniya 2:8) I ntiyiso, tiko ra Egipta ni ra Etiyopiya ma hluriwile hi vahlaseri va le Babilona. Kambe, xana Xikwembu xi ma avanyise njhani matiko ya Mowabu na Amone, lama humeke eka Lota, ntukulu wa Abrahama? Yehovha u profetile: “Mowabu wu ta fana na Sodoma, ni vana va Amone va ta fana na Gomora.” Ku hambana ni vakokwa wa vona va xisati—vana vambirhi va Lota va vanhwanyana, lava poneke ku lovisiwa ka Sodoma na Gomora—tiko ta Mowabu ni ra Amone lama tikukumuxaka a ma nga ta tumbetiwa eku avanyiseni ka Xikwembu. (Sofaniya 2:9-12; Genesa 19:16, 23-26, 36-38) Xana ri kwihi tiko ra Filisita ni miti ya rona namuntlha? Ku vuriwa yini hi muti wa Mowabu ni wa Amone leyi a yi tikukumuxa? Hambi wo yi lava vusiku ni nhlikanhi a wu nge yi kumi.
13. I yini leswi tshuburiweke eNinivha?
13 Enkarhini wa Sofaniya, Mfumo wa Asiriya a wu ri ni matimba swinene. Loko Austen Layard, mutivi wa vuyimburi a hlamusela xiphemu xin’we xa yindlu ya vuhosi lexi a xi pfumbuleke entsindza wa le Asiriya wa Ninivha, u tsarile: “Tisilingi ta kona . . . a ti avanyisiwe ti va swiyenge leswi ringanaka matlhelo hinkwawo, ti pendiwe swiluva kumbe swifaniso swa swiharhi. Swin’wana a swi namekiwe rimhondzo ra ndlopfu, xiyenge ha xin’we xi rhendzeriwe hi swikhaviso swo xonga ni swilo leswi vumbiweke. Swi nga ha endleka leswaku tinsika ni makhumbi ya tindlu a swi namekiwe nsuku kumbe silivhere; nakambe a ku tirhisiwe mintsandza yin’wana leyi nga tolovelekangiki, ngopfu-ngopfu ya mukedari, leswaku ku khavisiwa hi yona.” Kambe, hilaha Sofaniya a profeteke hakona, Asiriya a wu ta lovisiwa swin’we ni ntsindza wa wona, Ninivha, a wu ta hundzuka “rhumbi.”—Sofaniya 2:13.
14. Vuprofeta bya Sofaniya byi hetiseke njhani ehenhla ka Ninivha?
14 Endzhaku ka malembe ya 15 Sofaniya a profeta marito wolawo, muti wa Ninivha wa matimba wu lovisiwile, xigodlho xa wona xa le vuhosini xi mbundzumuxiwa. Ina, muti wolowo wa vanhu lava tikukumuxaka wu loviseriwe makumu. Leswaku a wu ta sala wu ri njhani endzhaku ka ndzoviso swi hlamuseriwe kahle hi marito lawa: “Gumba ni nungu swi ta etlela exikarhi ka tiphuphu [leti weke] ta wona nivusiku. Rito ri ta tshamela ku yimbelela efasitereni. Ku ta va ni ku onhiwa enyangweni.” (Sofaniya 2:14, 15) Miako ya le vuhosini ya Ninivha a yi ta faneriwa hi ku va vutshamo bya tinungu ni magumba ntsena. Emagondzweni ya muti a ku nga ha ta twiwa huwa ya mabindzu, ku huwelela ka tinhenha ni tinsimu ta vaprista. Emagondzweni wolawo a ma tele hi vanhu, a ku ta sala ntsena mpfumawulo lowu nga twariki kahle efasitereni, kumbexana wa risimu ra xirilo ra xinyenyana kumbe wa ku hunga ka moya. Hilaha ku fanaka, onge valala hinkwavo va Xikwembu va nga lovisiwa!
15. Hi nga dyondza yini eka leswi humeleleke muti wa Filisita, Mowabu, Amone na Asiriya?
15 I yini lexi hi nga xi dyondzaka eka leswi humeleleke muti wa Filisita, Mowabu, Amone na Asiriya? Hi dyondza leswi: Tanihi malandza ya Yehovha, a ku na nchumu lexi valala va hina va faneleke va hi chavisa ha xona. Xikwembu xa swi vona leswi endliwaka hi lava kanetaka vanhu va xona. Yehovha u teke goza ro lwa ni valala va yena enkarhini lowu hundzeke, naswona ku avanyisa ka yena ku ta tisiwa ehenhla ka misava hinkwayo leyi akiweke ya namuntlha. Kambe va ta va kona lava nga ta pona—ku nga ‘ntshungu lowukulu lowu humaka ematikweni hinkwawo.’ (Nhlavutelo 7:9) U nga va exikarhi ka vona—kambe u fanele ku ya emahlweni u lava Yehovha, u lava ku lulama naswona u lava ku rhula.
Khombo Eka Vadyohi Lava Tikurisaka!
16. Vuprofeta bya Sofaniya byi vule yini malunghana ni tihosana ta le Yuda ni varhangeri va kona va vukhongeri, naswona ha yini marito lawa ma byi fanela kahle Vujagana?
16 Vuprofeta bya Sofaniya byi tlhela byi vulavula hi Yuda na Yerusalema. Sofaniya 3:1, 2 yi ri: “Khombo eka loyi a xandzukaka, loyi a tinyamisaka, muti lowu wu tshikilelaka! A wu ri yingisanga rito; a wu yi amukelanga ndzayo. A wu n’wi tshembanga Yehovha. A wu tshinelanga eka Xikwembu xa wona.” Swi tsema nhlana swonghasi leswi matshalatshala ya Yehovha yo tshinya vanhu vakwe ma hundzukeke ya hava! Tihanyi ta tihosana, vanhu va xiyimo xa le henhla ni vaavanyisi a xi nyenyetsa hakunene. Sofaniya u sole xiyimo lexi nyumisaka xa varhangeri va vukhongeri, a ku: “Vaprofeta va wona a va tikurisa, a va ri vanhu va vuxengi. Vaprista va wona va nyamise leswi a swi ri swo kwetsima; va endle madzolonga enawini.” (Sofaniya 3:3, 4) Marito wolawo ma xi hlamusela kahle xiyimo xa vaprofeta ni vaprista va Vujagana bya namuntlha! Hi ku tikurisa, va suse vito ra Xikwembu evuhundzuluxerini bya vona bya Bibele naswona va dyondzise tidyondzo leti onhaka vito ra Loyi va vulaka leswaku va n’wi gandzela.
17. Ha yini u fanele u hambeta u twarisa mahungu lamanene, ku nga khathariseki leswaku vanhu va yingisa kumbe e-e?
17 Hi musa Yehovha u tsundzuxe vanhu vakwe va le nkarhini lowu hundzeke malunghana ni goza leri a a ta ri teka. U rhumele malandza yakwe lama nga vaprofeta—ku katsa na Sofaniya na Yeremiya—ku khongotela vanhu leswaku va hundzuka. Ina, “Yehovha . . . a a nga [ta swi endla] leswi swi nga lulamangiki. Mixo wun’wana ni wun’wana a a hambeta a humesa xiboho xakwe xa vuavanyisi. A xi pfumalekanga ninhlikanhi.” Xana va angurise ku yini? Sofaniya u te: “Kambe loyi a nga lulamangiki a a nga ri na tingana.” (Sofaniya 3:5) Sweswi ku twarisiwa xitsundzuxo lexi fanaka. Loko u ri muhuweleri wa mahungu lamanene, wa hlanganyela entirhweni lowu wa ku tsundzuxa. Yana emahlweni ni ku vula mahungu lamanene handle ko karhala! Ku nga khathariseki leswaku vanhu va yingisa kumbe e-e; Xikwembu xi byi teka byi ri lebyi humelelaka vutirheli bya wena ntsena loko u byi endla hi ku tshembeka; a wu boheki ku khomiwa hi tingana loko u ri karhi u endla ntirho wa Xikwembu hi ku hiseka.
18. Xana Sofaniya 3:6 yi ta hetiseka njhani?
18 Ku hetisisiwa ka ku avanyisa ka Xikwembu a ku nga ta kongomisiwa eku lovisiweni ka Vujagana ntsena. Yehovha u hundzisela ku avanyisa loku ni le matikweni man’wana: “Ndzi dlaye matiko; swihondzo swa wona swa le yinhleni swi hundzuke rhumbi. Ndzi onhe switarata swa wona, lerova a ku vanga na munhu loyi a tsemakanyaka eka swona. Miti ya wona yi endliwe marhumbi.” (Sofaniya 3:6) Marito lawa ma tshembekile lerova Yehovha u vulavula hi ndzoviso lowu onge se wu endlekile. Xana ku endleke yini hi miti ya Filisita, Mowabu na Amone? Naswona ku endleke yini hi ntsindza wa Asiriya, ku nga Ninivha? Ku lovisiwa ka yona ku fanele ku va xitsundzuxo eka matiko ya namuntlha. Xikwembu a xi vungunyiwi.
Hambeta U Lava Yehovha
19. I swivutiso swihi leswi tlhontlhaka mianakanyo leswi hi nga tivutisaka swona?
19 Enkarhini wa Sofaniya, ku hlundzuka ka Xikwembu ku wele lava a “va onha mintirho ya vona hinkwayo” hi ndlela yo homboloka. (Sofaniya 3:7) Ku ta endleka nchumu lowu fanaka ni le nkarhini wa hina. Xana wa byi vona vumbhoni bya leswaku siku ra ku hlundzuka ka Yehovha ri tshinele? Xana u hambeta u ‘lava Yehovha’ hi ku hlaya Rito ra yena nkarhi ni nkarhi—siku ni siku? Xana u ‘lava ku lulama’ hi ku hanya vutomi lebyi tengeke hi ku pfumelelana ni mimpimanyeto ya Xikwembu? Naswona, xana u ‘lava ku rhula’ hi ku va ni langutelo ro rhula, ra ku titsongahata eka Xikwembu ni malunghiselo ya xona yo ponisa?
20. I swivutiso swihi leswi hi nga ta swi kambisisa exihlokweni xo hetelela xa nxaxamelo lowu wa vuprofeta bya Sofaniya?
20 Loko hi hambeta hi lava Yehovha hi ku tshembeka, hi lava ku lulama ni ku lava ku rhula, hi nga langutela ku tiphina hi mikateko leyi fuweke sweswi—ina, ni le ‘masikwini lawa yo hetelela’ lama ringaka ripfumelo. (2 Timotiya 3:1-5; Swivuriso 10:22) Kumbexana hi nga ha tivutisa leswaku, ‘Xana hi katekisiwa hi ndlela yihi tanihi malandza ya Yehovha ya manguva lawa, naswona hi yihi mikateko leyi hi nga yi langutelaka enkarhini lowu taka leyi vuprofeta bya Sofaniya byi yi tshembisaka lava nga ta tumbetiwa esikwini ra ku hlundzuka ka Yehovha leri tshineleke swinene?’
A Wu Ta Angurisa Ku Yini?
• Vanhu va ‘lava Yehovha’ hi ndlela yihi?
• I yini leswi katsekaka eku ‘laveni ka ku lulama’?
• Hi nga ‘lava ku rhula’ hi ndlela yihi?
• Ha yini hi fanele hi hambeta hi lava Yehovha, hi lava ku lulama hi tlhela hi lava ku rhula?
[Swivutiso Swa Dyondzo]
[Xifaniso eka tluka 18]
Xana u lava Yehovha hi ku dyondza Bibele ni ku khongela swi huma embilwini?
[Xifaniso eka tluka 21]
Hikwalaho ka leswi ntshungu lowukulu wu hambetaka wu lava Yehovha, wu ta pona siku ra ku hlundzuka ka yena