Ku Ponisiwa Ka Lava Hlawulaka Ku Vonakala
Ku Ponisiwa Ka Lava Hlawulaka Ku Vonakala
“Yehovha i ku vonakala ka mina ni ku ponisiwa ka mina. Xana ndzi ta chava mani?”—PISALEMA 27:1.
1. I malunghiselelo wahi lama nyikaka vutomi lawa Yehovha a ma endlaka?
YEHOVHA i Xihlovo xa ku vonakala ka dyambu loku endlaka leswaku swi koteka ku hanya emisaveni. (Genesa 1:2, 14) Nakambe i Mutumbuluxi wa ku vonakala ka moya, loku hlongolaka munyama lowu dlayaka wa misava ya Sathana. (Esaya 60:2; 2 Vakorinto 4:6; Vaefesa 5:8-11; 6:12) Lava va hlawulaka ku vonakala va nga vula hi rito rin’we na mupisalema va ku: “Yehovha i ku vonakala ka mina ni ku ponisiwa ka mina. Xana ndzi ta chava mani?” (Pisalema 27:1a) Kambe, hilaha swi humeleleke hakona enkarhini wa Yesu, lava va hlawulaka munyama va nga langutela ku avanyisiwa loku nga tsakisiki.—Yohane 1:9-11; 3:19-21, 36.
2. I yini leswi humeleleke eka lava va fularheleke ku vonakala ka Yehovha, ni le ka lava yingiseke rito ra yena eminkarhini ya khale?
2 Enkarhini wa Esaya, vo tala va vanhu lava Yehovha a endleke ntwanano na vona va fularhele ku vonakala. Hikwalaho ka sweswo, Esaya u vone ku lovisiwa ka mfumo wa le n’walungwini wa Israyele hinkwawo. Naswona hi 607 B.C.E., Yerusalema ni tempele ya wona swi herisiwile kutani vaaki va Yuda va yisiwa evuhlongeni. Kambe, lava va yingiseke rito ra Yehovha va tiyisiwile leswaku va lwisana ni vugwinehi bya le nkarhini wolowo. Malunghana na lembe ra 607 B.C.E., Yehovha u tshembise leswaku lava va n’wi yingiseke a va ta pona. (Yeremiya 21:8, 9) Namuntlha, hina lava hi rhandzaka ku vonakala hi nga dyondza swo tala eka leswi humeleleke hi nkarhi wolowo.—Vaefesa 5:5.
Ntsako Wa Lava Nga Eku Vonakaleni
3. Namuntlha, hi nga va ni ntshembo wihi, hi rihi “tiko ro lulama” leri hi ri rhandzaka, naswona hi wihi “muti lowu tiyeke” lowu “tiko” rero ri nga na wona?
3 “Hi ni muti lowu tiyeke. [Xikwembu xi] veka marhangu ni makhokholo swi va ku ponisiwa. Pfulani tinyangwa, leswaku ku nghena tiko ro lulama leri tikhomaka hi ku tshembeka.” (Esaya 26:1, 2) Lawa i marito ya ku tsaka ya vanhu lava tshembeke Yehovha. Vayuda vo tshembeka va le nkarhini wa Esaya va langute eka Yehovha tanihi Xihlovo xi ri xin’we xa nsirhelelo wa xiviri, ku nga ri eka swikwembu swa mavunwa swa vaaka-tiko-kulobye. Ni namuntlha hi ni ntshembo lowu fanaka. Ku tlula kwalaho, hi rhandza “tiko ro lulama” ra Yehovha—ku nga “Israyele wa Xikwembu.” (Vagalatiya 6:16; Matewu 21:43) Yehovha na yena u rhandza tiko leri hikwalaho ka ku tikhoma ka rona hi ndlela yo tshembeka. Hikwalaho ko katekisiwa hi yena, Israyele wa Xikwembu u ni “muti lowu tiyeke,” nhlengeletano leyi fanaka ni muti leyi wu seketelaka yi tlhela yi wu sirhelela.
4. I langutelo rihi ra mianakanyo leri hi faneleke hi ri hlakulela?
4 Lava va nga endzeni ka “muti” va swi xiya leswaku “mboyamelo lowu seketeriwaka [Yehovha] u ta wu hlayisa hi ku rhula loku tshamaka ku ri kona, hikuva munhu u endliwa leswaku a tshemba [Yehovha].” Yehovha u seketela lava voyameleke eku n’wi tshembeni naswona va fambisanaka ni misinya ya milawu yakwe leyinene. Xisweswo, Vayuda vo tshembeka va yingise xikhongotelo xa Esaya lexi nge: “Tshembani Yehovha hi minkarhi leyi nga heriki, hikuva Yah Yehovha i Ribye ra hilaha ku nga riki na makumu.” (Esaya 26:3, 4; Pisalema 9:10; 37:3; Swivuriso 3:5) Lava va nga ni langutelo rolero ra mianakanyo va languta eka “Yah Yehovha” tanihi Ribye rin’we ntsena ra nsirhelelo. Va tiphina hi “ku rhula loku tshamaka ku ri kona” swin’we na yena.—Vafilipiya 1:2; 4:6, 7.
Ku Tsongahatiwa Ka Valala Va Xikwembu
5, 6. (a) Xana Babilona wa khale wu tsongahatiwe hi ndlela yihi? (b) Xana “Babilona Lonkulu” wu tsongahatiwe hi ndlela yihi?
5 Ku vuriwa yini hi loko lava va tshembaka Yehovha va va enhlomulweni? A va fanelanga va chava. Yehovha u pfumelela leswaku swilo swo tano swi humelela ku ringana nkarhi wo karhi, kambe eku heteleleni wa va ntshunxa, naswona lava va vangaka nhlomulo va langutana ni ku avanyisa kakwe. (2 Vatesalonika 1:4-7; 2 Timotiya 1:8-10) Anakanya hi mhaka ya “muti [wo karhi] lowu tlakukeke.” Esaya u ri: “[Yehovha] u va yise ehansi lava tshamaka eku tlakukeni, muti lowu tlakukeke. Wa wu tsongahata, a wu tsongahatela emisaveni; u wu khumbanisa ni misava. Nenge wu ta wu kandziyela, milenge ya lava xanisekaka, mikondzo ya swisiwana.” (Esaya 26:5, 6) Swi nga ha endleka muti lowu tlakusiweke laha ku vuriwa Babilona. Muti wolowo entiyisweni wu xanise vanhu va Xikwembu. Kambe ku humelele yini eka Babilona? Hi 539 B.C.E., wu wele eka Vameda na Vaperesiya. Wa nga vona ku tsongahatiwa ko tano!
6 Enkarhini wa hina marito ya vuprofeta ya Esaya ma swi hlamusela kahle leswi humeleleke eka “Babilona Lonkulu” ku sukela hi 1919. Muti wolowo lowu tlakukeke wu we hi ndlela leyi tsongahataka hi lembe rolero loko wu sindzisiwe ku ntshunxa vanhu va Yehovha evuhlongeni bya moya. (Nhlavutelo 14:8) Leswi humeleleke endzhaku ka sweswo a swi nyumisa swinene. Ntlawa wolowo lowutsongo wa Vakreste wu vuye hi muti lowu tshameke wu va mahlonga ya wona, wu wu ‘kandziyela.’ Hi 1922, wu sungule ku twarisa ku herisiwa loku taka ka Vujagana, wu twarisa marungula ya tintsumi ta mune leti yimbeke timhalamhala hi ku ya hi Nhlavutelo 8:7-12 ni hi makhombo manharhu lama profetiweke eka Nhlavutelo 9:1–11:15.
“Ndlela Ya Lowo Lulama I Vululami”
7. I nkongomiso wihi lowu kumiwaka hi lava va hundzukelaka eku vonakaleni ka Yehovha, va tshemba mani, naswona va tlangela yini?
7 Yehovha u ponisa vanhu lava hundzukelaka eku vonakaleni ka yena, naswona wa va kongomisa endleleni ya vona, hilaha marito ya Esaya lama landzelaka ma kombisaka hakona: “Ndlela ya lowo lulama i vululami. Leswi wena u lulameke, u ta khula ndlela ya lowo lulama. Ina, Wena Yehovha, hi ku tshembile hikwalaho ka ndlela ya wena ya vuavanyisi. Moya-xiviri a wu navela vito ra wena ni ku ku tsundzuka.” (Esaya 26:7, 8) Yehovha i Xikwembu lexinene, naswona lava va n’wi gandzelaka va fanele va yingisa mimpimanyeto ya yena leyinene. Loko va n’wi yingisa, Yehovha wa va kongomisa, a khula ndlela ya vona. Hi ku yingisa nkongomiso wa yena, vanhu lavo rhula va kombisa leswaku va tshemba Yehovha naswona va tlangela vito ra yena hi mbilu hinkwayo—“xitsundzuxo” xa yena.—Eksoda 3:15.
8. Xana Esaya u kombise langutelo rihi leri nga xikombiso lexinene?
8 Esaya a a ri tlangela vito ra Yehovha. Sweswo swi vonaka kahle eka marito yakwe lama landzelaka: “Hi moya-xiviri wa mina ndzi ku naverile nivusiku; ina, hi moya wa mina lowu nga endzeni ka mina, ndzi hambeta ndzi ku lava; hikuva loko wena u avanyisa misava, kunene vaaki va tiko leri noneke va ta dyondza ku lulama.” (Esaya 26:9) Esaya a a rhandza Yehovha ‘hi moya-xiviri wa yena’—hi miri wa yena hinkwawo. Anakanya hi muprofeta loyi a ri karhi a khongela Yehovha loko ku lo cowee, ni vusiku, a n’wi byela leswi nga evuentweni bya miehleketo yakwe, a tlhela a kombela hi ku hiseka leswaku Yehovha a n’wi kongomisa. Mawaku xikombiso lexinene swonghasi! Ku tlula kwalaho, Esaya u dyondze ku lulama eka swiendlo swa vuavanyisi swa Yehovha. Emhakeni leyi, u hi tsundzuxa hi xilaveko xa nkarhi na nkarhi xa ku hiteka, hi tshama hi xalamukele ku twisisa ku rhandza ka Yehovha.
Van’wana Va Hlawula Munyama
9, 10. I swiendlo swihi swa tintswalo leswi Yehovha a swi endleleke tiko ra yena leri nga tshembekiki, kambe rona ri angurise ku yini?
9 Yehovha u kombise Yuda tintswalo ta rirhandzu letikulu, kambe lexi vavisaka a hi hinkwavo va ti amukeleke. Hakanyingi vunyingi byi hlawule ku xandzuka ni ku gwineha ematshan’weni ya ku vonakala ka ntiyiso wa Yehovha. Esaya u te: “Hambiloko lowo homboloka o kombiwa tintswalo, a nga ka a nga ku dyondzi ku lulama. Etikweni ro lulama u ta endla hilaha ku hombolokeke naswona a nge byi voni vukulu bya Yehovha.”—Esaya 26:10.
10 Enkarhini wa Esaya, loko voko ra Yehovha ri sirhelele Yuda eka valala va yena, vo tala va tiarisile ku xiya mhaka leyi. Loko a va katekise hi ku rhula, tiko a ri nkhensanga. Hikwalaho, Yehovha u va fularherile leswaku va ya tirhela “valawuri van’wana,” a hetelela a tshike Vayuda va yisiwa evukhumbini eBabilona hi 607 B.C.E. (Esaya 26:11-13) Nilokoswiritano, eku heteleleni masalela ya tiko leri ma tlhelele etiko-xikaya ra wona se ma xupuriwile.
11, 12. (a) Xana vanhu lava a va yise Yuda evukhumbini a va ri ni vumundzuku byihi? (b) Hi 1919 i vumundzuku byihi lebyi vanhu lava tshameke va yisa malandza lama totiweke ya Yehovha evukhumbini a va ri na byona?
11 Ku vuriwa yini hi lava a va yise Yuda evuhlongeni? Esaya u hlamula hi vuprofeta a ku: “Va file; a va nge hanyi. Va hluriwa hi rifu, a va nge pfuki. Hikokwalaho u yise nyingiso wa wena leswaku u va lovisa, u herise ni ku kumbukiwa ka vona.” (Esaya 26:14) Ina, endzhaku ka ku wa ka yena hi 539 B.C.E., Babilona a a nga ha ri na vumundzuku. Hi ku famba ka nkarhi, muti lowu a wu ta nyamalala. A wu ta “hluriwa hi rifu,” naswona mfumo wa wona lowukulu a wu ta va nchumu wa nkarhi lowu hundzeke. Mawaku xitsundzuxo lexinene eka lava va tshembaka vanhu va matimba va misava leyi!
12 Timhaka tin’wana ta vuprofeta lebyi ti hetiseke loko Xikwembu xi pfumelela malandza ya xona lama totiweke leswaku ma ya evuhlongeni bya moya hi 1918, ivi xi ma ntshunxa hi 1919. Ku sukela hi nkarhi wolowo ku ya emahlweni, vumundzuku bya vanhu lava va tshameke va va yisa evukhumbini, ngopfu-ngopfu Vujagana, a byi nga tsakisi. Kambe mikateko leyi a yi rindzele vanhu va Yehovha a yi fuwile hakunene.
“U Engetele Tiko”
13, 14. I mikateko yihi leyi fuweke leyi malandza lama totiweke ya Yehovha ma tiphineke ha yona ku sukela hi 1919?
13 Hi 1919 Xikwembu xi katekise moya wo hundzuka wa malandza ya xona lama totiweke xi endla leswaku ma andza. Xi rhange xi nyikela nyingiso eku hlengeleteni ka swirho swo hetelela swa Israyele wa Xikwembu, ivi ku sungula ku hlengeletiwa “ntshungu lowukulu” wa “tinyimpfu tin’wana.” (Nhlavutelo 7:9; Yohane 10:16) Mikateko leyi a yi profetiwe eka vuprofeta bya Esaya lebyi nge: “U engetele tiko; Wena Yehovha u engetele tiko; u tivangamisile. U yi ndlandlamuxele ekule mindzilakana hinkwayo ya tiko. Oho Yehovha, emaxangwini va yise nyingiso wa vona eka wena; loko u va laya, va khongerile.”—Esaya 26:15, 16.
14 Namuntlha, mindzilakana ya Israyele wa Xikwembu yi ndlandlamuxiwe yi hlanganisa misava hinkwayo, naswona sweswi ntshungu lowukulu lowu engeteriweke se wu kwalomu ka tsevu wa timiliyoni ta vanhu lava hlanganyelaka hi ku hiseka entirhweni wo chumayela mahungu lamanene. (Matewu 24:14) Wolowo i nkateko lowukulu lowu humaka eka Yehovha! Naswona sweswo swi tisa ku dzuneka lokukulu evitweni ra yena! Namuntlha vito rolero ri twarisiwa ematikweni ya 235—koloko i ku hetiseka loku xiyekaka ka xitshembiso xakwe.
15. I ku pfuxiwa kwihi ko fanekisela loku humeleleke hi 1919?
15 Leswaku Yuda a pona evukhumbini bya le Babilona, a a lava mpfuno wa Yehovha. A va ta va va nga tiponisanga. (Esaya 26:17, 18) Hilaha ku fanaka, ku ntshunxiwa ka Israyele wa Xikwembu hi 1919 a ku ri xikombiso xa nseketelo wa Yehovha. Loko a ku nga ri yena a va ta va va nga ntshunxiwanga. Naswona lexi hlamarisaka swinene a ku ri ku cinca ka xiyimo xa vona lexi Esaya a xi fanisaka ni ku pfuxiwa ka vafi: “Lava feke va wena va ta hanya. Mintsumbu ya mina—yi ta pfuka. Pfukani, mi ba nkulungwana, n’wina lava tshamaka entshurini! Hikuva mberha ya n’wina yi fana ni mberha ya swimilana swa malo, naswona misava yi ta endla leswaku lava hluriweke hi rifu va velekiwa.” (Esaya 26:19; Nhlavutelo 11:7-11) Ina, lava etleleke eku feni va ta tlhela va tswariwa hi ndlela yo fanekisela, leswaku va ta endla ntirho lowuntshwa!
Nsirhelelo eMinkarhini Ya Khombo
16, 17. (a) Hi 539 B.C.E., i yini leswi Vayuda a va fanele va swi endla leswaku va ta pona ku wa ka Babilona? (b) ‘Makamara ya le mpfungwe’ ma nga va ma ri yini namuntlha, naswona ma hi vuyerisa hi ndlela yihi?
16 Malandza ya Yehovha minkarhi hinkwayo ma lava nsirhelelo wa yena. Kambe, ku nga ri khale u ta ri tshambuluta ro hetelela voko ra yena, a lwisana ni misava ya Sathana, naswona vagandzeri va yena va ta lava mpfuno wa yena ku tlula rini na rini. (1 Yohane 5:19) Yehovha wa hi tsundzuxa malunghana ni nkarhi wolowo wa khombo: “Fambani, vanhu va mina, nghenani emakamareni ya n’wina ya le mpfungwe, mi pfala tinyangwa ta n’wina. Tifihleni nkarhinyana kukondza vuavanyisi byi hundza. Hikuva, maswivo, Yehovha wa huma endhawini yakwe a ta tenga xidyoho lexi vaaki va tiko va xi endleke eka yena, kunene tiko ri ta paluxa ku halata ngati ka rona naswona a ri nge he va fihli lava dlayiweke eka rona.” (Esaya 26:20, 21; Sofaniya 1:14) Xitsundzuxo lexi xi kombise Vayuda ndlela yo pona loko Babilona ri wa hi 539 B.C.E. Lava va xi yingiseke a va ta va va tshame etindlwini ta vona, va sirhelelekile eka masocha lama hlulaka lawa a ma ri emagondzweni.
17 Namuntlha, ‘makamara ya le mpfungwe’ ya vuprofeta lebyi swi nga ha endleka ma fanekisela makume ya magidi ya mavandlha ya vanhu va Yehovha emisaveni hinkwayo. Mavandlha wolawo i xisirhelelo hambi ku ri sweswi, i ndhawu leyi Vakreste va kumaka nsirhelelo eka vamakwavo, ehansi ka nkhathalelo wa rirhandzu wa vakulu. (Esaya 32:1, 2; Vaheveru 10:24, 25) Leswi swi tano ngopfu-ngopfu leswi makumu ya mafambiselo lawa ya swilo laha ku pona ku nga ta va ku titshege hi ku yingisa.—Sofaniya 2:3.
18. Ku nga ri khale Yehovha u ta “dlaya xivandzana xa lwandle” hi ndlela yihi?
18 Esaya wa profeta malunghana ni nkarhi wolowo: “Esikwini rero, Yehovha, hi banga ra yena ra matimba, lerikulu, leri tiyeke, u ta yisa nyingiso wa yena eka Levhiyathani, nyoka leyi kokovaka, loko ku ri Levhiyathani, nyoka yo homboloka, kunene u ta dlaya xivandzana xa lwandle lexi nga elwandle.” (Esaya 27:1) “Levhiyathani” wa manguva lawa i yini? Handle ko kanakana, i “nyoka ya khale,” Sathana hi byakwe, swin’we ni mafambiselo ya yena yo biha ya swilo, lawa a ma tirhisaka ku pfuxa nyimpi ku lwisana ni Israyele wa Xikwembu. (Nhlavutelo 12:9, 10, 17; 13:14, 16, 17) Hi 1919, Levhiyathani a ya ha swi kotanga ku lawula vanhu va Xikwembu. Hi ku famba ka nkarhi, yi ta loviseriwa makumu. (Nhlavutelo 19:19-21; 20:1-3, 10) Xisweswo, Yehovha u ta “dlaya xivandzana xa lwandle.” Enkarhini wa sweswi, a xi kona lexi Levhiyathani a nga ringetaka ku xi endla ku lwisana ni vanhu va Yehovha lexi nga ta humelela hilaha ku nga heriki. (Esaya 54:17) Swa chavelela hakunene ku tiyisekisiwa hi mhaka leyi!
“Nsimu Ya Vhinya, Ya Vhinyo Leyi Vilaka”
19. Hi xihi xiyimo xa masalela namuntlha?
19 Hikwalaho ka ku vona ku vonakala loku hinkwako loku humaka eka Yehovha, xana a hi na swivangelo leswi twalaka swo tsaka? Hi na swona hakunene! Esaya u wu hlamusela kahle ntsako wa vanhu va Yehovha loko a tsala a ku: “Esikwini rero, n’wi yimbeleleleni: ‘Nsimu ya vhinya, ya vhinyo leyi vilaka! Mina Yehovha ndza n’wi hlayisa. Nkarhi hinkwawo ndzi ta n’wi cheleta. Leswaku ku nga vi na munhu la nga n’wi nyikiki nyingiso, ndzi ta n’wi hlayisa vusiku ni nhlikanhi.’” (Esaya 27:2, 3) Yehovha u khathalele “nsimu ya vhinya” yakwe, ku nga masalela ya Israyele wa Xikwembu, naswona u tlhele a khathalela vanakulobye va wona lava tirhaka hi matimba. (Yohane 15:1-8) Vuyelo bya kona ku ve mihandzu leyi tisaka ku dzuneka evitweni ra xona, naswona vuyelo lebyi byi endla leswaku malandza ya xona ya laha misaveni ma tsaka swinene.
20. Yehovha u ri sirhelela njhani vandlha ra Vukreste?
20 Hi nga tsaka ku tiva leswaku vukarhi bya Yehovha bya le ku sunguleni eka malandza ya yena lama totiweke—lebyi n’wi endleke a ma tshika ma ya evuhlongeni bya moya hi 1918—se byi herile. Yehovha hi byakwe u ri: “Vukarhi a ndzi na byona. I mani la nga ta ndzi nyika swihlahla swa mitwa ni nhova enyimpini? Ndzi ta swi kandziya. Ndzi ta swi lumeka hi ndzilo hi nkarhi wun’we. Loko swi nga ri tano a a khomelele khokholo ra mina, a a endle ku rhula na mina; ina, a a endle ku rhula na mina.” (Esaya 27:4, 5) Leswaku a tiyiseka leswo madiriva ma hambeta ma humesa “vhinyo leyi vilaka” yo tala, Yehovha u pfotlosa a tlhela a lovisa nkucetelo wihi ni wihi lowu fanaka ni mfava lowu nga va onhaka. Hikwalaho, ku nga vi na munhu loyi a vekaka vuhlayiseki bya vandlha ra Vukreste ekhombyeni! Hinkwavo a va ‘khomelele ekhokholweni ra Yehovha,’ va lava ku tsakeriwa hi yena ni nsirhelelo wa yena. Loko hi endla tano, hi endla ku rhula ni Xikwembu—ku nga nchumu wa nkoka swinene lerova Esaya u wu boxe kambirhi.—Pisalema 85:1, 2, 8; Varhoma 5:1.
21. Xana tiko leri noneke ri tatiwe hi “ntshovelo” hi ndlela yihi?
21 Mikateko ya kona yi ya emahlweni: “Emasikwini lama taka Yakobe u ta dzima timitsu, Israyele u ta rhumbuka a hluka; kutani va ta tata vuandlalo bya tiko leri noneke hi ntshovelo.” (Esaya 27:6) Ndzimana leyi yi hetiseke ku sukela hi 1919, yi nyikela vumbhoni lebyi hlamarisaka bya matimba ya Yehovha. Vakreste lava totiweke va tate misava hi “ntshovelo,” ku nga swakudya leswi xurhisaka swa moya. Hi ntsako va hlayise mimpimanyeto leyi tlakukeke ya Xikwembu, hambiloko va ri exikarhi ka misava leyi hombolokeke. Naswona Yehovha u hambeta a va katekisa hi ku andza. Hikwalaho ka sweswo, vanakulobye va vona va timiliyoni, ku nga tinyimpfu tin’wana, va “endlela [Xikwembu] ntirho wo kwetsima nhlikanhi ni vusiku.” (Nhlavutelo 7:15) Hi nga tshuki hi lahlekeriwa hi ntshembo wa lunghelo rolero lerikulu ra ku hlanganyela eka “ntshovelo” ni ku wu avela van’wana!
22. I mikateko yihi leyi kumiwaka hi lava va amukelaka ku vonakala?
22 Eminkarhini leyi yo nonon’hwa, laha munyama wu funengeteke misava ni munyama lowukulu wu funengeteke mintlawa ya matiko, xana a hi nkhensi leswi Yehovha a tisaka ku vonakala ka moya ehenhla ka vanhu va yena? (Esaya 60:2; Varhoma 2:19; 13:12) Ku vonakala koloko ku vula ku rhula ka mianakanyo ni ntsako enkarhini wa sweswi ni vutomi lebyi nga heriki enkarhini lowu taka, eka hinkwavo lava amukelaka ku rhula koloko. Kutani, hi xivangelo lexinene hina lava hi rhandzaka ku vonakala hi dzunisa Yehovha hi timbilu ta hina ivi hi vula marito lama landzelaka swin’we ni mupisalema: “Yehovha i khokholo ra vutomi bya mina. Xana ndzi ta chava mani? Tshemba Yehovha; vana ni xivindzi naswona u endla mbilu ya wena yi va ni matimba. Ina, tshemba Yehovha.”—Pisalema 27:1b, 14.
Wa Tsundzuka Xana?
• Hi byihi vumundzuku bya lava va tshikilelaka vanhu va Yehovha?
• I ku engeteleka kwihi loku profetiwaka hi Esaya?
• Xana hi fanele hi tshama ‘emakamareni wahi ya le mpfungwe,’ naswona ha yini?
• Ha yini xiyimo xa vanhu va Yehovha xi tisa ku dzuneka eka yena?
[Swivutiso Swa Dyondzo]
[Bokisi eka tluka 22]
BUKU LEYINTSHWA
Ro tala ra rungula leri hlamuseriweke eka tinhloko-mhaka letimbirhi leti dyondziwaka ri nyikeriwe tanihi nkulumo enongonokweni wa ntsombano wa muganga wa 2000/2001. Loko nkulumo yi hela, ku humesiwe buku leyintshwa leyi nge Vuprofeta Bya Esaya—I Rivoningo Eka Vanhu Hinkwavo I. Buku leyi yi nga ni matluka ya 416 yi hlamusela ndzimana hi ndzimana ya tindzima ta 40 to sungula ta buku ya Esaya.
[Xifaniso eka tluka 18]
I vanhu lavanene ntsena lava pfumeleriwaka ku nghena ‘emutini lowu tiyeke’ wa Yehovha, ku nga nhlengeletano ya yena
[Xifaniso eka tluka 19]
Esaya u lave Yehovha “nivusiku”
[Xifaniso eka tluka 21]
Yehovha u sirhelela “nsimu ya vhinya” ya yena naswona u yi endla yi tswala swinene mihandzu